Filisi tiinə taanɩ
47
Baŋa-Wɛ na pɛ DƖ nijoŋnu Zeremi kwǝrǝ kalʋ Filisi tiinə bam ŋwaanɩ, yɩ Ezipi Pa-farʋ wʋm ya ta wʋ zaŋɩ najara dɩ Gaza tɩʋ tɩn mʋ tɩntʋ:2 Baŋa-Wɛ na tagɩ kʋlʋ tɩn mʋ tɩntʋ:
«Nii-na jazɩm baŋa seeni!
Na-fara zaŋɩ je sɩm kʋntʋ nɩ ba bɩɩna!
Ba nan yɔɔrɩ ba wuuri dɩ baarɩ mʋ
sɩ ba su ba pɛɛlɩ tɩga kam maama
yɩ ba di kʋlʋ maama na wʋ ka wʋnɩ tɩn.
Na bam wʋ́ cɔgɩ tɩɩnɩ dɩm
dɩ balʋ na zʋʋrɩ dɩ wʋnɩ tɩn mʋ.
Nɔɔna wʋ́ taa keeri mʋ ba loori zǝnǝ.
Balʋ maama na zʋʋrɩ tɩga kam wʋnɩ tɩn wʋ́ taa coosǝ.
3 Nɔɔna bam wʋ́ ni siseŋ-nɔɔna napɔɔna na dwana.
Ba dʋna jara-kǝm tərikooru tɩm dɩ maa kɩ sɔɔ,
tɩ nɛ sɩm na dwanɩ tɩn ŋwaanɩ.
Nɔɔna wʋ́ duri ba daarɩ ba biə,
fʋʋnɩ na jɩgɩ-ba yɩ ba vwana parɩ tɩn ŋwaanɩ.
4 Bɛŋwaanɩ, dɛ dɩlʋ Wɛ na wʋ́ cɔgɩ
Filisi tiinə bam maama tɩn yiǝ.
Maŋa yiǝ sɩ balʋ ta na daarɩ
yɩ ba wǝli Tiiri dɩ Sidɔn tiinə tɩn je.
Baŋa-Wɛ ti DƖ yigə mʋ sɩ DƖ cɔgɩ Filisi tiinə balʋ ta na daarɩ tɩn.
Bantʋ ya nuŋi Kaftɔrɩ nɩnɩʋ ni dɩm nɩ mʋ.
5 Gaza tiinə wʋ́ ceeri ba yum wʋ-cɔgɔ ŋwaanɩ.
Asekelon tiinə dɩ wʋ́ kɩ cɩmm.
Abam balʋ ta na daarɩ tɩ-kamparɩ laŋa kam nɩ tɩn,
á ta wʋ́ taa gwɩn á yɩra yam wʋ-cɔgɔ ŋwaanɩ na?
6 Abam maa laara yɩ á tɛ á wɩ:
‹Sʋ-lɔŋɔ kʋlʋ na wʋ Baŋa-Wɛ jɩŋa nɩ tɩn,
nmʋ wʋʋ ta wʋ tʋ dɩ n na goni dɩbam te tɩn na?
Joori n zʋ n polo kʋm wʋnɩ,
sɩ n ta n tigi da n siə!›
7 Kʋ nan bá wanɩ kʋ sin,
Baŋa-Wɛ na pɛ-kʋ kwǝrǝ tɩn ŋwaanɩ.
DƖ ma pa ni sɩ kʋ vu kʋ jeeri Asekelon tiinə,
dɩ balʋ na zʋʋrɩ nɩnɩʋ ni seeni tɩn,
sɩ kʋ cɔgɩ-ba fasɩ.»