Nɔn-dʋŋʋ kʋm:
4
Nii nmʋ na tiini n lana te,amʋ bɩcɔŋɔ!
Nmʋ yibiyə lana zanzan ka pa-nɩ!
Nmʋ na mɛ gar-fɩfala n kwǝli n yibiyə,
n yiǝ yam lana nɩ kunkwənə tɩn mʋ.
Nmʋ yuuywe sɩm zwərə lanyɩranɩ
nɩnɛɛnɩ bʋnɩ na zɩgɩ Galadɩ pweeru tɩm yuu nɩ
dɩ faŋɩ dɩ maa tu tɩga te tɩn mʋ.
2 Nmʋ yələ yam maa pɩɩrɩ carɩ carɩ,
nɩ pe-kɔgɔ ba na goni sɩ kʋrʋ,
yɩ ba swɛ-sɩ pa sɩ pɩɩrɩ te tɩn mʋ.
Ya maama maŋɩ daanɩ mʋ,
yɩ dɩdʋa tɩtɩ wʋ sagɩ dɩ cwǝŋǝ.
3 Nmʋ ni-vɔɔrʋ tɩm nyɩ dɩ
gar-ŋʋn-sɩŋa mʋ.
N ni dɩm nyɩnyʋgʋ dɩ lana zanzan.
N na kwǝli n yibiyə dɩ gar-fɩfala,
n kələ yam lam ta naɩ mʋ jaja,
yɩ ya nyɩ dɩ grɩnadɩnɩ tiu bu
na cɛ bɩle te tɩn.
4 Nmʋ ban dɩm yɔɔrɩ dɩ dwara
nɩnɛɛnɩ di-dɩdɔrɔ kʋlʋ
Pɛ Davidi na lɔgɩ o zɩgɩ tɩn mʋ.
Nmʋ zambili nyɩ dɩ pamaŋ-bɩbɛ mʋ kwe ba najara cɩ-kwɛn mʋrʋ
ba palɩ di-dɩdɔrɔ kʋm yɩra nɩ.
5 Nmʋ yɩla yɔɔrɩ ya maŋɩ daanɩ mʋ lanyɩranɩ,
nɩnɛɛnɩ fǝri sɩle na ve daanɩ
yɩ sɩ zɩgɩ liisi ga-punnu tɩtarɩ nɩ sɩ di gaa te tɩn.
6 Tɩga ta na wʋ pʋʋrɩ,
sɩ tɩtɩɩtɩ vu-zuru kʋm dʋlɩ,
amʋ nan wʋ́ vu a maŋɩ
nmʋ pweeru tɩle tɩm seeni,
mɛ ba na zɩzagɩ Miiri tralɩ
dɩ wo-taloori
pa sɩ lwəm zaŋɩ lanyɩranɩ tɩn mʋ.
7 Amʋ bɩcɔŋɔ, n yɔɔrɩ n lana mʋ
sɩ kʋ gaalɩ,
yɩ gɛɛrɩ tǝrǝ dɩ fɩnfɩɩn dɩ.
8 Amʋ katɔgɔ, pa dɩ́ yagɩ Liban pweeru je sɩm!
Zɩgɩ dáanɩ yigə yigə n ba amʋ te.
Zɩgɩ Amana piu kʋm yuu nɩ,
dɩ Seniri piu kʋm,
dɩ Hɛrmɔn piu kʋm yuu nɩ,
n tu n ba.
Yagɩ je sɩm kʋntʋ
dɩ gugwəəru tɩm kʋntʋ,
sɩ nywəənu dɩ gweerə mʋ zʋʋrɩ da.
9 Amʋ bɩcɔŋɔ dɩ a katɔgɔ tɩtɩ,
nmʋ mʋ yɔɔrɩ n je a bɩcarɩ nɩ.
Kʋ nan yɩ n na dʋlɩ n yi bɩdwɩ
n nii-nɩ te tɩn,
dɩ n ban zambili dɩm kandwɛ-nyɩɩnɩ dɩdʋa na nyɩɩnɩ te tɩn mʋ
n mɛ n ganɩ a bɩcarɩ n wanɩ.
10 Amʋ bɩcɔŋɔ dɩ a katɔgɔ tɩtɩ,
nmʋ na soe amʋ te tɩn
tiini kʋ lana kʋ pa-nɩ!
A na laŋɩ n sono kʋm a nii tɩn,
kʋ ywəəni dwe dɩvɛn na yɩ te tɩn.
Nmʋ yɩra tralɩ dɩm lwəm mʋ tiini dɩ lamma
dɩ dwe parfɛn dwi maama lwəm.
11 Amʋ katɔgɔ, n ni-vɔɔrʋ tɩm
sʋna tɩ pa-nɩ,
nɩnɛɛnɩ tʋʋrʋ na sʋna te tɩn mʋ.
Kʋ nyɩ nɩnɛɛnɩ tʋʋrʋ dɩ nayɩla mʋ
wʋ n dindǝlimi kuri nɩ.
ɡwaarʋ tɩlʋ n na zʋ tɩn lwəm
dɩ maa ywəmmə,
nɩ Liban tweeru tɩm lwəm
na yɩ te tɩn.
12 Amʋ bɩcɔŋɔ dɩ a katɔgɔ tɩtɩ,
nmʋ yɩ gaarɩ dɩlʋ ni
na fɔgɩ dɩ pɩ tɩn mʋ.
N ta ma n yɩ buli-yi dɩlʋ
ba na cɩgɩ tɩn,
yɩ nɔɔn-nɔɔnʋ daɩ sɩ o mɔ dɩ na.
13 Nmʋ yɩra yam nyɩ dɩ tweeru zanzan mʋ puli da,
dɩ na ləri grɩnadɩnɩ tiu biə
na ywəmmə tɩn.
Wǝǝnu tɩlʋ lwǝm na ywǝmmǝ tɩn dɩ pun-laarʋ tɩlʋ lwəm na ywəmmə tɩn dɩ maa wʋra.
14 Wo-talooru tɩm maa yɩ Naradɩ,
dɩ Saferan, dɩ Loriye,
dɩ Kanɛlɩ, dɩ tweeru tɩlʋ maama
na pa wo-talooru tɩn.
Miiri maarʋ, dɩ Alowɛ tweeru,
dɩ wo-talooru kalʋ maama
na tiini ka lana tɩn dɩ wʋra mʋ.
15 Nmʋ yɔɔrɩ n yɩ buli-yi dɩlʋ
na tigi gaarɩ wʋnɩ tɩn mʋ.
Buli-yi dɩm kʋntʋ buri bu-tʋla mʋ,
yɩ ka na bam nuŋi Liban pweeru tɩm seeni
ba soe ba tʋlɩ ba veǝ.
Bukɔ wʋm:
16 Viu kʋlʋ na nuŋi jazɩm baŋa seeni tɩn,
zaŋɩ n ta n dʋla!
Jagwiə seeni viu kʋm dɩ zaŋɩ kʋ ba!
Pa kʋ taa dʋlɩ amʋ gaarɩ dɩm nɩ,
sɩ a gaarɩ dɩm lwəm jagɩ
dɩ yi je maama.
Pa a bɔɔlʋ wʋm zʋ
o gaarɩ dɩm wʋnɩ,
sɩ o di dɩ wʋ bi-ywənə bam maama.