Emanuyɛlɩ mɩmaŋɩ dɩm
7
Zʋatam bu Ahazɩ na yɩ Ozɩasɩ naa tɩn dɛɛn di Zuda tɩʋ paarɩ. Maŋa kam kʋntʋ nɩ mʋ Siiri tɩʋ pɛ Resin, dɩ Yisɩrayɛlɩ tɩʋ pɛ Peka na yɩ Remalia bu tɩn kɩ daanɩ sɩ ba jeeri Zeruzalɛm tɩʋ kʋm dɩ najara. Ba nan wʋ wanɩ tɩʋ kʋm ba di.a2 Kwǝrǝ ma yi pɛ sɔŋɔ kʋm tiinə ka wɩ: «Siiri tiinə sɔgɩ ni dɩ Efrayim dwi tiinə mʋ sɩ ba kɩ najara dɩ dɩbam!» Taanɩ dɩm ma pa Ahazɩ dɩ o nɔɔna bam yɩra yɔɔrɩ ya saɩ, nɩ vu-fɔrɔ na magɩ tweeru yɩ dɩ zuuli te tɩn.
3 Baŋa-Wɛ laan ma ta dɩ Ezayi DƖ wɩ: «Nuŋi dɩ n bu Sear-Yasubib sɩ á vu á jeeri Pɛ Ahazɩ. Abam wʋ́ na‑o na-fɩra kalʋ na zʋʋrɩ baŋa seeni bugǝ kʋm tɩn ni nɩ, sɩ kʋ maŋɩ dɩ cwǝŋǝ kam mɛ ba na sɔ gwaarʋ tɩn. 4 Ta dɩd-o nɩ:
Ta n ye n tɩtɩ. Ta n zɩgɩ cimm, yɩ kwarɩ fʋʋnɩ dɩ kʋlʋkʋlʋ. Yɩ zaŋɩ n pa n bɩcarɩ ga baarɩ dɩ ba banɩ na zaŋɩ dɩ nmʋ tɩn ŋwaanɩ, lwannʋ tɩntʋ tɩle mim lagɩ dɩ baanɩ tɩn yigə nɩ. Siiri tɩʋ pɛ Resin, dɩ o nɔɔna bam, dɩdaanɩ Remalia bu Peka daa ba jɩgɩ dam. 5 Cɩga ŋwaanɩ, Siiri tɩʋ pɛ, dɩ Yisɩrayɛlɩ tɩʋ pɛ, dɩ Efrayim tiinə bam kɩ ni daanɩ sɩ ba kɩ abam zʋnnɩ. Ba maa tɛ ba wɩ: 6 ‹Dɩ́ wʋ́ vu dɩ́ li Zuda tɩʋ kʋm mʋ dɩ́ fugi kʋ nɔɔna bam yɩ dɩ́ daarɩ dɩ́ joŋi-kʋ dɩ́ taa te. Dɩ́ laan maa wʋ́ tiŋi Tabeeli bu wʋm sɩ o ji ba pɛ.› 7 Yuutu Baŋa-Wɛ nan tagɩ tɩntʋ mʋ DƖ wɩ:
‹Cɩga ŋwaanɩ, kʋ bá tʋŋɩ.
Ba bá ba ba joŋi tɩʋ kʋntʋ ba taa te!
8 Bɛŋwaanɩ, Siiri ba dana kʋ dwe kʋ tʋ-fɔrɔ Damasɩ.
Damasɩ tɩʋ kʋm dɩ nan ba dana kʋ dwe kʋ pɛ Resin.
Sɩ kʋ na yɩ Efrayim tiinə bam,
bɩna fusɩrdʋ-yanu mʋ daarɩ sɩ ba na cɔgɩm,
yɩ ba dwi dɩm je.
9 Efrayim tiinə bam ba dana ba dwe ba tʋ-fɔrɔ Samari.
Samari tɩʋ kʋm dɩ nan ba dana kʋ dwe Remalia bu Peka.
Abam na wʋ kɩ á cɩga dɩ amʋ,
á bá wanɩ á fɔgɩ á zɩgɩ dɩ pu-dɩa.› »
10 Ezayi na tagɩ Wɛ kwǝrǝ kam kʋntʋ o brɩ Pɛ Ahazɩ tɩn mʋ Baŋa-Wɛ daa ta tagɩ dɩ pɛ wʋm DƖ wɩ: 11 «Nan loori amʋ wʋlʋ na yɩ n Tu Baŋa-Wɛ tɩn, sɩ Aá kɩ maana woŋo a brɩ-m, sɩ n lwarɩ nɩ a tagɩ cɩga. Amʋ wʋ́ kɩ maana woŋo nɩ nmʋ na lagɩ te tɩn, kʋ na maŋɩ kʋ yɩ tɩga kuri nɩ naa wɛyuu nɩ yigə yigə dɩ.»
12 Ahazɩ ma ləri o wɩ: «Awo, amʋ bá sɛ sɩ a maŋɩ Baŋa-Wɛ a nii.»
13 Ezayi laan ma ta o wɩ: «Cəgi-na, abam balʋ na nuŋi Pɛ Davidi dwi dɩm wʋnɩ tɩn. Á yǝni á daanɩ Wɛ tɩntʋŋna bam mʋ. Á laan bʋŋɩ sɩ á daanɩ Wɛ dɩlʋ amʋ na tʋŋɩ a pa‑o tɩn tɩtɩ mʋ na? 14 Kʋ nan na yɩ te tɩn, Baŋa-Wɛ tɩtɩ mʋ lagɩ DƖ kɩ maana woŋo DƖ brɩ abam. Nii-na! Busankan-pwələ kam wʋ́ ba o ja pugə o lʋ bəkərə. O maa wʋ́ bəŋi bu wʋm yɩrɩ nɩ ‹Emanuyɛlɩ›c.d 15 Bu wʋm na kɩ nɔɔnʋ o yi sɩ o taa kuri lam yɩ o vɩn lwarɩm, nayɩl-dɔa dɩ tʋʋrʋ yɩranɩ mʋ wʋ́ taa wʋra sɩ o di. 16 Bɛŋwaanɩ, bu wʋm ta na wʋ yi sɩ o pɔɔrɩ lam dɩ lwarɩm daanɩ, dɩ pwa bale bam nmʋ zɩm na kwarɩ fʋʋnɩ dɩ ba tɩn tɩɩnɩ dɩm jigi di-dwəənu. 17 Baŋa-Wɛ nan lagɩ DƖ pa kʋ tiini kʋ ni nmʋ, dɩ n nɔɔna bam, dɩ n ko dwi dɩm maama mʋ. Kʋ zɩgɩ maŋa kalʋ Efrayim tiinə bam na pwɛ ba tɩtɩ dɩ Zuda tɩʋ sɩ kʋ yi zɩm tɩn, cam dɩntʋ doŋ wʋ yi abam. Asiiri tɩʋ pɛ mʋ wʋ́ ba á baŋa.»
18 Maŋa kam kʋntʋ na yiǝ, Baŋa-Wɛ wʋ́ fooli sɩ o pa Ezipi jar-kərə nuŋi ba ba, nɩ nanjwɛ mʋ nuŋi Ezipi bu-tʋlɩ sɩm nɩ yigə yigə tɩn. DƖ ta wʋ́ bəŋi Asiiri jar-kərə sɩ ba dɩ ba, nɩ ba na ciŋi twɩ ba yagɩ te tɩn. 19 Bantʋ wʋ́ nuŋi dɩ kɔgɔ mʋ ba ba ba faarɩ tɩga kam maama. Baá vu ba jǝni bol-fwaarʋ nɩ, dɩ pweeru gugwəəru wʋnɩ, dɩ mɛ na jɩgɩ sabarɩ tɩn nɩ, kʋ wǝli dɩ vara pwəli sɩm nɩ.
20 Maŋa kam na yiǝ, Baŋa-Wɛ wʋ́ bəŋi Asiiri tɩʋ pɛ o nuŋi Efratɩ bugə kam seeni o ba o cɔgɩ abam pa á di á cavɩɩra, nɩ o na kwe fana o ma o ceeri á yuuywe maama, yɩ o fanɩ á twana, sɩ o daarɩ o kooni á yɩra kʋrʋ tɩm maama te tɩn. 21 Maŋa kam kʋntʋ nɩ, valʋ waɩ o pɔɔrɩ nʋa dɩdʋa dɩ bʋnɩ dɩle yɩranɩ sɩ o taa jɩga. 22 Dɩ kʋ dɩ, kʋ tu ta wʋ́ na nayɩla zanzan sɩ o taa di nayɩl-nugə. Balʋ ta na daarɩ tɩga kam nɩ tɩn wʋ́ di nayɩl-nugə dɩ tʋʋrʋ mʋ. 23 Maŋa kam kʋntʋ nɩ, mɛ maama ba ya na jəri vinyə tweeru mʋrʋ yɩ dɩ jeelim yi səbu-dala mʋrʋ tɩn, ga-balwaarʋ dɩ sabarɩ yɩranɩ laan mʋ wʋ́ taa nuŋi da. 24 Nɔɔna laan maa wʋ́ taa ve dáanɩ ba tɔɔra, ga-balwaarʋ dɩ sabarɩ na wʋ́ joŋi je sɩm kʋntʋ maama tɩn ŋwaanɩ. 25 Nɔɔn-nɔɔnʋ daa bá vu pweeru tɩm je sɩm nɩ sɩ o va. Bɛŋwaanɩ, ga-balwaarʋ dɩ sabarɩ yɩranɩ mʋ wʋ́ su je sɩm maama. Dáanɩ mʋ ba nan wʋ́ kalɩ naanɩ ba yagɩ da sɩ dɩ di gaa, yɩ peeni dɩ wʋ́ taa nɔnɩ je sɩm kʋntʋ nɩ.