Zeruzalɛm tɩʋ na tʋ te tɩn
52
Sedesɩasɩ dɛɛn jɩgɩ bɩna fiinle-dɩdʋa mʋ yɩ o ji Zuda tɩʋ pɛ. O ma jǝni Zeruzalɛm nɩ o di paarɩ dɩm o kɩ bɩna fugə-dɩdʋa. O nu yɩrɩ mʋ Hamutalɩ. Wʋntʋ maa yɩ Zeremi wʋlʋ na nuŋi Libina tɩn bukɔ mʋ. 2 Pɛ Sedesɩasɩ dɛɛn tʋŋɩ lwarɩm mʋ o cɔgɩ Baŋa-Wɛ yigə, nɩ Pɛ Yeoyakim dɩ ya na kɩ te tɩn. 3 Lɛɛrʋ tɩlʋ maama na kɩ Zeruzalɛm dɩ Zuda tiinə bam maama yɩra nɩ tɩn tɔgɩ Baŋa-Wɛ ban-zɔŋɔ kʋm ŋwaanɩ mʋ. DƖ ma yɔɔrɩ DƖ zəli-ba DƖ yigə nɩ, ba kikiə yam ŋwaanɩ.Pɛ Sedesɩasɩ dɛɛn ma zaŋɩ o nuŋi Babilɔnɩ tɩʋ pɛ Nebukadnɛtsarɩ kwaga nɩ. 4 O paarɩ dim bɩna nʋgʋ bɩnɩ dɩm canɩ fugə cana kam wʋnɩ, ka da fugə dɛ dɩm nɩ mʋ Nebukadnɛtsarɩ dɛɛn tu o li Zeruzalɛm dɩ o jar-kərə bam maama. Ba ma kaagɩ ba pu tɩʋ kʋm yɩ ba daarɩ ba lɔ taalɩ-kamunə ba yǝri kʋ kabri sɩm yɩra nɩ. 5 Kʋ na yi Sedesɩasɩ paarɩ dim bɩna fugə-dɩdʋa bɩnɩ dɩm tɩn, mʋ Babilɔnɩ tiinə bam dɛɛn wanɩ Zeruzalɛm tɩʋ kʋm ba di.
6 Kʋ na yi bɩnɩ dɩm kʋntʋ canɩ sɩna cana kam da nʋgʋ dɛ dɩm tɩn, kana dɛɛn tiini ka cɛ mʋ pa Zeruzalɛm nɔn-biə bam daa ba jɩgɩ wʋdiu sɩ ba taa di. 7 Babilɔnɩ tiinə bam ma bwəri tɩʋ kʋm kabri sɩm ba dɩ tɩga nɩ, yɩ ba tɔgɩ pwəli sɩm nɩ ba zʋ kʋ wʋ. Sedesɩasɩ dɩ o jar-kərə bam maama dɛɛn duri sɩ ba lu tɩtɩɩ nɩ mʋ. Ba ma kwe pɛ gaarɩ cwǝŋǝ kam, ba vu ba tɔgɩ ni dɩm na wʋ tɩʋ kabri sɩle sɩm tɩtarɩ nɩ tɩn, yɩ ba laan duri ba tu Zʋrdɛn bolo kʋm seeni. 8 Dɩ kʋ dɩ, Babilɔnɩ tiinə jar-kərə bam dɛɛn maa pɛ pɛ wʋm kwaga ba pu. Ba ma vu ba yi Sedesɩasɩ sɩ kʋ maŋɩ dɩ Zeriko tɩ-kamparɩ sɩm seeni. O jar-kərə bam ma pwɛ da yigə nɩ, yɩ ba jagɩ ba daarɩ‑o.
9 Ba ma zi Sedesɩasɩ ba ja ba vu Babilɔnɩ tɩʋ pɛ Nebukadnɛtsarɩ te. O dɛɛn wʋ Ribila tɩʋ nɩ mʋ, Hamatɩ tɩʋ kʋm nɩ. Nebukadnɛtsarɩ ma di taanɩ o vanɩ Sedesɩasɩ dáanɩ. 10 O ma pa ba gʋ Sedesɩasɩ biə bam Ribila nɩ, yɩ o zɩgɩ da o niə. O ta ma pa ba gʋ Zuda tɩʋ dɩdɛɛra bam maama. 11 Kʋ kwaga nɩ o pɛ ba kʋkɔrɩgɩ Sedesɩasɩ yiǝ yam mʋ ba lɩ, yɩ ba daarɩ ba kwe canna capʋnnʋ ba ma ba vɔ‑o ba vaŋɩ ba ja ba vu Babilɔnɩ. O na yi da tɩn, ba ma kɩ-o pɩɩna digə nɩ sɩ o maŋɩ da o tɩ.
12 Nebukadnɛtsarɩ dɛɛn na di Babilɔnɩ tɩʋ paarɩ o kɩ bɩna fugə-nʋgʋ bɩnɩ dɩlʋ nɩ tɩn, canɩ sɩnu cana kam da fugə dɛ dɩm nɩ mʋ o kwaga-saŋɩnʋ Nebuzaradan zʋ Zeruzalɛm tɩʋ kʋm wʋnɩ. Wʋntʋ maa yɩ Babilɔnɩ tɩʋ pamaŋna bam yigə tu. 13 O dɛɛn ma pa ba zwɛ Baŋa-Wɛ digə kam, dɩ pɛ sɔŋɔ kʋm, dɩ Zeruzalɛm sam dɩm maama. Ba dɛɛn zwɛ sa-ŋʋnnʋ dwi maama mʋ Zeruzalɛm tɩʋ wʋnɩ. 14 Nebuzaradan ma pa ni pa o jar-kərə bam yɔɔrɩ ba yigi Zeruzalɛm tɩʋ kabri sɩm maama ba dɩ tɩga nɩ. 15 O ma kalɩ yinigə tiinə badonnǝ, dɩ balʋ ta na daarɩ tɩʋ kʋm wʋnɩ tɩn, kʋ ta wǝli dɩ gwarʋ ta na daarɩ tɩn, dɩ balʋ na duri ba zʋ Babilɔnɩ tiinə kɔgɔ kʋm wʋnɩ tɩn o ja o vu Babilɔnɩ. 16 Kʋ nan na yɩ tɩʋ kʋm yinigə tiinə badaara bam, Nebuzaradan ma yagɩ-ba Zuda laŋa kam nɩ. O ma pa-ba tɩga sɩ ba va, dɩ vinyə tweeru karɩ, sɩ ba taa nii sɩ baŋa nɩ.
17 Babilɔnɩ tiinə bam ma zʋ Baŋa-Wɛ digə kam ba bwəri canna zɩla yam maama. Yantʋ maa yɩ ywə yale yam, dɩ war-zʋn-zɔŋɔ kʋlʋ ba na bǝi nɩ ‹Nɩnɩʋ kʋm› tɩn, dɩ war-zwɩ zɩgɩm tərikooru tɩm. Ba ma daarɩ ba kwe tɩ canna kam ba zɩŋɩ ba ja ba vu Babilɔnɩ. 18 Ba ta ma kwe zwɩ sɩlʋ ba na wʋ́ taa maɩ ba pɛ tɩntwarɩm tɩn, dɩ sɛbʋllʋ, dɩ wǝǝnu tɩlʋ na wʋ́ fɔgɩ tɩ kwɛ mim dɩm tɩn, dɩ zwɩ sɩlʋ na maŋɩ sɩ lwəri jana tɩn, dɩ sɩlʋ ba na zwɛ wǝǝnu tɩlʋ lwǝm na ywǝmmǝ tɩn sɩ wʋnɩ tɩn, dɩ canna wǝǝnu tɩlʋ maama na jɩgɩ tɩ fɔgɩ Wɛ-di-kamunu cullu tɩm tɩn ba wǝli da. 19 Nebuzaradan ta ma pa ba kwe Wɛ-digə zɩla yalʋ maama ba na mɛ səbu-sɩŋa, naa səbu-poŋo ba kɩ-ya tɩn. Tɩntʋ maa yɩ zʋn-balɛ, dɩ min-cala zwɩ dɩ zwɩ sɩlʋ ba na wʋ́ ma ba zɩzagɩ na bimbim dɩm baŋa nɩ tɩn, dɩ kambi, dɩ min-zwǝn-zɩgɩrʋ, dɩ zʋŋ-bi, dɩ zwɩ sɩlʋ ba na maɩ ba loi wo-nyɔɔrʋ pɛɛra tɩn.
20 Kʋ na yɩ ywə yale yam, dɩ war-zʋn-zɔŋɔ kʋm, dɩ kʋ nabɛ nyɩnyʋrʋ fugǝ-tɩle tɩlʋ na zɩŋɩ-kʋ tɩn, dɩdaanɩ war-zwɩ zɩgɩm tərikooru tɩm, Pɛ Solɔmɔn dɛɛn ya pɛ ba mɔ wǝǝnu tɩm kʋntʋ maama Baŋa-Wɛ digə cullu tɩm ŋwaanɩ mʋ. Tɩ yɩra canna kam dɛɛn tiini ka dummə ka dwe maŋɩm. 21 Ywə yale yam dɩdʋa wɛ-baŋa seeni dɩdwarɩm dɛɛn yɩ kantɩ ni maŋɩm kuni fugə-nana mʋ. Ya yɩra kukulim maŋɩm maa yɩ kantɩ ni maŋɩm kuni fugə bɩle. Ba dɛɛn mɔɔnɩ-ya sɩ ya taa yɩ wʋgʋ mʋ. Canna kam lilirim maa yɩ nwɩ sɩna maŋɩm. 22 Ywe maama yuu nɩ ba məəli canna wo-sugili mʋ da sɩ dɩ wanɩ dɩ təli digə kam yuu kʋm seeni. Nipuru yam dɩdʋa dɩdʋa dɩdwarɩm yɩ kantɩ ni maŋɩm kuni bɩnu mʋ. Ba mɛ canna mʋ ba sɔ ba lɛɛnɩ daanɩ ba kɩ da, yɩ ba gɔgɩrɩ kampwɩ tweeru biə ba kaagɩ nipuru yam. Ywə yale yam nipuru yam maama yɩ bɩdwɩ mʋ. 23 Ywe maama yɩra nɩ, ba gɔgɩrɩ kampwɩ tweeru biə bi mʋ, sɩ nɔɔnʋ na zɩgɩ tɩga nɩ yɩ kʋ tu kwǝni sɩ o nii dɩ sɛn sɩm, o naɩ funʋgʋ yardʋ yɩranɩ mʋ.
24 Nebuzaradan dɛɛn ta jaanɩ Wɛ kaanɩm nakwɩ tu Seraya, dɩ o kwaga-saŋɩnʋ Sofoni, dɩ Wɛ-digə kam ni-yɩrɩna batɔ bam mʋ o ja o viiri. 25 Kʋ na yɩ balʋ ya ta na daarɩ Zeruzalɛm tɩʋ kʋm wʋnɩ tɩn, o ma kalɩ ba jar-kərə yigə tu wʋm, dɩ nɔɔna barpɛ balʋ ya na bwələ dɩ pɛ wʋm tɩn, dɩ dɩdɛɛrʋ wʋlʋ na lɩ nɔɔna sɩ o wǝli-ba jar-kərə kɔgɔ kʋm wʋnɩ tɩn, dɩ nɔɔna fusɩrdʋ balʋ ta na wʋra tɩn o wǝli da o ja o viiri. 26 Nebuzaradan dɛɛn jaanɩ bantʋ maama mʋ o vu Babilɔnɩ tɩʋ pɛ wʋm te. O dɛɛn wʋ Hamatɩ tɩʋ Ribila nɩ mʋ. 27 Dáanɩ mʋ Babilɔnɩ tɩʋ pɛ dɛɛn pɛ ba gʋ nɔɔna bam kʋntʋ maama.
Kʋ dɛɛn kɩ kʋntʋ mʋ yɩ ba kalɩ Zuda dwi tiinə bam ba ja ba vu sa-tɩʋ yigə yigə. 28 Pɛ Nebukadnɛtsarɩ na kalɩ balʋ maama o ja o vu Babilɔnɩ tɩʋ tɩn mʋ tɩntʋ:
O paarɩ dim bɩna yarpɛ bɩnɩ dɩm nɩ
o kalɩ Zuda dwi tiinə mʋrrʋ tɩtɔ dɩ fiinle-batɔ (3,023) o vu da.
29 O paarɩ dim bɩna fugə-nana bɩnɩ dɩm nɩ
o ma kalɩ Zeruzalɛm tiinə biə-nana dɩ fiintɔ-bale (832) o vu da.
30 O paarɩ dim bɩna fiinle-yatɔ bɩnɩ dɩm nɩ
o pamaŋna bam yigə tu Nebuzaradan ma ja Zuda dwi tiinə biə yarpɛ dɩ fiinna-banu (745) o vu da.a
Nɔɔna balʋ ba na kalɩ ba vu Babilɔnɩ tɩn na kɩ daanɩ,
ba yɩ mʋrrʋ tɩna dɩ biə-yardʋ (4,600) mʋ.
Ba pʋrɩ Yehoyakini ba yagɩ
31 Ba dɛɛn na kalɩ Zuda tɩʋ Pɛ Yehoyakini ba ja ba vu Babilɔnɩ yɩ o daarɩ o kɩ bɩna fiintɔ-yarpɛ Babilɔnɩ nɩ tɩn, bɩnɩ dɩm kʋntʋ canɩ fugə-sɩle cana kam da fiinle-yanu dɛ dɩm nɩ mʋ Babilɔnɩ tɩʋ Pɛ Evil-Merodakɩ kɩ Pɛ Yehoyakini zaanɩ, yɩ o pʋr‑o pɩɩna digə nɩ o yagɩ. Kʋ maa yɩ bɩnɩ dɩlʋ Evil-Merodakɩ na puli o di Babilɔnɩ tɩʋ paarɩ tɩn mʋ o kɩ kʋntʋ. 32 O ma kɩ Pɛ Yehoyakini lanyɩranɩ, yɩ o pa‑o jǝŋǝ je na tiini sɩ jɩgɩ zulə sɩ dwe je sɩlʋ pwa babam bam na wʋ Babilɔnɩ nɩ na nɛ tɩn. 33 Yehoyakini ma lɩ o pɩɩna digə gwaarʋ tɩm o tiŋi. O ŋwɩa kam dɛ maama wʋnɩ o ma lɛɛrɩ o di wʋdiu Babilɔnɩ tɩʋ pɛ tee nɩ. 34 Babilɔnɩ tɩʋ pɛ ta ma kwe kʋlʋ maama Yehoyakini na wʋ́ kɩ o yɩra nɩ tɩn o pa‑o dɛ maama, sɩ kʋ vu kʋ yi o tʋʋnɩ maŋa.