Wɛ Nijoŋnu
Ezayi Tɔnɔ
Wɛ Nijoŋnə Twannʋ tɩm
Kʋ na zɩgɩ Ezayi tɔnɔ kʋm nɩ sɩ kʋ vu kʋ yi Wɛ Tɔn-doŋo kʋm na kweeli mɛ tɩn, twannʋ tɩm kʋntʋ kwe Wɛ nijoŋnǝ bam na jɩgɩ kwǝri sɩlʋ dwi dwi sɩ ba pa nɔɔna tɩn mʋ tɩ brɩ dɩbam. Wɛ dɛɛn yǝni DƖ ŋɔɔnɩ dɩ DƖ nijoŋnǝ bam mʋ yɩ DƖ pa-ba DƖ ni sɩ ba dɩ kwe-dɩ ba pa DƖ nɔɔna abam. Nijoŋnǝ bam badaara jaanɩ Wɛ ni ba vu ba pa Yisɩrayɛlɩ tɩʋ tiinə mʋ, yɩ badonnǝ dɩ ja DƖ ni ba vu ba pa Zuda tɩʋ tiinə. Maŋa kadoŋ nɩ, Wɛ na lɩ DƖ brɩ-ba kʋlʋ na wʋ́ kɩ jwa seeni, ba dɩ yǝni ba ta kʋntʋ mʋ dɩ nɔɔna bam. Wɛ Nijoŋnǝ bam dɛɛn yɔɔrɩ ba tɛ Wɛ kwǝrǝ kam mʋ, ka ya na ywəmmə pugə nɩ, naa ka na ba ywəmmə dɩ. Bɛŋwaanɩ, kʋntʋ mʋ yɩ wo-cɛɔ kʋ pa-ba.
Ezayi Tɔnɔ
Ezayi dɛɛn jaanɩ Wɛ kwǝrǝ o vu o pa Zuda tɩʋ tiinə mʋ. O ma kaanɩ nɔɔna bam sɩ ba pipiri ba yagɩ ba lwarɩm dɩm kikiə sɩ Wɛ daa yɩ waarɩ-ba. Nii Pɔɔrɩm 1-39. O ta ŋɔɔnɩ sɩ kʋ vu maŋa kalʋ nɔɔna bam na wʋ́ vu sa-tɩʋ yigə yigə Babilɔnɩ nɩ tɩn seeni, yɩ o goni ni o pa-ba wɩ: tɩɩna ta wʋra ya pa-ba jwa seeni ŋwaanɩ. Nii Pɔɔrɩm 40-66. O pɛ ba lwarɩ nɩ: Wɛ bá swe ba swiə dɩ DƖ na goni ni sɩ DƖ tiŋi Pa-dʋʋrʋ DƖ pa-ba tɩn. Wʋntʋ mʋ wʋ́ taa yɩ Wɛ Dam Tu wʋm na di o paarɩ sɩ kʋ taa ve maŋa kalʋ na ba ti tɩn. Nyɩnyʋrʋ zanzan nan mʋ brɩ nɩ Wɛ Dam Tu wʋm lagɩ o ji Wɛ Tɩntʋŋnʋ mʋ. Kʋ tu ta wʋ́ yaarɩ o daarɩ o tɩ sɩ o joŋi nɔɔna ba lwarɩm wʋnɩ o yagɩ. Nii 52:11-53:12. Zezi na puli o tɩtʋŋa yam lʋgʋ baŋa nɩ tɩn, o tɩtɩ dɩ dɛɛn tagɩ taanɩ dɩlʋ na wʋ Ezayi tɔnɔ kʋm 61:1-2 nɩ tɩn mʋ. Wɛ nan ta goni ni sɩ DƖ fɔgɩ DƖ kɩ wǝǝnu maama sɩ tɩ ji wo-dʋnnʋ. Nii 65:17-25.