Baŋa-Wɛ paarɩ-zulə wʋ́ brɩ jaja
2
Baŋa-Wɛ dɛɛn na lɩ wǝǝnu tɩlʋ na tɛ Zuda dɩ Zeruzalɛm taanɩ DƖ brɩ Amɔtɩ bu Ezayi tɩn mʋ tɩntʋ:2 Maŋa wʋ́ ba yɩ Baŋa-Wɛ digə kam na zɩgɩ piu kʋlʋ yuu nɩ tɩn na yɩrɩ kʋ dwǝni lʋgʋ baŋa je maama. Kʋʋ́ taa zɩgɩ wɛɛnɩ vili-vili sɩ kʋ dwǝni pweeru tɩm maama. Dwi maama tiinə wʋ́ taa nuŋi ba tɩɩnɩ dɩm nɩ ba toŋi daanɩ taa ba yɔɔrɩ da.
3 Dwiə yɩra yɩra maa wʋ́ ba da yɩ ba ta ba brɩ daanɩ ba wɩ:
«Pa-na sɩ dɩ́ vu dɩ́ di Baŋa-Wɛ piu kʋm yuu
sɩ dɩ́ zuli Zakɔbɩ Wɛ dɩm DƖ digə kam nɩ.
Dɩntʋ wʋ́ brɩ dɩbam DƖ cwe sɩm,
sɩ dɩbam dɩ wanɩ dɩ́ taa tɔgɩ-sɩ.»
Bɛŋwaanɩ, da yam kʋntʋ nɩ Wɛ kwiə yam wʋ́ zɩgɩ Siyɔn nɩ mʋ
ya jagɩ je maama nɩ.
Baŋa-Wɛ kwǝrǝ kam maa wʋ́ nuŋi Zeruzalɛm nɩ
ka yi nɔɔna maama.
4 Lʋgʋ baŋa dwi tiinə balʋ maama na jɩgɩ daanɩ,
Wɛ wʋ́ fɔgɩ-ba DƖ kɩ daanɩ yɩ DƖ lwɛ ba najara yam.
Ba maa wʋ́ kwe ba jara-kǝm sʋ-lwaanʋ ba ma lu vaanɩ,
sɩ ba cicwə yam dɩ pipiri ya ji sʋkwaarʋ ya pa-ba.
Tɩʋ daa bá zaŋɩ najara dɩ kʋ doŋ.
Nɔɔna dɩ daa bá zaasɩ najara kǝm.a
5 Zakɔbɩ dwi tiinə bam, nan ba-na!
Pa-na sɩ dɩ́ taa ve pooni dɩlʋ Baŋa-Wɛ na tiŋi DƖ pa dɩbam tɩn wʋnɩ.b
Baŋa-Wɛ dɛ-kamunu kʋm taanɩ
6 Baŋa-Wɛ, nmʋ yɔɔrɩ n dʋlɩ n nɔɔna Zakɔbɩ dwi tiinə bam n yagɩ mʋ.
Ba yǝni ba tɔgɩ wa-puli seeni liri mwaanʋ tiinə kikiə,
yɩ ba beeri sampwəri nɩ Filisi tiinə bam na kɩ te tɩn mʋ.
Ba maa mɩ dɩ dwi-gɛ tiinə dɩ ba cullu tɩm.
7 Ba tɩʋ kʋm maama su dɩ səbu-poŋo dɩ səbu-sɩŋa mʋ.
Ba jɩjɩgɩrʋ tɩm warɩ tɩ jeeli tɩ ti.
Ba tɩga kam ta su dɩ siseŋ-nɔɔna mʋ,
yɩ ba warɩ ba sise-tərikooru tɩm ni sɩ ba ga ba ti.
8 Ba tɩga kam maama su dɩ jwə-yɔɔrʋ mʋ.
Ba maa tiiri ba zuli wǝǝnu tɩlʋ ba tɩtɩ jɩan yam na kɩ tɩn.
9 Nɔɔna goori ba tɩtɩ ya yigə nɩ,
yɩ ba daarɩ ba vin ba yibiyə tɩga nɩ ba pa-ya.
Kʋntʋ ŋwaanɩ, yɩ kwe ba lwarɩm dɩm n cɛ-ba.
10 Nan ve-na pweeru tɩm gugwəəru nɩ,
sɩ á səgi tɩga kam wʋnɩ.
Bɛŋwaanɩ, Baŋa-Wɛ ban-zɔŋɔ kʋm jɩgɩ fʋʋnɩ mʋ
yɩ DƖ paarɩ-zulǝ yam dɩ tiini ya nyɩ.c
11 Dɛ dɩm kʋntʋ na yiǝ,
nabiinǝ balʋ na gooni ba donnǝ tɩn wʋ́ tʋ tɩga nɩ.
Balʋ na brɩ ba tɩtɩ kamunni tɩn dɩ wʋ́ joori ba ba tɩga.
Baŋa-Wɛ yɩrɩ dɩm yɩranɩ mʋ wʋ́ zaŋɩ wɛɛnɩ.
12 Paŋwa Tu Baŋa-Wɛ lɩ dɛ mʋ DƖ tiŋi dáa nɩ,
sɩ DƖ waarɩ balʋ na jɩgɩ fiə yɩ ba brɩ nɩ ba fuŋi tɩn.
Dɛ dɩm kʋntʋ nɩ bantʋ maama wʋ́ tʋ tɩga nɩ.
13 Wɛ lagɩ DƖ kɩ jara mʋ dɩdaanɩ Liban sɛdrɩ tweeru tɩlʋ na zəŋi wɛɛnɩ tɩ kɩ dɩdwaarʋ tɩn. Dɩ kɩ jara dɩdaanɩ Basan tɩʋ kʋm tu-dɩdwaarʋ tɩm.
14 DƖ maa wʋ́ pa pu-dɩdwaarʋ tɩm
dɩ pweeru tɩlʋ na wʋ wɛɛnɩ tɩn joori tɩga,
15 yɩ di-dɩdwaarʋ dwi maama
dɩ tɩʋ kabri-lilirru dwi maama dɩ tʋ tɩga nɩ.
16 Kʋ ta na yɩ nabwǝǝru tɩlʋ na beeri pipiu ŋwaanɩ tɩn,
dɩ tɩlʋ dwi na lana tɩn,
tɩ maama dɩ wʋ́ cɔgɩ dɛ dɩm kʋntʋ nɩ.
17 Nabiinǝ kamunni kikiə maama wʋ́ ti mʋ
pa ba fiə kam ji kafɛ.
Baŋa-Wɛ yɩrɩ dɩm yɩranɩ mʋ wʋ́ zaŋɩ wɛɛnɩ.
18 Jwǝnǝ yam nan lagɩ ya da ya je mʋ.
19 Nɔɔna wʋ́ duri mʋ ba vu ba səgi pweeru gugwəəru wʋnɩ,
dɩdaanɩ tɩga kuri bɔɔna wʋnɩ,
maŋa kalʋ Baŋa-Wɛ na wʋ́ zaŋɩ DƖ fugi-ba tɩn.
Bɛŋwaanɩ Baŋa-Wɛ jɩgɩ fʋʋnɩ DƖ pa-ba,
yɩ DƖ paarɩ-zulǝ yam dɩ tiini kʋ nyɩ mʋ.d
20 Dɛ dɩm kʋntʋ nan na yiǝ, nɔɔna wʋ́ kwe ba jwǝnǝ
yalʋ ba na mɛ səbu-sɩŋa dɩ səbu-poŋo ba mɔ sɩ ba taa zuli tɩn mʋ
ba dʋlɩ ba yagɩ,
sɩ baywə dɩ jɩnjwaanʋ taa kaagɩ tɩ kɩkarɩ ya baŋa nɩ.
21 Ba laan wʋ́ vu ba səgi ba tɩtɩ pweeru bɔɔna wʋnɩ,
dɩ gugwəəru wʋnɩ,
sɩ ba wanɩ ba lu Baŋa-Wɛ ban-zɔŋɔ dɩ DƖ paarɩ-zulǝ yam.
Kʋntʋ wʋ́ kɩ maŋa kalʋ Baŋa-Wɛ na wʋ́ zaŋɩ DƖ fugi nabiinǝ tɩn mʋ.
22 Yɩ taá jɩgɩ-na nabiinǝ cɩga.
Ba yɔɔrɩ ba bwǝnǝ mʋ lagɩ-lagɩ nɩ siun te.
Dam dɔɔ mʋ ba jɩga sɩ á salɩ ba yɩra nɩ?