Zeruzalɛm tɩʋ bukwa bam:
6
Nmʋ wʋlʋ na lanan dwe kaana maama tɩn,
n bɔɔlʋ wʋm ve yən mʋ?
Ta n brɩ dɩbam o na kwe cwǝŋǝ kalʋ tɩn,
sɩ dɩ́ tɔgɩ dɩ́ wəli‑m dɩ́ beeri o jǝgǝ.
Bukɔ wʋm:
2 Amʋ bɔɔlʋ wʋm laan tu
o wʋ o gaarɩ dɩm wʋnɩ mʋ,
mɛ ba na dugi dwə-biə balʋ
lwəm na ywəmmə tɩn.
O maa beeri gaarɩ dɩm wʋnɩ
yɩ o laɩ liisi ga-punnu o kɩ daanɩ.
3 Amʋ maama yɩ a bɔɔlʋ wʋm nyɩm mʋ,
yɩ o dɩ yɔɔrɩ o yɩ amʋ nyɩm.
o kalɩ o vara bam
o jaanɩ o ve liisi ga-punnu tɩm wʋnɩ mʋ.
Ləŋə 5
Nɔn-dʋŋʋ kʋm:
4 Amʋ bɩcɔŋɔ, nmʋ lam dɩm yɔɔrɩ dɩ nuŋi mʋ,
nɩ Tirisa tɩʋ na yɩ te tɩn.
Nmʋ yibiyə lana mʋ,
nɩ Zeruzalɛm tɩʋ kʋm na yɩ te tɩn.
Nmʋ yɔɔrɩ n jɩgɩ nɩnwaŋa zanzan,
nɩ calɩcwɩ sɩm na brɩ jaja te tɩn.a
5 Kɩ n yiǝ dáa dáa
sɩ n yɩ ta n nii amʋ seeni,
ya na paɩ a bɩcarɩ zaga tɩn ŋwaanɩ.
Nmʋ yuuywe sɩm zwərə lanyɩranɩ
nɩnɛɛnɩ bʋnɩ na zɩgɩ
Galadɩ pweeru tɩm yuu nɩ
dɩ faŋɩ dɩ maa tu tɩga te tɩn.
6 Nmʋ yələ yam pɩɩrɩ carɩ carɩ nɩ peeni kɔgɔ
ba na swɛ-sɩ pa sɩ pɩɩrɩ te tɩn mʋ.
Ya maama maŋɩ daanɩ mʋ,
yɩ dɩdʋa tɩtɩ wʋ sagɩ dɩ cwǝŋǝ.
7 N na kwǝli n yibiyə dɩ gar-fɩfala,
n kələ yam lam ta naɩ mʋ jaja,
yɩ ya nyɩ dɩ grɩnadɩnɩ tiu bu
na cɛ bɩle te tɩn.
8 Pɛ na maŋɩ o di kaana fusɩrdʋ,
dɩdaanɩ ka-bi funɔnɔ,
yɩ busankan-pwalɩ mʋrʋ na wʋ
o tee nɩ dɩ,
9 wʋlʋ wʋm na tigi amʋ bɩcɔŋɔ nɩ tɩn
ta ba jɩgɩ doŋ!
O yɩ amʋ kunkwǝŋǝ na ba jɩgɩ gɛɛrɩ o yɩra nɩ tɩn mʋ.
O maa yɩ o nu bukɔ-dʋa,
yɩ o nu wʋm soe wʋntʋ
o dwe o biə bam maama.
Busankan-pwalɩ sɩm na nɛ‑o tɩn,
ba sɛ nɩ o jɩgɩ yu-yoŋo lanyɩranɩ.
Pɛ wʋm kaana bam,
dɩ o ka-bi sɩm maama
dɩ maa yɔɔrɩ ba tee-o.
10 Ba maa wɩ:
«Wɔɔ mʋ tɩntʋ na yɔɔrɩ o yɩ jasɩ
nɩ tɩga na jɩgɩ ka pʋʋrɩ tɩn?
Wʋntʋ lam nan nyɩ dɩ
cana kam na pɩɩrɩ te,
yɩ o paɩ pooni nɩ wɩa kam.
O ta maa jɩgɩ nɩnwaŋa zanzan,
nɩ calɩcwɩ sɩm na brɩ jaja te tɩn.»
11 Amʋ ve bolo kʋm nɩ mɛ
a ya na jəri a tweeru tɩn mʋ,
sɩ a nii ga-lɛɛrʋ puli da na?
A ve sɩ a nii vinyə tweeru tɩm kwi vɔɔrʋ,
yɩ grɩnadɩnɩ tweeru tɩm dɩ kɩ punnu na?
12 Amʋ wʋbʋŋa laan ma vugimi
wʋpolo ŋwaanɩ.
Kʋ kɩ-nɩ nɩnɛɛnɩ a je
pabu saŋa nɩ mʋ,
yɩ siseŋ-nɔɔna vaŋɩ dɩbam
dɩ tərikooru sɩ veǝ.
13 Sulam tiinə bukɔ,
joori n ba yo seeni!
Ba yo sɩ dɩ́ wanɩ dɩ́ taa nii nmʋ!
Bukɔ wʋm:
Bɛɛ mʋ yɩ á lagɩ á nii
wʋlʋ na ba jɩgɩ gɛɛrɩ tɩn,
nɩ o na tɔgɩ kɔgɔ kuni bɩle
tɩtarɩ nɩ o saɩ tɩn?