Bukɔ wʋm:
8
Nɩ n ya na yɩ a nabɔwʋlʋ na ŋɔgɩ a tɩtɩ nu yɩlɩ tɩn,
yɩ dɩ́ na jeeri daanɩ je sɩlʋ maama nɩ,
a yaá mu n ni mʋ,
yɩ nɔɔn-nɔɔnʋ bá ta wɩ
a kɩ a cɔgɩ.
2 A yaá ja‑m sɩ dɩ́ tɔgɩ daanɩ
dɩ́ vu sɔŋɔ,
yɩ dɩ́ zʋ digə kalʋ wʋnɩ
a nu na kɔnɩ-nɩ tɩn.
A laan wʋ́ kwe dɩvɛn
dɩ amʋ grɩnadɩnɩ tiu biə nyʋa bam
sɩ n nyɔ n su.
3 O ma kwe o jagwiə kam o təli a yuu,
sɩ o daarɩ o ma o jazɩm dɩm
o kukwǝri-nɩ.
4 Zeruzalɛm tɩʋ bukwa bam,
du-na durə nɩ
abam bá gigiri dɩbam yiǝ
dɩ dɩ́ sono kʋm.
Nan pa-na dɩbam cwǝŋǝ
sɩ dɩ́ tʋŋɩ dɩ́ fra mʋ.
Kweelim taanɩ
Zeruzalɛm tɩʋ bukwa bam:
5 Busankana kɔɔ mʋ tɩntʋ
o zɩgɩ kagʋa seeni o bɩɩnɩ,
yɩ o salɩ o bɔɔlʋ wʋm yɩra nɩ?
Bukɔ wʋm:a
Kalɩgoŋo tiu kʋm kuri nɩ,
mʋ a pɩpagɩ‑m sɩ n zaŋɩ.
Kʋ yɩ dáanɩ mʋ n nu dɛɛn jaanɩ n pugə.
Je sɩntʋ nɩ mʋ o ta vri n pugə
yɩ o lʋ-m.
6 Pa amʋ yɩranɩ taa tigi
n bɩcɔŋɔ nɩ,
sɩ kʋ taa yɩ nɩ a yɩ lʋnnɩ zɔŋɔ mʋ n ban nɩ,
naa baŋa mʋ n jɩŋa nɩ tɩn.
Bɛŋwaanɩ sono vɔɔrɩ kʋ tui
nɔɔna baŋa mʋ,
nɩ tʋʋnɩ na kɩ te tɩn.
Fra dɩ maa zi nɔɔna
nɩ yibeelǝ na li-ba te tɩn.
Kʋ ta nyɩ dɩ min-vʋgʋ kʋlʋ
na yɔɔrɩ kʋ zwɛ wǝǝnu tɩn mʋ.
7 Na-fara na daga te maama dɩ,
kʋ warɩ kʋ dwe sono mim dɩm.
Bugə na maŋɩ ka su ka pɛɛlɩ te dɩ,
ka warɩ ka zwarɩ sono pa kʋ je.
Nɔɔnʋ na maŋɩ o vɩn o sɔŋɔ jɩjɩgɩrʋ maama
sɩ o wanɩ o yəgi sono,
nɔɔn-nɔɔnʋ bá joŋi-tɩ o tee nɩ.
Bukɔ wʋm nabwa:
8 Dɩ́ jɩgɩ dɩ́ nakɔ balaŋa,
o ta na wʋ yi sɩ o magɩ yɩla.
Nɩ nɔɔnʋ na tu o wɩ o lagɩ‑o
sɩ o di o kɩ kaanɩ,
dɩ́ laan wʋ́ kɩ tɛ mʋ?
9 O ya na yɩ kəbrə,
dɩ́ wʋ́ kwe səbu-poŋo mʋ
dɩ́ ma dɩ́ lɔ dɩ́ daŋɩ o baŋa nɩ.
O nan ya na yɩ digə ni boro,
dɩ́ wʋ́ kwe Sɛdrɩ da-ŋʋnnʋ mʋ
dɩ́ ma dɩ́ kwǝli o yɩra sɩ ya kwɛ.
Bukɔ wʋm:
10 Amʋ sɩɩnɩ a yɩ kəbrə mʋ.
A yɩla yam nan nyɩ dɩ
di-dɩdwaarʋ na zɩgɩ lanyɩranɩ tɩn mʋ.
Kʋntʋ ŋwaanɩ mʋ a kikiə laan su
a bɔɔlʋ wʋm yi.
11 Solɔmɔn dɛɛn jɩgɩ vinyə tweeru gaarɩ Baal-Hamɔn nɩ.
O ma kwe-dɩ o pa nɔɔna sɩ ba ta yɩrɩ-kʋ.
Nɔɔnʋ na lagɩ sɩ o gwəri kʋ biə, o maŋɩ sɩ o ŋwɩ səbu dala mʋrʋ mʋ o pa-o.
12 Kʋ nan na yɩ amʋ tɩtɩ vinyə tweeru gaarɩ dɩm,
dɩ yɩ amʋ nyɩm mʋ
sɩ a taa nii dɩ baŋa nɩ.
Kʋ na yɩ səbu-dala mʋrʋ kʋm,
kʋ yɩ nmʋ Pɛ Solɔmɔn nyɩm mʋ.
Balʋ na nii dɩ tiu biə baŋa nɩ tɩn,
ba dɩ wʋ́ joŋi səbu-dala biə-yale mʋ.
Nɔn-dʋŋʋ kʋm:
13 Nmʋ wʋlʋ na kaagɩ n beeri
gaarɩ dɩm wʋnɩ
yɩ n yuudonnə wʋ n tee nɩ
ba cəgi nmʋ kwǝrǝ tɩn,
pa amʋ dɩ ni n kwǝrǝ!
Bukɔ wʋm:
14 Amʋ bɔɔlʋ, kɩ lɩla n ba amʋ te!
Duri nɩnɛɛnɩ fərə naa wəŋə mʋ na duri lɩla te
sɩ ka vu ka yi pweeru tɩlʋ na su dɩ wǝǝnu tɩlʋ lwǝm na ywǝmmǝ tɩn.