Wɛ tʋŋɩ Ezayi
6
Bɩnɩ dɩlʋ wʋnɩ Pɛ Ozɩasɩ na tɩgɩ tɩn, mʋ a nɛ a Yuutu Wɛ dɩm.a DƖ dɛɛn je paarɩ jangɔŋɔ kʋlʋ na tiini kʋ yɩ wɛ wɛ tɩn yuu nɩ mʋ. DƖ gwar-dɩdɔrɔ kʋm nabili maa su Wɛ-digə kam maama. 2 Serafɛn tiinəb dɛɛn mʋ zɩgɩ DƖ baŋa nɩ. Ba maama dɛɛn jɩgɩ vwana yardʋ yardʋ mʋ. Ba jɩgɩ vwana yale mʋ ba maa kwǝli ba yibiyə, yale dɩ maa kwǝli ba nɛ, yɩ ba daarɩ yale ba jɩgɩ ba jaana. 3 Ba laan maa mɔɔnɩ ləŋə ba brɩ daanɩ, yɩ ba daarɩ ba sɛ-ka ba wɩ:«Paŋwa Tu Baŋa-Wɛ dɩm yɩ wʋ-poŋo tu mʋ.
DƖ maa yɔɔrɩ o yɩ wʋ-poŋo tu yɩ o doŋ tǝrǝ.
O paarɩ-zulǝ yam mʋ su tɩga baŋa ni maama.»c
4 Ba kwǝri sɩm sɔɔ ma pa Wɛ-digə kam sisiŋi ka yi ka kuri na jaanɩ mɛ tɩn, yɩ nyʋa yɔɔrɩ ka pɩ ka wʋʋ kʋm maama.
5 A na nɛ kʋntʋ tɩn, mʋ a tagɩ a wɩ: «Lɛɛrʋ yi amʋ! A tɩgɩ a ti! Bɛŋwaanɩ, a yɩ wʋlʋ ni-taanɩ na digimi tɩn mʋ. A maa zʋʋrɩ dɩ balʋ ni-taanɩ dɩ na digimi tɩn. Dɩ kʋ dɩ, amʋ ta nɛ Pɛ wʋm na yɩ Paŋwa Tu Baŋa-Wɛ tɩn.»
6 Serafɛn tiinə bam dɩdʋa ma jaanɩ o yi a te, yɩ o ze min-calɩ o dɛɛn na mɛ makʋ mʋ o lɩ-dɩ kaanɩm bimbim dɩm baŋa nɩ tɩn o ja o ba. 7 O laan ma kwe-dɩ o dwe a ni, yɩ o ta dɩ amʋ o wɩ: «Nii yo! Min-calɩ dɩntʋ na dwe n ni-vɔɔrʋ tɩn, n tusim dɩm saarɩ dɩ yagɩ, yɩ n lwarɩm dɩm daa tǝri n yuu nɩ.»d
8 Amʋ laan ma ni a Yuutu wʋm kwǝrǝ, o na bwe o wɩ: «Wɔɔ mʋ amʋ wʋ́ tʋŋɩ sɩ o ja dɩbam kwǝrǝ o vu a nɔɔna bam te?» Amʋ dɩ ma ləri a wɩ: «Nii amʋ da! Tʋŋɩ-nɩ!»
9 O laan maa wɩ:
«Ve a nɔɔna bam te sɩ n ta dɩ ba nɩ:
Abam wʋ́ fɔgɩ á cǝgi Wɛ taanɩ dɩm dɩ á zwa,
yɩ á bá ni dɩ kuri.
Abam wʋ́ fɔgɩ á nii dɩ á yiǝ,
yɩ á bá na.
10 Bɛŋwaanɩ nɔɔna bam kʋntʋ wʋbʋŋa tɩgɩ mʋ.
Ba zwa dɩ ma kwarɩmɩ,
yɩ ba daarɩ ba pu ba yiǝ,
sɩ ba yiǝ yɩ zaŋɩ ya na,
sɩ ba zwa yɩ zaŋɩ ya ni,
sɩ ba wʋbʋŋa yɩ zaŋɩ ya lwarɩ Wɛ taanɩ dɩm kuri.
Kʋ na daɩ kʋntʋ, ba ya wʋ́ pipiri ba sɛ amʋ Wɛ yɩ a pa-ba yazurǝ.»e
11 Amʋ dɩ ma bwe‑o a wɩ:
«Amʋ Yuutu, wǝǝnu tɩntʋ wʋ́ taa kɩ taan
sɩ tɩ vu tɩ maŋɩ yən mʋ?»
O ma ləri-nɩ o wɩ:
«Kʋ maŋɩ sɩ kʋ vu kʋ yi maŋa kalʋ ba tɩɩnɩ dɩm na wʋ́ ji di-dwəənu
pa nɔɔna warɩ dɩ wʋnɩ sɩ ba taa zʋʋra tɩn.
Nɔɔna wʋ́ duri ba daarɩ ba sam,
yɩ ba tɩga kam maama dɩ wʋ́ cɔgɩ ka ti.
12 Baŋa-Wɛ wʋ́ zəli DƖ nɔɔna bam
DƖ ja vu DƖ yagɩ tɩʋ kʋdoŋ nɩ yigə yigə.
DƖ ta wʋ́ daarɩ ba tɩga kam pa ka taa tigi yɔɔ yɩranɩ.
13 Nɔɔna fugə maama wʋnɩ dɩdʋa tɩtɩ mʋ na daarɩ da,
tɩga kam daa ta wʋ́ na cɔgɩm mʋ.
Kʋ nan wʋ́ taa yɩ nɩnɛɛnɩ ba na goni tiu,
yɩ kʋ kugu kʋm ta daarɩ tɩga kam nɩ te tɩn mʋ.
Kugu kʋm daa wʋ́ joori kʋ kwi
sɩ Yisɩrayɛlɩ dwi dɩm taa yɩ lanyɩranɩ.»