4
Maŋa kam kʋntʋ nan na yiǝ,
kaana barpɛ mʋ lagɩ ba tʋ
ba gʋrɩgɩ baarʋ dɩdʋa,
yɩ ba ta dɩd-o wɩ:
«Dɩ́ wʋ́ taa jɩgɩ dɩ́ tɩtɩ ni-wʋdiu,
yɩ dɩ́ daarɩ dɩ́ beeri dɩ́ tɩtɩ yɩra gwaarʋ.
Nan sɛ sɩ dɩ́ kwe n yɩrɩ dɩ́ kɩ dɩ́ yɩra nɩ,
sɩ ba taa maɩ-dɩ ba bǝi dɩbam,
sɩ ba yɩ kɩ dɩbam cavɩɩra nɩ dɩ́ wʋ zʋ banna ŋwaanɩ.»
Baŋa-Wɛ wʋ́ kwɛ tɩʋ kʋm
2 Maŋa kam kʋntʋ nɩ Baŋa-Wɛ wʋ́ pa tɩga kam tweeru dɩ gaarʋ dwi maama puli zanzan sɩ ka lam dɩ ka nɩnwaŋa tiini kʋ gaalɩ. Tɩga kam wʋ́ kɩ wʋdiiru zanzan ka pa Yisɩrayɛlɩ tiinə balʋ ta na daarɩ tɩn, sɩ ba taa jɩgɩ wʋpolo dɩ tɩɩra ka ŋwaanɩ. 3 Baá taa bǝi Siyɔn tɩʋ tiinə ta na daarɩ yɩ ba wʋ Zeruzalɛm nɩ tɩn nɩ: «Wʋ-poŋo tiinə.» Bantʋ yɩra mʋ pʋpʋnɩ ya tiŋi nɩ: baá wəri cɔgɩm dɩm baŋa nɩ. 4 Bɛŋwaanɩ Baŋa-Wɛ mʋ lagɩ DƖ zarɩ Siyɔn kaana bam digiru tɩm DƖ yagɩ. DƖ lagɩ DƖ tʋŋɩ waarɩm ba wʋnɩ nɩ mim mʋ te, DƖ ma DƖ zarɩ jana balʋ na taagɩ Zeruzalɛm tɩʋ kʋm tɩn. 5 Baŋa-Wɛ laan maa wʋ́ pa woro ba kʋ kwǝli Siyɔn piu kʋm dɩ nɔn-kɔgɔ kʋlʋ maama na jeeri da tɩn. Wɩa nɩ nyʋa wʋ́ taa nyɩ dɩ kunkoŋo mʋ kʋ kwǝli je sɩm. Tɩtɩɩ nɩ min-vʋgʋ dɩ maa wʋ́ taa wʋra kʋ nyɩɩna. Kʋʋ́ taa yɩ nɩ tɩʋ kʋm dɩ kʋ lam maama wʋ pwəŋə kuri nɩ mʋ.a 6 Tɩntʋ maa wʋ́ taa kwǝli-ba pa ba na woro wɩa fʋnyʋgʋ maŋa nɩ, yɩ ba daarɩ ba na dalɩm je vu-dɩʋ dɩ dʋa maŋa nɩ.