Wɛ na pɛ Baruki kwǝrǝ kalʋ tɩn
45
Zuda tɩʋ pɛ Zʋzɩasɩ bu Yeoyakim paarɩ dim bɩna yana bɩnɩ dɩm nɩ mʋ Wɛ nijoŋnu Zeremi dɛɛn lwǝni Baŋa-Wɛ taanɩ o brɩ Baruki, yɩ Baruki dɩ pʋpʋnɩ-dɩ o tiŋi tɔnɔ wʋnɩ. Zeremi dɛɛn tagɩ dɩd-o o wɩ: 2 «Yisɩrayɛlɩ tiinə Baŋa-Wɛ dɩm na tagɩ kʋlʋ dɩ nmʋ Baruki tɩn mʋ tɩntʋ: 3 Nmʋ kaagɩ n tɛ mʋ n wɩ: ‹Lɛɛrʋ wʋ a yuu nɩ! Baŋa-Wɛ fɔgɩ DƖ kwe wʋ-cɔgɔ mʋ DƖ wǝli a zʋnnɩ dɩm wʋnɩ. Amʋ yɩra laan cɛ mʋ dɩ vuvunim, yɩ siun tǝrǝ a tee nɩ.› »4 Baŋa-Wɛ nan pɛ Zeremi ni sɩ o ta dɩ Baruki nɩ: «Baŋa-Wɛ na tagɩ kʋlʋ tɩn mʋ tɩntʋ: Amʋ lagɩ a yigi wǝǝnu tɩlʋ a na lɔgɩ tɩn mʋ a dɩ tɩga nɩ, sɩ a daarɩ a gɔ wǝǝnu tɩlʋ a na jəri tɩn a yagɩ. A nan wʋ́ kɩ kʋntʋ mʋ tɩga baŋa maama nɩ. 5 Kʋntʋ ŋwaanɩ, nmʋ na beeri kamunni sɩ n pa n tɩtɩ, yɩ kɩ kʋntʋ. Bɛŋwaanɩ, amʋ lagɩ a pa lɛɛrʋ mʋ yi nabiinǝ maama. Kʋ daarɩ nmʋ, amʋ wʋ́ pa, n na ma n ve mɛ maama, sɩ n joŋi n tɩtɩ n yagɩ. Amʋ Baŋa-Wɛ na tagɩ te tɩn mʋ kʋntʋ.»