Nɔn-dʋŋʋ kʋm:
5
Amʋ bɩcɔŋɔ dɩ a katɔgɔ tɩtɩ,a tu sɩ a zʋ a gaarɩ dɩm wʋnɩ mʋ.
Amʋ lagɩ a pɛ a Miiri maarʋ tɩm
dɩ a wəənu tɩlʋ lwəm na ywənə tɩn biə mʋ.
A maa lagɩ a di a tʋʋrʋ tɩm
dɩ a tʋ-kamparamɩ dɩm.
A ta maa lagɩ a nyɔ a dɩvɛn sana kam,
sɩ a daarɩ a di a nayɩla bam.
Ba badonnǝ bam:
Dɩ́ badonnǝ bam, taá di-na
sɩ á yɔɔrɩ á su!
Daa taá nyɔ-na,
sɩ á laan ba á bugi,
á na soe daanɩ tɩn ŋwaanɩ.
Ləŋə 4
Bukɔ wʋm:
2 Amʋ ya na tigi a dɔ tɩn,
a wʋbʋŋa ba dɔa.
A laan ma ni nɩ a bɔɔlʋ wʋm tuǝ
yɩ o dwanɩ manchoŋo ni dɩm!
O maa tɛ o wɩ: «Amʋ bɩcɔŋɔ,
pʋrɩ digə kam n pa-nɩ,
nmʋ wʋlʋ na yɩ amʋ kunkwǝŋǝ
yɩ gɛɛrɩ tǝrǝ n yɩra nɩ tɩn.
Amʋ yuuywe sɩm yɔɔrɩ sɩ bugi mʋ dɩ nyɔnɔ.»
3 Amʋ nan ya maŋɩ a lɩ
a gwaarʋ a dɩ tɩga nɩ mʋ.
A daa maŋɩ sɩ a lɛ-tɩ mʋ na?
A nan maŋɩ a sɩn a nɛ,
kʋ yɩ kʋ cwǝŋǝ nɩ sɩ a daa pa sɩ digimi na?
4 A bɔɔlʋ wʋm twɩ o jɩŋa mʋ
sɩ o pʋrɩ digə kam ni.
Kʋntʋ maa paɩ a bɩcarɩ yɔɔrɩ dɩ zaga zanzan.
5 Amʋ dɩ ma zaŋɩ
sɩ a pʋrɩ ni dɩm a pa‑o,
yɩ Miiri maarʋ taagɩ a jɩn sɩm maama.
A ma vu a dwe boro kʋm
sɩ a pʋrɩ-kʋ,
yɩ Miiri maarʋ bɔɔrɩ ka tɔgɩ
a nwa tɩtarɩ nɩ ka lurə.
6 A ma pʋrɩ digə kam a pa a bɔɔlʋ wʋm,
dɩ o na pipiri o viiri
o daarɩ-nɩ tɩn dɩ.
Amʋ lagɩ a bəri mʋ dɩ o na je tɩn.
A ma nuŋi a beeri o je a ga.
A maa tɔɔlɩ a bǝi o yɩrɩ.
O nan wʋ ləri-nɩ.
7 Balʋ na yɩrɩ tɩʋ kʋm tɩtɩɩ nɩ tɩn
dɩ maa kaagɩ ba veǝ.
Ba maa na nɛ amʋ tɩn,
ba ma magɩ-nɩ yɩ ba kɩ-nɩ zʋnnɩ.
Ba ta ma vrɩ a gar-vɔɔ kʋm.
Kʋ yɩ tɩʋ kʋm kabri yɩrɩna bam
mʋ kɩ kʋntʋ!
8 Zeruzalɛm tɩʋ bukwa bam,
du-na durə nɩ:
abam na nɛ a bɔɔlʋ wʋm,
á wʋ́ ta á brɩ-o nɩ
a lagɩ a bəri mʋ
a fra na wʋ o sono kʋm wʋnɩ tɩn ŋwaanɩ.
Á bá sɛ sɩ á kɩ kʋntʋ na?
Zeruzalɛm tɩʋ bukwa bam:
9 Nmʋ wʋlʋ na lana
n dwe kaana maama tɩn,
bɛɛ mʋ pɛ n bʋŋɩ nɩ n bɔɔlʋ wʋm
mʋ garɩ nɩnwana maama?
Bɛɛ mʋ pɛ n pa dɩbam ni
sɩ dɩ́ kwe dɩ́ pa‑o?
Bukɔ wʋm:
10 Amʋ bɔɔlʋ yɔɔrɩ o yɩ lannʋ mʋ,
yɩ o yibiyə nyɩɩna.
O ta maa zɩgɩ marɩ-marɩ
nɔɔna mʋrʋ tɩtarɩ nɩ.
11 O yibiyə lam nyɩ dɩ səbu-sɩŋa mʋ cɩga cɩga.
O yuuywe sɩm maa bʋbwalɩ,
yɩ sɩ laan zwərə
nɩ bacangaa na yɩ te tɩn.
12 O yiǝ yam nyɩnyʋgʋ yɩ
nɩ kunkwənə bale mʋ te,
ba na zɩgɩ bu-tʋla ni nɩ,
yɩ ba kwe nayɩla ba zarɩ-ba
pa ba pɩɩrɩ carɩ carɩ tɩn.
Ya fɔgɩ ya məəli o yibiyə kam nɩ,
nɩ kandwa-ŋʋna mʋ tɩn.
13 O kələ yam seeni nyɩ dɩ
gaarɩ dɩlʋ wʋnɩ ba na dugi dwə-biə
balʋ lwəm na ywəmmə tɩn mʋ.
O ni-vɔɔrʋ tɩm nyɩ dɩ ga-pun-laarʋ,
yɩ Miiri nugə soe
ka tɔgɩ da ka lurə tɩn.
14 O jɩan yam nyɩ dɩ səbu-sɩŋa
bɛn mʋ,
ba na kwe Bɛrili kandwa-ŋʋna
ba məəli da te tɩn mʋ.
Kʋ na yɩ o yɩra yam tɩtɩ,
ya nyɩ nɩ tuu yələ mʋ,
ba na kwe Safiiri kandwa-ŋʋna
ba ma ba gɔgɩrɩ-ya.
15 O nɛ sɩm maa yɩ nɩnɛɛnɩ ywə yalʋ
ba na mɛ marbrɩ na pɩɩrɩ parɩ parɩ tɩn ba kɩ
yɩ ba kwe-ya ba cwi kugu je sɩlʋ
ba na mɛ səbu-sɩŋa ba kɩ tɩn.
O maa zɩga nɩ Liban pweeru tɩm na yɩ te tɩn,
yɩ o ba jɩgɩ doŋ
nɩ Sɛdrɩ tweeru dɩ na yɩ te tɩn.
16 O ni dɩm tɩtɩ mʋ tiini dɩ sʋna.
A fra maa yɔɔrɩ ya tigi o wʋnɩ.
Zeruzalɛm bukwa bam,
amʋ bɔɔlʋ wʋm mʋ tɩntʋ.
Wʋntʋ nan mʋ yɩ amʋ ciloŋ.