Lɛɛrʋ wʋ́ ba Zuda tiinə baŋa
3
Nii-na yo!Yuutu Baŋa-Wɛ dɩm na yɩ Paŋwa tɩn ti DƖ yigə mʋ
sɩ DƖ lɩ Zeruzalɛm tiinə bam dɩ Zuda tiinə bam
ya na tɩɩgɩ wǝǝnu tɩlʋ maama baŋa nɩ tɩn.
Kʋ maa yɩ ba wʋdiiru dɩ ba na bam mʋ kʋntʋ.
2 O ta wʋ́ lɩ ba cɩ-tɔgɔ babɛ sɩm, dɩ ba jar-kərə bam,
dɩ ba sarɩya-dirə bam, dɩ ba nijoŋnǝ bam dɩ.
O maa wʋ́ lɩ vʋra bam, dɩ nakwa bam ba wʋnɩ.
3 DƖ daa ta wʋ́ lɩ ba jar-kərə yigǝ tiinǝ, dɩ ba nɔn-yɩrrʋ tɩm,
dɩ ba swan tiinə bam, dɩ ba gwarʋ tɩm, dɩ ba liri mwaanʋ tiinə bam dɩ.
Baŋa-Wɛ maa wɩ:
4 «A lagɩ a kuri busɔ-nyɩna mʋ sɩ ba taa yɩ tɩʋ kʋm dɩdɛɛra,
sɩ ba kwe wʋbʋŋ-yɔɔrʋ ba taa maa nii tɩʋ kʋm.
5 Nɔɔna wʋ́ da kʋ ŋwaanɩ sɩ ba taa bɛɛsɩ daanɩ mʋ.
Baarʋ wʋ́ nuŋi o doŋ kwaga nɩ,
yɩ fara dɩ nuŋi da-kwaga nɩ.
Biə daa bá taa nɩgɩ nankwɩn.
Nɔn-yɔɔrʋ dɩ maa wʋ́ dwəni dɩ nɔn-yum.
6 Kantʋ maŋa nɩ nɔɔnʋ wʋ́ vu o ko sɔŋɔ
o kuri o dwi nɔɔnʋ dɩdʋa yɩ o ta dɩd-o o wɩ:
‹Nmʋ na jɩgɩ gɔrɔ n zʋʋrɩ tɩn ŋwaanɩ,
ta n yɩ dɩ́ yigə tu sɩ n lɩ dɩbam lɛɛrʋ tɩntʋ wʋnɩ.›
7 Kʋntʋ tu dɩ maa wʋ́ ləri o ta jaja nɩ:
‹Amʋ bá wanɩ abam a joŋi a yagɩ.
A ba jɩgɩ wʋdiu, naa gwaarʋ a sɔŋɔ nɩ.
Kʋntʋ ŋwaanɩ, yɩ le-nɩ-na sɩ a ji nɔɔna bam yigə tu.› »
8 Nii-na! Zeruzalɛm tɩʋ kʋm yɔɔrɩ kʋ titirigi mʋ sɩ kʋ tʋ!
Zuda provɛnsɩ dɩm maama wʋra dɩ tʋɩ mʋ!
Ba ni-taanɩ dɩ ba kikiə maama ba tɔgɩ Baŋa-Wɛ wʋbʋŋa.
Ba maa maɩ ba kwaga ba ya Dɩntʋ dɩ DƖ paarɩ dɩm.
9 Ba yibiyə maama brɩ nɩ ba ba lagɩ Baŋa-Wɛ ni-taanɩ.
Ba maa yɔɔrɩ ba kɩ lwarɩm jaja,
nɩ Sodɔm tiinə dɛɛn na kɩ te tɩn.
Lɛɛrʋ mʋ wʋ́ yi-ba!
Kʋ maa wʋ́ zɩgɩ ba tɩtɩ yɩra nɩ.
10 Kʋ nan na yɩ balʋ na zɩgɩ dɩ cɩga tɩn,
ta dɩ ba nɩ: wǝǝnu wʋ́ tɔgɩ cwǝŋǝ tɩ pa-ba.
Baá na ba tɩtʋŋa yam nyɔɔrɩ.
11 Lɛɛrʋ taa wʋ nɔn-balwaarʋ tɩm baŋa nɩ!
Cam mʋ lagɩ dɩ yi-ba!
Ba lagɩ ba na ba tɩtʋŋ-balwaarʋ tɩm ŋwɩɩrʋ mʋ.
12 Busɔ-nyɩna mʋ jɩgɩ a nɔɔna bam ba bɛɛsa.
Kaana dɩ maa jɩgɩ-ba ba niə.
Amʋ nɔɔna bam, á yigǝ tiinǝ bam mʋ jaanɩ abam ba ywəri.
Ba maa paɩ á cɔgɩ cwǝŋǝ kam.
13 Baŋa-Wɛ tɩtɩ nan mʋ tu sɩ DƖ saŋɩ nɔɔna bam.
DƖ jɩgɩ taanɩ mʋ dɩ ba.
14 Baŋa-Wɛ lagɩ DƖ di DƖ nɔɔna nakwa bam,
dɩ ba dɩdɛɛra bam taanɩ, yɩ DƖ ta dɩ ba DƖ wɩ:
«Abam mʋ jaanɩ amʋ vinyə tweeru kara kam á cɔgɩ.
Á ta daarɩ á vrɩ wǝǝnu nabwənə tee nɩ
á ja á zʋ á tɩtɩ sam wʋnɩ á tiŋi da.
15 Wɔɔ mʋ pɛ abam cwǝŋǝ
sɩ á taá yɔɔrɩ á pɩɩnɩ a nɔɔna bam?
Á ta maa jɩgɩ yinigə tiinə jana á nyɔa.»
Paŋwa Tu Baŋa-Wɛ mʋ tagɩ kʋntʋ.
16 Baŋa-Wɛ ta ma ta DƖ wɩ:
«Zeruzalɛma tɩʋ kaana bam tiini ba brɩ ba tɩtɩ mʋ.
Ba maa kaagɩ ba veǝ,
yɩ ba ba nii ba naɩ nɔɔn-nɔɔnʋ.
Ba maa jɩgɩ ba yiǝ ba sʋgɩ baara sɩ ba da ba kwaga.
Ba maa na ve tɩn, ba jɩgɩ ba kurə mʋ ba dʋlɩ ba brɩ nɔɔna.
Ba maa kaagɩ ba ve yɩ ba najullu tɩm dwanɩ dɩ sɔɔ.
17 Kʋntʋ ŋwaanɩ, a nan wʋ́ pa ba ywe sɩm yɔɔlɩ sɩ daarɩ yu-sankolo mʋ,
yɩ a daarɩ-ba a zɩgɩ dɩ cavɩɩra yɩranɩ.»
18 Maŋa kam kʋntʋ na yiǝ, Baŋa-Wɛ wʋ́ lɩ Zeruzalɛm kaana bam yɩra zɩla yalʋ na paɩ-ba lam tɩn, sɩ DƖ daarɩ-ba DƖ zɩgɩ kafɛ. Kʋ maa yɩ ba najullu tɩm, dɩ ba zambilə yam, dɩ ba yum səbu-poŋo tɩm, 19 dɩ ba zwa-kwana yam, dɩ ba jɩn bɛn sɩm, dɩ ba gar-fɩfalɩ sɩlʋ na kwǝli ba yibiyə tɩn. 20 O ta wʋ́ lɩ ba yukwalɩ sɩm, dɩ ba ban-jullu tɩm, dɩ ba kili sɩm, dɩ ba wo-talooru sɩm, dɩ ba yu-yoŋo liri sɩm, 21 dɩ ba jafʋla yam, dɩ ba mʋmwan-zwakwana yam. 22 Kʋ nan ta na yɩ ba gwar-ŋʋnnʋ, dɩ ba gwar-dɩdwaarʋ, dɩ ba gwar-dannʋ tɩm, dɩ ba tampwarʋ tɩm, 23 dɩ ba niiru tɩm, dɩ ba gar-fɩfalɩ sɩm, dɩ ba yuu garyiə yam, dɩ gwaarʋ tɩlʋ ba na ma ba kukwəri ba tɩtɩ tɩn, Wɛ wʋ́ lɩ wǝǝnu tɩntʋ maama mʋ kaana bam tee nɩ.
24 Baá taa tɩɩnɩ sɩ lwəm na ywəmmə tɩn mʋ zaŋɩ,
yɩ ba yɩra lwəm nan mʋ wʋ́ cɛ nɔɔna mʋmwa nɩ.
Ba ya na tɩɩnɩ təŋə kili:
baá na ŋʋnɩ yɩranɩ mʋ.
Ba ya na tɩɩnɩ sɩ ba yuuywe taa lana,
ba yum tɩm wʋ́ fɩn tɩ daarɩ yu-kaporro mʋ.
Ba ya na bʋŋɩ sɩ ba zʋ gwar-ŋʋnnʋ,
baá zʋ gwar-zɩnzwara mʋ.
Ba lam dɩm wʋ́ ləri dɩ ji wo-yɔɔrʋ tɩntʋ doŋ mʋ.
25 Á tɩʋ kʋm baara bam wʋ́ tɩ jara-kǝm baŋa nɩ mʋ.
Á cɩtarɩ-babɛ sɩm dɩ wʋ́ tɔgɩ najara baŋa nɩ mʋ ba tɩ.
26 Zeruzalɛm tɩʋ manco-pɩʋ kʋm tɩtɩ wʋ́ taa keeri mʋ ga ŋɔɔ,
tɩʋ kʋm na yɔɔrɩ kʋ cɔgɩ yɩ nɔɔna daa tǝrǝ kʋ wʋnɩ tɩn ŋwaanɩ.
Kʋ maa wʋ́ taa nyɩ dɩ kaanɩ na je tɩga nɩ bwəri
yɩ o wʋʋ yɔɔrɩ kʋ cɔgɩ tɩn.