Wɛ wʋ́ waarɩ dwi-gɛ tiinə
46:1–51:64
Ezipi tɩʋ taanɩ
46
Baŋa-Wɛ na pɛ DƖ nijoŋnu Zeremi kwǝrǝ kalʋ dwi-gɛ tiinə seeni tɩn mʋ tɩntʋ:2 Ezipi tɩʋ taanɩ mʋ tɩntʋ. Zuda tɩʋ pɛ Zʋzɩasɩ bu Yeoyakim paarɩ dim bɩna yana bɩnɩ dɩm nɩ mʋ Babilɔnɩ tɩʋ pɛ Nebukadnɛtsarɩ dɛɛn wanɩ Ezipi Pa-farʋ Neko najara wʋnɩ. Najara yam dɛɛn kɩ Karekemisi laŋa nɩ mʋ yɩ kʋ bwələ dɩ Efratɩ bugə kam. Ezipi Pa-farʋ jar-kərə bam taanɩ mʋ tɩntʋ:
3 «Tigisi-na á zɩgɩ dɩ á jara zɩla
sɩ á vu á kɩ najara!
4 Kwɛ-na á siseŋ-nɔɔna bam
sɩ á daarɩ á din-sɩ.
Cice á zɩgɩ najara zɩga
yɩ á yice wʋ á yum nɩ.
Dwəri-na á cicwə yam,
sɩ á fɔgɩ á vɔ á jara zɩla yam.»
5 Baŋa-Wɛ ta ma ta DƖ wɩ:
«Bɛɛ mʋ amʋ nan nii a naɩ?
Fʋʋnɩ mʋ tiini dɩ zʋ-ba!
Ba pamaŋ-babɛ sɩm yɔɔrɩ ba titwəni ba joori kwaga mʋ,
ba na tʋ najara wʋnɩ tɩn ŋwaanɩ.
Ba yɔɔrɩ ba kɩ lɩla mʋ sɩ ba duri ba lu.
Ba daa ba barɩ sɩ ba nii kwaga yɩ tɩta.
Nɔɔna fugi-ba mʋ je maama nɩ.
6 Pamaŋ-bɩbɛ sɩlʋ na warɩma tɩn bá lu,
ba na maŋɩ ba duri lɩla te dɩ.
Ba na duri ba yi tɩga kam jazɩm baŋa seeni,
ba lagɩ ba tʋ ba tɩ
Efratɩ bugə kam ni nɩ mʋ.
7 Wɔɔ mʋ zaŋɩ wɛɛnɩ tɩntʋ,
nɩ Nili bugə kam na yǝni ka su ka pɛɛlɩ te tɩn?
8 Ezipi tɩʋ mʋ kʋntʋ.
Kʋ yɔɔrɩ kʋ zaŋɩ mʋ nɩ Nili bugə na kɩ te tɩn.
Kʋ yɔɔrɩ kʋ zaŋɩ mʋ fugi-fugi.
Ezipi tiinə maa tɛ ba wɩ:
‹Dɩ́ wʋ́ zaŋɩ dɩ́ faarɩ lʋgʋ baŋa je maama mʋ.
Dɩ́ laan maa wʋ́ cɔgɩ tɩɩnɩ dɩm,
dɩdaanɩ dɩ nɔn-biə.›
9 Fɩ-na á siseŋ-nɔɔna bam sɩ sɩ vu najara wʋnɩ!
Duri-na á tərikooru tɩm dɩ fʋra!
Abam pamaŋ-babɛ sɩm, nuŋi-na sɩ á zaŋɩ najara.
Kusi tiinə, dɩ Puti tiinə,
ja-na á najara tankwallʋ á nuŋi.
Luudi tiinə, saŋɩ-na á tɛn sɩm.
10 Paŋwa Tu Baŋa-Wɛ nan mʋ te dɛ dɩntʋ.
Dɩ yɩ jɩna ŋwɩɩm dɛ mʋ,
dɛ dɩlʋ nɩ DƖ na wʋ́ ŋwɩ jɩnɩ DƖ dʋna baŋa nɩ tɩn.
DƖ sʋ-lɔŋɔ kʋm wʋ́ gʋ ba maama kʋ ti.
Kʋ ta wʋ́ nyɔ ba jana kʋ su,
sɩ kʋ laan yagɩ ba cɔgɩm.
Bɛŋwaanɩ, kʋ yɩ kaanɩm mʋ Yuutu Baŋa-Wɛ na yɩ Dam-fɔrɔ Tu tɩn ŋwaanɩ
Efratɩ bugə kam ni nɩ.
11 Ezipi tiinə bam, á tiini á bwǝnǝ.
Nan ve-na Galadɩ laŋa kam
á beeri liri á ma á yɔɔrɩ á tɩtɩ.
Abam nan na jɩgɩ liri sɩlʋ á ma á yɔɔrɩ á tɩtɩ tɩn
warɩ abam sɩ sɩ joŋi.
12 Lʋgʋ baŋa dwi tiinə wʋ́ ni
cavɩɩra na jaanɩ abam te tɩn.
Á kərə kam dɩ wʋ́ jagɩ
ka yi tɩga baŋa je maama nɩ.
Abam tɩʋ pamaŋna bam wʋ́ garɩ daanɩ mʋ,
yɩ ba maama laan tri ba tʋ da-baŋa nɩ.»
Babilɔnɩ tɩʋ pɛ Nebukadnɛtsarɩ taanɩ
13 Kwǝrǝ kalʋ Baŋa-Wɛ na pɛ DƖ nijoŋnu Zeremi sɩ kʋ vu Babilɔnɩ tɩʋ pɛ Nebukadnɛtsarɩ na lagɩ o zaŋɩ najara dɩ Ezipi tɩʋ kʋm te tɩn mʋ tɩntʋ:
14 «Tɔɔlɩ taanɩ dɩntʋ sɩ dɩ jagɩ dɩ yi Ezipi tɩɩnɩ dɩm maama.
Pa Migidɔla tiinə ni-dɩ,
sɩ Memfisi tiinə, dɩ Tapanɛzɩ tiinə dɩ ni-dɩ.
‹Kɩ-na á tɩtɩ daanɩ sɩ á kɩ najara!
Bɛŋwaanɩ, nɔɔna balʋ na gilimi abam tɩn
wʋra ba tʋ najara wʋnɩ mʋ.›
15 Bɛɛ mʋ kɩ yɩ abam tɩʋ pamaŋ-bɩbɛa sɩm tʋ ba tigi ba pwi baŋa nɩ kʋntʋ?
Ba warɩ ba zɩgɩ wɛɛnɩ,
Bɛŋwaanɩ, Baŋa-Wɛ mʋ yigi-ba DƖ dɩ tɩga nɩ.
16 Á jar-kərə kɔgɔ kʋm tri kʋntʋ mʋ taan.
Ba laan maa wʋ́ vu ba tʋ ba daŋɩ da-baŋa nɩ.
Baá ta daanɩ ba wɩ:
‹Pa-na sɩ dɩ́ zaŋɩ dɩ́ joori
dɩ́ tɩtɩ nɔɔna te dɩ́ tɩtɩ tɩɩnɩ dɩm wʋnɩ,
sɩ dɩ́ lu najara wʋnɩ yɩ dɩ́ ta ŋwɩ.›
17 Ba na yi sɔŋɔ mʋ baá taa tɛ ba wɩ:
‹Ezipi tɩʋ Pa-farʋ wʋm yɔɔrɩ o yɩ sɔɔ yɩranɩ mʋ.
O ya nɛ cwǝŋǝ sɩ o kɩ o wʋbʋŋa,
yɩ o yagɩ-ka pa ka kɛ ka daarɩ‑o.› »
18 Paŋwa Tu Baŋa-Wɛ nan yɩ Pɛ mʋ cɩga cɩga.
Dɩntʋ mʋ wɩ: «Amʋ yɔɔrɩ a yɩ Ŋwɩa Tu Baŋa-Wɛ mʋ.
Babɩa wʋ́ ba o jeeri abam o na yɩ kamunu
nɩ Tabɔɔrɩ piu kʋm na dwe pweeru maama te tɩn.
Kʋ tu wʋ́ taa zɩgɩ wɛɛnɩ colololo,
nɩ Karmɛlɩ piu na zɩgɩ wɛɛnɩ te nɩnɩʋ kʋm ni nɩ tɩn.
19 Abam balʋ na zʋʋrɩ Ezipi wʋnɩ tɩn,
lu-na á zɩla á kɩ daanɩ,
sɩ ba lagɩ ba kalɩ abam mʋ
ba ja ba vu sa-tɩʋ yigə yigə.
Bɛŋwaanɩ, Memfisi tɩʋ wʋ́ ba kʋ cɔgɩ,
pa kʋ ji di-dwəənu mʋ
yɩ nɔɔn-nɔɔnʋ ba zʋʋrɩ da.
20 Ezipi tɩʋ nyɩ dɩ na-paalɩ mʋ na lana lanyɩranɩ tɩn.
Dɩ kʋ dɩ, pɔɔ nan mʋ wʋ́ nuŋi jazɩm baŋa seeni
kʋ ba kʋ dʋnɩ-kʋ.
21 Ezipi tiinə na jɩnɩ jar-kərə balʋ sɩ ba wǝli-ba tɩn
nyɩ dɩ na-paala na nugi lanyɩranɩ tɩn mʋ.
Bantʋ dɩ pipiri ba duri mʋ sɩ ba lu najara wʋnɩ,
ba na warɩ sɩ ba jeeri ba dʋna bam tɩn ŋwaanɩ.
Kʋ yɔɔrɩ kʋ yɩ lɛɛrʋ maŋa mʋ kʋ pa Ezipi tiinə bam.
Maŋa yiǝ sɩ ba na waarɩm.
22 Ezipi nyɩ nɩ bɩsankwɩa mʋ.
O kɩ lɩla lɩla sɩ o duri o lu, yɩ o seesə,
o dʋna na zəg-o vɩra-vɩra dɩ dam tɩn ŋwaanɩ.
Ba jɩgɩ ba doorə mʋ ba bɩɩnɩ sɩ ba gʋ-o,
nɩ nɔɔna na goni tweeru ba dɩ tɩga nɩ te tɩn.
23 Ba jar-kərə bam na maŋɩ ba lini dɩ kɔgɔ te maama dɩ,
baá goni ba maama ba dɩ tɩga nɩ.»
Baŋa-Wɛ na tagɩ te tɩn mʋ kʋntʋ.
«Bɛŋwaanɩ, ba dʋna bam yɔɔrɩ ba yʋ mʋ
nɩ kayɩra doŋ te tɩn.
Nɔɔna warɩ ba ni sɩ ba ga ba ti.
24 Ezipi tiinə bam wʋ́ di cavɩɩra,
jazɩm baŋa seeni nɔɔna bam na wʋ́ di-ba najara wʋnɩ tɩn ŋwaanɩ.»
25 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn tagɩ tɩntʋ mʋ DƖ wɩ:
«Nii-na! A ti a yigə mʋ sɩ a waarɩ Tebɛsɩ tɩʋ jwəm Amɔn, dɩ Ezipi jwǝnǝ yadonnə yam. A nan ta wʋ́ waarɩ Ezipi Pa-farʋ wʋm, dɩ kʋ pwa badonnǝ bam, dɩ kʋ nɔn-biə bam, kʋ ta wǝli dɩ balʋ maama na kwe ba cɩga ba daŋɩ Ezipi Pa-farʋ wʋm baŋa nɩ tɩn. 26 A yɔɔrɩ a lagɩ a kwe-ba mʋ a kɩ balʋ na beeri-ba sɩ ba gʋ tɩn jɩŋa nɩ. Kʋ maa yɩ Babilɔnɩ tɩʋ Pɛ Nebukadnɛtsarɩ dɩ o dɩdɛɛra bam mʋ kʋntʋ. Kwaga seeni, a nan wʋ́ pa ba daa joori ba taa zʋʋrɩ Ezipi wʋnɩ nɩ faŋa kam tɩn.»
Baŋa-Wɛ na tagɩ te tɩn mʋ kʋntʋ.
Baŋa-Wɛ wʋ́ joŋi DƖ nɔɔna DƖ yagɩ
27 «Amʋ tɩntʋŋna, Zakɔbɩ dwi tiinə bam,
yɩ taá kwarɩ-na fʋʋnɩ.
Yisɩrayɛlɩ tiinə bam, nan yɩ taá liə.
Kʋ na yɩ balʋ na pɩ abam ba yagɩ tɩʋ wʋnɩ yigə yigə tɩn,
a lagɩ a joŋi abam dɩ á dwi dɩm bantʋ jɩŋa nɩ mʋ a yagɩ.
Zakɔbɩ dwi tiinə bam wʋ́ joori ba tɩtɩ tɩʋ dɩ yazurə,
yɩ nɔɔn-nɔɔnʋ daa bá kɩ sɩ fʋʋnɩ zʋ-ba.
28 Amʋ tɩntʋŋna, Zakɔbɩ dwi tiinə bam,
yɩ taá kwarɩ-na fʋʋnɩ.
Bɛŋwaanɩ, amʋ wʋ abam tee nɩ.
Amʋ wʋ́ yɔɔrɩ a cɔgɩ tɩɩnɩ dɩlʋ maama
a ya na jagɩ abam a yagɩ dɩ wʋnɩ tɩn.
Sɩ kʋ na yɩ abam, a bá cɔgɩ abam fasɩ.
Amʋ wʋ́ yǝni a kʋrɩsɩ abam.
A nan na waarɩ abam maŋa dɩ maŋa,
kʋʋ́ taa tɔgɩ cɩga cwǝŋǝ mʋ.»
Baŋa-Wɛ na tagɩ te tɩn mʋ kʋntʋ.