Bukɔ wʋm:
2
Amʋ nyɩ dɩ ga-puŋu kʋlʋ na puli Sarɔn je sɩm nɩ tɩn mʋ,dɩ liisi ga-puŋu kʋlʋ na puli bolo tɩga nɩ tɩn.
Nɔn-dʋŋʋ kʋm:
2 Amʋ bɩcɔŋɔ na wʋ o yuudonnə wʋnɩ,
o yɩ nɩnɛɛnɩ liisi ga-puŋu mʋ na puli yɩ sabarɩ gilimi-dɩ tɩn.
Bukɔ wʋm:
3 Amʋ bɔɔlʋ wʋm dɩ na zɩgɩ
dɩ o yuudonnə bam,
o nyɩ dɩ kalɩgoŋo tiu na zɩgɩ punnu wʋ tweeru tɩtarɩ nɩ tɩn mʋ.
A kɩ a wʋbʋŋa nɩ sɩ a taa je o woro kʋm kuri nɩ mʋ.
A ma tiini a ni tiu biə balʋ o na pɛ-nɩ pa a di tɩn ywəəni.
4 O jaanɩ-nɩ o zʋ digə kalʋ wʋnɩ ba na di ywəəni da tɩn,
O ma yɔɔrɩ o kwəli-nɩ dɩ o sono.
5 A yɩra maama tɩgɩ mʋ
a fra na wʋ n sono kʋm wʋnɩ tɩn ŋwaanɩ.
Nan kwe kacɩnnʋ maasa
dɩ kalɩgoŋo tiu biə n pa-nɩ sɩ a di,
sɩ n ma n sooni-nɩ sɩ a wəri.
6 O ma kwe o jagwiə kam o təli a yuu,
sɩ o daarɩ o ma o jazɩm dɩm o kukwǝri-nɩ.
7 Zeruzalɛm tɩʋ bukwa bam,
da-na we dɩdaanɩ fǝri dam ŋwaanɩ
á du-na durə nɩ
abam bá gigiri dɩbam yiǝ
dɩ dɩ́ sono kʋm.
Nan pa-na dɩbam cwǝŋǝ sɩ dɩ́ tʋŋɩ dɩ́ fra.
Ləŋə 2
Bukɔ wʋm:
8 Amʋ ni a bɔɔlʋ wʋm kwǝrǝ.
Nii o na bɩɩnɩ te!
O yɔɔrɩ o nɔnɩ pweeru dɩ zwəənu tɩm yuu nɩ mʋ
o faŋɩ o bɩɩnɩ.
9 A bɔɔlʋ wʋm nyɩ dɩ fərə
naa wəŋə mʋ.
Nii o na zɩgɩ bri-kwaga nɩ,
yɩ o tɔgɩ takoro nɩ o niə
o nii digə wʋnɩ te.
10 O laan maa ŋɔɔnɩ dɩ amʋ o wɩ:
«Amʋ bɩcɔŋɔ, nmʋ wʋlʋ yibiyə
na lana amʋ yigə nɩ tɩn,
ba sɩ dɩ́ tɔgɩ daanɩ dɩ́ kɛ.
11 Nii mʋ! Waarʋ maŋa kam kɛ,
dʋa kam dɩ maa kɔ nɩnɩm.
12 ɡa-punnu laan mʋ faarɩ tɩga kam je maama.
Kʋ laan yɩ maŋa mʋ sɩ dɩ́ leeni le.
Kunkwənə kərə laan mʋ zaŋɩ
dɩ́ tɩga kam je maama nɩ.
13 Kapʋrrʋ tɩm sɩŋɩ sɩ tɩ taa kɩ mɔɔla.
vinyə tweeru tɩm dɩ maa kwi punnu
yɩ tɩ lwəm zaŋɩ je maama nɩ.
Kʋntʋ ŋwaanɩ, a bɔɔl-sono,
pa dɩ́ lagɩ je dɩ́ vu.»
Nɔn-dʋŋʋ kʋm:
14 Nmʋ wʋlʋ na yɩ amʋ kunkwǝŋǝ kam
yɩ n səgi pweeru gugwəəru wʋnɩ tɩn,
nan nuŋi sɩ a na n yibiyə,
sɩ a daarɩ a ni n kwǝrǝ.
Bɛŋwaanɩ, nmʋ yibiyə kam tiini ka lana mʋ,
yɩ n kwǝrǝ kam dɩ ywəmmə lanyɩranɩ.
Bukɔ wʋm:
15 Popo ja ga-kakuri sɩm n pa dɩbam,
bɛŋwaanɩ varɩ-balwa bam kʋntʋ
jɩgɩ dɩ́ vinyə tweeru tɩm mʋ
ba cɔga ba yaga.
Dɩ́ vinyə tweeru tɩm nan wʋra
dɩ kwi punnu mʋ,
sɩ dɩ daarɩ dɩ lə biə.
16 A bɔɔlʋ wʋm yɩ amʋ nyɩm mʋ,
yɩ amʋ maama dɩ yɩ wʋntʋ nyɩm.
O laan maa yɛ liisi ga-punnu tɩm wʋnɩ.
17 Ta ta n wʋra sɩ kʋ taa nii tɩga na pʋʋrɩ,
yɩ tɩtɩɩtɩ vu-zuru kʋm dʋlɩ.
A bɔɔlʋ, laan nan joori n kɛ!
Duri-na nɩ wəŋə te tɩn,
dɩ fərə na nɔnɩ pweeru tɩlʋ na pɔɔrɩ bɩle tɩn baŋa nɩ.