Amɔn dwi tiinə taanɩ
49
Amɔn tiinə bam taanɩ mʋ tɩntʋ.Baŋa-Wɛ na tagɩ kʋlʋ tɩn mʋ tɩntʋ:
«Yisɩrayɛlɩ dwi dɩm daa ba jɩgɩ baara
sɩ ba taa te ba tɩga kam mʋ na?
Kʋ yɩ kʋntʋ ŋwaanɩ mʋ balʋ na kaanɩ Molɔkɩ jwəm tɩn tuǝ
ba joŋi Gadɩ dwi dɩm laŋa kam ba te,
pa ba zʋʋrɩ ka tɩɩnɩ dɩm wʋnɩ na?
2 Maŋa nan lagɩ ka yi sɩ amʋ Baŋa-Wɛ pa sɩ ba ni cɩ-tɔgɔ kaasa kwəri
sɩ najara ba Amɔn tiinə tɩʋ Raba baŋa nɩ.
Kʋʋ́ ji di-dwəənu na tigi zoŋo yuu nɩ tɩn mʋ.
Mim wʋ́ zwɛ kʋ nawuurə yam dɩ di maama.
Yisɩrayɛlɩ tiinə laan maa wʋ́ zəli Amɔn tiinə
balʋ dɛɛn na tu ba zəli-ba tɩn sɩ ba viiri.»
Baŋa-Wɛ na tagɩ te tɩn mʋ kʋntʋ.
3 «Hesebon tiinə, keeri-na Ayi tɩʋ kʋm na cɔgɩ tɩn ŋwaanɩ.
Abam Raba tiinə, á dɩ taá coosǝ!
Kwe-na gwar-zɩnzwara á zʋ
sɩ á taá keerǝ.
Taá duri-na tɩʋ kʋm wʋnɩ á lɛɛna,
ba na lagɩ ba zɩŋɩ á jwəm Molɔkɩ
ba ja ba viiri tɩn ŋwaanɩ.
Ba ta wʋ́ kalɩ dɩ kaanɩm tiinə dɩ balʋ na tʋŋɩ ba pa-dɩ tɩn,
ba ja ba wǝli da ba vu sa-tɩʋ.
4 Amɔn dwi tiinə bam, bɛɛ mʋ yɩ á jɩgɩ tɩɩra á dam dɩma ŋwaanɩ?
Á dam dɩm kʋntʋ nan lagɩ dɩ je mʋ.
Á yɩ kamun-nyɩna!
Á ma á kwe á cɩga á daŋɩ á jɩjɩgɩrʋ baŋa nɩ,
yɩ á wɩ: ‹Nɔɔn-nɔɔnʋ bá wanɩ o zaŋɩ dɩbam baŋa nɩ.›
5 Amʋ Paŋwa Tu Baŋa-Wɛ wʋ́ pa fʋʋnɩ tiini dɩ ja abam,
tɩɩnɩ dɩlʋ na gilimi abam tɩn ŋwaanɩ.
Ba lagɩ ba zəli á maama mʋ pa á duri á jagɩ dayigǝ nɩ.
Nɔɔn-nɔɔnʋ daa bá wanɩ balʋ na duri tɩn
sɩ o joori o la o kɩ daanɩ.
6 Kʋ kwaga nɩ nan, amʋ wʋ́ pa Amɔn tiinə bam joori ba taa jɩgɩ yu-yoŋo.»
Baŋa-Wɛ na tagɩ te tɩn mʋ kʋntʋ.
Edɔm tiinə taanɩ
7 Edɔm tiinə taanɩ mʋ tɩntʋ.
Paŋwa Tu Baŋa-Wɛ na tagɩ te tɩn mʋ tɩntʋ:
«Swan daa tǝrǝ Teman laŋa kam nɩ mʋ na?
Yi-pʋrɩ-nyɩna daa tǝrǝ sɩ ba taa tɛ cɩga na?
Ba wʋbʋŋa maama je mʋ na?
8 Abam balʋ na zʋʋrɩ Dedan nɩ tɩn, pipiri-na á duri,
sɩ á vu á səgi pweeru bɔɔna wʋnɩ!
Bɛŋwaanɩ, maŋa yiǝ sɩ a waarɩ Esayu dwi tiinə bam.
A nan lagɩ a pa lɛɛrʋ ba ba baŋa nɩ mʋ.
9 Nɔɔna na tu abam te sɩ ba gwəri vinyə tiu biə,
ba bá gwəri ba daarɩ tiu biə bam badaara na?
Ŋwɩɩna nan na tu sɩ ba ŋɔ abam tɩtɩɩ nɩ,
ba yǝni ba ŋɔnɩ kʋlʋ ba na beeri tɩn yɩranɩ mʋ.
10 Kʋ nan na yɩ Esayu dwi tiinə bam,
amʋ lagɩ a vrɩ ba wǝǝnu maama mʋ
a daarɩ-ba.
A maa wʋ́ pa ba səgim je sɩm taa tigi jasɩ,
sɩ ba daa yɩ wanɩ ba səgi ba dʋna yigə nɩ.
Ba biə, dɩ ba cʋrrʋ maama wʋ́ na cɔgɩm mʋ.
Ba dwi dɩm wʋ́ je tɩga baŋa nɩ.
11 Nan yagɩ-na á bɩtara,
sɩ amʋ mʋ taa nii ba baŋa nɩ.
Á kadənə dɩ́ wʋ́ wanɩ ba salɩ amʋ yɩra nɩ.»
12 Baŋa-Wɛ na tagɩ te tɩn mʋ tɩntʋ: «Balʋ ya na wʋ maŋɩ sɩ ba na waarɩm tɩn nan maŋɩ sɩ ba nyɔ a ban-zɔŋɔ na-zʋŋa kam wʋʋ na mʋ. Bɛɛ mʋ yɩ á bʋŋɩ sɩ á lu waarɩm dɩm wʋnɩ? Amʋ bá yagɩ abam! Á maŋɩ sɩ á nyɔ ka wʋʋ na mʋ! 13 Amʋ Dam-fɔrɔ Tu Baŋa-Wɛ dugi dɩ a tɩtɩ mʋ nɩ amʋ wʋ́ cɔgɩ Botisera tɩʋ pa kʋ ji wo-zɔɔnɩ nɔɔna yigə nɩ. Nɔɔna wʋ́ taa mwanɩ-kʋ, yɩ ba daarɩ ba ma kʋ yɩrɩ ba sɔɔlɩ lwarɩm ba pa daanɩ. Laŋa kam tɩɩnɩ dɩm maama wʋ́ ji di-dwəənu mʋ maŋa maama.»
14 Amʋ ni kwǝrǝ na nuŋi Baŋa-Wɛ tee nɩ.
DƖ tʋŋɩ nɔɔnʋ mʋ lʋgʋ baŋa dwi maama tee nɩ,
sɩ kʋ tu vu o ta dɩ ba o wɩ:
«La-na daanɩ sɩ á vu á jeeri-ba dɩ najara!
Zaŋɩ-na wɛɛnɩ jara-kǝm ŋwaanɩ!»
Baŋa-Wɛ ma ta dɩ Edɔm tiinə bam DƖ wɩ:
15 «Amʋ nan lagɩ a pa á taá tiini á bwǝnǝ mʋ
lʋgʋ baŋa tɩɩnɩ dɩm maama wʋnɩ,
sɩ nɔɔn-nɔɔnʋ yɩ taa nɩgɩ abam.
16 Abam brɩ á tɩtɩ kamunni mʋ,
yɩ á bʋŋɩ nɩ nɔɔna kwarɩ fʋʋnɩ dɩ abam.
Abam nan ganɩ á tɩtɩ mʋ.
Á zʋʋrɩ pweeru bɔɔna wʋnɩ,
yɩ á wʋ pweeru tɩm yuu nɩ wɛ wɛ.
Abam na maŋɩ á zʋʋrɩ baŋa baŋa,
sɩ kʋ maŋɩ dɩ kaloŋ-zɔŋɔ na sɔgɩ kʋ pogo wɛ wɛ te tɩn dɩ,
amʋ nan ta wʋ́ vaarɩ abam a dɩ tɩga nɩ.»b
Baŋa-Wɛ na tagɩ te tɩn mʋ kʋntʋ.
17 «Edɔm tɩʋ wʋ́ tiini kʋ na cɔgɩm.
Balʋ maama na tɔgɩ kʋ je seeni ba maa kɛa,
kʋʋ́ kɩ-ba yǝǝu.
Baá taa jɩgɩ tɩʋ kʋm ba yáala
yaara yalʋ na yi-kʋ tɩn ŋwaanɩ.
18 Kʋʋ́ yɔɔrɩ kʋ kɩ Edɔm tɩʋ kʋm
nɩ kʋ dɛɛn na kɩ Sodɔm, dɩ Gomɔrɩ,
dɩ tɩɩnɩ dɩlʋ na bwələ da tɩn te tɩn mʋ.
Nɔɔn-nɔɔnʋ daa bá taa zʋʋrɩ je sɩm kʋntʋ nɩ.
Nɔɔn-nɔɔnʋ nan bá maŋɩ dáanɩ.»
Baŋa-Wɛ na tagɩ te tɩn mʋ kʋntʋ.
19 «Amʋ lagɩ a ba a nuŋi Edɔm tiinə baŋa nɩ
sɩ a zəli-ba ba tɩga kam wʋnɩ bɩdwɩ baŋa nɩ mʋ,
Kʋʋ́ taa nyɩ dɩ nyoŋo na nuŋi punnu na li mɛ Zʋrdɛn bugə kam ni nɩ te,
yɩ kʋ zaŋɩ vara dim je sɩm nɩ kʋ zi-ba tɩn mʋ.
Amʋ laan wʋ́ kuri yigə tu
sɩ o taa nii tɩʋ kʋm baŋa nɩ.
Wɔɔ nan mʋ nyɩ dɩ amʋ, sɩ kʋ tu wanɩ o bwe-nɩ?
Yigə tuc tǝrǝ o na wʋ́ wanɩ o dwəni dɩ amʋ.
20 Nan cəgi-na sɩ á lwarɩ bʋbʋŋɩ dɩlʋ
amʋ Baŋa-Wɛ na jɩgɩ Edɔm tiinə bam ŋwaanɩ tɩn.
Taá ye-na a wʋbʋŋa na jaanɩ sɩ a kɩ te
dɩ balʋ na zʋʋrɩ Teman wʋnɩ tɩn.
Ba lagɩ ba zi ba bu-balwa tɩtɩ mʋ ba ja ba viiri.
Amʋ wʋ́ pa ba sam dɩm ji sa-kʋrɩ.
21 Edɔm tɩʋ kʋm na tʋa,
tɩga kam baŋa maama wʋ́ sisiŋi.
Ba kərə kam wʋ́ zaŋɩ ka yi Nanɩ-sʋŋʋ kʋm.
22 Nii-na! Kaloŋ-zɔŋɔ mʋ lagɩ kʋ taa yaarɩ wɛɛnɩ,
sɩ kʋ fʋʋrɩ kʋ tu kʋ ba tɩga kam seeni.
Kʋ nan lagɩ kʋ yarɩgɩ kʋ vwana yam Botisera baŋa nɩ mʋ.
Maŋa kam na yiǝ, fʋʋnɩ wʋ́ ja Edɔm nɔn-babɛ sɩm,
nɩ kaanɩ na yaarɩ sɩ o lʋ yɩ o fʋna te tɩn.»
Damasɩ tiinə taanɩ
23 Baŋa-Wɛ na tagɩ Damasɩ tiinə bam taanɩ te tɩn mʋ tɩntʋ:
«Liǝ mʋ wʋ́ ja Hamatɩ dɩ Arapadɩ tiinə,
ba na ni kwər-balɔrɔ tɩn ŋwaanɩ.
Ba wʋʋ dɩ maa wʋ́ leeri, yɩ ba warɩ ba sin,
fʋʋnɩ na jɩgɩ-ba tɩn ŋwaanɩ.
24 Damasɩ tiinə bam vwana wʋ́ parɩ mʋ.
Ba ta wʋ́ pipiri sɩ ba duri ba lu najara wʋnɩ.
Vuvugə lagɩ ka tʋ ba wʋnɩ mʋ.
Liǝ yɩranɩ mʋ wʋ́ taa jɩgɩ-ba,
yɩ zʋnnɩ dɩ yi-ba zanzan.
Cam wʋ́ zʋ-ba
nɩ kaanɩ na vri pugə sɩ o lʋ te tɩn.
25 Kʋ na yɩ á tɩʋ kʋlʋ yɩrɩ dɛɛn na zaŋɩ
yɩ wʋpolo tiini kʋ wʋ kʋ wʋnɩ tɩn,
nɔɔna wʋ́ viiri ba daarɩ-kʋ.
26 Cɩga ŋwaanɩ, ba lagɩ ba gʋ tɩʋ kʋm nɔn-dʋnnʋ tɩm
kʋ pɩmpala yuu nɩ mʋ.
Maŋa kam na yiǝ, ba jar-kərə bam dɩ wʋ́ tɩ.
27 Amʋ mʋ lagɩ a zwɛ Damasɩ kabri sɩm,
sɩ mim di Bɛn-Hadadɩ dam je sɩm maama.»
Paŋwa Tu Baŋa-Wɛ na tagɩ te tɩn mʋ kʋntʋ.
Kedarɩ tiinə dɩ Hazɔrɩ tiinə taanɩ
28 Kʋ nan na yɩ Kedarɩ dwi tiinə, dɩ Hazɔrɩ dwi tiinə balʋ Babilɔnɩ tɩʋ pɛ Nebukadnɛtsarɩ na di najara wʋnɩ tɩn, bantʋ taanɩ mʋ tɩntʋ.
Baŋa-Wɛ na tagɩ kʋlʋ tɩn mʋ tɩntʋ:
«Zaŋɩ-na sɩ á nuŋi á zaŋɩ najara dɩ Kedarɩ tiinə bam,
sɩ á cɔgɩ nɔɔna bam kʋntʋ na zʋʋrɩ wa-puli seeni tɩn.
29 Vrɩ-na ba vwə, dɩ ba vara bam,
dɩ gwaarʋ tɩlʋ ba na ma kwǝli ba vwə yam tɩn.
Vrɩ-na ba jɩjɩgɩrʋ, dɩ ba yogondə yam maama.
Nɔɔna wʋ́ kaasɩ dɩ kwǝr-dɩa ba wɩ:
‹Dɩ́ dʋna fugi dɩbam mʋ je maama nɩ!›
30 Hazɔrɩ tiinə bam, kɩ-na lɩla á duri a viiri.
Ve á maŋɩ-na pweeru bɔɔna wʋnɩ sɩ á səgi da.»
«Babilɔnɩ tɩʋ pɛ Nebukadnɛtsarɩ yɔɔrɩ o bʋŋɩ sɩ o kɩ abam lwarɩm mʋ.
O wʋbʋŋa jaanɩ mʋ dɩ o na wʋ́ kɩ te o cɔgɩ abam tɩn.»
Baŋa-Wɛ na tagɩ te tɩn mʋ kʋntʋ.
31 Baŋa-Wɛ ta ma ta DƖ wɩ:
«Zaŋɩ-na á nuŋi sɩ á zaŋɩ najara dɩ tɩʋ kʋm kʋntʋ.
Liǝ ba jɩgɩ-ba
yɩ ba ba kwarɩ nɔɔn-nɔɔnʋ.
Ba wʋ pɩ ba tɩʋ kʋm niə dɩ bwəəru naa luuru.
Tɩɩnɩ dɩdonnǝ ba bwələ dɩ ba.
32 Vrɩ-na ba yogondə dɩ ba varɩ-kɔgɔ kʋm maama á taá te.
Kʋ na yɩ balʋ na ceeri ba yum
yɩ ba zʋʋrɩ kagʋa yuu nɩ tɩn
a lagɩ a jagɩ-ba a yagɩ viu wʋnɩ,
yɩ a daarɩ a pa lɛɛrʋ nuŋi je maama nɩ tɩ ba tɩ yi-ba,»
Baŋa-Wɛ na tagɩ te tɩn mʋ kʋntʋ.
33 «Hazɔrɩ wʋ́ ji kagʋa yɩranɩ maŋa maama,
mɛ ga-kakuri na kaagɩ sɩ ve tɩn mʋ.
Nɔɔna daa bá taa zʋʋrɩ je sɩm kʋntʋ nɩ.»
Elam tiinə taanɩ
34 Baŋa-Wɛ kwǝrǝ kalʋ DƖ na pɛ DƖ nijoŋnu Zeremi Elam ŋwaanɩ tɩn mʋ tɩntʋ. Ka dɛɛn nan tu o te maŋa kalʋ Zuda tɩʋ pɛ Sedesɩasɩ na puli sɩ o di paarɩ tɩn mʋ:
35 Paŋwa Tu Baŋa-Wɛ na tagɩ te tɩn mʋ tɩntʋ:
«Nii yo! A lagɩ a ja Elam cɩ-tara bam mʋ a cɔgɩ.
Bantʋ mʋ yɩ nɔn-babɛ ba dwe jar-kərə bam maama.
36 A maa wʋ́ pa viu zɩgɩ je maama nɩ
kʋ dʋlɩ kʋ ba kʋ daanɩ Elam tɩʋ kʋm.
A ta wʋ́ da kʋ ŋwaanɩ a jagɩ tɩʋ kʋm nɔɔna
a yagɩ je maama nɩ.
Tɩʋ bá daarɩ lʋgʋ kʋm baŋa nɩ,
yɩ ba wʋ kalɩ Elam tiinə bam ba yi kʋ wʋnɩ.
37 Amʋ wʋ́ pa Elam tiinə bam taa kwarɩ fʋʋnɩ dɩ ba dʋna,
ba dʋna na beeri-ba sɩ ba gʋ tɩn ŋwaanɩ.
A ta maa wʋ́ yɔɔrɩ a pa lɛɛrʋ ba ba baŋa,
a ban-lʋm dɩm ŋwaanɩ.»
Baŋa-Wɛ na tagɩ te tɩn mʋ kʋntʋ.
«A lagɩ a tʋŋɩ jar-kərə ba baŋa nɩ
sɩ ba ba ba zəli-ba taan,
sɩ kʋ yi ba maama cɔgɩm mʋ.
38 Amʋ lagɩ a cɔgɩ ba pɛ dɩ o nakwa bam mʋ,
sɩ a daarɩ a cwi a paarɩ jangɔŋɔ ba tɩʋ kʋm wʋnɩ.»
Baŋa-Wɛ na tagɩ te tɩn mʋ kʋntʋ.
39 «Maŋa nan daa wʋ́ ba
sɩ amʋ pa Elam tiinə joori ba taa jɩgɩ yu-yoŋo.»
Baŋa-Wɛ na tagɩ te tɩn mʋ kʋntʋ.