Baŋa-Wɛ wʋ́ ma Asiiri tɩʋ pɛ o tʋŋɩ
8
Baŋa-Wɛ ma ta dɩ amʋ DƖ wɩ: «Beeri da-pɩlɔgɔ sɩ n pʋpʋnɩ bɩtarbiǝ kʋ wʋnɩ sɩ nɔɔna taa waɩ ba karɩma jaja. Pʋpʋnɩ tɩntʋ: ‹Kɩ-na lɩla á jaanɩ ba jɩjaanɩ dɩm›. 2 Amʋ nan wʋ́ bəŋi Wɛ kaanɩm tu Yuri, dɩ Yeberekɩa bu Zakari, sɩ ba ba ba ji maana tiinə cɩga cɩga ba pa-nɩ.»3 Amʋ dɛɛn ma pəni dɩ a kaanɩ, yɩ o ja pugə o lʋ bəkərə. Baŋa-Wɛ ma ta dɩ amʋ DƖ wɩ: «Bəŋi o yɩrɩ nɩ ‹Kɩ-na lɩla á jaanɩ ba jɩjaanɩ dɩm›.a 4 Bɛŋwaanɩ kʋ loori bu wʋm na wʋ́ ba o lwarɩ sɩ o taa tɛ nɩ: ‹A nu› naa ‹A ko›, Asiiri pɛ wʋm wʋ́ ba o vrɩ Damasɩ jɩjɩgɩrʋ tɩm, dɩ Samari wǝǝnu tɩm maama o ja o viiri.»
5 Baŋa-Wɛ daa ta ma ta dɩ amʋ DƖ wɩ:
6 «Zuda tiinə bam yɔɔrɩ ba vɩn Silʋa bu-tʋla kam na duri mɛmɛ tɩn mʋ, yɩ ba sɛ ba pa Resin, dɩ Remalia bu Peka. 7 Kʋntʋ ŋwaanɩ amʋ lagɩ a bəŋi Asiiri tɩʋ pɛ dɩ o jar-kərə bam maama mʋ sɩ ba ba ba jeeri abam dɩ najara. Kʋʋ́ taa nyɩ nɩ Efratɩ bugə kam na su ka pɛɛlɩ, yɩ ka ta nuŋi ka su ka bu-tʋlɩ sɩm maama, ka ta kɛ ka kwǝli ka buburru tɩm baŋa maama te tɩn. 8 Na bam ta wʋ́ cuuri ba kɛ ba yi Zuda laŋa kam ba su ba pɛɛlɩ je sɩm, yɩ ba daarɩ ba li tɩga kam dɩ nɔɔna bam maama. Emanuyɛlɩ, Wɛ nan wʋ́ kwǝli nmʋ tɩga kam maama, nɩ zuŋə na yarɩgɩ ka vwana ka biə baŋa nɩ te tɩn.»
9 Abam dwi-gɛ tiinə bam, kaasɩ-na tiguri-kaasa,
sɩ á wʋ́ na cɔgɩm!
Cəgi-na, abam tɩɩnɩ dɩlʋ na yɩ yigə yigə tɩn.
Kwe-na á najara zɩla sɩ á kɩ najara!
Á nan wʋ́ na cɔgɩm!
Á na ti yigə sɩ á kɩ najara te dɩ,
á ta wʋ́ na cɔgɩm mʋ zɔŋ-zɔŋ!
10 Abam na jaanɩ wʋbʋŋa sɩ á kɩ te maama dɩ,
ya lagɩ ya vugimi mʋ.
Á na lɩ á wʋbʋŋa yam cwe á tiŋi te dɩ,
ya bá wanɩ ya zɩgɩ.b
Bɛŋwaanɩ, Wɛ wʋra dɩ́ tee nɩc.
Kwarɩ-na Baŋa-Wɛ
11 Baŋa-Wɛ yɔɔrɩ DƖ tɔgɩ DƖ dam dɩm baŋa nɩ mʋ DƖ kaanɩ-nɩ sɩ a dɩ yɩ kwe cwǝŋǝ kalʋ nɔɔna bantʋ na tɔgɩ da tɩn. DƖ maa wɩ:
12 «Bantʋ na jeeli kʋlʋ nɩ: ba kɩ ni sɩ ba baarɩ nɔɔnʋ kwaga, abam yɩ jeeli-kʋ kʋntʋ. Nan yɩ taá kwarɩ-na wǝǝnu tɩlʋ bantʋ na kwarɩ tɩn. Á yɩ taá kɩ fʋʋnɩ dɩ-kʋ. 13 Paŋwa Tu Baŋa-Wɛ yɩranɩ mʋ á wʋ́ taá nii nɩ DƖ yɩ wʋ-poŋo tu. Kʋ maa yɩ Dɩntʋ mʋ á maŋɩ sɩ á taá kwarɩ, yɩ á fʋna dɩ DƖ. 14 Baŋa-Wɛ tɩtɩ wʋ́ taa yɩ dalɩm je DƖ pa abam. Kʋ na yɩ Yisɩrayɛlɩ dwi tiinə di sɩle sɩmd, DƖ nan wʋ́ taa yɩ kandwɛ dɩlʋ na cəli pa nɔɔna garɩ-dɩ ba cɔɔlɩ ba tʋ tɩga nɩ tɩn mʋ. Cɩga tɩn, DƖ wʋ́ taa yɩ cɩkʋ mʋ sɩ DƖ ja Zeruzalɛm tɩʋ nɔn-biə bam dɩ.e 15 Ba zanzan mʋ lagɩ ba tri ba tʋ ba cɩcʋgɩ ba tɩtɩ. Ba dʋna maa wʋ́ cɩ-ba dɩ cɩkʋ ba ja ba viiri.»
Kɩ n tɩɩna Baŋa-Wɛ wʋnɩ
16 Kwe-na niə yalʋ maama Wɛ na pɛ dɩbam tɩn á kɩ daanɩ. Fɔgɩ á tiŋi DƖ kwiə yam, yɩ á daarɩ á kɩ-ya amʋ tɔgɩna bam jɩŋa nɩ. 17 Dɩ Baŋa-Wɛ na jɩgɩ DƖ tɩtɩ DƖ səgi Zakɔbɩ dwi tiinə bam yigə nɩ tɩn dɩ, amʋ ta wʋ́ taa cəgi-DƖ mʋ, amʋ tɩɩna yam na tigi Dɩntʋ baŋa nɩ tɩn ŋwaanɩ.
18 Nii-na amʋ dɩ biə balʋ Baŋa-Wɛ na kɩ amʋ jɩŋa nɩ tɩn mʋ tɩntʋ dɩ́ zɩga. Dɩ́ yɩ maana woŋo mʋ dɩ́ pa Yisɩrayɛlɩ tiinə bam sɩ ba wanɩ ba lwarɩ kʋlʋ Wɛ na lagɩ DƖ kɩ tɩn. Paŋwa Tu Baŋa-Wɛ dɩm na zʋʋrɩ Siyɔn piu kʋm yuu nɩ tɩn nan mʋ pɛ dɩ́ yɩ kʋntʋ.f
19 Nɔɔna nan wʋ́ ta dɩ abam sɩ á beeri vʋra, dɩ sampwəri, dɩ balʋ na yǝni ba zuli ba vʋgʋ tɩn mʋ, yɩ ba wɩ: «Nɔɔna maŋɩ sɩ ba vu ba wa yam yigə nɩ ba beeri ba yigə mʋ. Baá bwɛ dɩ twa sɩ ba lwarɩ kʋlʋ na wʋ́ yi balʋ na ŋwɩ tɩn.»g 20 Nan kwe-na ba taanɩ dɩm kʋntʋ á maŋɩ dɩ Wɛ niə dɩ DƖ zaasɩm dɩm. Ba na tagɩ kʋlʋ tɩn brɩ nɩ: cɩga sɩɩnɩ ka tǝri ba taanɩ dɩm wʋnɩ. 21 Amʋ nɔɔna bam wʋ́ taa kaagɩ tɩga kam maama wʋnɩ ba beerǝ, sɩ wʋ-cɔgɔ dɩ kana taa jɩgɩ-ba. Ba banɩ wʋ́ zaŋɩ ba kana kam ŋwaanɩ. Ba maa wʋ́ kwǝni ba yum wɛɛnɩ ba lwɛ ba pɛ wʋm dɩ ba Wɛ dɩmh. 22 Ba ta wʋ́ tiiri sɩ ba nii tɩga kam je maama nɩ, yɩ ba na cam, dɩ lim-nyɔrɩsɩ, dɩ wʋ-cɔgɔ yɩranɩ mʋ. Ba laan maa wʋ́ vu ba tʋ lim dɩm wʋnɩ.