43
Zeremi dɛɛn ma ta dɩ nɔɔna bam kwǝrǝ kalʋ maama ba Tu Baŋa-Wɛ na pɛ‑o sɩ o ta tɩn.2 O na ti tɩn mʋ Hosaya bu Azarɩa, dɩ Kareya bu Yohanan, dɩ kamun-nyɩna badaara bam tagɩ dɩ Zeremi ba wɩ: «N fɔɩ vwan mʋ! Dɩ́ Tu Baŋa-Wɛ brɩ DƖ wʋ tʋŋɩ-m dɩbam tee nɩ sɩ n ta nɩ dɩ́ yɩ ve dɩ́ taa zʋʋrɩ Ezipi nɩ.3 Aye, kʋ nan yɩ Neriya bu Baruki mʋ sʋgɩ-m sɩ n ta tɩntʋ n brɩ dɩbam. O maa bʋŋɩ sɩ Babilɔnɩ tiinə bam mʋ na dam dɩ́ baŋa nɩ, sɩ ba wanɩ ba gʋ dɩbam, naa ba kalɩ dɩbam ba ja ba viiri.»
4 Yohanan, dɩ jar-kərə yigǝ tiinǝ bam maama, dɩ nɔɔna bam maama ma vɩn Baŋa-Wɛ ni dɩm sɩ ba maŋɩ Zuda laŋa kam nɩ. 5 Yohanan, dɩ jar-kərə yigǝ tiinǝ bam ma la nɔɔna balʋ maama na nuŋi ba ya na jagɩ ba wʋ tɩɩnɩ dɩlʋ maama wʋnɩ yɩ ba joori Zuda laŋa kam sɩ ba taa zʋʋrɩ da tɩn ba kɩ daanɩ sɩ ba kɛ Ezipi. 6 Ba ta ma ja nɔɔna balʋ maama Babilɔnɩ pamaŋna bam yigə tu Nebuzaradan na yagɩ o pa Ahikam bu Gedalia sɩ o taa nii-ba tɩn ba ja ba kɛ. Baara, dɩ kaana dɩ biə maa wʋ kɔgɔ kʋm wʋnɩ, kʋ wǝli dɩ pɛ bukwa bam. Wɛ nijoŋnu Zeremi dɩdaanɩ Neriya bu Baruki dɩ dɛɛn tɔgɩ ba wʋ ba wʋnɩ. 7 Nɔɔna bam ma yɔɔrɩ ba vɩn Baŋa-Wɛ ni dɩm, yɩ ba vu Ezipi. Ba ma vu ba yi Tapanɛzɩ tɩʋ kʋm.a
8 Ba na wʋ tɩʋ kʋm kʋntʋ nɩ tɩn, mʋ Baŋa-Wɛ pɛ Zeremi DƖ kwǝrǝ DƖ wɩ: 9 «Beeri kandwa-zana n ja n vu Ezipi Pa-farʋ sɔŋɔ kʋlʋ na wʋ Tapanɛzɩ nɩ tɩn. Kwe-ya n suli dɔgɔ wara bimbim dɩm dɩ na wʋ pa-digə kam ni dɩm nɩ. Nan kɩ kʋntʋ sɩ Zuda dwi tiinə bam taa zɩgɩ da ba niə. 10 Laan ta dɩ ba n wɩ: ‹Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: Amʋ lagɩ a tʋŋɩ a bəŋi Babilɔnɩ tɩʋ Pɛ Nebukadnɛtsarɩ mʋ sɩ o ba yo. Wʋntʋ yɩ a tɩntʋŋnʋ mʋ. Amʋ laan maa wʋ́ cwi o paarɩ jangɔŋɔ kʋm sɩ kʋ ja tɩga kandwa yantʋ a na səgi tɩn baŋa nɩ. Wʋntʋ wʋ́ yarɩgɩ o woro kʋm sɩ kʋ yi yantʋ dɩ. 11 Oó ba o zaŋɩ najara dɩ Ezipi tiinə bam. Balʋ na maŋɩ sɩ ba tɩ tɩn maa wʋ́ tɩ. Balʋ maa na maŋɩ sɩ ba kalɩ-ba ba ja viiri tɩn, baá kalɩ-ba ba ja viiri mʋ. Balʋ nan na maŋɩ sɩ ba tɩ najara wʋnɩ tɩn wʋ́ yɔɔrɩ ba tɩ najara wʋnɩ mʋ. 12 Amʋ wʋ́ pa Nebukadnɛtsarɩ zwɛ Ezipi tiinə jwǝnǝ di sɩm sɩ o daarɩ o zwɛ ba jwǝnǝ yam dɩ, naa o pɛ-ya o ja o viiri. O lagɩ o zwarɩ Ezipi tɩga kam mʋ lanyɩranɩ, nɩ nayɩrʋ na yǝni o lɩ kasɩlɩ o gɔrɔ yɩra nɩ te tɩn. O laan maa wʋ́ joori o tɩtɩ tɩʋ dɩ yazurə. 13 O yɔɔrɩ o lagɩ o zʋ digə kalʋ Ezipi tiinə na zuli wɩa jwəm dɩm ka wʋnɩ tɩn mʋ. O ta wʋ́ yigi kandwa yalʋ ba na cwi ba jwəm dɩm kʋntʋ ŋwaanɩ tɩn o dɩ tɩga nɩ. O laan maa wʋ́ zwɛ Ezipi tiinə jwǝnǝ yam di sɩm maama dɩdaanɩ mim.› »