Ba kɩ Zeremi pɩɩna digə nɩ
37
Pɛ Nebukadnɛtsarɩ dɛɛn tiŋi Zʋzɩasɩ bu Sedesɩasɩ mʋ sɩ o ləri Yeoyakim bu Yehoyakini yuu nɩ o ji Zuda tɩʋ pɛ. 2 Sedesɩasɩ, dɩ o tɩntʋŋna balʋ na zən‑o tɩn, dɩ Zuda tiinə bam maama nan wʋ sɛ kwǝrǝ kalʋ Baŋa-Wɛ dɛɛn na pɛ DƖ nijoŋnu Zeremi sɩ o ta o brɩ-ba tɩn.a3 Dɛ dɩdʋa: Pɛ Sedesɩasɩ dɛɛn tʋŋɩ Selemɩa bu Yewukalɩ mʋ, dɩ Maaseya bu Sofoni na yɩ Wɛ kaanɩm tu tɩn, sɩ ba vu Wɛ nijoŋnu Zeremi te ba ta kwǝrǝ kantʋ dɩd-o ba wɩ: «Nan loori dɩ́ Tu Baŋa-Wɛ n pa dɩbam.»
4 Maŋa kam kʋntʋ nɩ, dɩ ba ya ta wʋ pɩ Zeremi pɩɩna digə nɩ. O dɛɛn maa waɩ o beeri o na lagɩ te tɩn, sɩ o taa ŋɔɔnɩ dɩ nɔɔna bam. 5 Kʋ ta maŋɩ dɩ Babilɔnɩ tiinə jar-kərə bam ya tu ba kaagɩ Zeruzalɛm tɩʋ kʋm ba pu mʋ. Ba maa na ni nɩ Ezipi pa-farʋ jar-kərə bam nuŋi ba tɩʋ kʋm nɩ ba bɩɩnɩ sɩ ba jeeri-ba dɩ najara tɩn, mʋ ba titwəni ba joori ba viiri ba daarɩ Zeruzalɛm tɩʋ kʋm.
6 Baŋa-Wɛ laan ma pa Zeremi ni yɩ DƖ wɩ: 7 «Yisɩrayɛlɩ tiinə Baŋa-Wɛ dɩm na tagɩ te tɩn mʋ tɩntʋ: Zuda tɩʋ pɛ Sedesɩasɩ tʋŋɩ nmʋ mʋ sɩ n ba n bwe-nɩ n nii kʋlʋ na wʋ́ kɩ tɩn. Nan ta n brɩ-o nɩ: Ezipi pa-farʋ jar-kərə bam sɩɩnɩ ba nuŋi ba ba sɩ ba wǝli abam. Ba nan wʋ́ joori ba tɩtɩ tɩʋ ba daarɩ abam, 8 sɩ Babilɔnɩ tiinə bam dɩ pipiri ba ba ba zaŋɩ najara tɩʋ kʋntʋ baŋa nɩ. Ba lagɩ ba di-kʋ mʋ, yɩ ba daarɩ ba zwɛ-kʋ dɩ mim!
9 Amʋ Baŋa-Wɛ nan na tagɩ kʋlʋ tɩn mʋ tɩntʋ: Yɩ ganɩ-na á tɩtɩ dɩ á na kaagɩ á bʋŋɩ á tɩtɩ nɩ á wɩ: ‹Babilɔnɩ tiinə bam daa bá joori yo› tɩn. Cɩga ŋwaanɩ tɩn, ba lagɩ ba joori ba ba abam baŋa nɩ mʋ. 10 Abam ya na maŋɩ á di Babilɔnɩ jar-kərə bam maama mʋ, pa balʋ na nɛ zʋnnɩ tɩn yɩranɩ daarɩ ba tigi ba vwə wʋnɩ dɩ, bantʋ mʋ lagɩ ba nuŋi ba vwə yam nɩ ba zwɛ tɩʋ kʋntʋ maama dɩ mim!»
11 Babilɔnɩ tɩʋ jar-kərə bam dɛɛn viiri mʋ ba daarɩ Zeruzalɛm tɩʋ kʋm, Ezipi pa-farʋ jar-kərə bam na bɩɩnɩ tɩn ŋwaanɩ. 12 Zeremi ma ja wʋbʋŋa sɩ o nuŋi Zeruzalɛm tɩʋ kʋm nɩ o vu Bɛnzamɛn tiinə tɩʋ dɩm nɩ sɩ o joŋi tɩga o sɔŋɔ tiinə bam pʋpwara wʋnɩ. 13 O ma vu o yi tɩʋ kʋm manchoŋo ni dɩlʋ ba na bǝi nɩ ‹Bɛnzamɛn Ni› tɩn sɩ o nuŋi o kɛ. O na yi da tɩn, mʋ jar-kərə yigə tu wʋdoŋ zɩgɩ da, o na yɩ Selemɩa bu Yiriya, dɩ Hanania naa tɩn. O ma zi Zeremi yɩ o ta dɩd-o o wɩ: «Nmʋ laan lagɩ n gɔ n zʋ Babilɔnɩ tiinə kɔgɔ kʋm wʋnɩ mʋ na?» 14 Zeremi ma lǝr-o o wɩ: «Kʋ daɩ cɩga. Amʋ wʋ lɔgɩ á kwaga nɩ sɩ a daarɩ a zʋ Babilɔnɩ kɔgɔ kʋm wʋnɩ.»
Dɩ kʋ dɩ, Yiriya wʋ sɛ. O ma ja Zeremi o yi dɩdɛɛra bam te. 15 Ba dɩ banɩ dɛɛn ma zaŋɩ dɩ Zeremi, yɩ ba mag-o lanyɩranɩ. Ba ta ma ja-o ba vu ba pɩ tɔn-pʋpʋnnʋ Zonatan sɔŋɔ nɩ. Ba ya ləni wʋntʋ sɔŋɔ kʋm mʋ sɩ kʋ ji pɩɩna digə sɩ ba wanɩ ba taa pɩ nɔɔna kʋ wʋnɩ.
16 Ba ma ja Zeremi ba vu ba pɩ digə kalʋ wʋnɩ ba na lugi tɩga nɩ tɩn. Ba ma yag-o pa o maŋɩ da o daanɩ. 17 Pɛ Sedesɩasɩ ma tʋŋɩ pa ba ja-o ba ba o te pɛ sɔŋɔ kʋm nɩ. O ma bwe‑o tɩga tɩga o wɩ: «Baŋa-Wɛ daa pɛ‑m kwǝrǝ na?»
Zeremi ma lǝr-o o wɩ: «Ɛɛn, kwǝrǝ wʋra.» O ta ma ta o wɩ: «Ba sɩɩnɩ ba lagɩ ba ja‑m ba vu ba kɩ Babilɔnɩ tɩʋ pɛ jɩŋa nɩ mʋ.»
18 Zeremi laan ma bwe pɛ wʋm o wɩ: «A kɩ bɛɛ mʋ a cɔgɩ nmʋ yigə, dɩ n tɩʋ dɩdɛɛra bam, dɩ nɔɔna bam maama yigə, yɩ abam yɔɔrɩ á pɩ-nɩ á yagɩ pɩɩna digə wʋnɩ? 19 Nmʋ tɩtɩ nijoŋnǝ bam tagɩ dɩ nmʋ ba wɩ: ‹Babilɔnɩ tɩʋ pɛ bá ba yo sɩ o zaŋɩ najara dɩ nmʋ, naa dɩ tɩga kantʋ.› Bantʋ nan ve yən mʋ? 20 Pɛ, a nan loori‑m mʋ sɩ n cəgi a loro kʋntʋ: Daa n yɩ pa ba ja-nɩ ba joori ba vu ba pɩ Zonatan sɔŋɔ kʋm nɩ, sɩ a daa na lagɩ a vu dáanɩ, aá tɩ mʋ.»
21 Pɛ Sedesɩasɩ ma sɛ yɩ o daarɩ o pa ni sɩ ba ja-o ba vu ba pɩ pɛ sɔŋɔ kʋnkɔlɔ kʋm wʋnɩ. Pɛ wʋm ta ma pa ni sɩ ba taa paɩ Zeremi dɩpɛ dɩdʋa dɛ maama wʋnɩ, sɩ kʋ vu kʋ yi maŋa kalʋ dɩpɛ dɩm na wʋ́ ti tɩʋ kʋm wʋnɩ tɩn. Zeremi dɛɛn ma maŋɩ pɛ sɔŋɔ kʋnkɔlɔ kʋm mɛ ba na pɩ-o tɩn wʋnɩ.