Roma
Abuku Romada, Paulusdi, Roma mutu kuramidi, teka tenerami nesala tep, surat sekeiamu.
Abuku seku deiyo ngebo Paulusda, Allahdi, ‘Angebo ne upu dopra, Yahudi yala gum nesala, yuk yala-yala nesala kunge mutu peterembenkamre’ tenen, Paulus wepra deipu.
Dinino, Paulusda, Yesus kapul teka men teneamu taruda, Paulusdi, ‘Yesus tep teka tenenge nesala yuma gum kupkamenge’ tenen, ton nengda, ateng koupra, wenemna ati dongorbaramu. Ton nengda, portamamu. Erda, pio yu weik ngebo kuramu dinino, Paulusdi, Yesus tep teka tenepudi, er mali kuramu keca yuma tapra, Yesuspu talepra dombaramu. Tonda, ‘Yahudi yala gum nesala, yuk-yuk nesala yuma ton, teka tenenkameng’ tenen, Allah upu buku weik sengamu. Abuku Romada, Roma mutu nesala kuramidi, teka tenerami nesala tep, sekra dokotepu.
Abuku neitamaida, Paulusdi, ‘Aupuda ila mambule’ tenen, sekra deipseu ngeda, ake. Allahdi, ‘Nesala yuma, Yahudi neng pe, Yahudi yala gum neng peda, malipu kununga cadi, nesala weika di lyepkamne’ tenen, Kristus dokotepseupa, sengdin co deiki popipa, nun pununa tep depka deiki di, nun lyemna deiyo keca keteneipseue. Kristus pel dopseua deiki, Allah er kange dipapu, Yesus tep teka tenenge nesala yuma tep nengeda, ‘Aneslaada, konum dumsisi kupra kununge,’ pepra deriserure. Lyepsere pangeda, Kristus cap dipru dukdongopra, gam pio kunkamep nge cap yumada, men gum kunkamsere.