9
Kʋ nan na yɩ te tɩn, liǝ ya na jɩgɩ nɔɔna balʋ tɩn wʋ́ nuŋi ba cam dɩm wʋnɩ. Faŋa kam tɩn, nɔɔna dɛɛn jɩgɩ Zabulɔn dwi tiinə laŋa kam dɩ Nɛfitali tiinə laŋa kam ba goonə. Maŋa nan na bɩɩnɩ tɩn, Wɛ wʋ́ pa je sɩm kʋntʋ na zulə lanyɩranɩ. Kʋ maa yɩ je sɩlʋ na wʋ nɩnɩʋ kʋm seeni tɩn, dɩ je sɩlʋ na wʋ Zʋrdɛn bugə kam bubɛ dɩdoŋ dɩm kwaga nɩ tɩn, dɩ Galile laŋa kam dwi-gɛ tiinə na zʋʋrɩ mɛ tɩn.
2 Nɔɔna balʋ dɛɛn na beeri lim wʋnɩ tɩn
mʋ pooni laan yi-ba lanyɩranɩ.
Balʋ ya na zʋʋrɩ lim-nyɔrɩsɩ je nɩ yɩ tʋʋnɩ te-ba tɩn,
wɩa laan maa nyɩ ba baŋa nɩ.a
3 Nmʋ Baŋa-Wɛ pɛ tɩʋ kʋm nɔn-biə bam puli zanzan,
pa ba wʋpolo kʋm dɩ puli lanyɩranɩ.
Ba maa jɩgɩ ywəəni ba di nmʋ yigə nɩ,
nɩ vala na jɩgɩ wʋpolo wʋdiiru zagɩm maŋa nɩ te tɩn.
Kʋ ta nyɩ dɩ jar-kərə na di ywəəni,
dɩ ba na wanɩ ba dʋna,
yɩ ba pɔɔrɩ ba jɩjɩgɩrʋ ba pa daanɩ te tɩn mʋ.
4 Bɛŋwaanɩ, n jaanɩ zɩlɩ-zana yalʋ ba ya na zɩŋɩ tɩn,
dɩ da-lwaanʋ tɩlʋ ya na magɩ-ba tɩn
n ja n bwəri n yagɩ.
Kʋntʋ tɩn, n cɔgɩ dam dɩlʋ ba dʋna na kwe
ba ma ba bɛɛsɩ-ba tɩn mʋ,
nɩ nmʋ dɛɛn na kɩ te n cɔgɩ Madɩan tiinə bam dam tɩn.
5 Ba maa wʋ́ kwe ba najara zɩla yam maama
ba ma ba tarɩgɩ mim.
Natra yalʋ maama ba na zʋ cɩtɔgɔ kʋm wʋnɩ tɩn,
dɩ gɔrɔ kʋlʋ maama na fɩrɩmɩ dɩ jana tɩn
wʋ ba tɩ cɔgɩ zɔŋ-zɔŋ.
6 Bɛŋwaanɩ bu mʋ ba lʋgɩ ba pa dɩbam,
bəkərə mʋ ba kwe ba pa dɩbam.
Baá kwe paarɩ dɩm ba daŋɩ o bakalɩ baŋa nɩ mʋ.
Ba wʋ́ taa bə-o nɩ,
kwen-kweenu kajaanɩ tu,
Wɛ dɩlʋ na dana tɩn,
ko wʋlʋ na ba jɩgɩ tiim jəgə tɩn,
yazurə pabu.b
7 O na te o nɔɔna bam te tɩn
wʋ́ taa fɔgɩ kʋ ve yigə mʋ,
pa yazurə jagɩ ya yi je maama.
O lagɩ o jǝni Pɛ Davidi paarɩ jangɔŋɔ kʋm baŋa nɩ mʋ
o di Davidi dwi dɩm paarɩ.c
O ta wʋ́ da cɩga dɩ nɔn-ŋʋnnɩ ŋwaanɩ mʋ
o ma o fɔgɩ o paarɩ dɩm sɩ dɩ zɩgɩ dɩ dam,
kʋ zɩgɩ zɩm sɩ kʋ taa ve maŋa kalʋ na ba ti tɩn.
Paŋwa Tu Baŋa-Wɛ tɩtɩ nan wʋ́ pa wǝǝnu tɩntʋ maama kɩ,
DƖ na sɩɩnɩ yiǝ sɩ tɩ kɩ tɩn ŋwaanɩ.
Wɛ wʋ́ waarɩ Yisɩrayɛlɩ tiinə bam
8 Baŋa-Wɛ maŋɩ DƖ tʋŋɩ DƖ kwǝrǝ
sɩ DƖ ma DƖ kaanɩ Zakɔbɩ dwi dɩm mʋ.
Yisɩrayɛlɩ tiinə bam wʋ́ sɩɩnɩ ba na waarɩm.
9 Nɔɔna bam maama wʋ́ lwarɩ kʋ ni nɩ,
kʋ na maŋɩ kʋ yɩ Efrayim dwi tiinə bam,
dɩ balʋ maama na zʋʋrɩ Samari tɩʋ nɩ tɩn.
Bantʋ yǝni ba brɩ ba tɩtɩ kamunni
yɩ ba ta dɩ yɩrɩgʋ ba wɩ:
10 «Dɩ́ kəbrə yam tʋ tɩga nɩ.
Dɩ́ nan wʋ́ sarɩ kandwa
dɩ́ fɔgɩ dɩ́ lɔ dɩ́ di sɩm.
Ba goni dɩ́ kapʋrrʋ tɩm dɩ ba dɩ tɩga nɩ.
Dɩ kʋ dɩ, dɩ́ wʋ́ joori dɩ́ jəri Sɛdrɩ tweeru mʋ
sɩ tɩntʋ ləri tɩ yuu nɩ.»
11 Baŋa-Wɛ nan lagɩ DƖ ciŋi Pɛ Resin dʋna bam mʋ
sɩ ba jeeri-ba dɩ najara.
DƖ ta wʋ́ pa Yisɩrayɛlɩ tiinə dʋna bam maama zaŋɩ
ba ba ba baŋa nɩ.
12 Siiri tiinə bam wʋ́ nuŋi wa-puli seeni
sɩ Filisi tiinə bam dɩ zɩgɩ wa-zʋʋrɩ seeni ba ba.
Bantʋ maama laan maa wʋ́ kəŋi ba niə
ba li Yisɩrayɛlɩ tiinə bam.
13 Dɩ Paŋwa Tu Baŋa-Wɛ nan na pɛ kʋ zʋ ba yɩra tɩn maama dɩ,
nɔɔna bam ta wʋ pipiri sɩ ba joori DƖ te.
14 Kʋntʋ ŋwaanɩ, Baŋa-Wɛ wʋ́ cɔgɩ Yisɩrayɛlɩ dwi dɩm maama,
nɩ DƖ na goni ba yuu kʋm dɩ ba nabili dɩm dɛ dɩdʋa wʋnɩ te tɩn mʋ.
DƖ wʋ́ go kʋrʋ tiu naga, kʋ wəli dɩ miu, dɛ dɩdʋa wʋnɩ mʋ.
15 Ba nakwa dɩ ba nɔn-yum tɩm mʋ yɩ yuu kʋm.
Ba nijoŋnə balʋ na kaagɩ ba fɔɩ vwan tɩn maa yɩ nabili dɩm.d
16 Balʋ na wʋ nɔɔna bantʋ yigə nɩ tɩn mʋ paɩ ba ywəri cwəŋə.
Kʋ maa paɩ balʋ ba na jɩgɩ ba brɩ cwǝŋǝ tɩn na cɔgɩm.
17 Kʋntʋ ŋwaanɩ mʋ Baŋa-Wɛ yi ba sui ba nɔn-dʋnnʋ tɩm kikiə.
DƖ nan ba duri bɩtara bam dɩ kadənə bam dɩ ŋwaŋa.
Bɛŋwaanɩ, nɔɔna bam maama vɩn Wɛ cwǝŋǝ tɔgɩm mʋ
yɩ ba tʋŋɩ wo-balɔrɔ tɩtʋŋɩ yɩranɩ.
Ba dɩdʋa dɩdʋa maɩ ba niə yam ba maa ŋɔɔnɩ wo-zɔɔna mʋ.
Dɩ kʋntʋ maama dɩ nan, Baŋa-Wɛ banɩ dɩm ta bá zuri.
DƖ ta wʋ́ twɩ DƖ jɩŋa kam mʋ sɩ DƖ waarɩ-ba.
18 Nɔɔna bam pu-sɩŋa tɩtʋŋa yam nyɩ nɩ mim mʋ,
dɩ na jɩgɩ punnu dɩ sabarɩ dɩ di.
Dɩ ta ma di tweeru kagʋa kam bilǝm-biləm,
sɩ nyʋa yɔɔrɩ ka tiini ka taa zaŋɩ wɛɛnɩ.
19 Paŋwa Tu Baŋa-Wɛ ban-lʋm dɩm ŋwaanɩ,
tɩga kam maama wʋ́ di mim mʋ yɩ ka zwɛ maama.
Nɔɔna bam wʋ́ ji nɩ dɛ mʋ sɩ ba kwe-ba ba ma ba tarɩgɩ mim,
yɩ nɔɔn-nɔɔnʋ wʋ wanɩ o cʋrʋ o joŋi o yagɩ.
20 Jazɩm seeni dɩ jagwiə seeni maama
ba kaagɩ ba beeri wʋdiu mʋ sɩ ba di.
Ba nan ta ba di ba sui.
Ba ma kwaanɩ ba di ba tɩtɩ dwi dɩm ya-nwana.
21 Manasɩ dwi tiinə kɩ jara dɩ Efrayim dwi tiinə mʋ,
yɩ Efrayim dwi tiinə bam dɩ kɩ jara dɩ Manasɩ dwi tiinə bam.
Bantʋ bale laan ma kɩ daanɩ
ba kɩ jara dɩ Zuda dwi tiinə bam.
Dɩ kʋntʋ maama dɩ nan, Baŋa-Wɛ banɩ dɩm ta bá zuri.
DƖ ta wʋ́ twɩ o jɩŋa kam mʋ sɩ DƖ waarɩ-ba.