51
Baŋa-Wɛ na tagɩ te tɩn mʋ tɩntʋ:
«Amʋ lagɩ a pa viu mʋ zaŋɩ
sɩ kʋ dʋlɩ kʋ vu kʋ cɔgɩ Babilɔnɩ tɩʋ kʋm,
dɩ balʋ na zʋʋrɩ Babilɔnɩ laŋa kam nɩ tɩn.
2 A lagɩ a tʋŋɩ jar-kərə mʋ Babilɔnɩ tɩʋ baŋa nɩ,
sɩ ba vu ba cɔgɩ ba tɩga kam maama,
nɩ ba na caarɩ mɩna te dɩ viu tɩn.
Dɛ dɩm lɛɛrʋ na wʋ́ yi Babilɔnɩ tiinə tɩn,
ba dʋna wʋ́ kaagɩ-ba mʋ ba pu,
yɩ ba di-ba ba daarɩ ba tɩga kam ba tiŋi yɔɔ yɩranɩ.
3 Yɩ pa-na ba cɩ-tara bam cwǝŋǝ sɩ ba saŋɩ ba tɛn,
naa sɩ ba vɔ ba jara zɩla yam.
Yɩ yagɩ-na ba nɔn-dʋnnʋ tɩm tɩtɩ sɩ ba taa ŋwɩ.
Nan yɔɔrɩ á cɔgɩ-na ba jar-kərə bam maama.
4 Pa-na sɩ ba na zʋnnɩ yɩ ba daarɩ ba tɩ
ba taa tigi Babilɔnɩ tɩʋ cwe sɩm nɩ.
5 Kʋ na yɩ Yisɩrayɛlɩ tiinə bam, dɩ Zuda tiinə bam,
ba Tu Baŋa-Wɛ dɩm na yɩ Paŋwa tɩn wʋ nuŋi ba kwaga nɩ,
dɩ ba na maŋɩ ba cɔgɩ te tɩn dɩ.
Ba kɩ lwarɩm ba cɔgɩ Yisɩrayɛlɩ dwi dɩm Wʋ-poŋo Tu wʋm yigə
pa ba tɩga kam maama cɔgɩ.
6 Duri á nuŋi-na Babilɔnɩ tɩʋ kʋm wʋnɩ!
Duri-na sɩ á lu yɩ á ta ŋwɩ!
Yɩ tɔgɩ-na dɩ Babilɔnɩ tiinə bam
á tɩ ba lwarɩm dɩm ŋwaanɩ.
Maŋa yiǝ sɩ Baŋa-Wɛ joori DƖ ŋwɩ jɩnɩ ba baŋa nɩ.
DƖ lagɩ DƖ pa Babilɔnɩ tiinə joŋi ba kikiə yam ŋwɩɩrʋ mʋ.
7 Babilɔnɩ dɛɛn nyɩ nɩ səbu-sɩŋa na-zʋŋa mʋ Baŋa-Wɛ jɩŋa nɩ.
Dɩntʋ ma kwe ka wʋʋ sana bam
DƖ pa lʋgʋ baŋa dwi maama
pa ba nyɔ ba su ba bugi.
Ba maama na nyɔgɩ ka wʋʋ sana bam tɩn,
ba yɔɔrɩ ba yirisi mʋ.
8 Babilɔnɩ nan lagɩ kʋ da kʋ tʋ mʋ kʋ cɩcʋgɩ.
Tiini á keeri-na kʋ ŋwaanɩ!
Beeri-na nugə sɩ á ma á lɛ kʋ zʋnnɩ dɩm,
sɩ dɛdoŋ kʋʋ́ joori kʋ na yazurə.
Vərə balʋ na zʋʋrɩ Babilɔnɩ nɩ tɩn maa wɩ:
9 ‹Dɩ́ ya na waɩ, dɩ́ yaá pa Babilɔnɩ na yazurə.
Kʋ nan warɩ, o bá na soonim.
Pa-na sɩ dɩ́ viiri dɩ́ daarɩ tɩʋ kʋm,
sɩ nɔɔnʋ maama joori o tɩtɩ tɩʋ.
Wɛ na lagɩ DƖ waarɩ-ba te tɩn wʋ́ kɛ jɩŋa,
sɩ kʋ yi wɛyuu kʋm tɩtɩ.
Kʋ nan maŋɩ sɩ ba yɔɔrɩ ba na cɔgɩm mʋ.›
Zuda dwi tiinə bam dɩ maa wɩ:
10 ‹Baŋa-Wɛ brɩ nɩ dɩbam mʋ jɩgɩ cɩga.
Pa-na sɩ dɩ́ vu Zeruzalɛm sɩ dɩ́ zɩgɩ Siyɔn nɩ
yɩ dɩ́ ta dɩ́ Tu Baŋa-Wɛ dɩm na kɩ kʋlʋ DƖ pa dɩbam tɩn.›
11 Sɩlɩ-na á cɩna yam á tiŋi,
sɩ á kwe-na á najara tankwallʋ tɩm á zeeri!
Bɛŋwaanɩ, Baŋa-Wɛ mʋ ciŋi Mɛdɩ pwa bam sɩ ba ba,
DƖ na bʋŋɩ sɩ DƖ cɔgɩ Babilɔnɩ tɩʋ kʋm tɩn ŋwaanɩ.
Baŋa-Wɛ wʋ́ joori DƖ ŋwɩ jɩnɩ Babilɔnɩ tiinə baŋa nɩ,
dɩ ba na cɔgɩ Wɛ-digə kam te tɩn.a
12 Zəŋi-na maana woŋo sɩ najara kɩ Babilɔnɩ tɩʋ nɩ!
Kɩ-na dam jar-kərə bam kuri nɩ!
Pa-na sɩ yɩrɩna bam taa zɩgɩ ba zɩga je nɩ!
Ta pa-na sɩ nɔɔna badonnǝ vwɛ ba kaagɩ tɩʋ kʋm!
Bɛŋwaanɩ, Baŋa-Wɛ lagɩ DƖ kɩ DƖ su DƖ bʋbʋŋɩ dɩm mʋ.
DƖ bʋbʋŋɩ dɩlʋ DƖ na maŋɩ sɩ DƖ cɔgɩ Babilɔnɩ tɩn mʋ kʋntʋ.
13 Abam balʋ na zʋʋrɩ Babilɔnɩ bu-tʋlɩ sɩm ni nɩ tɩn,
á yɩ nadunə mʋ pipiu ŋwaanɩ.
Maŋa nan yi sɩ á tɩʋ kʋm tʋ kʋ saarɩ
sɩ abam dɩ tɩ.
14 Paŋwa Tu Baŋa-Wɛ dugi DƖ tɩtɩɩ nɩ mʋ DƖ wɩ:
Amʋ lagɩ a pa á dʋna tiini ba yʋ mʋ á baŋa nɩ
nɩ kayɩra doŋ.
Ba maa wʋ́ kaasɩ wɔnɔ kaasa
sɩ ba ja dɩdaanɩ abam.»
15 Baŋa-Wɛ nan kwe DƖ dam dɩm mʋ
DƖ kɩ tɩga kam baŋa.
DƖ ma daarɩ DƖ kwe DƖ swan yam
DƖ naanɩ lʋgʋ kʋm maama.
DƖ ma da DƖ wʋbʋŋa baŋa nɩ DƖ lwarɩ wɛyuu kʋm
pa kʋ tigi palalala.
16 Wʋntʋ na zɩgɩ wɛɛnɩ DƖ bagɩ DƖ kwǝrǝ,
wɛyuu baŋa na bam yǝni ba wuuri mʋ.
DƖ waɩ o paɩ kunkwǝǝnu zɩgɩ
lʋgʋ baŋa kweelim je sɩm nɩ
tɩ taɩ tɩ nuŋǝ.
DƖ maa paɩ dʋa nɩ yɩ ka pɩpɩla.
DƖ na pʋrɩ DƖ digə kam,
viu mʋ wʋ́ nuŋi da kʋ jagɩ kʋ yi je maama.
17 Jwǝ-kaana bam maama jwərim dɩm gaalɩ mʋ,
yɩ ba wʋbʋŋa tǝrǝ.
Cavɩɩra wʋ́ ja gɔgɔ kʋlʋ maama na mɔɔnɩ jwǝnǝ tɩn,
o jwǝnǝ yam na ba jɩgɩ ŋwɩa tɩn ŋwaanɩ.
Ya yɩ wo-yɔɔrʋ mʋ.
18 Ya ba jɩgɩ kuri.
Ya maŋɩ sɩ nɔɔna taa jɩgɩ-ya ba mwana mʋ.
Ya waarɩm maŋa na yiǝ,
ya maama wʋ́ cɔgɩ mʋ fasɩ.
19 Wʋlʋ Zakɔbɩ dwi tiinə bam na zuli tɩn
nan daɩ nɩ yantʋ na yɩ te tɩn.
Wʋntʋ mʋ yɩ woŋo maama Naanʋ wʋm.
Yisɩrayɛlɩ dwi tiinə bam dɩ yɩ balʋ
o na kuri sɩ ba taa yɩ wʋntʋ tɩtɩ nyɩm tɩn mʋ.
O yɩrɩ nan mʋ yɩ Paŋwa Tu Baŋa-Wɛ dɩm.
Baŋa-Wɛ ma ta Babilɔnɩ tɩʋ taanɩ DƖ wɩ:
20 «Nmʋ yɩ gwəli dɩlʋ a na jɩgɩ a ma a kɩ najara tɩn mʋ.
Amʋ yǝni a kwe nmʋ mʋ
a ma a cɔgɩ dwi tiinə dɩ lʋgʋ baŋa tɩɩnɩ maama.
21 A maa tɔgɩ nmʋ baŋa nɩ
a cɔgɩ siseŋ-nɔɔna, dɩ balʋ na diini-sɩ tɩn.
A ta maa tɔgɩ nmʋ baŋa nɩ
a cɔgɩ jara-kǝm tərikooru, dɩ tɩ coonə.
22 A maa tɔgɩ nmʋ baŋa nɩ
a cɔgɩ baara, dɩ kaana,
dɩ nankwɩn: dɩ nɔn-dʋnnʋ,
dɩ bəkəri, dɩ bɩsankam maama.
23 A ta tɔgɩ nmʋ baŋa nɩ
a cɔgɩ nayɩra, dɩ ba peeni sɩm,
dɩ vala, dɩ ba nabɛ,
dɩ tɩʋ yigǝ tiinǝ, dɩ dɩdɛɛra dɩ.»
24 Baŋa-Wɛ ta ma ta DƖ wɩ: «Amʋ laan lagɩ a joori a ŋwɩ jɩnɩ Babilɔnɩ tɩʋ baŋa nɩ, yɩ a ta ŋwɩ-dɩ balʋ maama na zʋʋrɩ Babilɔnɩ laŋa kam nɩ tɩn baŋa nɩ mʋ. Abam wʋ́ taa zɩgɩ á nii mʋ yɩ a waarɩ-ba kʋntʋ dɩ ba na kɩ te Zeruzalɛm tiinə yɩra nɩ tɩn.»
25 Baŋa-Wɛ na tagɩ kʋlʋ tɩn mʋ tɩntʋ:
«Babilɔnɩ, nmʋ nyɩ dɩ piu
kʋlʋ na jɩgɩ lʋgʋ baŋa maama kʋ cɔgɩ tɩn mʋ.
Amʋ Baŋa-Wɛ nan mʋ nuŋi nmʋ kwaga nɩ.
Amʋ wʋ́ ma a dam mʋ a waarɩ-m.
A lagɩ a dʋlɩ‑m a dɩ tɩga nɩ mʋ,
sɩ a daarɩ a zwɛ n sam dɩm sɩ dɩ ji tɩntwarɩm.
26 Nɔɔn-nɔɔnʋ daa bá beeri weeru tɩlʋ na daarɩ tɩn wʋnɩ
sɩ o na kandwɛ o ma o cwi kabri-kuri wʋdoŋ.
Bɛŋwaanɩ, abam tɩʋ kʋm yɔɔrɩ kʋ cɔgɩ mʋ wuu.»
Baŋa-Wɛ na tagɩ te tɩn mʋ kʋntʋ.
27 Zəŋi-na drapoo tɩga kam baŋa nɩ!
Wu-na najara nabwaanʋ sɩ kʋ yi lʋgʋ baŋa tɩɩnɩ maama!
Pa-na sɩ dwi maama tiinə jar-kərə bam kɩ daanɩ
sɩ ba nuŋi ba zaŋɩ najara dɩ Babilɔnɩ tɩʋ kʋm.
Bəŋi-na Arara tiinə, dɩ Minni tiinə, dɩ Asekenazi tiinə,
sɩ ba vu ba jeeri-kʋ dɩ najara.
Nan lɩ najara yigə tu sɩ o da ba yigə o kɩ najara yam.
Ja-na siseŋ-nɔɔna á nuŋi
sɩ sɩ taa daga nɩ kayɩra na yʋ te tɩn.
28 Pa-na sɩ dwi maama tiinə jar-kərə bam kɩ daanɩ
sɩ ba nuŋi ba zaŋɩ najara dɩ Babilɔnɩ tɩʋ kʋm.
Bəŋi-na Mɛdɩ pwa bam,
dɩ ba tɩʋ yigǝ tiinǝ bam, dɩ ba dɩdɛɛra bam,
dɩdaanɩ tɩɩnɩ dɩlʋ maama ba na te tɩn jar-kərə bam.
29 Tɩga kam maama sisiŋi mʋ, yɩ ka yɩra saɩ.
Bɛŋwaanɩ, Baŋa-Wɛ wʋbʋŋa jaanɩ ya ti
sɩ DƖ cɔgɩ Babilɔnɩ laŋa kam.
DƖ maa lagɩ sɩ DƖ yɔɔrɩ DƖ cɔgɩ-ka
sɩ nɔɔn-nɔɔnʋ daa yɩ taa zʋʋrɩ da.
30 Nii-na! Babilɔnɩ nɔn-babɛ sɩm yagɩ najara yam kǝm.
Ba ma lɛɛrɩ ba maŋɩ ba dam je sɩm nɩ.
Ba dam maama ti mʋ.
Ba laan bwǝnǝ nɩ kaana doŋ mʋ.
Mim mʋ zwɛ tɩʋ kʋm sam.
Kʋ mancwəənu niə da-garɩ sɩm laan ma bwəri.
31 Tɩntʋŋna zanzan saŋɩ da kwaga mʋ
ba jɩgɩ najara kwǝrǝ ba duri ba maa ve
sɩ ba pa Babilɔnɩ tɩʋ pɛ nɩ:
o dʋna mʋ yɔɔrɩ ba di o tɩʋ kʋm maama ba ti.
32 Ba ma sin cwe sɩlʋ nɔɔna na wʋ́ tɔgɩ da bɛ bugə kam ba lu tɩn.
Ba ta ma zwɛ nancan-gullu je sɩm.
Kʋntʋ ŋwaanɩ mʋ pɛ fʋʋnɩ tiini dɩ jɩgɩ Babilɔnɩ tɩʋ jar-kərə bam.
33 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ:
«Babilɔnɩ tɩʋ kʋm nyɩ dɩ tɩga kalʋ nɔɔna na fɔgɩ ba kwɛ-ka
sɩ ba ma ba magɩ mɩna tɩn mʋ.
Kʋ brɩ nɩ wʋdiu zagɩm maŋa yiǝ.
Ba dʋna laan wʋ́ ba ba zagɩ-ba ba dɩ tɩga nɩ.»
Zeruzalɛm tiinə bam daa ma ta ba wɩ:
34 Babilɔnɩ tɩʋ pɛ Nebukadnɛtsarɩ mʋ di dɩbam.
O ma pa vuvugə zanzan tʋ dɩbam tɩtarɩ nɩ.
O ma koori tɩʋ kʋm
sɩ kʋlʋkʋlʋ daa yɩ daarɩ kʋ wʋnɩ.
O ma li dɩbam fasɩ,
nɩ o yɩ juru mʋ te tɩn.
O na dʋnɩ dɩ́ wo-laarʋ tɩm o su o pugə tɩn
mʋ o twanɩ dɩbam o yagɩ.
35 Balʋ na zʋʋrɩ Siyɔn nɩ tɩn wʋ́ ta wɩ:
«Wɛ wʋ́ pa lɛɛrʋ tɩlʋ Babilɔnɩ tɩʋ tiinə na kɩ dɩbam yɩra nɩ tɩn joori tɩ tʋ ba tɩtɩ baŋa nɩ.»
Zeruzalɛm tiinə bam wʋ́ ta wɩ:
«Waarɩm ta wʋ Babilɔnɩ tiinə bam yuu nɩ,
dɩ ba na gʋ dɩ́ yɩra nɔɔna tɩn.»
36 Kʋntʋ ŋwaanɩ, Baŋa-Wɛ tagɩ tɩntʋ:
«Amʋ wʋ́ zɩgɩ abam kwaga nɩ
sɩ a ŋɔɔnɩ a pa abam.
A ta wʋ́ joori a ŋwɩ jɩnɩ Babilɔnɩ tiinə baŋa nɩ.
A nan wʋ́ pa ba bwi sɩm wɩ,
sɩ ba buli-yi dɩ yɩ buri na.
37 Babilɔnɩ tɩʋ kʋm wʋ́ ji di-doŋ-kʋrʋ,
mɛ ga-kakuri na kaagɩ sɩ ve tɩn mʋ.
Tɩʋ kʋm wʋ́ di cavɩɩra, sɩ nɔɔna taa mwanɩ-kʋ,
yɩ nɔɔn-nɔɔnʋ bá taa zʋʋrɩ kʋ wʋnɩ.
38 Babilɔnɩ tiinə bam maama yɔɔrɩ ba kaasɩ mʋ,
nɩ nywəənu na suuri te tɩn.
Ba ta maa ŋuunə nɩ nyon-biə na ŋuuni te tɩn.
39 Maŋa kalʋ ba niə na tʋtʋgɩ dɩ fra tɩn,
amʋ wʋ́ kɩ candi-fara a pa-ba,
yɩ a pa ba nyɔ sana ba bugi.
Ba laan maa wʋ́ taa bagɩ mwaanʋ ba yaga,
yɩ ba daarɩ ba dɔ ba lusi maŋa maama,
yɩ ba daa bá zaŋɩ wɛɛnɩ.
40 Amʋ wʋ́ ja-ba a vu ba gʋm jǝgǝ,
nɩ vara mʋ ba jɩgɩ ba ve sɩ ba gʋ tɩn.
Baá taa nyɩ dɩ pəlbiə, dɩ pi-balɩ, dɩ bʋ-balɩ
sɩlʋ ba na lagɩ ba goni ba tiŋi tɩn.»
Baŋa-Wɛ na tagɩ te tɩn mʋ kʋntʋ.
41 «Nii Babilɔnɩb tɩʋ na yɔɔrɩ kʋ tʋ te!
Ba lagɩ ba di tɩʋ kʋlʋ tɩga baŋa maama na tɩɩrɩ kʋ baŋa nɩ tɩn mʋ!
Babilɔnɩ laan wʋ́ ji wo-zɔɔnɩ
lʋgʋ baŋa tɩɩnɩ dɩm maama yigə nɩ.
42 Nɩnɩʋ kʋm lagɩ kʋ zaŋɩ mʋ kʋ yi Babilɔnɩ tɩʋ kʋm.
Na-fara bam mʋ wʋ́ cuuri
tɩ kwǝli tɩʋ kʋm maama.
43 Babilɔnɩ tɩɩnɩ maama wʋ́ ji di-dwəənu yɩranɩ mʋ.
Tɩga kam wʋ́ taa yɩ kagʋ-kʋra mʋ,
mɛ nɔɔn-nɔɔnʋ na bá taa zʋʋrɩ ka wʋnɩ tɩn.
Nabiinǝ brɩ ba bá taa tɔgɩ ka wʋnɩ ba kɛa.
44 Kʋ na yɩ Babilɔnɩ tiinə jwəm Bɛlɩ,
a lagɩ a waarɩ-dɩ mʋ.
A ta wʋ́ pa dɩ twanɩ wo-laarʋ tɩlʋ dɩ na ligi tɩn dɩ yagɩ.
Lʋgʋ baŋa dwi tiinə daa bá taa ve sɩ ba zuli-dɩ.
Cɩga tɩn, Babilɔnɩ tɩʋ kabri sɩm lagɩ sɩ tʋ mʋ!
45 Amʋ nɔɔna bam, nuŋi-na Babilɔnɩ tɩʋ kʋm wʋnɩ!
Duri-na á lu yɩ á ta ŋwɩ!
Duri-na sɩ á wanɩ á lu Baŋa-Wɛ ban-lʋm dɩm.
46 Yɩ pa-na sɩ á vwana parɩ.
Á nan yɩ taá kwarɩ fʋʋnɩ,
nɩ á na ni sawɩa kalʋ maama na kaagɩ tɩʋ kʋm wʋnɩ ka ŋɔɔna tɩn.
Sawɩa waɩ ka zaŋɩ bɩnɩ dɩntʋ nɩ,
yɩ kadoŋ zaŋɩ bɩnɩ yigə nɩ.
Sawɩ sɩm wʋ́ taa tɛ vuvugə taanɩ,
yɩ sɩ tɛ tɩʋ yigə tu na wʋ́ dwəni dɩ wʋdoŋ te tɩn.
47 Bɛŋwaanɩ, maŋa lagɩ ka yi
sɩ amʋ yɔɔrɩ a waarɩ Babilɔnɩ tɩʋ jwǝnǝ yam.
Ba tɩʋ kʋm maama wʋ́ di cavɩɩra.
Kʋ nɔn-biə bam wʋ́ tɩ,
yɩ ba yɩra taa tigi kʋ je maama nɩ.
48 Wɛyuu dɩ tɩga baŋa maama,
dɩ wǝǝnu tɩlʋ na wʋ tɩ wʋnɩ tɩn
wʋ́ ta cakɩ dɩ wʋpolo
Babilɔnɩ na tʋa tɩn ŋwaanɩ.
Bɛŋwaanɩ, jar-kərə lagɩ ba nuŋi jazɩm baŋa seeni mʋ,
ba ba ba zaŋɩ najara dɩ-kʋ.»
Baŋa-Wɛ na tagɩ te tɩn mʋ kʋntʋ.
49 «Babilɔnɩ tiinə bam yɔɔrɩ ba gʋ
lʋgʋ baŋa tɩɩnɩ maama nɔɔna mʋ.
Babilɔnɩ tɩʋ kʋm laan maŋɩ sɩ kʋ tʋ,
ba na gʋ Yisɩrayɛlɩ tiinə bam te tɩn ŋwaanɩ.
50 Abam Yisɩrayɛlɩ tiinə balʋ na lugi tʋʋnɩ tɩn,
kɩ-na lɩla á viiri sɩ á yɩ taá zɩgɩ á daana yo!
Nan guli-na Baŋa-Wɛ dɩm gulə,
dɩ á na wʋ sa-tɩʋ nɩ yigə yigə te tɩn dɩ.
Daa taá bʋŋɩ-na Zeruzalɛm tɩʋ kʋm wʋbʋŋa.
51 Abam ma á tɛ á wɩ: ‹Dɩ́ yuu tiini kʋ yáalɩ.
Bɛŋwaanɩ, dɩ́ dʋna bam twɩ dɩbam mʋ
yɩ ba ta kɩ dɩbam cavɩɩra wʋnɩ.
Dwi-gɛ tiinə ma ba ba zʋ Baŋa-Wɛ wara-je
sɩlʋ na yɩ lanyɩranɩ fasɩ tɩn wʋnɩ mʋ.›
52 Amʋ Baŋa-Wɛ nan na tagɩ kʋlʋ tɩn mʋ tɩntʋ:
Maŋa lagɩ ka yi
sɩ amʋ waarɩ Babilɔnɩ tɩʋ jwǝnǝ yam.
Babilɔnɩ tɩʋ kʋm je maama nɩ,
kʋ nɔn-biə bam wʋ́ taa sin ba sɔɔna,
ba na nɛ zʋnnɩ tɩn ŋwaanɩ.
53 Babilɔnɩ tɩʋ kʋm na maŋɩ kʋ lɔ kʋ di wɛ wɛ te,
yɩ Kʋ daarɩ kʋ fɔgɩ dam je sɩm wɛyuu nɩ te dɩ,
amʋ ta wʋ́ tʋŋɩ jar-kərə mʋ
sɩ ba ba kʋ baŋa.»
Baŋa-Wɛ na tagɩ te tɩn mʋ kʋntʋ.
54 Cəgi-na sɩ á ni kərə na zaŋɩ Babilɔnɩ tɩʋ nɩ te!
Kʋ nan yɩ tɩʋ kʋm cɔgɩm sɔɔ mʋ
yɩ kʋ nuŋi Babilɔnɩ tɩʋ je maama nɩ.
55 Baŋa-Wɛ mʋ lagɩ DƖ cɔgɩ Babilɔnɩ tɩʋ kʋm,
sɩ DƖ pa kʋ sɔɔ maama ti.
Ba dʋna bam wʋ́ da ba ba ba baŋa,
nɩ na-fara na wuuri ba bɩɩnɩ te tɩn mʋ.
Bantʋ wʋ́ tiini ba bagɩ sɔɔ ba jeeri-ba dɩ najara.
56 Tɩʋ kʋdoŋ jar-kərə mʋ lagɩ ba ba
ba cɔgɩ Babilɔnɩ tɩʋ kʋm.
Baá ja Babilɔnɩ nɔn-babɛ sɩm,
yɩ ba joŋi ba tɛn sɩm ba bwəri ba yagɩ.
Bɛŋwaanɩ, Baŋa-Wɛ yǝni DƖ waarɩ balʋ na tusi tɩn mʋ.
DƖ lagɩ DƖ joori DƖ ŋwɩ jɩnɩ maama mʋ.
57 Pɛ wʋlʋ yɩrɩ na yɩ Paŋwa Tu Baŋa-Wɛ tɩn na tagɩ kʋlʋ tɩn mʋ tɩntʋ:
«Kʋ nan na yɩ ba tɩʋ kʋm nakwa, dɩ ba yi-pʋrɩ-nyɩna bam,
kʋ ta wǝli dɩ ba yigǝ tiinǝ, dɩ ba dɩdɛɛra, dɩ ba nɔn-babɛ sɩm dɩ,
amʋ wʋ́ pa ba nyɔ sana ba bugi.
Ba maama wʋ́ dɔ ba lusi mʋ taan wuu
yɩ ba daa bá zaŋɩ wɛɛnɩ.»
58 Paŋwa Tu Baŋa-Wɛ na tagɩ te tɩn mʋ tɩntʋ:
«Babilɔnɩ tɩʋ kabri sɩm na lirǝ te maama dɩ,
ba lagɩ ba yigi-sɩ ba dɩ tɩga nɩ mʋ buri buri.
Mim wʋ́ zwɛ tɩʋ kʋm mancwəənu niə yam.
Lʋgʋ baŋa nɔɔna bam yaarɩ ba tɩtɩ kafɛ ŋwaanɩ mʋ.
Bɛŋwaanɩ, ba na tʋŋɩ te maama tɩn wʋ́ ja mim.»
Zeremi tʋŋɩ kwǝrǝ sɩ ka vu Babilɔnɩ
59 Neriya bu Seraya dɛɛn mʋ yɩ Pɛ Sedesɩasɩ tɩntʋŋnʋ na nii o wǝǝnu baŋa nɩ tɩn. O ta yɩ Maseya naa mʋ. Bɩnɩ dɩlʋ Sedesɩasɩ na di Zuda tɩʋ paarɩ o kɩ bɩna yana tɩn nɩ mʋ Seraya dɛɛn tɔgɩ dɩ Pɛ wʋm sɩ ba vu Babilɔnɩ. Zeremi ma kwe kwǝrǝ kantʋ o pa‑o sɩ o ja o wǝli da o vu o pa. 60 O dɛɛn ya pʋpʋnɩ Babilɔnɩ tɩʋ kʋm na wʋ́ na lɛɛrʋ tɩlʋ maama tɩn mʋ o kɩ tɔnɔ wʋnɩ. Babilɔnɩ wǝǝnu maama mʋ pʋpʋnɩ tɩ tiŋi tɔnɔ kʋm wʋnɩ. 61 O ma ta dɩ Seraya o wɩ: «Nmʋ na ve n yi Babilɔnɩ, sɩ n karɩmɩ taanɩ dɩntʋ maama baŋa baŋa sɩ nɔɔna bam ni-dɩ. 62 Ta ta n wǝli da nɩ: ‹Amʋ Tu Baŋa-Wɛ, nmʋ mʋ taga nɩ n lagɩ n cɔgɩ tɩʋ kʋntʋ fasɩ, sɩ nabiinǝ, dɩ vara daa yɩ wanɩ kʋ wʋnɩ ba zʋ, sɩ kʋ lagɩ kʋ ji di-dwəənu yɩranɩ mʋ sɩ kʋ taa ve maŋa maama.› 63 N na karɩmɩ tɔnɔ kʋntʋ n ti, sɩ n kwe-kʋ n vɔ dɩ kandwɛ, yɩ n laan vu n dʋlɩ-kʋ n dɩ Efratɩ bugə kam wʋnɩ, 64 sɩ n daarɩ n ta nɩ: ‹Mʋ Babilɔnɩ tɩʋ na lagɩ kʋ tu kʋ lini te tɩn. Kʋ nan daa bá zaŋɩ wɛɛnɩ, amʋ na yɔɔrɩ a lagɩ a ja lɛɛrʋ zanzan a ba kʋ baŋa nɩ tɩn ŋwaanɩ. Kʋ nɔn-biə bam maama wʋ́ tʋ.› »
Zeremi kwǝri sɩm maama kweeli yo mʋ.