Ba dʋlɩ Zeremi ba dɩ vʋlɩ wʋnɩ
38
Dɛ dɩdʋa: mʋ Matan bu Sefatɩa, dɩ Pasuuri bu Gedalia, dɩ Selemɩa bu Yewukalɩ, dɩ Malakɩya bu Pasuuri ni Zeremi na jɩgɩ taanɩ dɩlʋ o tɛ dɩ nɔɔna bam tɩn. O yɔɔrɩ o tɛ-ba mʋ o wɩ: 2 «Baŋa-Wɛ na tagɩ te tɩn mʋ tɩntʋ: ‹Wʋlʋ maama na maŋɩ tɩʋ kʋntʋ wʋnɩ, najara, naa kana, naa yawɩ-cɛɔ mʋ lagɩ tɩ gʋ kʋ tu. Kʋ daarɩ wʋlʋ na lɛɛnɩ o vu Babilɔnɩ tiinə bam te, kʋ tu wʋ́ joŋi o tɩtɩ o yagɩ. Ba bá gʋ-o.› 3 Baŋa-Wɛ ta ma ta DƖ wɩ: ‹Babilɔnɩ tɩʋ pɛ jar-kərə bam wʋ́ sɩɩnɩ ba wanɩ tɩʋ kʋntʋ ba di sɩ ba taa te-kʋ.› »4 Tɩʋ kʋm dɩdɛɛra bam na ni Zeremi ni-taanɩ dɩm tɩn, ba ma ta dɩ pɛ wʋm ba wɩ: «Nɔɔnʋ wʋntʋ maŋɩ sɩ o tɩ mʋ. O na jɩgɩ taanɩ dɩlʋ o ŋɔɔnɩ dɩ jar-kərə bam, dɩ nɔɔna bam maama tɩn yɔɔrɩ dɩ bwəri ba nɛ mʋ. O ba lagɩ nɔɔna bam zǝnǝ, o beeri ba cɔgɩm mʋ.» 5 Pɛ wʋm ma lǝri-ba o wɩ: «Kʋ wʋ á tee nɩ. Kɩ-na dɩd-o á na bʋŋɩ te tɩn, sɩ a bá wanɩ a cɩ abam yigə.»
6 Ba ma kwe Zeremi ba dɩ pabu Malɩkɩa vʋl-kɔgɔ wʋnɩ. Dɩ dɛɛn wʋ pɛ sɔŋɔ kʋnkɔlɔ kʋm nɩ mʋ. Ba ma kwe ŋʋnɩ ba ba‑o, yɩ ba daarɩ ba dʋl-o ba dɩ vʋlɩ dɩm wʋnɩ. Na dɛɛn tǝri dɩ wʋnɩ, sɩ bwəru yɩranɩ mʋ su da. Zeremi ma mʋʋrɩ bwəru tɩm wʋnɩ.a
7 Ebedɩ-Mɛlɛkɩ dɛɛn maa wʋra yɩ o yɩ Kusi tu mʋ. O yɩ pɛ sɔŋɔ dɩdɛɛrʋ mʋ o tʋŋɩ kʋ wʋnɩ. O ma ni nɩ ba jaanɩ Zeremi ba dʋlɩ ba dɩ vʋlɩ dɩm wʋnɩ. Pɛ wʋm ya nuŋi o je Bɛnzamɛn Ni dɩm seeni mʋ o di taanɩ. 8 Ebedɩ-Mɛlɛkɩ ma vu o yi o te yɩ o ta dɩd-o o wɩ: 9 «Pɛ, nɔɔna bantʋ tiini ba cɔgɩ dɩ ba na kɩ te Zeremi yɩra nɩ tɩn. Ba dʋl-o mʋ ba yagɩ vʋlɩ dɩm wʋnɩ sɩ o yaarɩ dɩ kana o tɩ, wʋdiu na lagɩ kʋ je tɩʋ kʋm nɩ tɩn ŋwaanɩ.»
10 Pɛ wʋm ma pa Ebedɩ-Mɛlɛkɩ ni o wɩ: «Tɔgɩ dɩ nɔɔna fiintɔ sɩ á vu á vaŋɩ á lɩ Wɛ nijoŋnu Zeremi vʋlɩ dɩm wʋnɩ. Kɩ-na kʋntʋ lɩla sɩ o daa yɩ tɩ.»
11 Ebedɩ-Mɛlɛkɩ ma tɔgɩ dɩ nɔɔna bam yɩ ba zʋ pɛ sɔŋɔ kʋm digə kadoŋ na wʋ jɩjɩgɩrʋ tiŋim digə kam kuri nɩ tɩn. Ba ma na gwar-zɩnzwara yadonnə da, yɩ ba daarɩ ba kwe-ya ba lə dɩ ŋʋna. Ba ma vu ba dɩ-ya vʋlɩ dɩm wʋnɩ sɩ ya yi Zeremi na wʋ mɛ tɩn. 12 Ebedɩ-Mɛlɛkɩ ma tɔɔlɩ o ta dɩ Zeremi vʋlɩ dɩm nɩ o wɩ: «Kwe gwar-zɩnzwara yantʋ n kɩ n pulugu kuri nɩ, sɩ ŋʋna kam yɩ fuuli‑m. Dɩ́ laan wʋ́ ma-ka dɩ́ lɩ‑m.» Zeremi ma kɩ kʋntʋ. 13 Ba ma vaŋ-o ba lɩ vʋlɩ dɩm wʋnɩ, yɩ ba daarɩ ba ja-o ba vu ba pɩ pɛ sɔŋɔ kʋnkɔlɔ kʋm nɩ. O ma lɛɛrɩ o wʋ dáanɩ.
Sedesɩasɩ bwe Zeremi bwiə yadonnə
14 Dɛ dɩdʋa Pɛ Sedesɩasɩ ma tʋŋɩ pa ba ja Zeremi ba ba o te. Ba ma jeeri daanɩ Baŋa-Wɛ digə kam niə yatɔ tu ni dɩm nɩ. Ba na nɛ daanɩ tɩn mʋ pɛ wʋm tagɩ dɩd-o o wɩ: «A lagɩ a bwe‑m bwiə mʋ. Nan yɩ səgi kʋlʋkʋlʋ a yigə nɩ.» 15 Zeremi ma ləri pɛ wʋm o wɩ: «Amʋ na ləri‑m cɩga cɩga, nmʋ wʋ́ gʋ-nɩ mʋ. A nan na brɩ-m n na wʋ́ kɩ te sɩ kʋ joŋi‑m tɩn, n ta bá cəgi. Kʋ daɩ kʋntʋ na?»
16 Pɛ Sedesɩasɩ ma səgi o goni ni dɩ Zeremi yɩ o wɩ: «A dugi durə Ŋwɩa Tu Baŋa-Wɛ yɩrɩ ŋwaanɩ, DƖ na yɩ dɩlʋ na paɩ dɩbam ŋwɩa tɩn, nɩ amʋ bá gʋ-m. A nan bá lɩ‑m a pa balʋ na beeri‑m sɩ ba gʋ tɩn.»
17 Zeremi ma ta dɩ Sedesɩasɩ o wɩ: «Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: ‹Nmʋ na nuŋi n vu n jeeri Babilɔnɩ tɩʋ pɛ dɩdɛɛra bam, ba bá gʋ-m. Ba nan bá zwɛ dɩ́ tɩʋ kʋm. Nmʋ dɩ n digə tiinə dɩ wʋ́ joŋi á tɩtɩ á yagɩ. 18 Kʋ daarɩ, nmʋ na wʋ sɛ n pa Babilɔnɩ tɩʋ pɛ dɩdɛɛra bam, lwarɩ nɩ tɩʋ kʋntʋ lagɩ kʋ zʋ Babilɔnɩ tiinə bam jɩan nɩ mʋ sɩ ba zwɛ-kʋ dɩ mim. Nmʋ dɩ n digə tiinə bam dɩ nan bá lu ba jɩŋa nɩ.› »
19 Pɛ Sedesɩasɩ ma ləri Zeremi o wɩ: «Kʋ nan na yɩ Zuda tiinə balʋ na duri ba yagɩ dɩbam yɩ ba zʋ Babilɔnɩ tiinə bam wʋnɩ tɩn, a kwarɩ fʋʋnɩ dɩ ba mʋ. Babilɔnɩ tiinə bam na kwe-nɩ ba kɩ bantʋ jɩan nɩ, ba waɩ ba pa kʋ tiini kʋ zʋʋrɩ a yɩra.»
20 Zeremi ma lǝr-o o wɩ: «Ba bá lɩ‑m ba pa-ba. Nmʋ na yɔɔrɩ n sɛ Baŋa-Wɛ ni dɩm nɩ a na brɩ-m sɩ n kɩ te tɩn, nmʋ wʋ́ joŋi n tɩtɩ n yagɩ. N ŋwɩa dɩ maa wʋ́ kɩ lanyɩranɩ. 21 Kʋ daarɩ, nmʋ na vɩn sɩ n nuŋi n vu n sɛ Babilɔnɩ tiinə bam, nan lwarɩ nɩ Baŋa-Wɛ lɩ wǝǝnu tɩntʋ mʋ DƖ brɩ-nɩ: 22 Ba lagɩ ba kwe kaana balʋ maama ta na daarɩ Zuda pɛ sɔŋɔ nɩ tɩn mʋ ba ja ba vu ba pa Babilɔnɩ tɩʋ pɛ dɩdɛɛra bam. Kaana bam kʋntʋ laan maa wʋ́ taa tɛ dɩ nmʋ ba wɩ:
‹Ba ganɩ‑m mʋ ba dɩ tɩga nɩ.
Kʋ nan yɩ n badonnǝ balʋ n na pɛ-ba cɩga tɩn mʋ kɩ kʋntʋ.
N nɛ sɩm laan na mʋʋrɩ bwəru wʋnɩ tɩn,
mʋ ba maama duri ba je ba daarɩ‑m.›
23 Ba lagɩ ba ja n kaana dɩ n biə bam maama mʋ ba nuŋi ba kɩ Babilɔnɩ tiinə bam jɩŋa nɩ. Nmʋ tɩtɩ dɩ nan bá lu ba jɩŋa nɩ. Babilɔnɩ tɩʋ pɛ wʋ́ sɩɩnɩ o ja‑m. Ba maa wʋ́ daarɩ ba zwɛ tɩʋ kʋntʋ dɩdaanɩ mim.»
24 Sedesɩasɩ daa ta ma ta dɩ Zeremi o wɩ: «Yɩ ta dɩ nɔɔn-nɔɔnʋ n na tagɩ te dɩ amʋ tɩntʋ tɩn. Kʋ na daɩ kʋntʋ, n waɩ n tʋɩ taanɩ dɩntʋ ŋwaanɩ. 25 Tɩʋ kʋm dɩdɛɛra bam na ni nɩ amʋ dɩ nmʋ ŋɔɔnɩ daanɩ, baá taa lagɩ sɩ ba lwarɩ dɩ́ na bwɛ kʋlʋ tɩn. Ba waɩ ba fugi‑m yɩ ba wɩ: ‹N na səgi kʋlʋ n na tagɩ tɩn sɩ dɩ́ yɩ lwarɩ kʋ ni nɩ, dɩ́ wʋ́ gʋ-m.› 26 Kʋ na yɩ kʋntʋ, sɩ n ta dɩ ba nɩ: ‹A ya loori pɛ wʋm mʋ sɩ o yɩ pa a joori Zonatan sɔŋɔ kʋm nɩ. Bɛŋwaanɩ, a na joori dáanɩ, aá tɩ mʋ.› »
27 Pɛ wʋm dɩdɛɛra bam ma sɩɩnɩ ba vu Zeremi te sɩ ba bwe‑o ba lwarɩ bɛŋwaanɩ pɛ wʋm na tʋŋɩ o bǝŋ-o tɩn. O ma ta dɩ ba kʋlʋ maama pɛ wʋm na brɩ-o sɩ o ta tɩn. Ba daa maa wʋ tagɩ kʋlʋkʋlʋ dɩd-o, Bɛŋwaanɩ, nɔɔn-nɔɔnʋ wʋ ni kʋlʋ Zeremi dɛɛn na tagɩ dɩ pɛ wʋm tɩn.
28 Zeremi dɛɛn ma lɛɛrɩ o maŋɩ pɛ sɔŋɔ kʋnkɔlɔ kʋm nɩ o zʋʋrɩ da, sɩ kʋ yi maŋa kalʋ Babilɔnɩ tiinə bam na di Zeruzalɛm tɩʋ kʋm najara wʋnɩ tɩn.