Moabɩ tɩʋ taanɩ
48
Moabɩ tɩʋ taanɩ mʋ tɩntʋ.Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ:
«Lɛɛrʋ mʋ wʋ Nebo tɩʋ yuu nɩ,
kʋ na lagɩ kʋ cɔgɩ tɩn ŋwaanɩ.
Karyatayim dɩ wʋ́ yáalɩ
ba na di-kʋ najara wʋnɩ tɩn ŋwaanɩ.
Ba lagɩ ba yigi kʋ dam je sɩm ba dɩ tɩga nɩ mʋ,
pa tɩʋ kʋm nɔn-biə bam na ba cavɩɩra.
2 Zulə daa tərə Moabɩ ŋwaanɩ,
Ba jei ba jeeli o balɔrɔ kəm mʋ Hesebon tɩʋ nɩ:
Ba tɛ mʋ ba wɩ: ‹Á ba-na dɩ́ vu sɩ dɩ́ pa kʋ yɩrɩ je,
dwiə yam tɩtarɩ nɩ!›
Kʋ daarɩ nmʋ Madmɛn tɩyʋ,
ba lagɩ ba pa nmʋ dɩ tɩ mʋ.
Sʋ-lɔŋɔ mʋ wʋ nmʋ kwaga nɩ kʋ ve kʋ bɩɩnɩ.
3 Cəgi-na sɩ á ni nɔɔna na keeri te Horon wʋnɩ,
vuvugə dɩ cam na tʋ ba wʋnɩ tɩn ŋwaanɩ.
4 Moabɩ tɩʋ lagɩ kʋ cɔgɩ maama mʋ.
Kʋ biə bam wʋ́ kaasɩ zanzan.
5 Ba kwe Luhifi cwǝŋǝ kam mʋ ba maa kɛa.
Ba na maa diini tɩn mʋ ba yɔɔrɩ ba keeri taan.
Ba ta kwe Horon cwǝŋǝ kam mʋ ba maa tuǝ,
yɩ ba kaasɩ ba wɩ ba tɩʋ kʋm cɔgɩ.
6 Ba maa wɩ: ‹Duri-na sɩ á lu dɩ á ŋwɩa!
Ve á zʋ-na kagʋa kam wʋnɩ nɩ bɩnaga te.›
7 Abam Moabɩ tiinə kwe á cɩga á daŋɩ
á tɩtʋŋa dɩ á jɩjɩgɩrʋ baŋa nɩ mʋ.
Á dʋna nan wʋ́ wanɩ abam ba di.
Baá kalɩ á jwəm Kemɔsɩ dɩ ba ja ba vu sa-tɩʋ,
kʋ ta wǝli dɩ dɩ kaanɩm tiinə dɩ balʋ na tʋŋɩ ba pa-dɩ tɩn.
8 Á dʋna wʋ́ ba sɩ ba zaŋɩ najara
á tɩɩnɩ dɩm maama baŋa nɩ.
Dɩ maama wʋ́ cɔgɩ fasɩ.
Tɩɩnɩ dɩlʋ na wʋ bolo nɩ tɩn,
dɩ dɩlʋ na wʋ tɩ-kamparɩ nɩ tɩn dɩ,
maama lagɩ dɩ ji di-dwəənu yɩranɩ mʋ,
nɩnɛɛnɩ amʋ Baŋa-Wɛ na tagɩ te tɩn.
9 Kʋ-na yibeeli sɩ á kɩ Moabɩ dɩ wʋnɩ,
kʋ na wʋ́ taa tigi mʋ yɔɔ yɩranɩ tɩn ŋwaanɩ.
Moabɩ tɩɩnɩ dɩm maama wʋ́ ji di-dwəənu mʋ,
sɩ nɔɔn-nɔɔnʋ daa yɩ taa zʋʋrɩ dɩ wʋnɩ.»
10 Kʋ na yɩ wʋlʋ maama na vɩn sɩ o taa tʋŋɩ o pa Baŋa-Wɛ dɩ o wʋʋ maama tɩn, Wɛ wʋ́ sɔɔlɩ lwarɩm DƖ yagɩ kʋ tu yuu nɩ!
Kʋ ta na yɩ wʋlʋ na wʋ sɛ sɩ Moabɩ tiinə jana taŋɩ o sʋ-lɔŋɔ yɩra nɩ tɩn, Baŋa-Wɛ wʋ́ sɔɔlɩ lwarɩm DƖ yagɩ kʋ tu dɩ yuu nɩ!
11 Baŋa-Wɛ ta ma ta DƖ wɩ:
«Kʋ na zɩgɩ Moabɩ nɔn-dʋnnɩ maŋa nɩ
sɩ kʋ yi lele tɩntʋ tɩn,
kʋlʋkʋlʋ wʋ gigir‑o.
Ba ta wʋ kalɩ Moabɩ tiinə ba vu sa-tɩʋ
sɩ ba lwarɩ kʋ na yɩ te tɩn.
Ba nyɩ nɩ sana balʋ dabɩlɩ na tigisi dɩ dɔ tɩn mʋ.
Nɔɔn-nɔɔnʋ ta wʋ kwe-ba kambiə dɩdʋa nɩ,
sɩ o lo o kɩ wʋdoŋ wʋnɩ.
Kʋntʋ nan mʋ pɛ sana bam kʋntʋ ywəəni ba lərə.
Ba lwəm dɩ ta maa yɩ dɩ na yɩ te tɩn.
12 Maŋa nan lagɩ ka yi sɩ a tʋŋɩ nɔɔna Moabɩ tiinə tee nɩ
sɩ ba kwe-ba ba lo ba yagɩ.
Ba lagɩ ba koori sana bam maama mʋ ba lo ba yagɩ,
sɩ ba daarɩ ba cɩcʋgɩ kambi sɩm.
Amʋ Baŋa-Wɛ na tagɩ te tɩn mʋ kʋntʋ.
13 Moabɩ tiinə jwəm Kemɔsɩ wʋ́ pa ba di cavɩɩra,
nɩ Yisɩrayɛlɩ tiinə dɛɛn na pɛ ba jwəm dɩm cɩga Betɛlɩ nɩ
pa ba di cavɩɩra te tɩn.
14 Moabɩ tiinə bam, bɛɛ mʋ yɩ á kaagɩ á tɛ nɩ:
‹Dɩbam yɩ nɔn-bɩbɛ mʋ!
Dɩ́ ye jara-kǝm lanyɩranɩ›?
15 Moabɩ dʋna bam nan wʋ́ kaagɩ ba tɩɩnɩ dɩm ba pu,
yɩ ba daarɩ ba cɔgɩ dɩ maama!
Kʋ na yɩ Moabɩ nɔn-dʋnnʋ tɩlʋ na jɩgɩ jwa tɩn,
ba lagɩ ba gʋ ba maama mʋ.
Pɛ wʋlʋ yɩrɩ na yɩ Paŋwa Tu Baŋa-Wɛ tɩn mʋ tagɩ kʋntʋ.
16 Moabɩ tiinə cam maŋa kam yi ka ti.
Lɛɛrʋ mʋ wʋ́ kɩ lɩla tɩ ba ba baŋa.
17 Abam tɩɩnɩ dɩlʋ maama na gilimi Moabɩ
yɩ á ye o yɩrɩ dɛɛn na zaŋɩ te tɩn,
keeri-na á pa‑o.
Taá tɛ-na nɩ:
‹O paarɩ nacəgə kam laan bwəri!
Moabɩ daa ba jɩgɩ dam!›
18 Abam balʋ na zʋʋrɩ Dibɔna nɩ tɩn,
yagɩ-na á kamunni dɩm,
sɩ á tu á tɩtɩ á taá je fogo wʋnɩ.
Moabɩ dʋna bam bɩɩnɩ abam baŋa,
sɩ ba yɔɔrɩ ba cɔgɩ á dam je sɩm mʋ.
19 Abam balʋ na zʋʋrɩ Aroyɛrɩb nɩ tɩn,
taá zɩgɩ-na cwǝŋǝ ni nɩ sɩ á taá niə.
Á na nɛ baara dɩ kaana na duri sɩ ba lu najara wʋnɩ,
sɩ á bwe-ba nɩ: ‹Bɛɛ mʋ jɩgɩ kʋ kɩ?›
20 Ba laan wʋ́ ləri abam ba wɩ:
‹Moabɩ tiinə mʋ nɛ ba cavɩɩra,
ba dʋna na di-ba tɩn ŋwaanɩ!
Taá coosǝ,
yɩ á daarɩ á keeri-na á pa-ba.
Zɩgɩ-na Aroyɛrɩ bugə kam ni nɩ
á tɔɔlɩ dɩ kwǝr-dɩa nɩ:
Moabɩ tɩʋ kʋm cɔgɩ mʋ fasɩ!›
21 Tɩɩnɩ dɩlʋ na cwi tɩ-kamparɩ sɩm nɩ tɩn waarɩm maŋa yiǝ. Kʋ nan yɩ Holon, dɩ Yaza, dɩ Mefaatɩ, 22 dɩ Dibɔn, dɩ Nebo, dɩ Bɛtɩ-Dibilatayim, 23 dɩ Kiryatayim, dɩ Bɛtɩ-Gamuli, dɩ Bɛtɩ-Meon, 24 dɩ Kiriyɔtɩ, dɩ Botisera. Waarɩm dɩm lagɩ dɩ yi Moabɩ tɩɩnɩ dɩm maama mʋ, dɩlʋ na wʋ yigə yigə dɩdaanɩ dɩlʋ na bwələ tɩn dɩ. 25 Moabɩ tɩʋ dɩ kʋ jar-kərə dam dɩm maama ti mʋ.»
Baŋa-Wɛ na tagɩ te tɩn mʋ kʋntʋ.
26 «Moabɩ tɩʋ dwəni dɩ amʋ Baŋa-Wɛ mʋ.
Nan pa-na sɩ ba nyɔ sana ba bugi.
Baá taa tigi ba tɩtɩ tɩtwaanʋ wʋnɩ mʋ ba bibilə,
sɩ nɔɔna taa jɩgɩ-ba ba kɩ ba mwana.
27 Moabɩ tiinə bam, nii á dɛɛn na jɩgɩ Yisɩrayɛlɩ tiinə á mwanɩ te!
Abam kɩ-ba nɩ ba tɔgɩ ba wʋ ŋwɩɩna wʋnɩ mʋ tɩn.
Abam maa yɔɔrɩ á jɩgɩ-ba á yáala
dɩ á na ŋɔɔnɩ ba taanɩ te tɩn.
28 Abam balʋ na zʋʋrɩ Moabɩ laŋa kam nɩ tɩn,
nuŋi-na á tɩɩnɩ dɩm nɩ,
sɩ á daarɩ á vu á taá zʋʋrɩ pweeru je sɩm wʋnɩ.
Abam wʋ́ taá nyɩ dɩ kunkwǝŋǝ
kalʋ na beeri bɔɔnɩ piu yuu nɩ,
yɩ ka sɔ ka pogo da tɩn mʋ.
29 Dɩ́ ni Moabɩ tiinə na brɩ ba tɩtɩ kamunni te tɩn.
Kʋ yɩ kamunni dɩlʋ na jaanɩ dɩ kɛ jɩŋa tɩn mʋ,
o zəŋi-n-tɩtɩ dɩm,
o kamunni dɩm,
o tee-n-tɩtɩ dɩm,
dɩdaanɩ o bɩcɔŋɔ zʋzʋlɩm dɩm.
30 Amʋ Baŋa-Wɛ nan maŋɩ a ye
ba na brɩ ba tɩtɩ kamunni te tɩn.
Ba kamunni dɩm ba jɩgɩ kuri.
Ba kikiə maama yɩ kafɛ mʋ.
31 Kʋntʋ ŋwaanɩ a nan lagɩ a keeri a pa Moabɩ tɩʋ kʋm,
dɩ a wʋʋ na cɔgɩ Moabɩ tiinə bam maama ŋwaanɩ tɩn.
A ta wʋ́ ŋwanɩ a pa Kir-Aresɛtɩ tiinə bam mʋ.
32 Abam Sibima tiinə bam,
aá keeri a pa abam mʋ,
sɩ kʋ dwǝni a na kɩ te a pa Yazɛrɩ tɩʋ tiinə tɩn.
Abam nyɩ dɩ vinyə tiu,
kʋ nɛ sɩm na tagɩ sɩ yi nɩnɩʋ kʋm ni tɩn mʋ.
Sɩ ma tʋlɩ taa sɩ yi Yazɛrɩ tɩʋ kʋm.
Abam dʋna nan tu á baŋa,
yɩ ba cɔgɩ á mɔɔla dɩ á vinyə tiu biə bam.
33 Wʋpolo dɩ ywəəni daa tǝrǝ
Moabɩ tɩ-ywəŋə kam wʋnɩ.
Amʋ lagɩ a pa nɔɔna daa yɩ kan Vinyə tiu biə
sɩ ba ji sana mʋ.
Ba ya na bagɩ wʋpolo sɔɔ ba yagɩ je sɩm kʋntʋ nɩ te tɩn,
kʋ laan wʋ́ ləni kʋ ji sɔɔ kʋdoŋ mʋ.
34 Nɔɔna tiini ba coosi Hesebon dɩ Elealɛ nɩ.
Ba kərə kam zaŋɩ ka yi Yahaza seeni.
Ka ta zɩgɩ Soarɩ nɩ mʋ ka yi Horon dɩ Egɩlat-Selisiya.
Nimirim bu-tʋla kam tɩtɩ kʋgɩ mʋ.
35 Kʋ na yɩ balʋ na kaagɩ ba kaanɩ jwǝnǝ pweeru yuu nɩ
yɩ ba daarɩ ba zwɛ wǝǝnu ba ma ba zuli ba wa tɩn,
amʋ lagɩ a pa ba je Moabɩ laŋa kam nɩ mʋ.
Amʋ Baŋa-Wɛ na tagɩ kʋlʋ tɩn mʋ kʋntʋ.
36 Mʋ kʋ kuri amʋ bɩcɔŋɔ kʋm keeri Moabɩ tɩʋ ŋwaanɩ.
Kʋ nyɩ dɩ nɔɔnʋ na jɩgɩ gungwəŋə o magɩ
yɩ ba mɔɔnɩ lusəm te tɩn mʋ.
Amʋ wʋʋ cɔgɩ Kir-Aresɛtɩ tiinə dɩ ŋwaanɩ.
Bɛŋwaanɩ, ba jɩjɩgɩrʋ maama je ba jɩŋa nɩ mʋ.
37 Wʋ-cɔgɔ ŋwaanɩ mʋ
ba maama wʋ́ ceeri ba yum,
yɩ ba daarɩ ba fanɩ ba twana yam ba yagɩ.
Nɔɔnʋ maama jɩŋa nɩ ba mɛ sʋgʋ mʋ ba ma ba gwɩn gwɩn,
yɩ ba laan vɔ gwar-zɩnzwara ba təŋə nɩ.
38 Moabɩ tɩʋ sam dɩm nayuni nɩ,
dɩ ba yɛ sɩm maama nɩ
kərə yɩranɩ mʋ yɔɔrɩ ka zaŋa.
Bɛŋwaanɩ, amʋ lagɩ a ja Moabɩ tɩʋ a cɩcʋgɩ,
nɩ nɔɔnʋ na vaɩ kambiə
yɩ o cɩcʋgɩ-ka te tɩn mʋ.
Amʋ Baŋa-Wɛ na tagɩ kʋlʋ tɩn mʋ kʋntʋ.
39 Nii-na Moabɩ tɩʋ na cɔgɩ kʋ tigi te!
Cəgi-na sɩ á ni kʋ nɔn-biə bam na coosi te tɩn!
Ba ma pipiri ba joori dɩ cavɩɩra.
Moabɩ tiinə bam wʋ́ ji wo-zɔɔna
tɩɩnɩ dɩlʋ na gilimi-ba tɩn yigə nɩ.
Nɔɔna wʋ́ taa jɩgɩ-ba ba mwanɩ mʋ.»
40 Baŋa-Wɛ na tagɩ te tɩn mʋ tɩntʋ:
«Moabɩ dʋna bam wʋ́ da ba ba ba baŋa nɩ,
nɩ kaloŋ-zɔŋɔ na zɩgɩ wɛɛnɩ kʋ fʋʋrɩ
sɩ kʋ caalɩ kʋ nwanɩ te tɩn.
Kʋ nan wʋ́ yarɩgɩ kʋ vwana mʋ dɩ baŋa nɩ.
41 Baá wanɩ Moabɩ tɩɩnɩ dɩm
dɩ ba dam je sɩm maama ba di.
Maŋa kam na yiǝ, fʋʋnɩ wʋ́ ja Moabɩ jar-kərə nɔn-babɛ sɩm,
nɩ kaanɩ na yaarɩ sɩ o lʋ yɩ o fʋna te tɩn.
42 Moabɩ tɩʋ lagɩ kʋ cɔgɩ mʋ sɩ ba yɩrɩ saarɩ,
ba na dwəni dɩ Baŋa-Wɛ tɩn ŋwaanɩ.
43 Moabɩ tiinə bam,
lɛɛrʋ, dɩ gwəənu, dɩ cɩgɩrʋ mʋ tigə tɩ cəgi abam.»
Baŋa-Wɛ na tagɩ kʋlʋ tɩn mʋ kʋntʋ.
44 «Wʋlʋ maama na duri sɩ o lu lɛɛrʋ tɩm wʋnɩ,
kʋ tu wʋ́ vu o tʋ goŋo wʋnɩ mʋ.
O nan na bɛ o goŋo kʋm wʋnɩ,
kʋ tu wʋ́ vu o tʋ cɩkʋ wʋnɩ mʋ.
Bɛŋwaanɩ, maŋa kam na yiǝ,
amʋ wʋ́ yɔɔrɩ a waarɩ Moabɩ tiinə bam mʋ.»
Baŋa-Wɛ na tagɩ kʋlʋ tɩn mʋ kʋntʋ.
45 Nɔɔna na kwaanɩ ba duri ba vu ba yi Hesebon,
ba tɩɩna wʋ́ ti mʋ yɩ ba daa warɩ yigə sɩ ba vu.
Bɛŋwaanɩ, min-fɔrɔ mʋ nuŋi Pɛ Sɩhɔn tɩʋ Hesebon wʋnɩ
kʋ tɔgɩ kʋ yi Moabɩ tiinə bam,
ba na soe vuvugə kikiə tɩn ŋwaanɩ.
46 Moabɩ tiinə bam, lɛɛrʋ wʋ á yuu nɩ!
Abam balʋ na zuli á jwəm Kemɔsɩ tɩn wʋ́ na cɔgɩm.
Ba maa wʋ́ kalɩ á biə bam
ba ja ba vu sa-tɩʋ yigə yigə,
bəkəri dɩ bɩsankam maama.
47 «Maŋa nan daa wʋ́ ba
sɩ amʋ pa Moabɩ tiinə joori ba taa jɩgɩ yu-yoŋo.»
Baŋa-Wɛ na tagɩ kʋlʋ tɩn mʋ kʋntʋ.
Moabɩ yɩra taanɩ kweeli yo mʋ.