Jwǝnǝ kaanɩm wʋ́ ja waarɩm kʋ ba
44
Baŋa-Wɛ dɛɛn daa ma pa Zeremi kwǝrǝ kantʋ sɩ o pa Zuda tiinə balʋ na tu ba zʋʋrɩ Ezipi nɩ tɩn. Balʋ na zʋʋrɩ Migidɔla nɩ, dɩ Tapanɛzɩ nɩ, dɩ Memfisi nɩ, dɩdaanɩ Ezipi tɩʋ jagwiə seeni tɩn mʋ kʋntʋ.2 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ:
«Abam yi nɛ lɛɛrʋ tɩlʋ a na pɛ kʋ yi Zeruzalɛm tɩʋ kʋm, dɩ Zuda tɩɩnɩ dɩm maama tɩn. Je sɩm kʋntʋ zɩm tigi di-dwəənu yɩranɩ mʋ. Nɔɔn-nɔɔnʋ ba zʋʋrɩ dɩ wʋnɩ. 3 Kʋ nan yɩ ba lwarɩm kikiə yam ba na kɩ tɩn ŋwaanɩ mʋ a banɩ zaŋɩ dɩ ba. Ba zwɛ wǝǝnu ba ma kɩ kaanɩm ba pa wa-yɔɔrʋ. Ba ma yɔɔrɩ ba zuli wa yalʋ ba ya na yǝri tɩn. Abam, dɩ á nabaara bam dɩ ya yəri-ya. 4 A ma yǝni a tʋŋɩ a nijoŋnǝ bam á tee nɩ kuni zanzan. Ba dɩ maa tɛ ba wɩ: ‹Yɩ taá kɩ wo-zɔɔna yantʋ amʋ na tiini a culi tɩn!› 5 Amʋ nɔɔna bam nan wʋ cəgi ba ni-kaana yam. Ba wʋ sɛ sɩ ba yagɩ ba lwarɩm kikiə yam, yɩ ba ta yɔɔrɩ ba zuli wa-yɔɔrʋ tɩm kʋntʋ.a 6 Kʋntʋ ŋwaanɩ, a logi a ban-lʋm Zuda tɩɩnɩ dɩm baŋa nɩ, dɩ Zeruzalɛm tɩʋ cwe sɩm baŋa nɩ, pa tɩɩnɩ dɩm kʋntʋ tiini dɩ cɔgɩ dɩ tigi di-dwəənu yɩranɩ, dɩ zɩm maama.»
7 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ te tɩn mʋ tɩntʋ:
«Bɛŋwaanɩ mʋ abam yɔɔrɩ á lagɩ sɩ á ja lɛɛrʋ á ba á tɩtɩ baŋa? Abam lagɩ sɩ á baara, dɩ á kaana, dɩ á biə, dɩ bu-sɩsɩn sɩm maama mʋ je, sɩ nɔɔn-nɔɔnʋ daa yɩ daarɩ Zuda dwi tiinə bam wʋnɩ mʋ na? 8 Á na tu á zʋʋrɩ Ezipi tɩʋ yo seeni yɩ á jɩan dɩ kɩ wǝǝnu tɩlʋ tɩn dɩ á na zuli wa-yɔɔrʋ te tɩn mʋ zaŋɩ a banɩ. Á bʋŋɩ sɩ á da kʋ ŋwaanɩ á cɔgɩ á tɩtɩ mʋ na? Dwi tiinə maama wʋ́ yáalɩ abam mʋ yɩ ba daarɩ ba taa maɩ á yɩrɩ ba sɔɔlɩ lwarɩm ba pa daanɩ. 9 Abam swe á nabaara bam dɛɛn na tʋŋɩ lwarɩm kikiə yalʋ tɩn mʋ na? Á ta swe Zuda tɩʋ pwa, dɩ ba kaana bam, kʋ ta wǝli dɩ abam tɩtɩ, dɩ á kaana bam na kɩ lwarɩm kikiə yalʋ tɩn mʋ na? Abam maama kɩ á tusi kʋntʋ mʋ Zeruzalɛm tɩʋ kʋm wʋnɩ dɩdaanɩ Zuda tɩɩnɩ dɩm maama nɩ. 10 Dɩ zɩm maama dɩ, abam wʋ brɩ nɩ á wʋrʋ cɔgɩ dɩ á kikiə yam. Á ma á ba nɩgɩ-nɩ dɩ. Abam brɩ á wʋ sɛ sɩ á tɔgɩ niə yalʋ a dɛɛn na kwe a pa abam dɩ á nabaara bam tɩn.»
11 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ:
«Amʋ wʋbʋŋa laan nan jaanɩ ya ti sɩ a pa lɛɛrʋ ba á baŋa mʋ, sɩ a daarɩ a cɔgɩ Zuda dwi dɩm maama. 12 Cɩga tɩn, kʋ na yɩ Zuda tiinə balʋ ya na daarɩ ba tɩʋ kʋm nɩ yɩ ba wʋbʋŋa laan ja sɩ ba vu Ezipi ba taa zʋʋrɩ da tɩn, amʋ lagɩ a cɔgɩ-ba mʋ fasɩ. Ba maama wʋ́ maŋɩ Ezipi tɩʋ nɩ yo mʋ ba tɩ. Kʋ na maŋɩ kʋ yɩ nɔn-kamunə dɩ nɔn-balwa dɩ, ba maama lagɩ ba tɩ najara wʋnɩ, naa kana baŋa nɩ mʋ. Á wʋ́ ji wo-zɔɔna nɔɔna maama yiǝ nɩ, sɩ ba taa nɩɩsɩ abam. Baá taa mwanɩ abam, yɩ ba daarɩ ba taa maɩ á yɩrɩ ba sɔɔlɩ lwarɩm ba pa daanɩ. 13 A lagɩ a kɩ balʋ na tu ba zʋʋrɩ Ezipi nɩ tɩn nɩ a na kɩ te dɩ balʋ na wʋ Zeruzalɛm nɩ tɩn mʋ. Ba dɩ wʋ́ tɩ najara wʋnɩ, dɩ kana baŋa nɩ, dɩ yawɩ-cɛɛrʋ baŋa nɩ mʋ. 14 Zuda tiinə balʋ maama ya na daarɩ yɩ ba vu Ezipi tɩʋ ba zʋʋrɩ da tɩn wʋlʋwʋlʋ bá lu cam dɩm kʋntʋ wʋnɩ. Ba daa bá joori Zuda tɩʋ kʋm, sɩ ba taa zʋʋrɩ da, dɩ ba na maŋɩ ba jɩgɩ tɩɩna sɩ ba joori te tɩn dɩ. Sɩ ba wʋnɩ nɔɔna fɩnfɩɩn yɩranɩ mʋ lagɩ ba joori ba tɩtɩ tɩʋ kʋm nɩ.»
15 Zeremi na tagɩ kʋntʋ tɩn, baara balʋ maama na ye nɩ ba kaana yǝni ba zwɛ wǝǝnu ba ma kɩ kaanɩm ba paɩ wa yadonnə tɩn, dɩ kaana balʋ maama na zɩgɩ da tɩn ma ləri o taanɩ dɩm. Ba dɛɛn yɩ Zuda tiinə balʋ maama na tu ba zʋʋrɩ Ezipi tɩʋ kʋm baŋa dɩ kuri seeni tɩn mʋ. 16 Ba maa wɩ: «Dɩ́ bá sɛ taanɩ dɩlʋ n na tɔgɩ Baŋa-Wɛ yɩrɩ ŋwaanɩ n ta n brɩ dɩbam tɩn. 17 Dɩ́ wʋ́ kɩ dɩ́ wʋbʋŋa na jaanɩ sɩ dɩ́ kɩ te maama tɩn mʋ. Dɩbam lagɩ dɩ́ zwɛ wǝǝnu mʋ dɩ́ kɩ kaanɩm dɩ pa dɩ́ Wɛyuu Pa-kana jwəm dɩm mʋ, yɩ dɩ́ daarɩ dɩ́ lo sana dɩ́ pa-kʋ. Dɩ́ wʋ́ yɔɔrɩ dɩ́ kɩ nɩnɛɛnɩ dɩbam, dɩ dɩ́ kwə, dɩ dɩ́ pwa, dɩ dɩ́ nakwa dɛɛn na kɩ te Zeruzalɛm tɩʋ kʋm wʋnɩ dɩ Zuda tɩɩnɩ dɩm maama wʋnɩ tɩn mʋ. Bɛŋwaanɩ, maŋa kam kʋntʋ nɩ, dɩ́ dɛɛn jɩgɩ wʋdiiru dɩ́ di dɩ́ sui, yɩ lɛɛrʋ ba yi dɩbam. 18 Nan nii! Dɩ́ daa na ba zwɛ wǝǝnu dɩ́ paɩ ‹Wɛyuu Pa-kana kam›, yɩ dɩ́ daarɩ dɩ́ loi sana dɩ́ pa‑o tɩn, dɩ́ brɩ dɩ́ ba naɩ ywəəni. Dɩ́ nɔɔna bam yɔɔrɩ ba tʋ najara wʋnɩ mʋ, yɩ kana dɩ gʋɩ ba badonnǝ.»
19 Kaana bam dɩ ma ta ba wɩ: «Dɩbam dɛɛn na jɩgɩ wǝǝnu dɩ́ zwɛ dɩ́ paɩ Wɛyuu Pa-kana kam, yɩ dɩ́ ta loi sana dɩ́ pa‑o tɩn, dɩ́ banna yǝri kʋ ni nɩ na? Bantʋ nan mʋ yǝni ba zɩgɩ dɩ́ kwaga nɩ yɩ dɩ́ fɔgɩ maasa na lwǝni jwə-kana kam kʋntʋ nyɩnyʋgʋ.»
20 Zeremi ma ta dɩ nɔɔna balʋ na zɩgɩ ba tɛ taanɩ dɩm kʋntʋ ba brɩ-o, baara dɩ kaana maama tɩn, o wɩ: 21 «Kʋ na yɩ wǝǝnu tɩlʋ abam, dɩ á kwə bam, dɩ á pwa, dɩ á nakwa, dɩ tɩʋ kʋm nɔɔna maama dɛɛn na zwɛ ba ma ba kɩ kaanɩm ba pa wa yadonnə Zeruzalɛm tɩʋ kʋm wʋnɩ dɩ Zuda tɩɩnɩ dɩm maama wʋnɩ tɩn, abam bʋŋɩ nɩ á kikiə yam kʋntʋ wʋ zʋ Baŋa-Wɛ wʋbʋŋa nɩ mʋ na? DƖ nan wʋ swe ya swiə. 22 Baŋa-Wɛ yɩra dɛɛn yɔɔrɩ ya cɛ dɩ á wʋ-lʋŋʋ tɩtʋŋa, dɩ á kəm-balwaarʋ yam mʋ. Kʋntʋ ŋwaanɩ o pɛ á tɩga kam ji di-dwəənu yɩranɩ yɩ nɔɔn-nɔɔnʋ ba zʋʋrɩ ka wʋnɩ. Nɔɔna maa yǝni ba maɩ ka yɩrɩ ba sɔɔlɩ lwarɩm ba pa daanɩ. 23 Abam zɩm na jɩgɩ lɛɛrʋ tɩntʋ á di tɩn zɩgɩ á tɩtɩ yɩra nɩ mʋ. Abam zwɛ wǝǝnu mʋ á pa jwǝnǝ pa á tusi á cɔgɩ Baŋa-Wɛ yigə. Abam nan ba sɛ DƖ niə yam, dɩ kwiə yalʋ DƖ na tiŋi DƖ pa abam sɩ á taá tɔgɩ-ya tɩn.»
24 Zeremi laan ma ta dɩ nɔɔna bam maama, dɩ kaana bam maama, o wɩ: «Abam Zuda tiinə balʋ maama na tu á zʋʋrɩ Ezipi tɩʋ nɩ tɩn, cəgi-na Baŋa-Wɛ taanɩ dɩntʋ. 25 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: Abam dɩ á kaana bam ya na maŋɩ á ja wʋbʋŋa sɩ á kɩ te tɩn mʋ á sɩɩnɩ á jɩgɩ á kɩ. Bɛŋwaanɩ, abam fǝri ni mʋ yɩ á wɩ: ‹Dɩbam wʋ́ kɩ dɩ́ su kampwələ kalʋ dɩ́ na wɩ dɩ́ wʋ́ zwɛ wǝǝnu dɩ́ pa Wɛyuu Pa-kana kam, sɩ dɩ́ ta lo sana dɩ́ pa‑o tɩn.›
Kʋ maŋɩ. Yɔɔrɩ á kɩ-na á na fǝri á ni nɩ á wʋ́ kɩ te tɩn. 26 Abam Zuda tiinə balʋ nan na zʋʋrɩ Ezipi tɩʋ wʋnɩ tɩn, cəgi-na taanɩ dɩlʋ Baŋa-Wɛ na maŋɩ sɩ DƖ ta dɩ abam tɩn: Amʋ dugi a yɩrɩ kamunu kʋm ŋwaanɩ nɩ abam Zuda tiinə balʋ na wʋ Ezipi tɩʋ je sɩlʋ maama nɩ tɩn wʋlʋwʋlʋ daa bá kwe amʋ yɩrɩ o ma o du durə, naa o fǝri ni sɩ o ta wɩ: ‹Amʋ kwe Yuutu Baŋa-Wɛ na yɩ Ŋwɩa Tu tɩn yɩrɩ sɩ a ta tɩntʋ.› 27 Amʋ yɔɔrɩ a zɩgɩ a nii-ba sɩ a ja lɛɛrʋ mʋ a ba ba baŋa, sɩ kʋ daɩ lam. Zuda tu wʋlʋ maama na wʋ Ezipi nɩ tɩn wʋ́ tɩ mʋ. Ba lagɩ ba tɩ najara wʋnɩ mʋ, naa kana mʋ wʋ́ gʋ-ba, sɩ ba maama je. 28 Kʋ nan na yɩ te tɩn, ba fɩnfɩɩn wʋ́ lu najara wʋnɩ dɩ ba ŋwɩa, sɩ ba nuŋi Ezipi tɩʋ nɩ ba joori ba jǝni Zuda laŋa kam nɩ. Kʋntʋ tɩn, Zuda tiinə balʋ maama na daarɩ tɩn wʋ́ lwarɩ wʋlʋ taanɩ na sɩɩnɩ dɩ kɩ tɩn, kʋ na yɩ amʋ nyɩm dɩm, naa bantʋ nyɩm dɩm mʋ.
29 Baŋa-Wɛ ta na tagɩ kʋlʋ tɩn mʋ tɩntʋ: A nan wʋ́ kɩ mɩmaŋɩ sɩ á lwarɩ nɩ a sɩɩnɩ a lagɩ a waarɩ abam mʋ je sɩntʋ nɩ. Kʋ ta wʋ́ pa á maanɩ nɩ amʋ na tagɩ nɩ lɛɛrʋ tɩlʋ maama wʋ́ yi abam tɩn wʋ́ sɩɩnɩ tɩ kɩ. 30 A lagɩ kwe Ezipi tɩʋ Pa-farʋ Hofera a kɩ o dʋna balʋ na beer‑o sɩ ba gʋ tɩn jɩŋa nɩ mʋ. Kʋʋ́ kɩ nɩ a dɛɛn na kwe Zuda tɩʋ pɛ Sedesɩasɩ a kɩ o dʋnʋ Babilɔnɩ tɩʋ pɛ Nebukadnɛtsarɩ jɩŋa nɩ te tɩn mʋ. Nebukadnɛtsarɩ dɩ nan ya beer‑o mʋ sɩ o gʋ.»