Nɔɔna bam vɩn Baŋa-Wɛ ni
42
Jar-kərə yigǝ tiinǝ bam maama dɛɛn ma vu Wɛ nijoŋnu Zeremi te. Bantʋ maa yɩ Kareya bu Yohanan, dɩ Hosaya bu Yezanɩa. Ba ma tɔgɩ dɩ nɔɔna badonnǝ na yɩ nɔn-kamunə dɩ nɔn-balwa dɩ, 2 ba vu ba yi Wɛ nijoŋnu Zeremi te yɩ ba ta dɩd-o ba wɩ: «Dɩ́ loori-m! Cəgi dɩ́ na jɩgɩ kʋlʋ sɩ dɩ́ loori n tee nɩ tɩn. Loori nmʋ Tu Baŋa-Wɛ n pa dɩbam balʋ ta na daarɩ Zuda nɩ tɩn. Dɩ́ dɛɛn yɩ kɔgɔ mʋ. Laan nan nii, dɩ́ daarɩ fɩnfɩɩn yɩranɩ mʋ. 3 Nan loori Baŋa-Wɛ sɩ DƖ brɩ dɩbam dɩ́ na wʋ́ vu mɛ, dɩdaanɩ dɩ́ na wʋ́ kɩ te tɩn.»4 Zeremi ma lǝri-ba o wɩ: «Tɔ! A niə. Amʋ wʋ́ sɩɩnɩ a loori abam Tu Baŋa-Wɛ nɩ á na tagɩ te tɩn. DƖ nan na tagɩ kʋlʋ DƖ brɩ-nɩ, amʋ wʋ́ ta a dɩ á zwa nɩ. A bá səgi kʋlʋkʋlʋ á yigə nɩ.»
5 Ba daa ma ta dɩ Zeremi ba wɩ: «Baŋa-Wɛ yɩ cɩga Tu. Dɩntʋ wʋ́ maanɩ dɩ́ na tagɩ kʋlʋ tɩn cɩga cɩga yɩ DƖ waarɩ dɩbam, nɩ dɩ́ na wʋ kɩ dɩ́ tɔgɩ DƖ na wɩ dɩ́ kɩ te tɩn. 6 Dɩbam na tʋŋɩ nmʋ Baŋa-Wɛ tee nɩ tɩn, dɩ́ wʋ́ yɔɔrɩ dɩ́ kɩ DƖ na wɩ dɩ́ kɩ te tɩn mʋ. O kwǝrǝ kam na ywəmmə, naa ka na camma, dɩ́ wʋ́ sɛ dɩ́ Tu Baŋa-Wɛ ni dɩm mʋ sɩ wǝǝnu da cwǝŋǝ tɩ pa dɩbam.»
7 Taanɩ dɩm kʋntʋ kwaga nɩ, da fugə mʋ kɛ yɩ Baŋa-Wɛ laan pa Zeremi DƖ kwǝrǝ. 8 O ma bəŋi Kareya bu Yohanan, dɩ jar-kərə yigǝ tiinǝ balʋ na wʋ o tee nɩ tɩn, dɩ nɔɔna bam maama, nɔn-kamunə dɩ nɔn-balwa dɩ, sɩ ba jeeri daanɩ. 9 O ma ta dɩ ba o wɩ: «Abam tʋŋɩ amʋ Yisɩrayɛlɩ tiinə Baŋa-Wɛ dɩm tee nɩ mʋ. DƖ nan wɩ tɩntʋ mʋ: 10 ‹Abam na maŋɩ tɩga kantʋ nɩ á zʋʋra, amʋ wʋ́ fɔgɩ a lɔ abam a zɩgɩ mʋ, sɩ a bá vaarɩ abam a dɩ tɩga nɩ. A ta wʋ́ jəri abam mʋ tɩ-ywəŋə je nɩ, sɩ a bá vuuri abam a gɔ a yagɩ. Bɛŋwaanɩ, a wʋʋ tiini kʋ cɔgɩ dɩ a na pɛ lɛɛrʋ tɩlʋ ba abam baŋa nɩ tɩn. 11 Nan daa yɩ taá kwarɩ fʋʋnɩ dɩ Babilɔnɩ tɩʋ pɛ wʋm, sɩ amʋ wʋ á tee nɩ sɩ a joŋi abam o jɩŋa nɩ a yagɩ. 12 Amʋ laan maa wʋ́ duri á yibwənə, yɩ a pa Babilɔnɩ pɛ wʋm dɩ duri á yibwənə sɩ o pa á joori á tɩtɩ tɩʋ kʋm wʋnɩ á taá zʋʋrɩ da. Amʋ Baŋa-Wɛ na tagɩ te tɩn mʋ kʋntʋ.›
13 Abam nan daa yɩ vɩn abam Tu Baŋa-Wɛ ni dɩm sɩ á ta nɩnɛɛnɩ, ‹Dɩbam bá maŋɩ tɩʋ kʋntʋ nɩ›. 14 Á yɩ taá tɛ nɩ: ‹Dɩ́ wʋ́ vu dɩ́ taa zʋʋrɩ Ezipi tɩʋ kʋm wʋnɩ mʋ. Dáanɩ mʋ najara daa bá daanɩ dɩbam. Dɩ́ bá ni jara-kǝm nabwaanʋ kwǝri. Kana daa bá ja dɩbam dáanɩ.›a 15 Abam Zuda tiinə balʋ nan na daarɩ tɩga kam nɩ tɩn, cəgi-na Baŋa-Wɛ taanɩ dɩm. Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ te tɩn mʋ tɩntʋ: ‹Abam nan na kuri sɩ á vu Ezipi tɩʋ kʋm á taá zʋʋra, 16 nan lwarɩ-na nɩ jara-kǝm dɩlʋ á na kwarɩ tɩn wʋ́ yi abam dáanɩ. Abam nan na kwarɩ nɩ kana wʋ́ ja abam yo tɩn, ka wʋ́ sɩɩnɩ ka yi abam dáanɩ. Á wʋ́ tɩ Ezipi nɩ. 17 Cɩga ŋwaanɩ tɩn, kʋ na yɩ balʋ maama na lagɩ ba duri ba vu Ezipi sɩ ba taa zʋʋrɩ da tɩn, bantʋ wʋ́ tɩ najara wʋnɩ, dɩ kana baŋa nɩ, dɩ yawɩ-cɛɛrʋ baŋa nɩ mʋ. Ba wʋlʋwʋlʋ bá lu dɩ lɛɛrʋ tɩlʋ a na wʋ́ kwe a kɩ ba yɩra nɩ tɩn.› 18 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ te tɩn mʋ tɩntʋ: ‹Á na yɔɔrɩ á vu á zʋ Ezipi tɩʋ kʋm nɩ, amʋ wʋ́ tiini a lo a ban-lʋm abam baŋa nɩ, nɩ a banɩ dɛɛn na zaŋɩ dɩ Zeruzalɛm tiinə yɩ a kɩ-ba te tɩn. Á wʋ́ ji wo-zɔɔna nɔɔna maama yiǝ nɩ, pa ba nɩɩsɩ abam. Baá taa mwanɩ abam, yɩ ba daarɩ ba maɩ á yɩrɩ ba sɔɔlɩ lwarɩm ba pa daanɩ. Abam dɩ nan bá joori yo sɩ á na tɩga kantʋ.› »
19 Zeremi ta ma ta o wɩ: «Abam Zuda tiinə balʋ na daarɩ á tɩga kam nɩ tɩn, Baŋa-Wɛ maŋɩ DƖ ta dɩ abam DƖ wɩ: ‹Yɩ zaŋɩ-na á vu Ezipi tɩʋ kʋm.› Nan taá ye-na amʋ zɩm na kaanɩ abam te tɩn. 20 Lwarɩ-na nɩ abam mʋ kɩ á sa cwǝŋǝ dɩ á na tʋŋɩ-nɩ á Tu Baŋa-Wɛ dɩm tee nɩ, yɩ á ta á wɩ: ‹Loori dɩ́ Tu Baŋa-Wɛ dɩm n pa dɩbam, sɩ n daarɩ n ta DƖ na wɩ dɩ́ kɩ te tɩn, sɩ dɩ́ wʋ́ sɛ DƖ ni dɩm kʋntʋ.› 21 Amʋ zɩm nan tagɩ Baŋa-Wɛ kwǝrǝ kam a brɩ abam. Dɩ kʋ dɩ, á ta lagɩ á vɩn DƖ ni dɩlʋ maama DƖ na pɛ-nɩ sɩ a ta dɩ abam tɩn mʋ. 22 Kʋntʋ ŋwaanɩ, yɔɔrɩ á taá ye nɩ: á na ve á yi jǝgǝ kalʋ á na bʋŋɩ sɩ á vu á taá zʋʋrɩ da tɩn, á wʋ́ tɩ najara wʋnɩ, dɩ kana baŋa nɩ, dɩ yawɩ-cɛɛrʋ baŋa nɩ mʋ.»