Kisah Para Rasul
Yesus, er 12 neng wepra deipupa, sun pel dominge tep, Lukasdi sekeipseu upu
Abuku seku deiyo ngeboda, Lukas kuramu. Lukasda, Yesusdi, wepra deiamu neng, sun 12 neng kan-kan ton men kuramu dinin, Yesusdi, ‘Aneng ne upu dopra peterem benkamenga tep, gonga kemna deiyo neng, Rasul neng kunkameng’ tenen, wepra deipu nengdi pel dorami upu, Lukasdi seku. Erdi, Injil Lukas sekamudi, amendada, abuku Rasul ton sekamu. Lukas cap, Paulus cap kikiman pel doramrei (Pilemon 1:24; Kolose 4:14). Lukasda nimi kwetena ngebo kuramu.
Lukasdi abuku Rasul seku deiyoda ake. Ada, Yesusdi, “Allah er Lek Sambala sun dipruai yana wekseredi, puto weik karepserepa, dopropkamrume. Dopropmumdi, ne kuramsinge cap, peteremamsipa gekeramrumnge cap, ange yuma dopra, mutu sirik im sirik kunge nesala yuma tep, peterembenkamrume,” Yesusdi pepu. Yesusdi aupu peputopu, er wepra deipu nengdi, apel dopembaramipa, Lukasdi, abuku Rasul sekamu.
Abuku neitamaida, Yesus tep teka tenemi nesala, telep kupra kikiman kuramidi, pel doraminge cap, Allah er Lek Sambala dokotepupa, dopropipa, sun dipruai pel doramunge cap, Yesus upu pio men gekerami tara kurami nesala, ‘Gekepkameng’ tenen, peterem baraminge cap, teka tenemi nesala weik kupbaraminge cap, mali nengdi sun nong deiki ikin keca weik deriraminge cap, upu bokra weneminge cap, ayumada Lukasdi sekamu.