Babilɔnɩ tiinə taanɩ
50
Kwǝrǝ kalʋ Baŋa-Wɛ na pɛ DƖ nijoŋnu Zeremi Babilɔnɩ tɩʋ dɩ kʋ nɔn-biə bam ŋwaanɩ tɩn mʋ tɩntʋ:2 «Tɔɔlɩ-na dɩ kwǝr-dɩa
sɩ lʋgʋ baŋa tɩɩnɩ dɩm maama ni!
Zəŋi-na drapoo wɛɛnɩ,
sɩ á taá tɔɔlɩ á yaga.
Yɩ kweeli-na taanɩ á yagɩ tɩga nɩ,
nan ta-na nɩ:
‹Ba lagɩ ba di Babilɔnɩ tɩʋ kʋm mʋ.
Bɛlɩ jwəm dɩm wʋ́ na dɩ cavɩɩra.
Cɩga tɩn, lɛɛrʋ wʋ́ yi Merodakɩa jwəm dɩm.
Cavɩɩra wʋ́ ja Babilɔnɩ tɩʋ jwǝnǝ yam,
ba na wʋ́ cɩcʋgɩ wo-yɔɔrʋ tɩm kʋntʋ maama tɩn ŋwaanɩ.›
3 Tɩʋ kʋdoŋ jar-kərə wʋ́ zɩgɩ jazɩm baŋa seeni
ba nuŋi ba ba Babilɔnɩ baŋa.
Baá cɔgɩ tɩga kam maama
pa ka ji kagʋa ka tigə.
Nabiinǝ dɩ vara maama wʋ́ duri ba je.
Nɔɔn-nɔɔnʋ daa bá taa zʋʋrɩ ka wʋnɩ.»
4 Baŋa-Wɛ na tagɩ kʋlʋ tɩn mʋ tɩntʋ:
«Maŋa kam kʋntʋ na yiǝ,
Yisɩrayɛlɩ dwi tiinə dɩ Zuda dwi tiinə wʋ́ tɔgɩ daanɩ
ba vu ba beeri ba Tu Baŋa-Wɛ dɩm,
yɩ ba kan yi-na ba veǝ.
5 Ba laan maa wʋ́ bwe sɩ ba lwarɩ Siyɔn cwǝŋǝ kam,
yɩ ba daarɩ ba magɩ ba yum cwǝŋǝ kam kʋntʋ nɩ.
Baá ba amʋ Baŋa-Wɛ te
yɩ ba daarɩ ba salɩ amʋ yɩra nɩ
sɩ dɩ́ fɔgɩ dɩ́ goni ni dɩ́ pa daanɩ.
Ni-gonim dɩm kʋntʋ wʋ́ taa wʋra maŋa maama.
Ba nan bá swe dɩ swiə maŋa dɩ maŋa.b
6 Amʋ nɔɔna bam ya nyɩ dɩ peeni sɩlʋ na je tɩn mʋ.
Balʋ nan na jɩgɩ-ba ba nii tɩn mʋ pɛ ba ywəri cwǝŋǝ kam,
pa ba zʋ pweeru wʋnɩ ba jagɩ ba je.
Ba laan maa beeri pweeru dɩ zwǝǝnu yuu nɩ.
Ba daa yǝri ba kugu je na wʋ mɛ tɩn.
7 Balʋ maama na nɛ-ba,
ba yǝni ba zaŋɩ najara dɩ ba mʋ sɩ ba di-ba.
Ba dʋna dɩ maa tɛ ba wɩ: ‹Dɩ́ wʋ kɩ dɩ́ tusi.
Bantʋ mʋ tusi ba cɔgɩ Baŋa-Wɛ yigə.
Dɩntʋ maa yɩ ba woro cɩga cɩga.
Ba nabaara tɩɩna dɛɛn nan daŋɩ Baŋa-Wɛ baŋa nɩ mʋ.›
8 Amʋ nɔɔna bam, nuŋi-na Babilɔnɩ tɩʋ kʋm wʋnɩ.
Duri-na á nuŋi á daarɩ Babilɔnɩ tiinə bam.
Nan tɔgɩ-na kɔgɔ kʋm yigə á viiri.
9 Bɛŋwaanɩ, amʋ lagɩ a ciŋi nɔɔna mʋ
sɩ ba zaŋɩ najara dɩ Babilɔnɩ tiinə bam.
Kʋ nan yɩ tɩ-kamunə yalʋ na wʋ jazɩm baŋa seeni tɩn mʋ
lagɩ dɩ kɩ ni daanɩ sɩ ba nuŋi ba jeeri-ba dɩ najara.
Ba maama wʋ́ kɩ daanɩ ba kikili
sɩ ba kɩ najara yam.
Ba nan wʋ́ zɩgɩ jazɩm baŋa seeni mʋ ba nuŋi
ba vu ba di Babilɔnɩ tɩʋ kʋm.
Ba cɩ-tara bam yɩ pamaŋ-bɩbɛ
sɩlʋ cɩna na ba taɩ ya lɛɛrɩ tɩn mʋ.
10 Ba lagɩ ba vrɩ Babilɔnɩ tiinə jɩjɩgɩrʋ mʋ.
Balʋ na bɩɩnɩ ba baŋa tɩn wʋ́ coori ba zɩla maama.»
Baŋa-Wɛ na tagɩ te tɩn mʋ kʋntʋ.
11 «Abam Babilɔnɩ tiinə bam tiini á cakɩ dɩ wʋpolo mʋ,
á dɛɛn na di amʋ nɔɔna bam
yɩ á vrɩ ba wǝǝnu tɩn ŋwaanɩ.
Á laan ma kaagɩ á kɩkara
nɩ nacwɛn na jɩgɩ ga-lɛɛrʋ ka di te tɩn.
Abam ta kɩ nɩ siseŋ-nɔɔna na keeri te tɩn mʋ.
12 Abam tɩtɩ tɩʋ kʋm nan wʋ́ na kʋ cavɩɩra.
Tɩʋ kʋlʋ na yɩ á kugu je tɩn wʋ́ yáalɩ.
Kʋʋ́ taa yɩ tɩʋ kʋlʋ na muri tɩɩnɩ maama wʋnɩ tɩn.
Kʋ ta wʋ́ ji kagʋa kalʋ na yɩ tɩ-kʋra yɩranɩ tɩn mʋ.
13 Nɔɔn-nɔɔnʋ bá taa zʋʋrɩ je sɩm kʋntʋ nɩ,
Baŋa-Wɛ banɩ na zaŋɩ dɩ ba tɩn ŋwaanɩ.
Kʋ yɔɔrɩ kʋ lagɩ kʋ ji di-dwəənu yɩranɩ mʋ.
Balʋ maama na tɔgɩ kʋ je nɩ ba kɛ,
kʋʋ́ kɩ-ba yǝǝu
pa ba yáalɩ-kʋ kʋ cam dɩm ŋwaanɩ.
14 Abam balʋ na yɩ cɩ-tara tɩn,
fɔgɩ á toŋi á zɩgɩ á gilimi Babilɔnɩ tɩʋ kʋm.
Taá taɩ cɩna á yagɩ kʋ yɩra nɩ!
Yɩ daarɩ-na cɩnɩ dɩdwɩ dɩ.
Bɛŋwaanɩ, kʋ nɔn-biə bam tusi mʋ
ba cɔgɩ Baŋa-Wɛ yigə.
15 Á kaasɩ-na tiguri-kaasa,
sɩ á nuŋi á gilimi Babilɔnɩ tɩʋ kʋm dɩ najara!
Nii-na! Ba wʋra ba tʋɩ!
Tɩʋ kʋm dam je sɩm maama cɔgɩ.
Ba ma yigi kʋ kabri sɩm ba dɩ tɩga nɩ.
Baŋa-Wɛ mʋ lagɩ DƖ joori DƖ ŋwɩ jɩnɩ ba baŋa nɩ.
Kʋntʋ ŋwaanɩ, tɔgɩ-na á waarɩ-ba!
Kɩ-na dɩ ba nɩ ba na kɩ nɔɔna badonnǝ te tɩn.
16 Kʋ na yɩ balʋ na yǝni ba du wʋdiiru,
dɩ balʋ na zagɩ-tɩ tɩn,
kwaanɩ-na á lɩ-ba Babilɔnɩ tɩʋ nɩ.
Vərə balʋ maama na zʋʋrɩ da tɩn maŋɩ sɩ ba joori
ba tɩtɩ nɔɔna te ba nabaara tɩɩnɩ dɩm wʋnɩ,
sɩ ba lu najara wʋnɩ mʋ ba taa ŋwɩ.»
Baŋa-Wɛ ta ma ta DƖ wɩ:
17 «Yisɩrayɛlɩ dwi dɩm nyɩ nɩ pe-kɔgɔ
nyoŋo na zʋ sɩ tɩtarɩ nɩ
yɩ kʋ jagɩ-sɩ kʋ yagɩ te tɩn mʋ.
Asiiri tɩʋ pɛ mʋ dɛ yigə o ja-ba o di.
Babilɔnɩ tɩʋ pɛ Nebukadnɛtsarɩ ma saŋɩ o kwaga
o dɩ ja ba kwi sɩm o cɩcʋgɩ maama.»c
18 Paŋwa Tu Baŋa-Wɛ wʋm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ:
«Amʋ wʋ́ waarɩ Babilɔnɩ tɩʋ pɛ wʋm dɩ o tɩga kam,
nɩ a dɛɛn na waarɩ Asiiri tɩʋ pɛ te tɩn.
19 Kʋ daarɩ sɩ a ja Yisɩrayɛlɩ dwi tiinə
a joori ba tɩtɩ tɩ-ywəŋə kam wʋnɩ.
Ba laan wʋ́ taa zʋʋrɩ Karmɛlɩ, dɩ Basan nɩ,
ba taa di ba wʋbʋŋa na lagɩ te.
Ba maa wʋ́ maŋɩ Efrayim, dɩ Galadɩ pweeru tɩm yuu nɩ,
ba di ba su ba fra.
20 Maŋa kam kʋntʋ nan na yiǝ,
nɔɔna na bʋŋɩ sɩ ba na lwarɩm
yalʋ na wʋ Yisɩrayɛlɩ tiinə bam yuu nɩ tɩn,
ba bá na dɩdʋa tɩtɩ dɩ.
Ba ta bá na tusim Zuda tiinə bam dɩ tɩtarɩ nɩ,
dɩ fɩnfɩɩn dɩ.
Bɛŋwaanɩ, kʋ na yɩ balʋ amʋ na lɩ-ba sɩ ba daarɩ tɩn,
amʋ wʋ́ kwe ba lwarɩm a ma a cɛ-ba.»
Baŋa-Wɛ na tagɩ te tɩn mʋ kʋntʋ.
21 Baŋa-Wɛ ta ma ta DƖ wɩ:
«Nuŋi-na á vu á zaŋɩ najara dɩ Meratayim tɩʋ
dɩ balʋ na zʋʋrɩ Pekɔdɩ nɩ tɩn.
Zəli-ba-na á ja sɩ á gʋ sɩ ba dwi ti.
Kɩ-na kʋlʋ maama amʋ na pɛ abam ni sɩ á kɩ tɩn.
22 Jara-kǝm sɔɔ mʋ zaŋɩ tɩga baŋa je maama nɩ.
Wǝǝnu maama mʋ lagɩ tɩ cɔgɩ!
23 Babilɔnɩ dɛɛn cɔgɩ lʋgʋ baŋa je maama,
nɩ hama mʋ ba jɩgɩ ba magɩ wǝǝnu te.
Nii-na! Babilɔnɩ tɩʋ tɩtɩ laan cɩcʋgɩ mʋ kʋ ji murə-murə!
Kʋ yɔɔrɩ kʋ ji wo-zɔɔnɩ
lʋgʋ baŋa tɩɩnɩ dɩm maama yigə nɩ mʋ.
24 Babilɔnɩ tiinə bam, amʋ cɩgɩ cɩkʋ mʋ á ŋwaanɩ.
Á nan wʋ lwarɩ kʋ ni nɩ pa kʋ ja abam.
Abam na tʋ kʋ wʋnɩ tɩn
yɩ á na dwəni dɩ amʋ Baŋa-Wɛ tɩn ŋwaanɩ mʋ.
25 Amʋ pʋrɩ a na tiŋi a jara-kǝm zɩla yam mɛ tɩn,
sɩ a ja-ya a nuŋi pooni
a ma a tʋŋɩ a ban-zɔŋɔ tɩtʋŋa.
Bɛŋwaanɩ, a jɩgɩ woŋo sɩ a kɩ
Babilɔnɩ tiinə tɩga kam baŋa nɩ.
Amʋ yɩ Paŋwa Tu Baŋa-Wɛ dɩm mʋ.
26 Zɩgɩ-na yigə yigə á nuŋi á ba
sɩ á zaŋɩ najara dɩ Babilɔnɩ tɩʋ kʋm.
Puri-na ba tuli sɩm sɩ á lɩ mɩna yam.
Coori-na ba sam sɩ dɩ ji weeru-puuri.
Yɔɔrɩ á cɔgɩ-na tɩʋ kʋm
sɩ kʋlʋkʋlʋ daa yɩ daarɩ.
27 Go-na ba nɔn-babɛd sɩm maama!
Yɔɔrɩ á goni-sɩ á tiŋi!
Lɛɛrʋ wʋ ba yuu nɩ!
Ba maŋa kam yiǝ mʋ kʋntʋ
sɩ ba na ba waarɩm.»
28 Cəgi-na! Balʋ na zɩgɩ Babilɔnɩ tɩʋ nɩ ba duri ba lu najara yam wʋnɩ tɩn laan tu ba yi Zeruzalɛm. Ba maa zɩgɩ Siyɔn nɩ ba tɛ kʋ na kɩ te yɩ dɩbam Tu Baŋa-Wɛ joori DƖ ŋwɩ jɩnɩ Babilɔnɩ tiinə baŋa nɩ, dɩ ba na cɔgɩ Wɛ-digə kam tɩn.
29 «Bəŋi-na cɩ-tara sɩ ba nuŋi
ba vu ba jeeri Babilɔnɩ tiinə bam dɩ jara.
Kʋ maa yɩ balʋ na waɩ tɛn ba saŋɩ tɩn mʋ.
Pa-na sɩ ba gilimi tɩʋ kʋm ba kɩ tɩtarɩ nɩ,
sɩ nɔɔn-nɔɔnʋ yɩ wanɩ o lu.
Kɩ-na dɩ ba nɩ bantʋ na kɩ te dɩ nɔɔna badonnǝ tɩn.
Bɛŋwaanɩ, ba tiini ba gooni amʋ Baŋa-Wɛ
na yɩ Yisɩrayɛlɩ dwi dɩm Wʋ-poŋo Tu dɩm tɩn mʋ.
30 Kʋntʋ ŋwaanɩ mʋ Babilɔnɩ nɔn-dʋnnʋ tɩm wʋ́ tʋ
ba taa tigi tɩʋ kʋm cwe sɩm nɩ.
Ba jar-kərə bam maama wʋ́ tɩ dɛ dɩdʋa.»
Baŋa-Wɛ na tagɩ te tɩn mʋ kʋntʋ.
31 Paŋwa Tu Baŋa-Wɛ ta ma ta DƖ wɩ:
«Babilɔnɩ yɩ kamun-nyɩm mʋ!
Amʋ nan nuŋi á kwaga nɩ.
Dɛ dɩm amʋ na lɩ sɩ a waarɩ abam tɩn laan yiǝ.
32 Á tɩʋ kʋm kamunni ŋwɛ ŋwaanɩ,
á lagɩ á tri á tʋ tɩga nɩ mʋ.
Nɔɔnʋ bá taa wʋra sɩ kʋ tu ja abam sɩ á zaŋɩ wɛɛnɩ.
A maa wʋ́ pa mini zwɛ á tɩɩnɩ dɩm maama.
Dɩ ta wʋ́ di woŋo kʋlʋ maama na bwələ da tɩn.»
33 Paŋwa Tu Baŋa-Wɛ na tagɩ te tɩn mʋ tɩntʋ:
«Yisɩrayɛlɩ tiinə bam tiini ba na yaara zanzan,
ba dɩ Zuda tiinə bam dɩ.
Balʋ na jɩgɩ-ba ba bɛɛsɩ tɩn yɔɔrɩ ba sɔ-ba mʋ diŋ-diŋ.
Ba maa vɩn sɩ ba pa-ba cwǝŋǝ sɩ ba viiri.
34 Wʋlʋ na bʋrɩ o pa-ba tɩn nan tiini o dana.e
O yɩrɩ mʋ yɩ Paŋwa Tu Baŋa-Wɛ.
Dɩntʋ tɩtɩ mʋ lagɩ DƖ zaŋɩ DƖ ŋɔɔnɩ DƖ pa-ba.
DƖ lagɩ DƖ tɔgɩ kʋ baŋa nɩ mʋ
DƖ pa yazurə taa wʋ ba tɩga kam baŋa nɩ.
Sɩ kʋ na yɩ Babilɔnɩ tiinə bam,
cam wʋ́ yi bantʋ mʋ.»
35 Baŋa-Wɛ na tagɩ kʋlʋ tɩn mʋ tɩntʋ:
«Jar-kərə wʋ́ ba Babilɔnɩ tiinə bam baŋa!
Balʋ na zʋʋrɩ Babilɔnɩ tɩʋ nɩ tɩn wʋ́ na cɔgɩm,
ba dɩ ba tɩʋ nakwa, dɩ ba yi-pʋrɩ-nyɩna bam maama!
36 Ba tɩʋ kʋm sampwəri sɩm dɩ wʋ́ na cɔgɩm.
Ba jwərim kikiə wʋ́ ba ya lwarɩ jaja.
Ba tɩʋ nɔn-babɛ sɩm dɩ wʋ́ tʋ,
yɩ fʋʋnɩ tiini dɩ ja-ba.
37 Ba siseŋ-nɔɔna dɩ sɩ jara-kǝm tərikooru dɩ wʋ́ cɔgɩ.
Jar-kərə balʋ na yɩ vərə ba wʋnɩ tɩn dɩ lagɩ ba tʋ mʋ!
Bantʋ wʋ́ taa bwǝnǝ mʋ nɩ kaana te tɩn.
Ba jɩjɩgɩrʋ dɩ wʋ́ ba tɩ cɔgɩ najara yam ŋwaanɩ.
Ba dʋna wʋ́ vrɩ-tɩ ba ja ba viiri.
38 Da-kʋrɩ wʋ́ zɩgɩ ba tɩʋ kʋm wʋnɩ
pa ba bwi sɩm maama kʋ.
Najara wʋ́ ba ba baŋa nɩ,
ba tɩʋ kʋm na su dɩ jwǝnǝ yɩranɩ tɩn ŋwaanɩ.
Yantʋ yǝni ya fugi nɔɔna bam
pa ba wʋbʋŋa je fʋʋnɩ ŋwaanɩ mʋ.
39 Kʋntʋ ŋwaanɩ nan, ga-vara, dɩ wiirə mʋ wʋ́ taa zʋʋrɩ Babilɔnɩ nɩ. Kukwəəru dɩ wʋ́ taa zʋʋrɩ je sɩm kʋntʋ nɩ mʋ. Nabiinǝ daa bá taa zʋʋrɩ tɩʋ kʋm kʋntʋ nɩ sɩ kʋ taa ve wuu. 40 Kʋʋ́ yɔɔrɩ kʋ kɩ Babilɔnɩ tɩʋ nɩ kʋ dɛɛn na kɩ Sodɔm, dɩ Gomɔrɩ, dɩ tɩɩnɩ dɩlʋ na bwələ da tɩn te tɩn mʋ. Nɔɔn-nɔɔnʋ daa bá taa zʋʋrɩ je sɩm kʋntʋ nɩ. Nɔɔn-nɔɔnʋ nan bá maŋɩ dáanɩ.»
Baŋa-Wɛ na tagɩ te tɩn mʋ kʋntʋ.
41 «Kwǝni á nii-na jazɩm baŋa seeni!
Tʋ-fɔrɔ jar-kərə dɩdaanɩ pwa zanzan mʋ maa bɩɩnɩ abam baŋa.
Ba ti yigə mʋ sɩ ba nuŋi yigə yigə
ba ba ba jeeri abam dɩ najara.
42 Ba ze ba tɛn dɩdaanɩ ba cicwəf mʋ ba bɩɩna.
Ba nan tiini ba jɩgɩ pu-sɩŋa mʋ,
yɩ ba ba kwarɩ nɔɔna yibwənə kɔtaa!
Ba wurigi ba siseŋ-nɔɔna
nɩ nɩnɩʋ na-ŋʋna na wuuri te tɩn mʋ.
Ba kɩ ba tɩtɩ ba kɩ daanɩ
sɩ ba zaŋɩ najara dɩ abam Babilɔnɩ tiinə bam mʋ.
43 Babilɔnɩ tɩʋ pɛ ni nɔɔna bam kʋntʋ ŋwa,
pa o vwana parɩ.
Kʋ yɔɔrɩ kʋ jɩg-o kʋ ni mʋ yɩ o fʋna,
nɩnɛɛnɩ kaanɩ na vri pugə sɩ o lʋ
yɩ kʋ ni‑o te tɩn.
44 Amʋ lagɩ a ba a nuŋi Babilɔnɩ tiinə baŋa nɩ
sɩ a zəli-ba ba tɩga kam wʋnɩ bɩdwɩ baŋa nɩ.
Kʋʋ́ taa nyɩ dɩ nyoŋo na nuŋi punnu na li mɛ Zʋrdɛn bugə kam ni nɩ te,
yɩ kʋ zaŋɩ vara dim je sɩm nɩ kʋ zi-ba tɩn mʋ.
Amʋ laan wʋ́ kuri yigə tu
sɩ o taa nii tɩʋ kʋm baŋa nɩ.
Wɔɔ nan mʋ nyɩ dɩ amʋ, sɩ o wanɩ o bwe-nɩ?
Yigə tug tǝrǝ o na wʋ́ wanɩ o dwəni dɩ amʋ.
45 Nan cəgi-na sɩ á lwarɩ bʋbʋŋɩ dɩlʋ
amʋ Baŋa-Wɛ na jɩgɩ Babilɔnɩ tiinə bam ŋwaanɩ tɩn.
Taá ye-na a wʋbʋŋa na jaanɩ sɩ a kɩ te
dɩ balʋ na zʋʋrɩ Babilɔnɩ laŋa kam wʋnɩ tɩn.
Ba lagɩ ba zi ba bu-balwa tɩtɩ mʋ ba ja ba viiri.
Amʋ wʋ́ pa ba sam dɩm ji sa-kʋrɩ.
46 Babilɔnɩ tɩʋ kʋm na tʋa,
tɩga baŋa maama wʋ́ sisiŋi.
Ba kərə kam wʋ́ zaŋɩ
ka jagɩ ka yi lʋgʋ baŋa tɩɩnɩ dɩm maama.»