2 Korintus
Paulusdi, Korintus mutu teka tenerami nesala tep, butene taru surat sekeipu upu
Abuku seku deiyo ngeboda, Paulus kuramu. Allahdi, ‘Angebo ne upu dopra, Yahudi yala gum nesala peterembenkamre’ tenen, Paulus wepra deipu. Asurat seku taruda, Makedonia tara neitamai peterep embaramu taru neitamai seku.
Korintus mutuda, ila ati arum pio weike dorami. Yunani nesala pio weik amutu kurami. Korintus mutu neitamaida, ton nesalada, Yesus tep teka teneramidi, telep kurami dinin, aneng kan-kan peda, mok upu peteremna nesala inipra peteremyai. Ange tep nengeda, ‘Korintus mutu nesala, mankau kange doupra, mok upu teka tenepnung’ tenen, Paulusdi asurat sekra, Korintus mutu teka tenemi nesala tep dokotepu.
Abuku neitamaida, Paulusdi, ‘Aupuda ila mambule’ tenen, sekra deipseu ngeda, ake. “Pumun taru nedi, ‘Sun damai diryankamsene,’ pepsi dinin, men yasada, deiyo ton akapmara cadi, ‘Paulusda, tali upu peptapseu,’ pena meme,” pepu. Tonda, “Yerusalem mutu kunge nesala, pio kankan kunge nesala kununga cadi, anesala sun makuna tep, co bo bulupra deipmum ngeda, ketenepkamrume. Karepnemumyopda, ne dubenedi, Yerusalem mutu kunge kankan nesala tep karepkamna cadi, ne kapul men yane taru, co bo bulupra keteneipso,” pepu. Weneri ngeda, “Sun mok upu peteremna nengdi, ne Paulus tep, ‘Erda tali ngebo,’ penenung dinin, Yesusdi wepra deipneua tep, er upu peteremna gonga kemna deiyo ngebo kunune. Mali kun nesala tep nengeda, sun damai yanyopda, aneng puto di wenepkamne,” pepu.