41
Bɩnɩ dɩm kʋntʋ canɩ sɩrpɛ cana kam wʋnɩ, mʋ Netanɩa bu Ismayɛlɩ na yɩ Elisama naa tɩn dɛɛn tɔgɩ dɩ nɔɔna fugə pa ba vu Mitspa. Wʋntʋ dɛɛn yɩ pa-digə kam wʋ nɔɔnʋ mʋ. O ya yɩ pɛ wʋm dɩdɛɛra bam wʋnɩ dɩdʋa mʋ. O dɩ o nɔɔna bam ma vu Ahikam bu Gedalia te, yɩ ba je ba di wʋdiu daanɩ.2 Ba na wʋra ba di kʋntʋ tɩn, mʋ Ismayɛlɩ dɩ nɔɔna fugə balʋ na tɔgɩ o kwaga tɩn lɩ ba sʋ-lwaanʋ ba gʋ Ahikam bu Gedalia, o na yɩ wʋlʋ Babilɔnɩ tɩʋ pɛ na kuri sɩ o taa nii tɩʋ kʋm o pa‑o tɩn ŋwaanɩ.3 Ismayɛlɩ ta ma gʋ Zuda tiinə balʋ maama na wʋ Gedalia tee nɩ tɩn, dɩdaanɩ Babilɔnɩ tɩʋ jar-kərə balʋ dɩ na wʋ Mitspa nɩ tɩn.
4 Tɩga na pʋʋrɩ yɩ nɔɔna ta wʋ lwarɩ nɩ ba gʋ Gedalia tɩn, 5 mʋ nɔɔna funɔnɔ tu ba yi Mitspa. Bantʋ ya fanɩ ba twana, yɩ ba ja ba gwaarʋ ba kaarɩ kaarɩ, ba daarɩ ba goni ba yɩra maama wʋ-cɔgɔ ŋwaanɩ. Ba dɛɛn zɩgɩ Sishɛm nɩ, dɩ Siloo nɩ, dɩ Samari nɩ mʋ ba maa ve Zeruzalɛm sɩ ba zuli Baŋa-Wɛ DƖ digə kam nɩ. Ba ma ja ba wʋdiu pɛɛra dɩ wǝǝnu tɩlʋ lwǝm na ywǝmmǝ tɩn ba ba sɩ ba pa Baŋa-Wɛ. 6 Ba na maa bɩɩnɩ tɩn, Ismayɛlɩ ma nuŋi Mitspa nɩ o vu o jeeri-ba cwǝŋǝ nɩ. O maa keeri yɩ o veǝ. O na yi-ba tɩn, mʋ o tagɩ dɩ ba o wɩ: «Ba-na sɩ dɩ́ tɔgɩ daanɩ dɩ́ vu Ahikam bu Gedalia te.» 7 Ba na yɔɔrɩ ba zʋ tɩʋ kʋm wʋnɩ tɩn, mʋ Ismayɛlɩ dɩ o nɔɔna bam gʋ-ba. Ba ma dʋlɩ ba yɩra yam ba yagɩ vʋlɩ dɩm wʋnɩ. 8 Nɔɔna bam wʋnɩ fugə nan ya tagɩ dɩ Ismayɛlɩ ba wɩ: «Yɩ gʋ dɩbam, sɩ dɩ́ ya səgi dɩ́ mɩnaa, dɩ nugə, dɩ tʋʋrʋ gaa kʋm je sɩdoŋ nɩ. Dɩ́ nan wʋ́ ja-tɩ dɩ́ ba dɩ́ pa‑m.» Ismayɛlɩ ma sɛ yɩ o wʋ gʋ-ba nɩ o na kɩ te dɩ nɔɔna badaara bam tɩn. 9 Ismayɛlɩ na gʋ nɔɔna bam yɩ o kwe ba yɩra yam o dʋlɩ o dɩ vʋlɩ dɩlʋ wʋnɩ tɩn, yɩ dɩlʋ Zuda tɩʋ Pɛ Asa dɛɛn na kʋgɩ tɩn mʋ. O ya kʋgɩ vʋlɩ-kamunu kʋm sɩ o ma cɩ Mitspa tɩʋ kʋm sɩ Yisɩrayɛlɩ tɩʋ pɛ Baasa yɩ wanɩ-kʋ o di mʋ. Netanɩa bu Ismayɛlɩ dɛɛn kwe twa bam kʋntʋ o suuri kʋ ni dɩm maama mʋ.
10 Nɔɔna balʋ maama ta na daarɩ yɩ ba wʋ Mitspa tɩʋ kʋm nɩ tɩn, mʋ Ismayɛlɩ dɛɛn kalɩ o ja o viiri. Kʋ maa yɩ pɛ bukwa bam, dɩ balʋ maama Babilɔnɩ pamaŋna bam yigə tu Nebuzaradan dɛɛn na kwe o kɩ Gedalia jɩŋa nɩ sɩ o taa nii ba baŋa nɩ tɩn mʋ kʋntʋ. Netanɩa bu Ismayɛlɩ kalɩ ba maama yɩ ba kwe cwǝŋǝ ba maa ve Amɔn.
11 Kareya bu Yohanan, dɩ jar-kərə yigǝ tiinǝ balʋ maama na wʋ o tee nɩ tɩn ma ni Ismayɛlɩ na kɩ lwarɩm kikiə yalʋ tɩn. 12 Ba ma ja ba nɔɔna bam maama ba kɩ ba kwaga nɩ, yɩ ba pɛ Ismayɛlɩ dɩ o nɔɔna bam kwaga ba pu. Ba dɛɛn ve ba yi-ba Gabawɔn bu-zaŋa kam ni nɩ mʋ. 13 Nɔɔna balʋ Ismayɛlɩ na kalɩ sɩ o ja o viiri tɩn na nɛ Yohanan dɩ o jar-kərə yigǝ tiinǝ bam tɩn, ba wʋʋ ma poli zanzan. 14 Ba ta ma pipiri ba yagɩ Ismayɛlɩ, yɩ ba duri sɩ ba jeeri Yohanan dɩ o kɔgɔ kʋm. 15 Sɩ kʋ na yɩ Ismayɛlɩ, o dɩ o nɔɔna nana mʋ lugi Yohanan jɩŋa nɩ pa ba duri ba vu Amɔn tɩʋ.
16 Kareya bu Yohanan dɩ o jar-kərə yigǝ tiinǝ bam laan ma la nɔɔna balʋ ba na vrɩ Ismayɛlɩ jɩŋa nɩ tɩn ba kɩ daanɩ. Kʋ maa yɩ jar-kərə, dɩ kaana, dɩ biə, dɩ pɛ sɔŋɔ dɩdɛɛra balʋ Ismayɛlɩ ya na jaanɩ Mitspa nɩ maŋa kalʋ o na gʋ Gedalia tɩn mʋ. Yohanan ma kalɩ ba maama o ja o kɛ. 17 Ba dɛɛn maa tʋ vəŋə nɩ, yɩ ba vu ba cirigi ba zɩgɩ Kimam vərə digə kam yɩ ba kɩ da yale dáanɩ. Kʋ dɛɛn bwələ dɩ Betelɩhɛm mʋ. Ba dɛɛn bʋŋɩ sɩ ba vu Ezipi tɩʋ kʋm mʋ, 18 ba na lagɩ sɩ ba lu Babilɔnɩ tiinə bam jɩŋa nɩ tɩn ŋwaanɩ. Bɛŋwaanɩ, ba kwarɩ Babilɔnɩ tiinə bam mʋ. Ba yǝri kʋlʋ na wʋ́ yi-ba dɩ Ismayɛlɩ na gʋ Gedalia wʋlʋ Babilɔnɩ tɩʋ pɛ ya na kuri sɩ o taa nii Zuda laŋa kam tɩn.b