Solɔmɔn ləŋ-ywəŋə Tɔnɔ
1
Solɔmɔn yɩra ləŋə kalʋ na ywəmmə ka dwe le maama tɩn.abLəŋə 1
Bukɔ wʋm:
2 Ba n kwaarɩ n ni dɩ a ni,
sɩ n mu-dɩ.
Bɛŋwaanɩ, nmʋ sono kʋm ywəmmə kʋ pa-nɩ
kʋ dwe dɩvɛn ywəəni.
3 Nmʋ yɩra tralɩ nugə kam lwəm mʋ tiini kʋ ywəmmə.
N yɩrɩ dɩm ywəmmə
nɩ ba na logi wǝǝnu tɩlʋ lwǝm na ywǝmmǝ tɩn
pa ka lwəm jagɩ je maama nɩ te tɩn.
Kʋntʋ ŋwaanɩ mʋ bukwa maama wʋ́ taa soe-m.
4 Nan ja-nɩ sɩ dɩ́ kɩ lɩla dɩ́ lagɩ je dɩ́ vu!
Pɛ, nan ja-nɩ n zʋ n digə kam wʋnɩ.
Zeruzalɛm bukwa bam:
Dɩ́ wʋ́ taa caka mʋ dɩ wʋpolo nmʋ ŋwaanɩ.
Dɩ́ wʋ́ te n sono kʋm nɩ:
kʋ ywəəni lana kʋ dwe sana ywəəni.
Bukɔ wʋm:
Cɩga ŋwaanɩ tɩn, kʋ maŋɩ sɩ bukwa bam taa soe-m.
5 Abam Zeruzalɛm bukwa bam,
maanɩ-na nɩ amʋ sɩɩnɩ a zwərə mʋ
yɩ a yibiyə ta yɔɔrɩ ka lana.
A maa zwərə nɩ Kedarɩ tiinə vwə yam na yɩ te tɩn,
dɩ gwar-laarʋ tɩlʋ Solɔmɔn na kwe
o cɩ o di sɩm niə tɩn.
6 Nan yɩ taá lo yiǝ a baŋa nɩ
dɩ a na zwərə te tɩn.
Kʋ yɩ wɩa kam mʋ tiini ka magɩ a yɩra yam
pa ya zwəri kʋntʋ.
Amʋ nu-biə banɩ mʋ zaŋɩ dɩ amʋ.
Ba pɛ a tʋŋɩ vinyə tweeru kadwi sɩm nɩ mʋ taan,
yɩ a wʋ nɛ pwələ sɩ a nii a tɩtɩ kadugə kamc baŋa nɩ.
7 Amʋ bɩcɔŋɔ, ta n brɩ-nɩ mɛ seeni
n na yǝni n kalɩ n vara bam n ve tɩn,
dɩ je sɩlʋ nmʋ na paɩ ba sin wɩa tɩtarɩ nɩ tɩn.
Kʋ daɩ sɩ a taa tʋlɩ a beerǝ
nayɩrʋ dɩ nayɩrʋ pe-kɔgɔ maama wʋnɩ.
Nɔn-dʋŋʋ kʋm:
8 Nmʋ wʋlʋ na lana n dwe kaana maama tɩn,
n sɩɩnɩ n yǝri amʋ na wʋ mɛ tɩn na?
Nan tɔgɩ cwǝŋǝ kalʋ peeni sɩm na nɔnɩ da tɩn,
sɩ n vu n yi nayɩra bam vwə yam seeni,
yɩ n daarɩ n na gaa n pa n bʋbʋnɩ sɩm.
9 Amʋ bɩcɔŋɔ, nmʋ nyɩ dɩ sisəŋ-nɔɔnʋ
wʋlʋ ba na kwɛ ka yɩra
sɩ ka vaŋɩ Ezipi pa-farʋ wʋm təriko tɩn mʋ.
10 Zwannʋ tɩlʋ na wʋ n yuu nɩ tɩn
pɛ n kələ yam lam nuŋi mʋ cɩga cɩga.
Kandwa-ŋʋna tɩlʋ na yɩ zambili n ban nɩ tɩn
dɩ wǝli pa n lam dɩm nuŋi lanyɩranɩ.
11 Nan pa dɩ́ kɩ səbu-sɩŋa zwa-kwana mʋ dɩ́ pa‑m,
yɩ dɩ́ kwe səbu-poŋo dɩ́ ma dɩ́ gɔgɩrɩ ya maama.
Bukɔ wʋm:
12 Maŋa kalʋ amʋ pɛ wʋm na tigi o jangɔŋɔ kʋm baŋa nɩ tɩn,
mʋ tralɩ kalʋ a na kɩ a yɩra nɩ tɩn
lwəm jagɩ je maama nɩ.
13 A bɔɔlʋ wʋm nyɩ dɩ Miiri tralɩ mʋ a tee nɩ,
dɩ na wʋ gan-lɔgɔrɩ wʋnɩ
yɩ dɩ tigi amʋ yɩla yam tɩtarɩ laŋa nɩ tɩn.
14 O ta nyɩ dɩ ga-pun-laarʋ tɩlʋ lwəm na ywəmmə
yɩ ba goni-tɩ En-gedi vinyə karɩ sɩm nɩ tɩn.
Nɔn-dʋŋʋ kʋm:
15 Amʋ bɩcɔŋɔ, nii n na tiini n lana te!
N yibiyə tiini ka lana zanzan!
N yiǝ lam jɩgɩ fra nɩ kunkwənə mʋ te.
Bukɔ wʋm:
16 A bɔɔlʋ, nmʋ yɔɔrɩ n yɩ lannʋ mʋ!
Amʋ brɩ a ba nii‑m a sui.
Dɩ́ na tigi yo seeni tɩn
ga-zuru mʋ pugi dɩ́ vwe dɩm.
17 Sɛdrɩ dɛ mʋ yɩ dɩ́ digə be,
Daanʋ tɩlʋ na nɩ-ka tɩn maa yɩ Pini tweeru dɛ.