Kain Jen Ngebodi, ‘Yesus mali kuptue’ tenen, kurpetepu upu
4
Yohanesdi Yesus konum me dongopu pangeda,
Allah er Lek Sambaladi,
Yesus er dipru wekra dinikupa,
Yesus Yordan mekin tapra yukai beu.
Beu taruda,
Allah er Lek Sambaladi,
Yesus er dipru neitamai di peipupa,
me gumai tep,
nimi pio men kurami mutu neitamai Yesus beu.
2 Amutu neitamai kuramu taruda,
Kain Jen Ngebodi,a
‘Yesus mali kuptue’ tenen,
ue denge dumbari,
40 tumi deiki yan kurpeteramu.
Yesus amutu kuramu taruda,
keteng komuni cap,
lukunda cap yumada,
denge dumbari 40 lukunda maramu.
Amutu kuramu taru yumada,
jen bulungpu kuramnga cadi,
ue denge dumbari,
40 tumi konum kupkopda,
er jen pio putapu.
3 Jen keca pio putapu pangeda,
Kain Jen Ngebodi,
‘Yesus kupetepkun’ tenen,
Yesus damai peryau.
“Kanda tek sisi Allah er Mi Sisa kuramem dingeda,
akwapu gel dopropmemdi,
‘Kwaneng dayo,’
pepmempa,
kwaneng darepa,
jeptume,”
pepu.
4 Upepupane,
Yesusdi tamupra pepu.
“Allah upu buku sekeipseua neitamai peseryada ake.
‘Nimi yuma kwanengpu jepmengedi,
gam pio men kunkamenge.
Dinino,
Allahdi er upu perserenge yuma gekepra,
dombaramenge dingeda,
gam pio kunkamenge.
Jen kecada,
yambul mambul dinin,
ila mambul keca Allah er upu akwapmara tep,
jen kecapu tenena gume.
Allah upu gekepra dombanada,
ila mambule.’
Aupuda Allah upu neitamai kurura tep pepkene,” Yesusdi pepu.
5 Upepu pangeda,
Kain Jen Ngebodi Yesus dopra,
ila mutu dupai dubeudi,
ban-ban yuma ila deiyo neng talengepa kunge mutu cap,
akwapu keca urasin telep keca cap,
sun kunumna weik keca cap yuma,
benbenepudi,
“Dipterepo,”
penmaupa,
Yesusdi dinmau.
6 Dinmaupa,
Kain Jen Ngebodi aupu pepu.
“Aila nimi deiyo neng yuma,
sun puto cap,
sun talenge keca cap,
nesala cap,
ton sun urasin pio telep kure keca yumada,
tek sisi akeca yuma talerya deiyo ngeboda,
ne kunune.
Ukununa cadi,
ne tenepne ngebopu akeca yuma kareptene.
7 Ange tep nengeda,
kanda ne gispal dopra,
ne si erepnememnyopda,
adinmarem keca yuma,
kan tep karepkukene,”
Kain Jen Ngebodi Yesus tep pepu.
8 Upepu pangeda,
Yesusdi tamupra pepu.
“Gume,
Allah upu buku neitamai pesere upuda pepkukene.
Aupuda,
ake.
‘Sun nai bo Allahda,
er sipu erepra talenkamrume.
Sun kangeda,
er deiki dipu derinkamrume.
Er pelpu donkamrume.’
Aupuda Allah upu neitamai kurura tep pepkene,” Yesusdi pepu.
9 Yesusdi aupu konum pepu pangeda,
Kain Jen Ngebodi Yesus dopra,
Yerusalem mutu Allah karerbaramidi,
er si eremami ati dum deiki deipudi,
aupu pepu.
Kanda tek sisi Allah er Mi Sisa kumem dingeda,
atekmanemai di tuai sako.
10 Allah upu buku neitamaida aupu pepra seki.
‘Kan popkerur tep,
Allah er im deiki pel donung neng,
malaikat tep peiprepa,
tuai pio moupra kalekmangadi,
tomopra eremdinkamkenge.
11 Ada,
‘Kan yan giso pe gel dukra popkerur’ tenen,
kalekra makunkamkenge.
Tomopra eremdinkamkenga cadi,
‘Yambula di pona kuprur’ tenen,
kan tep kalengkamkenge.’
“Aupu akwapmara tep,
atekmanemai di tuai sako.” Kain Jen Ngebodi Yesus tep pepu.
12 Upepupa,
Yesusdi tamupra pepu.
“Apepmarem ngeda akwapmar dinin,
yuk Allah upu sekami ngeda pepkukene.
Ada ake.”
‘Sun nai Allahdi,
‘Tek sisi kalekra makunkamser do,
gum do?’
tenen,
Allah tep kurpeten keca kuna meme.’
“Aupuda Allah upu neitamai kurura tep pepkene,” Yesusdi pepu.
13 Kain Jen Ngebodi,
‘Yesus mali kuptue’ tenen,
kurpeten keca yuma konum piripterepu dingeda,
‘Yuk go kwapre taru ton cap,
Yesus kurpetepkamne,’
tenepudi beu.
Nasaret mutu kurami nengdi, ‘Yesus nun songe’ tenen, tapi upu
14 Allah er Lek Sambala er puto weik Yesus karepupa,
Galilea tara tamupra beu.
Beudi pel doramu pangeda,
amutu neitamai kurami nesala weika di,
er kuramu keca lap pepipa,
anesala yuma gekepra kael kemami.
15 Ataru yumada,
Yahudi yala nesala,
sun Allah upu peteremna atib wekrapudi,
Allah upu peteremamupa,
er upu gekerami nesaladi,
“Pio telep kupra peteremserure,”
tenepra perami.
16 Anesala uperami dinin,
Yesus er nemu mutu Nasaret beudi,
yuk mutu-mutu yuma kuramutopu,
Nasaret mutu peda,
Yahudi yala nesala sun beipye peingna tumi deiki di,
sun Allah upu peteremna ati weku.
Weku dingeda,
‘Allah upu pepkun’ tenen,
tekrapupa,
Allah upu buku dopra karepi.
17 Allah er upu lap peramu ngebo,
nabi Yesayadi sekeiamu buku karepipa,
Yesus teprapudi,
aupu sekamunge epra penmau.
Yesusdi nabi Yesaya sekamu domon upu dopra penmau upu ake.
18 Allahdi ne kai telep upu dopra,
‘Tali kankan kunge nesala peterembenkamre’ tenen,
konum wepra deipneua cadi,
Allah er Lek Sambaladi er puto weik karepneupa kunune.
‘Ateng koupra deiami nesala lortamna upu peterembenkamre’ tenen,
dokotepneue.
Tonda,
asuru pun nesala asuru perengdina cap,
yaniptapmengedi ikin keca sun nong deiki derirameng nesala,
‘Makupra eremdina cap,
kunkamre’ tenen,
dokotepneue.
19 Nimi Lyemna Deiyo Ngebo,
‘Nesala yuma kael kepkameng’ tenen,
Allahdi,
‘Nimi tep bicau tenepnedi,
telep kweipkamne’ tenen,
wepra deiamu keteng tamun konum kupre cadi,
er gam bungdina upu,
‘Kai perbenkamre’ tenen,
konum dokotepneue.
Nabi Yesayadi pepra sekamu. (Yesaya 61:1-2)
20 Yesusdi aupu pepu dingeda,
Allah upu sekami keca getepra akati melimna ngebo karepudi buku.
Buku pangeda,
Yehudi yala nesala sun Allah upu peteremna ati weka gekenmai neng yumadi,
Yesus tep dipyalek penmai.
21 Yesus tep pio dipyalek penmai pangeda,
Yesusdi aupu penmau.
“Tupa gekenmanerumpa,
aupu deiki pepmansen ngeboda,
yuk ngebo gume,
ne kununa cadi,
Allahdi,
‘Ukupkamre,’
pepu ngeda,
akonum gonga kepra kupser adano,”
Yesusdi pepu.
22 Yesusdi peteremaupane,
aupu gekenmai nengdi,
“Uo upu telep kupra penmasere,”
pepra lolopidi,
kange deipi.
Tonda,
“Angeboda,
Yusupdi deipu mi tenepmapada,
tek do,
gum do?”
tenepra penmai.
23 Upenmaipa,
Yesusdi aneng tep pepu.
“Ne tek sisi pepsene.
Domon upu apepkusen upuda,
amendada ka tamupra pepkamnerume.
Ada,
‘Nimi kwetena deiyo ngebo kandi kan pe teppu kwetedankurume,’
pepkamnerume.
Tonda,
‘Kapernaum mutu neitamai mambul pel doramumpa,
yuk nengdi lap pengepa gekenupada,
kan pe nepmum mutu neitamai pel dopsemempa epkupe,’
pepkamnerume.
24 Dinino,
ne tek sisi upu pepsene.
Ware Allah upu lap pen neng do,
ware nabi-nabi neng do yuma,
sun pe mutu neitamai kunge nengdi,
anabi neng tep gispal men dongedi,
sun penge upu men gekenunge.
25 Allah upu lap peramu ngebo nabi Elia,
Israel mutu neitamai kuramu taruda,
keteng tamun weneri neitamai ton cap,
mo men cemamupa,
jen pio putaramu.
26 Jen keca pio putaramu taruda,
Yahudi yala nerapu,
solu nerapu weik akurami dinin,
Allahdi sun damai yuma,
nabi Elia men dokotepu.
Sidon tara neitamai,
Sarafat mutu kuramu solu ner,
Yahudi yala gum ner tenpu,
er melimna tep,
nabi Eliadi asolu ner damai beu.
27 Angeda utopu,
Allah upu lap peramu ngebo nabi Elisa,
Israel mutu neitamai kuramu taruda,
kot susu utopu susu ila jeramu nesala,
Yahudi yala nesala weik akurami dinin,
ayuma men kweteramu.
Tenpu ngebopu,
Siria mutu kuramu ngebo,
Yahudi yala gum ngebo,
er sida Naman,
nabi Elisadi angebopu kwetepu.”
Yesusdi pepu.
28 Yesusdi aupu pepu pangeda,
akati Allah upu peteremna ati wekmaidi gekenmai neng yumada,
yu pio weik kupu.
Ada,
Yesus aupu pepmaser deiki di,
‘Yahudi yala nesala dakuamrepane,
Yahudi yala gum nesala tep,
Allah upu karerbenkune,
penmasere,’
tenepidi,
‘Warya tep nun Yahudi nesala tapserdi,
Yahudi yala gum nesala damai peterep embenkamre do?’
tenen,
yu kupu.
29 Yu weik kupupa,
‘Nun mutu tapra betu’ tenen,
enepra dokotepi.
Nasaret ati arum doramyaida,
mutu dup cadi,
‘Yesus amutu dup deiki di dopra,
kot dokotepmepepa,
angebo popkup’ tenen,
dubei.
30 Dubei dinin,
Yesusdi anesala weik wekmaiya neitam kan-kan kapra,
wiliptapra yukai beu.
Yesusdi nimi taleamu isok enepra dokotepu upu
31 Yesusdi amutu tapra,
bisi mapbanmaudi,
Galilea tara,
nimi ati arum doramyai sida,
Kapernaum mutu beu.
Beudi,
sun Yahudi yala nengdi Allah si eremna tep,
beipye peingami tumi,
Sabat tumi kupupa,
awekmai nesala tep,
Yesusdi peteremau.
32 Er upu peteremau taruda,
abulupmai neng yuma gekepidi,
mambul kange doupra,
uo tenen,
lolomai.
Ada,
Yesusda,
ila kael cap,
puto cap deiki di peteremaua tep,
lolomai.
33 Aneng lolomai ati,
sun Allah upu peteremna ati neitamai di,
isok taleamu ngebo bukmaua di,
upu ila di pepu.
Angeboda,
isok talepnuruamnga di pepu.
34 “Yesus Nasaret mutu kuramu ngebo,
kanda ware keca putanmakerpa yanmaserem do?
‘Poptapra gum kupra deipsetene’ tenen,
yanmaserem do?
Ne kael kepmakene.
Allahdi weiamkeupa,
mali kun keca tenpu peda men kuremdi,
pio mengne Dumsisi Ngebo kureme,”
pepu.
35 Isok upepupnen,
Yesus er upu puto di aisok tep pepu,
“Kan upu dimpepra,
angebo dipru neitamai talepmumada tapra beo,”
pepra wenepu.
Yesusdi upepra wenepupa,
isokdi ataleamu ngebo men popu dinin,
ila di talepra longdinmauanen,
tuai sakmaupa,
aisok taleamu ngebo,
er nong pumbon di gupsaka ngolopra beu.
36 Beupa,
aneng yumadi epi.
Yesus ukupu pangeda,
abulupra wekmai neng yumadi,
lolomaidi,
asipdana malye penmai.
“Angebodi,
akupmaser ngeda,
ware peteremna upu penmaser do?
Angeboda,
ila puto cap,
ila kael capdi peteremredi,
isok-isok peda,
Yesusdi ‘Ukuprume,
ukuprume,’
peprengepu gekepra bura gupsaka banunge,”
penmai.
37 Ange tep nengeda,
anengdi Yesus kupunge tep,
kai doupra lap perbaramipa,
Galilea tara neitamai kurami neng weika di gekerami.
Yesusdi pu jeramu nesala kweteramu upu
38 Atumi di Yahudi yala neng,
sun Allah upu peteremami ati tapra beidi,
Yesus cap,
Simon cap,
Simon er ati berei.
Berei dingeda,
aneng er ati wekmareipane,
Simon er yamal ner nong bupu pu jeramnga tep,
‘Yesusdi kweteptue’ tenen,
sun awekmai nengdi,
adipapu Yesus tep moropi.
39 Moropipa,
Yesusdi aner mapmauai beudi,
genepra dipetepudi,
‘Anong bupu pu gum kupkur’ tenen,
“Nong bupuda,
dimpepo,”
pepu.
Upepu pangeda,
adipapu aner nong bupu pu jeramngada,
dimpepupa,
telep kupudi aner tekrapudi,
aneng sun jen keca melipra karepu.
40 Atumipu dinin,
keteng konum wekrou taruda,
amutu nesaladi pu yala-yala yuma jeramu nesala dopra,
Yesus damai duyanmaipa,
er buru sun nong deiki deipudi,
tenpu-tenpu di anesala yuma kwetepu.
41 Tonda,
apu jeramu nesala kan-kan dinin,
anesala sun dipru taleami isok-isok yuma gupra bei.
Gupra bei dingeda,
aisok yumadi aupu penmai.
“Kanda Allah er Mi Sisa kurume,”
penmai dinin,
Yesusdi aupu sekrou.
Ada,
Yesusdi,
aisok yuma,
‘Yesus erda nimi Lyemna Deiyo Ngebo,
Mesiasc Ngebo kurure,’
konum tenepmanenga tep,
‘Ataruda aupu men lap pepkuneng’ tenen,
sun penmai upu sekrou.
Aisok yumada,
er Yesus konum kael keamya tep,
‘Ne katuai pepnenung’ tenen,d
“Sun upu dimpepso,”
pepupa,
aisok yumadi upu men pepmanto kupi.
Yesusdi nimi men kuramyai bena, Allah moropu upu
42 Sun mapmaiyanen,
men berekmau taru di,
tupa kunukmaupane,
Yesus bukrapudi,
akati tapra bura tara beudi,
nimi men kuramyai bena,
Allah moropu.
Allah moronmaupane,
anesala yumadi,
‘Yesus dan do?’
tenen,
epra banmai.
Epra embanmaiyanen,
Yesus epi dingeda,
‘Yesusdi nun tapra yukai beserur’ tenen,
“Yesus kao,
nun mutu tapra,
yukai bana gume,”
pepra upu weika di moropi.
43 Upepipa,
Yesusdi tamupra pepu.
“Allahdi nimi ban-ban yuma lyepredi,
sun dipru talenkamre upu,
kai telep upu peterep embana tep dokotepneupa,
yasi.
‘Aupu peterembenkamne’ tenen,
yasa cadi,
yuk mutu-mutu yuma peterep embenkamne,”
Yesusdi pepu.
44 Aupu peipka utopu,
Yudea tara neitamai,
Yahudi yala neng,
sun Allah upu peteremna ati wekrapudi peterep embaramu.