Bukɔ wʋm:
3
Tɩtɩɩ maama nɩ mʋ a tigi a sara nɩyɩ a bʋŋɩ a na soe wʋlʋ tɩn wʋbʋŋa taan.
A maa beeri o je yɩ a wʋ nɛ‑o.
2 «Amʋ nan wʋ́ zaŋɩ lele mʋ
a zʋ tɩʋ kʋm wʋnɩ.
A maa wʋ́ taa kaagɩ tɩʋ kʋm cwe sɩm yum nɩ,
dɩ kʋ kapwəəru tɩm maama nɩ
sɩ a beeri a na soe wʋlʋ tɩn jǝgǝ.»
A nan na beer‑o a vu mɛ maama tɩn,
a wʋ nɛ‑o.
3 Balʋ na yɩrɩ tɩʋ kʋm tɩtɩɩ nɩ tɩn
dɩ maa kaagɩ ba veǝ.
Ba ma na-nɩ, yɩ a bwe-ba wɩ:
«Amʋ beeri a na soe wʋlʋ tɩn mʋ.
Abam nɛ‑o na?»
4 A na yɔɔrɩ a gaalɩ-ba a kɛ fɩɩn tɩn,
mʋ a nɛ wʋlʋ wʋm a na soe tɩn.
A ma yɔɔrɩ a tʋ a gʋrɩg-o kəŋkəŋ.
A maa wʋ sɛ sɩ a yag-o
sɩ kʋ taa nii a na jaan‑o a vu sɔŋɔ
yɩ dɩ́ zʋ digə kalʋ wʋnɩ
a nu na lʋgɩ-nɩ tɩn.
5 Zeruzalɛm tɩʋ bukwa bam,
da-na we dɩdaanɩ fǝri dam ŋwaanɩ
á du-na durə nɩ:
abam bá gigiri dɩbam yiǝ
dɩ dɩ́ sono kʋm.
Nan pa-na dɩbam cwǝŋǝ
sɩ dɩ́ tʋŋɩ dɩ́ fra.
Ləŋə 3
6 Bɛɛ mʋ zɩgɩ kagʋa seeni kʋ zaŋɩ kʋ bɩɩna,
nɩ nyʋa na zaŋɩ tigi tigi ka maa diini wɛyuu te tɩn?
Kʋ maa nyɩ dɩ ba zwɛ wǝǝnu tɩlʋ lwǝm na ywǝmmǝ tɩn mʋ,
pa ka lwəm zaŋɩ wɛɛnɩ dɩ jagɩ je maama.
Kʋ kɩ nɩnɛɛnɩ Miiri dɩ wo-talooru tralɩ mʋ ba zwɛ,
dɩdaanɩ tralɩ dwi dwi sɩlʋ pipimpiinə na jɩgɩ tɩn.
7 Nii mʋ! Kʋ yɩ Pɛ Solɔmɔn mʋ ba zɩŋɩ ba veǝ,
yɩ Yisɩrayɛlɩ jar-kərə babɛ sɩm fusɩrdʋ laan gilimi‑o.
8 Ba maama jɩgɩ sʋ-lwaanʋ mʋ,
yɩ ba ye najara kǝm laŋa lanyɩranɩ.
Nɔɔnʋ maama sʋ-lɔŋɔ lǝgi o təŋə nɩ,
sɩ kʋ na maŋɩ kʋ yɩ tɩtɩɩ nɩ dɩ,
sɩ kʋ tu kɩ najara.
9 Ba dɛɛn kwe Liban tɩʋ
da-ŋʋnnʋ mʋ
ba ma ba kɩ gungolo ba pa Pɛ Solɔmɔn
sɩ ba taa maa zɩŋ‑o ba veǝ.
10 Ba kwe səbu-poŋo mʋ ba kwǝli dɛ sɩlʋ na təli gungolo kʋm tɩn,
yɩ ba ma səbu-sɩŋa ba kɩ kʋ kuri dɩm seeni.
Kʋ na yɩ jǝŋǝ je sɩm tɩtɩ,
ba kwe garyi-nasʋŋʋ mʋ
ba gɔgɩrɩ ba kwǝli da.
Zeruzalɛm tɩʋ bukwa mʋ zuri ba yɩra
ba kwɛ kʋ wʋ kʋm maama.
11 Abam Siyɔn tɩʋ bukwa bam,
nuŋi-na pooni,
sɩ á nii á na Pɛ Solɔmɔn na pugi
o paarɩ yipugə kam o yuu nɩ tɩn.
Ka yɩ paarɩ yipugə kalʋ
o nu na kwe o pu‑o
dɛ dɩlʋ wʋnɩ o na di o kaanɩ tɩn mʋ.
Kʋ maa yɩ dɛ dɩm kʋntʋ nɩ mʋ
o wʋʋ tiini kʋ poli.