Wɛ Nijoŋnu
Ezayi Tɔnɔ
1
Baŋa-Wɛ dɛɛn vɩɩrɩ wǝǝnu tɩntʋ na tɛ Zuda dɩ Zeruzalɛm taanɩ tɩn DƖ brɩ Amɔtɩ bu Ezayi mʋ. Kʋ nan yɩ maŋa kalʋ Ozɩasɩ, dɩ Zʋatam, dɩ Ahazɩ, dɩ Ezekɩasɩ na di Zuda tɩʋ paarɩ ba saŋɩ da-kwaga tɩn mʋ.aBaŋa-Wɛ vaŋɩ DƖ nɔɔna bam zwa
2 Wɛyuu cəgi! Tɩga baŋa dɩ cəgi!
Baŋa-Wɛ na tagɩ te tɩn mʋ tɩntʋ:
«Amʋ kɔnɩ a biə mʋ, yɩ a nii ba baŋa nɩ.
Ba nan nuŋi a kwaga nɩ.
3 Na-bɩa ye ka tu.
Bɩnaga dɩ ye ka tu, dɩ ka tu na paɩ-ka wʋdiu mɛ tɩn.
Amʋ nɔɔna Yisɩrayɛlɩ tiinə bam nan yəri-nɩ.
Ba ba ni amʋ na jɩgɩ kʋlʋ a kɩ tɩn kuri.»
4 Woo, nii tɩʋ kʋntʋ na soe lwarɩm kǝm te!
Ba yɩ balʋ wʋbʋŋa na ywəri tɩn mʋ.
Ba ta yɩ nɔn-balwaarʋ dwi mʋ,
dɩ biə balʋ tɩtʋŋa na ba tɔgɩ cwǝŋǝ tɩn!
Ba vɩn Baŋa-Wɛ dɩm na yɩ Yisɩrayɛlɩ dwi dɩm Wʋ-poŋo Tu wʋm tɩn mʋ.
Ba ma pipiri ba kwaga ba ya‑DƖ.
5 Bɛɛ mʋ yɩ á ta yɔɔrɩ á kɩ zwabaniə kikiə?
Á ba kwarɩ sɩ Wɛ waarɩ abam na?
Abam yum su dɩ fufwələ mʋ,
yɩ á bɩcara yam wʋnɩ dɩ, yazurə tǝrǝ.
6 Kʋ na zɩgɩ á yum nɩ sɩ kʋ taa tu á napra kuri nɩ tɩn,
yazurə tǝrǝ á yɩra yam wʋnɩ.
Fufwələ, dɩ bibələ,
dɩ ŋwan-balwaarʋ yɩranɩ mʋ wʋra.
Abam nan ba zarɩ á ŋwana yam, sɩ á vɔ-ya.
Á ma á ba kɩ liri ya wʋnɩ
sɩ ya je ya pa abam.
7 Abam tɩga kam yɔɔrɩ ka tigi mʋ yɔɔ yɩranɩ.
Mim ma zwɛ á tɩɩnɩ dɩm maama.
Vərə mʋ tu ba zagɩ á karɩ wʋdiiru maama nyɔ,
yɩ abam zɩgɩ á niə.
Vərə bam kʋntʋ ma cɔgɩ á tɩga kam maama
pa kʋlʋkʋlʋ wʋ daarɩ.
8 Siyɔn tɩʋ yɩ kʋ yɩranɩ mʋ kʋ zɩga,
nɩ pwəŋə na cwi ka zɩga gaarɩ nɩ te tɩn.
Kʋ ta nyɩ dɩ vwe mʋ na zɩgɩ gaanɩ kara tɩtarɩ nɩ.
Kʋ maa yɩ nɩnɛɛnɩ tɩʋ kʋlʋ ba na li-kʋ
sɩ ba kɩ najara ba di tɩn.
9 Paŋwa Tu Baŋa-Wɛ dɩm
ya na wʋ daarɩ dɩbam badaara sɩ dɩ́ wəri,
dɩbam dɩ yaá cɔgɩ dɩ́ ti,
nɩ kʋ dɛɛn na kɩ Sodɔm tɩʋ tiinə te tɩn mʋ.
Dɩ́ ya ta maa wʋ́ ji nɩ Gomɔrɩ tɩʋ dɛɛn na yɩ te tɩn.b
10 Nan cəgi-na Baŋa-Wɛ taanɩ dɩm,
abam balʋ na ba garɩ Sodɔm tɩʋ dɩdɛɛra bam tɩn.
Abam balʋ maa na nyɩ dɩ Gomɔrɩ tiinə bam tɩn,
cəgi-na Wɛ niə yam!
11 Baŋa-Wɛ tagɩ DƖ wɩ:
«Abam na yǝni á ja vara kɔgɔ kɔgɔ
á kɩ kaanɩm zanzan te tɩn,
á bʋŋɩ nɩ amʋ yigə wʋ ya wʋnɩ mʋ na?
Amʋ yɩra cɛ mʋ dɩ abam na kwe pi-balɩ,
dɩ na-paala lara,
á ma á kɩ zwɛɛm kaanɩm á pa-nɩ te tɩn.
Amʋ yi nan wʋ su
á na-balɩ, dɩ pəlbiə, dɩ bʋbwaalʋ jana balʋ
á na kwe á pa-nɩ tɩn.c
12 Á na yǝni á tui á warɩ-nɩ tɩn,
wɔɔ mʋ pɛ á kaagɩ á kɩkarɩ amʋ wara-je sɩm nɩ
dɩ á vara bam kʋntʋ?
13 Daa yɩ taá jaanɩ pɛɛra á tui yo sɩ á kwe-ya á pa-nɩ,
bɛŋwaanɩ ya daa ba jɩgɩ kuri!
Wo-talooru tɩlʋ á na kwe á zwɛ á pa-nɩ tɩn
yɩ wo-zɔɔnɩ mʋ amʋ tee nɩ.
Abam na yǝni á di candi can-dʋŋa ŋwaanɩ,
naa siun dɛ ŋwaanɩ, naa á kɔgɔ kikili-farɩ ŋwaanɩ tɩn,
amʋ yɩra wiiri mʋ dɩ á na tʋŋɩ lwarɩm á wǝli da te tɩn.
14 A joro mʋ yɔɔrɩ kʋ nuŋi á can-dʋŋa candi sɩm,
dɩ wʋdi-fɔrɔ candi sɩm.
A ba vɩɩlɩ dɩ-ya mʋ nɩ a ga zɩŋɩ zɩlɩ mʋ tɩn,
yɩ a yɩra cɛ ya ŋwaanɩ.
15 Abam na twɩ á jɩan á jeeri-nɩ wɛ-loro baŋa nɩ,
amʋ wʋ́ pipiri a kwaga mʋ a ma a ya abam.
Abam nan na tiini á warɩ-nɩ á daanɩ te maama dɩ,
a bá cəgi á wɛ-loro kʋm.
Bɛŋwaanɩ, á jɩan yam maama taagɩ dɩ jana mʋ.
16 Nan sanɩ-na á jɩan yam,
sɩ á daarɩ á fɔgɩ á kwɛ á tɩtɩ.
Ja-na á tɩtʋŋ-lwaannʋ tɩm
á vu dáa á daarɩ-nɩ.
Yagɩ-na lwarɩm tɩtʋŋa yalʋ á na jɩgɩ á kɩ tɩn,
17 sɩ á laan zaasɩ lanyɩranɩ kǝm!
Beeri-na sɩ cɩga kam taa tʋŋa,
sɩ á daarɩ á cɩ balʋ na bɛɛsɩ ba donnǝ tɩn.
Ta pa-na sɩ bɩtara na ba bʋra,
yɩ á ŋɔɔnɩ á pa kadənə dɩ.»d
18 Baŋa-Wɛ na tagɩ te tɩn mʋ tɩntʋ:
«Ba-na sɩ dɩ́ bwɛ wǝǝnu daanɩ.
Abam lwarɩm dɩm na maŋɩ ya pa á digimi te maama dɩ,
amʋ wʋ́ saarɩ ya digiru tɩm,
sɩ á taá jɩgɩ wʋ-poŋo fasɩ.
Kʋlʋ na digimi abam tɩn na tiini kʋ sɩɩnɩ cwɛn cwɛn mʋ dɩ,
amʋ wʋ́ pa á ŋwɩa kam pɩɩrɩ ca,
nɩ lɔŋɔ na yɩ te tɩn.e
19 Abam wʋʋ n dɛa, yɩ á na twəri sɩan sɩ á sɛ,
mʋ á wʋ́ di tɩga kam wo-laarʋ tɩm á su.
20 Abam nan na vɩn, pa á nuŋi amʋ kwaga nɩ,
á dʋna mʋ wʋ́ gʋ abam najara wʋnɩ.»
Baŋa-Wɛ tɩtɩ ni-taanɩ mʋ kʋntʋ DƖ taga DƖ tiŋi.
21 Nii mʋ! Tɩʋ kʋntʋ dɛɛn jɩgɩ amʋ cɩga.
Lele, kʋ laan nan yagɩ-nɩ mʋ nɩ ka-tʋla te!
Tɩʋ kʋm dɛɛn su dɩ cɩga mʋ,
yɩ nɔn-ŋʋna dɩ ya zʋʋrɩ kʋ wʋnɩ.
Nɔn-gʋra laan nan mʋ wʋra.
22 Abam dɛɛn jɩgɩ lam nɩ səbu-poŋo mʋ.
Á laan nan jigi wo-yɔɔrʋ.
Pulim nɩ tɩn, á dɛɛn yɩ sa-ŋʋna mʋ.
Na laan nan mʋ gwaanɩ ba wʋnɩ.
23 Abam nakwa bam yɩ vɩɩna mʋ,
yɩ ba mɩ dɩ ŋwɩɩna.
Ba maama soe pɛɛra joŋim kikiə mʋ,
yɩ ba duri ba tɔgɩ ŋwɩɩrʋ kwaga.
Ba yǝni ba kwɩɩlɩ cɩga bɩtara tee nɩ.
Ba nan ba di taanɩ ba bʋrɩ ba paɩ kadənə.
24 Kʋntʋ ŋwaanɩ mʋ Paŋwa Tu Baŋa-Wɛ dɩm
na yɩ Yisɩrayɛlɩ tiinə Dam Tu wʋm tɩn tagɩ jasɩ DƖ wɩ:
«Amʋ banɩ wʋ́ zaŋɩ abam balʋ na jigi a dʋna tɩn baŋa nɩ,
sɩ á daa yɩ ja cam á ba á pa-nɩ.
25 Amʋ wʋ́ pa kʋ cɛ abam yɩra nɩ,
sɩ a wanɩ a lɩ á yɩra digiru tɩm maama,
nɩ luru na kwɛ səbu-poŋo sɩ o lɩ tɩ digiru te tɩn.
26 A maa wʋ́ pa abam dɩdɛɛra dɩ yi-pʋrɩ-nyɩna
sɩ ba taa nii á baŋa nɩ lanyɩranɩ,
nɩ kʋ dɛɛn na yɩ te faŋa kam nɩ tɩn.
Kʋntʋ kwaga nɩ nɔɔna laan wʋ́ bəŋi abam yɩrɩ ba wɩ:
‹Tɩʋ kʋlʋ na tɔgɩ cɩga yɩranɩ tɩn›,
dɩ ‹Tɩʋ kʋlʋ na kɩ ba cɩga dɩ Wɛ tɩn.› »
27 Baŋa-Wɛ wʋ́ da DƖ cɩga kam ŋwaanɩ
DƖ joŋi Zeruzalɛm tiinə bam DƖ yagɩ.
Balʋ na pipiri ba joori DƖ te tɩn wʋ́ na vrɩm.
28 Kʋ nan na yɩ lwarɩm kərə,
dɩ balʋ na vɩn Baŋa-Wɛ tɩn maama,
DƖ wʋ́ mɩɩrɩ-ba mʋ pa ba je.
29 Cavɩɩra wʋ́ ja abam,
dɩ á na kwe á tɩɩna á daŋɩ tangwana baŋa nɩ,
yɩ á daarɩ á zuli jwǝnǝ liri mwaanʋ tiinə kara wʋnɩ tɩn.
30 Abam wʋ́ ji nɩ tiu kʋlʋ vɔɔrʋ na kwaarɩ tɩn,
dɩ gaarɩ dɩlʋ na gɛ na sɩ ba ma ba yagɩ-dɩ tɩn mʋ.
31 Dɩdɛɛra wʋ́ ji nɩ lɔŋɔ mʋ te,
yɩ ba tɩtʋŋ-balwaarʋ dɩ ji nɩ min-cɩnnʋ dɩ zwɛ-kʋ,
Nɔɔna bam tɩtɩ dɩ ba kikiə maama maa wʋ́ cɔgɩ lɩla
nɩ mim na zwɛ wǝǝnu te tɩn.
Nɔɔn-nɔɔnʋ bá wanɩ o joŋi-ba o yagɩ.