Nɔn-dʋŋʋ kʋm:
7
Nmʋ yɩ pɛ bukɔ mʋ cɩga cɩga.N nɛ sɩm dɩ sɩ natra jɩgɩ lam zanzan.
Nmʋ cwə yam jɩgɩ fra
nɩ kandwa-ŋʋna mʋ te.
Ya maa nyɩ dɩ gɔgɔ mʋ mɔɔnɩ-ya.
2 Nmʋ wuri dɩm nyɩ dɩ zʋŋa mʋ
na maŋɩ sɩ ka taa sui
dɩ dɩvɛn maŋa maama!
Nmʋ pugə kam nyɩ dɩ mɩn-pwe mʋ ba kikili ba tiŋi,
yɩ liisi ga-punnu laan kaagɩ ya maama ya pu.
3 Nmʋ yɩla yɔɔrɩ ya maŋɩ daanɩ mʋ lanyɩranɩ,
nɩnɛɛnɩ fǝri sɩle na ve daanɩ te tɩn.
4 Nmʋ ban dɩm yɔɔrɩ dɩ dwara
nɩnɛɛnɩ di-dɩdɔrɔ ba na mɛ tuu yələ ba kɩ tɩn mʋ.
N yiǝ yam dɩ maa nyɩ dɩ
Hesebon bwi sɩm na tigi
Bat-Rabim ni dɩm seeni tɩn.
N mʋmwɛ dɩm lam nyɩ dɩ
Liban di-dɩdɔrɔ
kʋlʋ na tʋlɩ kʋ naɩ Damasɩ tɩʋ seeni tɩn mʋ.
5 Nmʋ yuu kʋm zaŋɩ wɛɛnɩ,
nɩnɛɛnɩ Karmɛlɩ piu kʋm
na yɩ te tɩn mʋ.
Nmʋ yuuywe sɩm zwərə
yɩ sɩ nyɩɩnɩ lanyɩranɩ.
Pɛ wʋm na nɛ‑m,
o daa warɩ o tɩtɩ sɩ o ja,
n yuuywe sɩm na tiini sɩ lana tɩn ŋwaanɩ.
6 A bɩcɔŋɔ, nii nmʋ na tiini
n lana te!
Nii n na tiini n jɩgɩ fra n pa-nɩ te!
7 Nmʋ yɩra yam zɩgɩ ya maŋɩ daanɩ mʋ
nɩ kʋrʋ tiu nɛ na zɩgɩ marɩ-marɩ te tɩn.
N yɩla yam maa su daanɩ
nɩ ka tiu biə na lǝgi zɔgɔ te tɩn.
8 Amʋ laan wʋ́ din kʋrʋ tiu nɛ sɩm yuu mʋ,
sɩ a yi ka tiu biə na ləgi mɛ tɩn,
Ta pa n yɩla yam taa nyɩ dɩ
tiu bi-zwarʋ tɩlʋ vinyə tiu na kɩ tɩn.
Nmʋ na sin n yɩra viu, a soe sɩ kʋ lwəm taa ywəmmə
nɩ kalɩgoŋo tiu biə lwəm
na yɩ te tɩn mʋ.
9 Amʋ na jaanɩ n ni sɩ a mu-dɩ,
pa kʋ taa ywəmmə kʋ pa-nɩ
kʋ dwe dɩvɛn sa-ŋʋna ywəəni.
A bɩcɔŋɔ, nan pa sana bam
taa tʋlɩ nmʋ ni-vɔɔrʋ
dɩ n yələ nɩ ba taa lurə ba tuǝ.
Bukɔ wʋm:
10 Amʋ maama yɩ a bɔɔlʋ wʋm nyɩm mʋ,
yɩ o dɩ fra yɔɔrɩ ya wʋ amʋ wʋnɩ.
11 A bɔɔlʋ, nan pa dɩ́ nuŋi
tɩʋ kʋm wʋnɩ
dɩ́ vu dɩ́ taa wʋ karɩ sɩm wʋnɩ,
yɩ dɩ́ tigi tʋ-balwa je nɩa.
12 Dɩ́ laan maa wʋ́ goni tɩga
dɩ́ vu dɩ́ zʋ vinyə tweeru karɩ sɩm wʋnɩ,
sɩ dɩ́ nii dɩ kwi vɔɔrʋ dɩ punnu na?
Dɩ́ ta wʋ́ daarɩ dɩ́ nii
grɩnadɩnɩ tweeru tɩm kɩ punnu na?
Daanɩ mʋ amʋ wʋ́ kwe a tɩtɩ a pa‑m
sɩ kʋ brɩ a sono.
13 Mandragɔrɩ ga-punnu tɩm lwəm
mʋ joŋi je sɩm maama.
Tiu biə dwi dwi mʋ tigi
dɩ́ digə kam ni nɩ!
A bɔɔlʋ, a kwalɩmɩ tɩ maama
a tiŋi a pa nmʋ,
sɩ n wanɩ n di tɩ ywəəni.