1 Korintus
Paulusdi, Korintus mutu teka tenerami nesala tep, menmena taru sekeipu upu
Abuku seku deiyo ngeboda, Paulus kuramu. Yesus tep, kapul teka men tenepu taruda, Paulusdi, ‘Yesus tep teka tenenge nesala yuma gum kupkamenge’ tenen, yu weik kupupa, ikin keca pio weik sun nong deiki deriramudi, nimi weik popbaramu. Dinino, Yesus tep teka tenepudi, er mali kuramunge yuma tapudi, Yesus er upu talepra dombaramu. Tonda, ‘Yahudi yala gum nesala ton, teka tenenkameng’ tenen, buku weik sengamu.
Korintus mutu neitamaida, ton nengda, teka tenerami dinin, mali kun keca weik kurami. Ton nesalada, telep kurami. Atep, yuk nengdi, Paulus damai bena lap pepipa, Paulusdi Korintus mutu nesala, sun makuna cap, wenemna cap tep, asurat seku.
Abuku neitamaida, Paulusdi, ‘Aupuda ila mambule’ tenen, sekra deipseu ngeda, ake. Yesus teka tenepmepyopda, tali kange doupra, mali men kunkamep dinin, mali kun keca yuma tapra, telep kupra kupbankamepe. Tonda, Allah er Lek Sambala, er kange dipapu teneretopu, ila mambul pel dona deiyo keca yala yuk-yuk kareserepa, Allah er pel yuk-yuk dinin, er puto deiki di apel donkamep dinin, ila mambul ngeda, ada yuk nesala yuma tep bicau tenepra, makudanapu kunkamepe. Tonda, Kristus depu dinin, Allahdi, Yesus kange di ton cap gam bukeipupa, gam kuramudi, tupa kurure. Adeiki di, teka tenepmepepanen, dakuramepyanen, depmepya peda, amenda taru gam Allahdi gam bukeipserepa, pio gam kunkamepe.