Ba pɛ Zeremi te o tɩtɩ
40
Ba dɛɛn kalɩ nɔɔna balʋ maama ta na daarɩ Zeruzalɛm tɩʋ kʋm wʋnɩ dɩ Zuda laŋa kam maama nɩ tɩn mʋ ba maa ve Babilɔnɩ. Ba na yi Rama tɩn, Babilɔnɩ pamaŋna bam yigə tu Nebuzaradan ma na Zeremi ba wʋnɩ dɩ ba vɔg-o dɩ capʋnnʋ mʋ. O laan ma bwǝl-o o yagɩ. Kʋntʋ kwaga nɩ mʋ Baŋa-Wɛ kwərə dɛɛn maa ba ka ŋɔɔnɩ dɩ Zeremi.2 Nebuzaradan ma ta dɩ Zeremi o wɩ: «Abam Tu Baŋa-Wɛ dɩm maŋɩ DƖ ta nɩ lɛɛrʋ tɩntʋ wʋ́ ba á tɩʋ kʋm baŋa. 3 DƖ nan yɔɔrɩ DƖ kɩ DƖ su DƖ na tagɩ nɩ kʋlʋ wʋ́ kɩ tɩn mʋ. Kʋ kɩ kʋntʋ mʋ á tɩʋ tiinə bam na tusi ba cɔgɩ Baŋa-Wɛ yigə, yɩ ba ta vɩn DƖ ni dɩm tɩn ŋwaanɩ. 4 Amʋ zɩm nan lagɩ a bwǝli n jɩan capʋnnʋ tɩm mʋ, sɩ a yagɩ‑m sɩ n ta n te n tɩtɩ. Nmʋ na kuri sɩ n tɔgɩ dɩ amʋ n vu Babilɔnɩ tɩʋ kʋm, sɩ dɩ́ kɛ. Amʋ wʋ́ taa nii n baŋa nɩ dáanɩ. N nan na ba lagɩ sɩ n vu da, kʋ daɩ fɩfɩʋn. Kʋ wʋ nmʋ tee nɩ. Tɩga kantʋ na tigi n yigə nɩ palalala tɩn, n waɩ n kuri mɛ maama n na lagɩ tɩn, sɩ n vu n jǝni da.» 5 Zeremi ta wʋ kɛ yɩ o ta ta dɩd-o o wɩ: «Nan joori n vu Ahikam bu Gedalia te. Babilɔnɩ tɩʋ pɛ wʋm lɩ wʋntʋ sɩ o taa nii Zuda tɩɩnɩ dɩm mʋ o pa‑o. N waɩ n zʋʋrɩ wʋntʋ tee nɩ sɩ n ta n wʋ n nɔɔna bam tɩtarɩ nɩ. Kʋ na daɩ kʋntʋ, ve n na lagɩ mɛ maama tɩn, sɩ n ta n zʋʋrɩ da.»
Nebuzaradan laan ma kwe pɛɛrɩ o pa Zeremi yɩ o ta pa‑o wʋdiu sɩ o taa jɩgɩ o nii o tɩtɩ. O ma daarɩ o yag-o pa o viiri zaanɩ. 6 Zeremi ma vu Ahikam bu Gedalia te Mitspa nɩ. O maa zʋʋrɩ dɩ nɔɔna balʋ fɩnfɩɩn na daarɩ ba wʋ Zuda laŋa kam wʋnɩ tɩn.
Gedalia taanɩ
7 Zuda tɩʋ jar-kərə badonnǝ dɩ ba yigǝ tiinǝ dɛɛn ta kaagɩ ba beeri gaa wʋnɩ, ba na wʋ sɛ ba pa Babilɔnɩ pɛ wʋm tɩn ŋwaanɩ. Ba ma ni nɩ pɛ wʋm lɩ Ahikam bu Gedalia mʋ sɩ o taa yɩ ba tɩʋ kʋm yuutu sɩ o nii nɔɔna balʋ ta na daarɩ tɩga kam nɩ, yɩ ba wʋ kalɩ-ba ba wǝli da ba vu Babilɔnɩ tɩʋ tɩn. Bantʋ dɛɛn yɩ yinigə tiinə mʋ, baara, dɩ kaana, dɩ biə. 8 Jar-kərə yigǝ tiinǝ bam dɩ ba nɔɔna bam dɛɛn ma vu Gedalia te Mitspa nɩ. Yigǝ tiinǝ bam yɩra mʋ tɩntʋ: Netanɩa bu Ismayɛlɩ, dɩ Kareya biə Yohanan dɩ Zonatan, dɩ Tanwumɛtɩ bu Seraya, dɩ Netofa tu Efayi biə bam, dɩ Maaka tu Yezanɩa. 9 Gedalia ma kɩ baarɩ ba kuri nɩ yɩ o du durə o ta dɩ ba o wɩ: «Yɩ taá kwarɩ-na fʋʋnɩ. Nan sɛ-na á pa Babilɔnɩ tiinə bam. Maŋɩ-na yo dɩ́ tɩʋ kʋm nɩ, sɩ á sɛ á pa Babilɔnɩ tɩʋ pɛ, sɩ á ŋwɩa kɩ lanyɩranɩ ka pa abam. 10 Amʋ tɩtɩ wʋ́ maŋɩ yo Mitspa nɩ, sɩ a yǝni a ŋɔɔnɩ a pa abam, nɩ Babilɔnɩ tiinə bam na yǝni ba ba sɩ ba jeeri dɩbam. Nan joori-na tɩʋ kʋlʋ maama á na di tɩn sɩ á taá zʋʋrɩ kʋ wʋnɩ. Abam maa wʋ́ gwəri vinyə tiu biə, dɩ mɔɔla, sɩ á daarɩ á taá kɩ sana dɩ nugə á zɩga.»
11 Zuda dwi tiinə balʋ dɛɛn na zʋʋrɩ Moabɩ nɩ, dɩ Amɔn nɩ, dɩ Edɔm nɩ, dɩ tɩɩnɩ dɩdonnǝ wʋnɩ tɩn ma ni nɩ Babilɔnɩ tɩʋ pɛ wʋm pɛ cwǝŋǝ sɩ nɔɔna fɩnfɩɩn daarɩ Zuda laŋa kam nɩ. Ba ta ma ni nɩ o lɩ Ahikam bu Gedalia mʋ sɩ o taa nii ba baŋa nɩ. 12 Ba maama ma zɩgɩ ba ya na jagɩ ba wʋ mɛ maama tɩn nɩ ba joori Zuda tɩʋ Mitspa, Gedalia tee nɩ. Ba dɛɛn ma tiini ba la sana dɩ tiu biə zanzan ba zɩgɩ.
13 Dɛ dɩdʋa mʋ Kareya bu Yohanan, dɩ jar-kərə yigǝ tiinǝ balʋ ya na wʋ sɛ ba pa Babilɔnɩ tɩʋ pɛ wʋm tɩn tu Gedalia te Mitspa nɩ. 14 Ba ma ta dɩd-o ba wɩ: «Ta n ye nɩ Amɔn tiinə pɛ Baalisi tʋŋɩ Netanɩa bu Ismayɛlɩ mʋ sɩ o ba o gʋ-m.» Gedalia maa wʋ sɛ ba taanɩ dɩm.
15 Yohanan ma vu Mitspa o na Gedalia tɩga tɩga yɩ o wɩ: «Nan pa-nɩ cwǝŋǝ sɩ a vu a səgi a gʋ Ismayɛlɩ. Nɔɔn-nɔɔnʋ bá lwarɩ kʋ ni nɩ. Bɛŋwaanɩ mʋ dɩ́ wʋ́ taa je dɩ́ nii sɩ o gʋ nmʋ? Kʋntʋ na kɩa, Zuda tiinə balʋ na tu nmʋ te tɩntʋ tɩn maama wʋ́ jagɩ mʋ, pa balʋ na daarɩ Zuda laŋa kam nɩ tɩn dɩ je.»
16 Gedalia dɛɛn maa wʋ sɛ yɩ o ta dɩ Yohanan o wɩ: «Yɩ kɩ kʋntʋ! Nmʋ na tɛ Ismayɛlɩ yɩra taanɩ te tɩn daɩ cɩga.»