Babilɔnɩ tiinə di Zeruzalɛm tɩʋ kʋm a
39
Sedesɩasɩ paarɩ dim bɩna nʋgʋ bɩnɩ dɩm canɩ fugə cana kam wʋnɩ mʋ Babilɔnɩ tɩʋ pɛ Nebukadnɛtsarɩ dɩ o jar-kərə bam maama dɛɛn tu sɩ ba zaŋɩ najara dɩ Zeruzalɛm. Ba ma kaagɩ tɩʋ kʋm ba pu. 2 Kʋ na yi Sedesɩasɩ bɩna fugə-dɩdʋa paarɩ dim bɩnɩ dɩm canɩ sɩna cana kam da nʋgʋ dɛ dɩm nɩ tɩn, mʋ Babilɔnɩ tiinə bam dɛɛn magɩ Zeruzalɛm tɩʋ kabri sɩm ba bwəri sɩ ba zʋ tɩʋ kʋm wʋnɩ. 3 Babilɔnɩ tɩʋ pɛ dɩdɛɛra bam maama laan ma vu ba jǝni Zeruzalɛm tɩʋ Tɩtarɩ Ni dɩm manchoŋo nɩ. Bantʋ dɛɛn yɩ Samgarɩ tu Neregalɩ-Sarɩzerɩ, dɩ Nebo-Sarɩsekim, dɩ Neregalɩ-Sarɩzerɩ wʋdoŋ, dɩ Babilɔnɩ tɩʋ dɩdɛɛra badonnǝ mʋ. 4 Zuda tɩʋ Pɛ Sedesɩasɩ dɩ o jar-kərə bam maama na nɛ nɩ Babilɔnɩ tɩʋ dɩdɛɛra bam zʋ ba je tɩʋ kʋm mancoŋo ni boro kʋm nɩ tɩn, mʋ ba duri sɩ ba lu tɩtɩɩ nɩ. Ba kwe pɛ gaarɩ cwǝŋǝ kam mʋ, ba vu ba tɔgɩ ni dɩm na wʋ tɩʋ kabri sɩle sɩm tɩtarɩ nɩ tɩn, yɩ ba laan ma tu Zʋrdɛn bolo kʋm seeni.5 Dɩ kʋ dɩ, Babilɔnɩ tɩʋ jar-kərə bam dɛɛn zəli-ba mʋ. Ba ma vu ba yi ba ja Sedesɩasɩ sɩ kʋ maŋɩ dɩ Zeriko tɩ-kamparɩ sɩm seeni. Ba ma zi‑o ba ja ba vu Babilɔnɩ tɩʋ pɛ Nebukadnɛtsarɩ te. O dɛɛn wʋ Ribila tɩʋ nɩ mʋ, Hamatɩ provɛnsɩ dɩm nɩ. Nebukadnɛtsarɩ ma di taanɩ o vanɩ Sedesɩasɩ dáanɩ. 6 O ma pa ba gʋ Sedesɩasɩ biə bam, yɩ o zɩgɩ da o niə. O ta ma pa ba gʋ Zuda tɩʋ dɩdɛɛra bam maama. 7 Kʋ kwaga nɩ o ta pɛ ba cu ba pi Sedesɩasɩ yiǝ yam mʋ ba lɩ, yɩ ba daarɩ ba kwe canna capʋnnʋ ba ma ba vɔ‑o ba vaŋɩ ba jɩgɩ ba maa kɛ Babilɔnɩ.
8 Babilɔnɩ tiinə bam dɛɛn zwɛ pɛ sɔ-fɔrɔ kʋm, dɩ nɔɔna bam sam dɩm mʋ, yɩ ba daarɩ ba yigi Zeruzalɛm tɩʋ kabri sɩm ba dɩ tɩga nɩ. 9 Nebuzaradan dɛɛn mʋ yɩ Babilɔnɩ pamaŋna bam yigə tu. O ma kalɩ nɔɔna balʋ ya ta na daarɩ tɩʋ kʋm wʋnɩ tɩn, dɩ balʋ na duri ba zʋ Babilɔnɩ tiinə kɔgɔ kʋm wʋnɩ tɩn o ja o vu Babilɔnɩ tɩʋ kʋm. 10 Kʋ nan na yɩ yinigə tiinə balʋ na ba jɩgɩ kʋlʋkʋlʋ tɩn, Nebuzaradan ma yagɩ-ba Zuda laŋa kam nɩ. O ma pa-ba tɩga sɩ ba va, dɩ vinyə tweeru karɩ, sɩ ba taa nii sɩ baŋa nɩ.
11 Pɛ Nebukadnɛtsarɩ nan ya tɔgɩ Nebuzaradan baŋa mʋ o pa ni sɩ kʋ vu Zeremi seeni yɩ o wɩ: 12 «Kwaanɩ-na á beeri Zeremi je sɩ á nii o baŋa nɩ lanyɩranɩ. Yɩ zaŋɩ-na á kɩ-o zʋnnɩ. Nan kɩ-na kʋlʋ maama o na lagɩ tɩn á pa‑o.» 13 Nebuzaradan na yɩ pamaŋna bam yigə tu tɩn, dɩ Nebusazeban, dɩ Neregalɩ-Sarezerɩ, dɩ Babilɔnɩ tɩʋ dɩdɛɛra badonnǝ bam maama ma da kʋ ŋwaanɩ 14 ba tʋŋɩ nɔɔna pa ba vu pɛ sɔŋɔ kʋnkɔlɔ kʋm mɛ ba na pɩ Zeremi tɩn ba ja-o ba nuŋi. Ba ma kwe‑o ba pa Ahikam bu Gedalia sɩ wʋntʋ taa nii o baŋa nɩ. Gedalia dɛɛn yɩ Safan naa mʋ. O ma ja Zeremi o vu sɔŋɔ. Kʋntʋ mʋ te Zeremi maŋɩ o tɩtɩ nɔɔna bam tee nɩ.b
15 Maŋa kam ba ta na pɩ Zeremi pɛ sɔŋɔ kʋnkɔlɔ kʋm nɩ tɩn, Baŋa-Wɛ ya pɛ‑o kwǝrǝ kantʋ mʋ DƖ wɩ:
16 «Zaŋɩ n vu Kusi tu Ebedɩ-Mɛlɛkɩ te, sɩ n ta dɩd-o nɩ: ‹Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: Amʋ laan lagɩ a pa a na goni ni dɩlʋ tɩʋ kʋntʋ seeni tɩn sɩɩnɩ kʋ kɩ mʋ. Ba lagɩ ba na lɛɛrʋ mʋ, sɩ kʋ daɩ lam. Nmʋ yiǝ nan wʋ́ na kʋlʋ maama amʋ na wʋ́ kɩ tɩn. 17 Kʋ nan na yɩ nmʋ tɩtɩ, aá joŋi‑m a yagɩ maŋa kam kʋntʋ nɩ. Nmʋ na kwarɩ fʋʋnɩ dɩ balʋ tɩn bá na cwǝŋǝ ba ja‑m. 18 Amʋ wʋ́ taa yɩrɩ n ŋwɩa kam a pa‑m. Nmʋ bá tɩ najara wʋnɩ. N nan wʋ́ joŋi n tɩtɩ n yagɩ, n na kɩ n wʋ-dɩdʋa dɩ amʋ tɩn ŋwaanɩ. Amʋ Baŋa-Wɛ mʋ tagɩ kʋntʋ!› »c