Vinyə tweeru kara kam ləŋə
5
Amʋ wʋ́ leeni ləŋə a pa a na soe wʋlʋ tɩn,ka na brɩ o Vinyə tweeru kara yɩra taanɩ tɩn ŋwaanɩ:a
Wʋlʋ a na soe tɩn ya jɩgɩ o tweeru kara mʋ,
o na jəri-ka zoŋo kʋlʋ tɩga na lana tɩn baŋa nɩ.
2 O ma va tɩga kam kʋntʋ maama lanyɩranɩ,
yɩ o lɩ kandwa yalʋ na wʋ ka wʋnɩ tɩn.
O ta ma jəri vinyə tweeru na lana tɩn ka wʋnɩ.
O ma pu vwe sɩ o taa maa yɩrɩ-ka.
O ta ma lu goŋo sɩ ba taa kan vinyə tiu biə nyʋa kʋ wʋnɩ.
O laan maa je o cǝgǝ sɩ tiu biə bam bɩ wo-ŋʋna.
Dɩ kʋ dɩ, kʋ nan zɛ kʋ lə bu-balwaarʋ mʋ.
3 «Abam balʋ nan na zʋʋrɩ Zeruzalɛm tɩʋ
dɩ Zuda provɛnsɩ dɩm maama nɩ tɩn,
Zʋ-na amʋ dɩ a kara kam tɩtarɩ á bʋrɩ bʋra.
4 Bɛɛ mʋ a ya daa wʋ́ kɩ dɩ a kara kam
sɩ ka kɩ lanyɩranɩ, yɩ a wʋ kɩ?
A nan ya na beeri wo-ŋʋna tɩn,
bɛŋwaanɩ mʋ a kara kam lǝgi bu-balwaarʋ yɩranɩ?
5 Nan nii a na bʋŋɩ sɩ a kɩ te
dɩ a tweeru kara kam tɩn.
A lagɩ a lɩ wǝǝnu tɩlʋ ya na cɩgɩ-ka tɩn mʋ,
sɩ a daarɩ sɩ kara kam cɔgɩ.
A maa wʋ́ bwəri ka kəbrə kam a dɩ tɩga nɩ,
sɩ vara wanɩ ba zʋ ka wʋnɩ ba nɔnɩ tweeru tɩm.
6 A ta wʋ́ pa gaarʋ yɩranɩ joŋi kara kam.
Nɔɔn-nɔɔnʋ bá goni tweeru tɩm nɛ sɩ o kwɛ-dɩ,
naa o va tɩga kam.
Ga-balɔrɔ dɩ sabarɩ mʋ wʋ́ su kara kam maama.
Amʋ laan maa wʋ́ pa kunkwǝǝnu tɩm ni
sɩ tɩ yɩ pa dʋa nɩ ka wʋnɩ.»
7 Paŋwa Tu Baŋa-Wɛ tweeru kara kam
mʋ yɩ Yisɩrayɛlɩ dwi dɩm.
Zuda dwi tiinə bam maa yɩ gaarɩ dɩlʋ DƖ yi na su tɩn.
DƖ nan ya na beeri sɩ nɔn-ŋʋnnɩ taa wʋra tɩn,
nɔn-gʋra yɩranɩ mʋ DƖ nɛa.
DƖ maa na lagɩ sɩ cɩga taa tʋŋɩ tɩn,
cɔgɩm mʋ DƖ nɛa.
Lɛɛrʋ dɩ waarɩm taanɩ
8 Lɛɛrʋ wʋ́ yi abam balʋ na lɔ sam zanzan
á wǝli da-baŋa nɩ tɩn.
Á ta ma beeri karɩ á joŋə á daŋɩ da-baŋa nɩ.
Kʋ na wǝli fɩɩn, abam daa bá daarɩ je á tiŋi,
yɩ á yɩranɩ laan mʋ wʋ́ taá zʋʋrɩ tɩga kam nɩ.
9 Amʋ ni Paŋwa Tu Baŋa-Wɛ na tagɩ DƖ wɩ:
«Abam sɔ-fwaarʋ tɩntʋ zanzan wʋ́ ji sɔ-kʋrrʋ mʋ,
sɩ nɔɔn-nɔɔnʋ yɩ taa zʋʋrɩ dɩ wʋnɩ.
10 Nɔɔnʋ na jəri Vinyə tweeru zanzan kara kamunu wʋnɩ,
tiu biə bam bá lɛɛrɩ sana ba su kunkolo dɩdʋa.
Nɔɔnʋ maa na kwe wo-dwə bwɛn fugə o du tɩga kam nɩ,
oó na wʋdiu bwaŋa dɩdʋa yɩranɩ mʋ kʋ baŋa nɩ.»
11 Lɛɛrʋ wʋ́ yi balʋ na yǝni ba zaŋɩ tɩtɩɩtɩ
ba yɔɔrɩ ba wʋwʋlɩ ba beeri sana je tɩn.
Ba maa maŋɩ sana nyɔɔm nɩ taan sɩ kʋ yi tɩtɩɩ kʋnkʋrʋ maŋa,
yɩ sana bam joŋi ba wʋbʋŋa maama.
12 Ba na jɩgɩ candiə ba di, ba jɩgɩ kwaanʋ mʋ ba maga.
Ba ta maa jɩgɩ sɩnywaanʋ, dɩ wi ba kɩ sɔɔ,
yɩ ba nyɔ sana.
Sɩ kʋ na yɩ Baŋa-Wɛ, ba yigə tǝrǝ dɩ DƖ na jɩgɩ tɩtʋŋa yalʋ
DƖ kɩ ba tɩtarɩ nɩ tɩn.
Baŋa-Wɛ jɩŋa tɩtʋŋa yam ba saɩ ba yɩra kɔtaa!
13 Kʋntʋ ŋwaanɩ ba lagɩ ba kalɩ Wɛ nɔɔna bam
ba ja vu sa-tɩʋ yigə yigə,
ba na ba ni o taanɩ kuri tɩn ŋwaanɩ.
Kana wʋ́ gʋ ba tɩʋ nɔn-yum tɩm mʋ,
yɩ na-nyɔm dɩ ja ba nɔn-kɔgɔ kʋm maama.
14 Kʋntʋ ŋwaanɩ mʋ curu kɩ kʋ fra kʋ kɩ daanɩ,
pa kʋ yalɩ kʋ tɩtɩ kʋ kɩ da,
sɩ kʋ li nɔɔna bam maama.
Tʋʋnɩ wʋ́ ja tɩʋ kʋm dɩdɛɛra, dɩ nabwənə,
dɩ sa-nyɔra balʋ na kɩ sɔɔ bɔgɩ-bɔgɩ tɩn.
15 Nɔɔna bam wʋ́ ba tɩga nɩ mʋ.
Kamun-nyɩna dɩ wʋ́ di ba cavɩɩra.
16 Paŋwa Tu Baŋa-Wɛ yɩrɩ dɩm mʋ wʋ́ zaŋɩ wɛɛnɩ,
DƖ cɩga sarɩya dɩm na wʋ́ brɩ jaja tɩn ŋwaanɩ.
Wʋ-poŋo Tu Baŋa-Wɛ wʋ́ tɔgɩ DƖ cɩga kam baŋa nɩ mʋ
sɩ DƖ brɩ nɩ DƖ sɩɩnɩ DƖ yɩ wʋ-poŋo tu.
17 Peeni laan maa wʋ́ taa kaagɩ sɩ di wʋdiu tɩʋ kʋm wʋnɩ,
nɩ kʋ yɩ sɩ tɩtɩ pwələ mʋ tɩn.
Vərəb dɩ wʋ́ ba ba zɩgɩ nadunə bam di-dwəənu wʋnɩ
ba taa di ba sui.
18 Lɛɛrʋ wʋ́ yi balʋ na mɩ dɩ ba lwarɩm dɩm
yɩ ba warɩ-dɩ ba yagɩ tɩn.
Ba maa jaanɩ-dɩ ba ve je maama,
nɩnɛɛnɩ nɔɔnʋ na vaŋɩ təriko dɩ ŋʋnɩ te tɩn.
19 Ba ta maa tɛ ba wɩ: «Baŋa-Wɛ nan kɩ lɩla
DƖ tʋŋɩ kʋlʋ DƖ na nɩ DƖ wʋ́ kɩ tɩn,
sɩ dɩ́ yɔɔrɩ dɩ́ na.
DƖ wʋbʋŋa na jaanɩ sɩ DƖ kɩ kʋlʋ tɩn
DƖ nan maŋɩ sɩ DƖ sɩɩnɩ DƖ kɩ mʋ
sɩ dɩ́ lwarɩ kʋ ni nɩ.
Bɛŋwaanɩ, DƖ brɩ nɩ DƖ yɩ Wʋ-poŋo Tu wʋm
na zǝni DƖ nɔɔna Yisɩrayɛlɩ tiinə tɩn mʋ.»
20 Lɛɛrʋ wʋ́ yi balʋ na pipiri lwarɩm sɩ dɩ taa yɩ wo-laa,
yɩ ba daarɩ ba kwe wo-laarʋ pa tɩ yɩ lwarɩm tɩn.
Bantʋ dwi yǝni ba kwe lim mʋ ba ma ji pooni,
yɩ ba daarɩ ba pa pooni dɩm ji lim.
Ba ta maa paɩ wo-cɛɛrʋ yɩ tɩlʋ na sʋna tɩn,
yɩ wo-sʋnnʋ joori tɩ yɩ wo-cɛɛrʋ.
21 Lɛɛrʋ wʋ́ yi balʋ na bʋŋɩ ba tɩtɩɩ nɩ ba wɩ
bantʋ swan mʋ dwe nɔɔna maama tɩn.
Bantʋ paɩ ba tɩtɩ swan mʋ jɩgɩ-ba ya gana.c
22 Lɛɛrʋ wʋ́ yi balʋ na yɩ bɩyɩra sa-nyɔrɩ baŋa nɩ,
yɩ ba tiini ba ye sana kǝm ba dwe nɔɔna maama tɩn.
23 Taanɩ dim baŋa nɩ ba soe sɩ ba taa joŋi dim mʋ
yɩ ba yagɩ balʋ na gɛ bʋra tɩn pa ba viiri zaanɩ.
Ba ta ma da kʋ ŋwaanɩ ba vanɩ nɔn-ŋʋna ba bʋra.
24 Kʋntʋ ŋwaanɩ, bantʋ kugu je mʋ wʋ́ cɔgɩ,
nɩ mim na di ga-kʋrrʋ fasɩ
pa tɩ je lɩla te tɩn.
Ba punnu tɩm dɩ wʋ́ jagɩ tɩ je,
nɩ viu na yǝni kʋ jagɩ fogo te tɩn.
Bɛŋwaanɩ, ba vɩn Paŋwa Tu Baŋa-Wɛ dɩm
na yɩ Yisɩrayɛlɩ dwi dɩm Wʋ-poŋo Tu tɩn niə yam mʋ.
Ba ta ma nii DƖ taanɩ dɩm ba gooni.
25 Kʋntʋ nan mʋ pɛ Baŋa-Wɛ banɩ tiini dɩ fuli dɩ DƖ nɔɔna bam.
DƖ yɔɔrɩ o zǝŋi DƖ jɩŋa mʋ sɩ DƖ magɩ-ba DƖ dɩ tɩga nɩ.
Pweeru tɩm wʋ́ sisiŋi,
yɩ twa dɩ faarɩ tɩʋ kʋm cwe yuu nɩ, nɩ weeru te tɩn.
Dɩ kʋntʋ maama dɩ nan, Baŋa-Wɛ banɩ dɩm ta bá zuri.
DƖ ta wʋ́ twɩ DƖ jɩŋa kam mʋ sɩ DƖ waarɩ-ba.
26 Baŋa-Wɛ wʋ́ zǝŋi maana woŋo mʋ
sɩ DƖ pa dwi-gɛ tiinə balʋ na wʋ yigə yigə tɩn
zaŋɩ ba ba ba zaŋɩ najara dɩ DƖ nɔɔna bam.
DƖ ma fooli DƖ bǝŋi-ba sɩ ba ba.
Nii ba na kɩ lɩla ba wuuri te ba bɩɩnɩ!d
27 Ba nɔɔna bam wʋlʋwʋlʋ ba bwənə.
Ba nan ba tri ba tʋɩ tɩga nɩ.
Dɔɔnɩ ba tui ba wʋlʋwʋlʋ yibiyə nɩ.
Ba wʋlʋwʋlʋ kilə wʋ bwǝli o təŋə nɩ.
Ba natra yam dɩ nan wʋ bwǝli ba nɛ sɩm nɩ.
28 Ba cɩna yam niə yɔɔrɩ ya di mʋ bilǝm-biləm.
Ba tɛn sɩm tɩtɩ dɩ ma saŋɩ sɩ ti sɩ sɩ ta.
Ba siseŋ-nɔɔna bam napɔɔna dana
nɩ kandwa na yɩ te tɩn mʋ.
Ba tərikooru tɩm nɛ dɩ yɩ nɩ kʋrɩm viu na yɩ te tɩn mʋ.
29 Ba tiguri-kaasa nyɩ nɩ nyoŋo na kaasɩ te tɩn mʋ.
Ba maa yɔɔrɩ ba kaasɩ nɩ nyoŋ-pwalɩ na suuri te tɩn.
Ba suuri mʋ yɩ ba tʋɩ ba gʋrɩgɩ ba nwana yam.
Ba nan na jɩgɩ-ya ba maa kɛ tɩn,
nɔɔn-nɔɔnʋ tǝrǝ sɩ kʋ tu joŋi-ya o yagɩ.
30 Maŋa kam kʋntʋ na yiǝ
yɩ ba wuuri balʋ ba na jaanɩ tɩn baŋa nɩ,
kʋʋ́ taa nyɩ dɩ nɩnɩʋ kʋm na wuuri te tɩn mʋ.
Nɔɔnʋ maa na barɩ sɩ o nii tɩga kam na yɩ te tɩn,
kʋ tu wʋ́ na nɩ lim mʋ joŋi je sɩm maama
yɩ wʋ-cɔgɔ dɩ gaalɩ.
Kunkwǝǝnu mʋ wʋ́ kwǝli pooni dɩlʋ na maŋɩ dɩ wʋra tɩn,
pa dɩ ji lim yɩranɩ.