Zeremi na yaarɩ te tɩn
36:1–45:5
Yeoyakim zwɛ Zeremi tɔnɔ kʋm
36
Bɩnɩ dɩlʋ Zʋzɩasɩ bu Yeoyakim na di Zuda paarɩ o kɩ bɩna yana tɩn nɩ mʋ Baŋa-Wɛ pɛ Zeremi ni DƖ wɩ: 2 «Beeri tɔnɔ sɩ n pʋpʋnɩ wǝǝnu tɩlʋ a na maŋɩ a ta dɩ nmʋ sɩ kʋ vu Yisɩrayɛlɩ tiinə bam, dɩ Zuda tiinə bam, dɩdaanɩ dwi-gɛ tiinə bam maama seeni tɩn n tiŋi kʋ wʋnɩ. Nan pʋpʋnɩ wǝǝnu tɩlʋ a na tagɩ a brɩ-m kʋ zɩgɩ Zʋzɩasɩ paarɩ dim maŋa nɩ sɩ kʋ yi lele tɩn n tiŋi. 3 Dɛdoŋ Zuda tiinə bam na lwarɩ lɛɛrʋ tɩlʋ maama a na bʋŋɩ sɩ a pa tɩ yi-ba tɩn, baá ləni ba wʋbʋŋa dɩ ba lwarɩm kikiə yam. Amʋ dɩ maa wʋ́ da kʋ ŋwaanɩ a yagɩ ba lwarɩm dɩm dɩ ba tusim dɩm a cɛ-ba.»4 Zeremi ma tʋŋɩ o bəŋi Neriya bu Baruki. O na tu tɩn, Zeremi ma lwǝni kʋlʋ maama Baŋa-Wɛ ya na pɛ‑o sɩ o ta tɩn, yɩ Baruki dɩ pʋpʋnɩ-tɩ o kɩ tɔnɔ wʋnɩ. 5 Zeremi ta ma ta dɩ Baruki o wɩ: «Ba cɩgɩ amʋ cwǝŋǝ mʋ sɩ a daa yɩ zʋ Baŋa-Wɛ digə kam nɩ. 6 Kʋntʋ tɩn, nɔɔna bam ni-vɔrɩ dɛ daa na yiǝ, sɩ n zaŋɩ n vu Wɛ-digə kam. N laan ma n wʋ́ puri tɔnɔ kʋntʋ n karɩmɩ Baŋa-Wɛ taanɩ dɩlʋ DƖ na pɛ-nɩ, yɩ a lwǝni a pa‑m yɩ n dɩ pʋpʋnɩ n tiŋi tɩn n brɩ nɔɔna bam. Karɩmɩ-kʋ sɩ Zuda tiinə bam na nuŋi ba tɩɩnɩ dɩm wʋnɩ ba ba ba jeeri da tɩn maama cəgi. 7 Dɛdoŋ ba laan wʋ́ tu ba tɩtɩ ba loori zǝnǝ Baŋa-Wɛ tee nɩ, yɩ ba maama pipiri ba yagɩ cwə-balwaarʋ tɩlʋ ba na tɔgɩ tɩn. Bɛŋwaanɩ, Baŋa-Wɛ yɔɔrɩ DƖ ta nɩ DƖ lagɩ DƖ waarɩ nɔɔna bantʋ DƖ ban-lʋm dɩm na gaalɩ tɩn ŋwaanɩ mʋ.»
8 Neriya bu Baruki ma sɩɩnɩ o vu Wɛ-digə kam o karɩmɩ Baŋa-Wɛ taanɩ dɩm na pʋpʋnɩ tɔnɔ kʋm wʋnɩ tɩn o brɩ nɔɔna bam, nɩ Wɛ nijoŋnu Zeremi na brɩ-o sɩ o kɩ te tɩn. 9 Kʋ nan yɩ Zuda tɩʋ pɛ Zʋzɩasɩ bu Yeoyakim paarɩ dim bɩna yanu bɩnɩ dɩm canɩ nʋgʋ cana kam nɩ mʋ, ba tiŋi dɛ sɩ dɩ taa yɩ dɛ dɩlʋ nɔɔna bam na wʋ́ jeeri ba vɔ ni Baŋa-Wɛ ŋwaanɩ tɩn. Nɔɔna balʋ maama na zʋʋrɩ Zeruzalɛm nɩ tɩn, dɩ balʋ na nuŋi Zuda tɩɩnɩ dɩm maama wʋnɩ tɩn ma gilimi daanɩ yɩ ba vɔ ni. 10 Baruki dɛɛn na zʋ Wɛ-digə kam tɩn, o ma vu o zɩgɩ pɛ sɔŋɔ tɔn-pʋpʋnnʋ Safan bu Gemarɩa digə kam seeni. Digə kam kʋntʋ dɛɛn wʋ Wɛ-digə kʋnkɔlɔ kʋlʋ na wʋ baŋa nɩ tɩn nɩ mʋ yɩ ka bwələ dɩ ni dɩlʋ ba na bǝi nɩ ‹Ni-dʋʋrɩ› ni tɩn. Baruki zɩgɩ dáanɩ mʋ o karɩmɩ taanɩ dɩlʋ Zeremi na pɛ‑o yɩ o pʋpʋnɩ o kɩ tɔnɔ kʋm nɩ tɩn pa nɔɔna bam maama ni.
11 Gemarɩa bu Mikaya ma ni Baŋa-Wɛ kwǝrǝ kalʋ Baruki na karɩmɩ tɩn maama. 12 O ma tu o vu o zʋ pɛ sɔŋɔ tɔn-pʋpʋnnʋ wʋm digə kam nɩ. Tɩʋ dɩdɛɛra bam maama maa je da ba banɩ wǝǝnu. Bantʋ maa yɩ: Elisama wʋlʋ laan na yɩ tɔn-pʋpʋnnʋ tɩn, dɩ Semaya bu Delaya, dɩ Akbɔrɩ bu Elinatan, dɩ Safan bu Gemarɩa, dɩ Hanania bu Sedesɩasɩ, dɩ dɩdɛɛra badaara bam maama. 13 Mikaya ma ta o brɩ-ba Baruki na karɩmɩ wǝǝnu tɩlʋ yɩ nɔɔna bam maama ni tɩn. 14 Dɩdɛɛra bam maama ma tʋŋɩ Netanɩa bu Yehudi, o na yɩ Kusi bu Selemɩa naa tɩn, nɩ o pa Baruki ni sɩ o ja tɔnɔ kʋlʋ o na karɩmɩ yɩ nɔɔna bam ni tɩn o ba sɩ ba nii. Baruki ma sɩɩnɩ o ja tɔnɔ kʋm o vu ba te yɩ o zei-kʋ o jɩŋa nɩ. 15 Ba ma ta dɩd-o ba wɩ: «Jǝni tɩga nɩ, sɩ n karɩmɩ-kʋ n brɩ dɩbam.»
Baruki dɩ ma kɩ ba na wɩ o kɩ te tɩn. 16 Ba na ni tɔnɔ kʋm taanɩ dɩm maama tɩn, mʋ ba nii daanɩ yɩ fʋʋnɩ tiini dɩ zʋ-ba. Ba ma ta dɩ Baruki ba wɩ: «Dɩ́ maŋɩ sɩ dɩ́ pa pɛ wʋm ni tɔnɔ kʋntʋ ŋwa mʋ.»
17 Ba ta ma bwe Baruki ba wɩ: «Ta n brɩ dɩbam. Nmʋ kɩ tɩta mʋ n pʋpʋnɩ wǝǝnu tɩntʋ maama n tiŋi? Zeremi mʋ tɛ-tɩ yɩ n dɩ pʋpʋnɩ na?» 18 Baruki ma ləri o wɩ: «Ɛɛn, Zeremi mʋ yɔɔrɩ o lwe bɩtarɩ sɩm maama o brɩ-nɩ, yɩ amʋ dɩ pʋpʋnɩ-sɩ a tiŋi tɔnɔ kʋm wʋnɩ kʋntʋ jaja.»
19 Dɩdɛɛra bam ma ta dɩ Baruki ba wɩ: «Nmʋ dɩ Zeremi maŋɩ sɩ á beeri je mʋ á səgi da. Yɩ pa-na sɩ nɔɔn-nɔɔnʋ lwarɩ abam na wʋ mɛ tɩn.»
20 Ba laan ma tiŋi tɔnɔ kʋm Elisama digə kam wʋnɩ. Wʋntʋ dɛɛn yɩ pɛ tɔn-pʋpʋnnʋ mʋ. Dɩdɛɛra bam ma vu pɛ wʋm te ba vɩɩrɩ ba tʋlɩ bɩtarɩ sɩm maama pɛ wʋm yigə nɩ. 21 Pɛ wʋm ma tʋŋɩ Yehudi sɩ o vu o ja tɔnɔ kʋm o ba o pa‑o. Yehudi ma vu Elisama digə kam o ja tɔnɔ kʋm o ba o karɩmɩ o brɩ pɛ wʋm, yɩ o dɩdɛɛra bam maama zɩgɩ o tee nɩ. 22 Kʋ dɛɛn yɩ waarʋ maŋa nɩ mʋ. Pɛ wʋm maa wʋ o sɔ-fɔrɔ kʋm digə kadoŋ nɩ mɛ o na weeri mim sɩ o yɩra lʋnɩ tɩn. 23 Yehudi dɛɛn na karɩmɩ tɔn-vɔɔrʋ tɩtɔ tɩna, pɛ wʋm yəni o ma tɔn-pʋpʋnnʋ wʋm fana kam mʋ o go-tɩ o dɩ mim dɩm wʋnɩ. O dɛɛn kɩ kʋntʋ mʋ, kʋ ba kʋ yi sɩ o zwɛ tɔnɔ kʋm maama dɩdɩ o ti. 24 Pɛ wʋm dɩ o tɩntʋŋna bam nan na ni tɔnɔ kʋm taanɩ dɩm maama tɩn, kʋ wʋ pɛ fʋʋnɩ ja-ba. Ba wʋlʋwʋlʋ wʋ kaarɩ o gwaarʋ wʋ-cɔgɔ ŋwaanɩ. 25 Elinatan, dɩ Delaya, dɩ Gemarɩa dɛɛn na loori pɛ wʋm sɩ o yɩ zwɛ tɔnɔ kʋm tɩn, o wʋ cəgi ba taanɩ dɩm. 26 Pɛ wʋm ta ma pa ni sɩ pabu Yerameliti, dɩ Azireli bu Seraya, dɩ Abɩdɩlɩ bu Selemɩa vu ba ja Baruki na yɩ tɔn-pʋpʋnnʋ tɩn, dɩ Wɛ nijoŋnu Zeremi ba ba ba pa‑o. Baŋa-Wɛ nan ya mʋ kwe-ba DƖ səgi.
Zeremi daa pɛ Baruki pʋpʋnɩ tɔnɔ kʋdoŋ
27 Pɛ wʋm na zwɛ tɔnɔ kʋlʋ Zeremi dɛɛn na tɛa yɩ Baruki pʋpʋnɩ o tiŋi kʋ wʋnɩ tɩn, yɩ kʋ kɩ fɩɩn kʋ wǝli da tɩn, mʋ Baŋa-Wɛ daa pɛ Zeremi ni DƖ wɩ: 28 «Beeri tɔnɔ kʋdoŋ sɩ n joori n pʋpʋnɩ taanɩ dɩlʋ maama ya na wʋ pulim tɔnɔ kʋm nɩ yɩ Zuda pɛ Yeoyakim zwɛ-kʋ tɩn n kɩ kʋ wʋnɩ. 29 Nmʋ ta wʋ́ ta dɩ Pɛ Yeoyakim nɩ: ‹Baŋa-Wɛ kwǝrǝ mʋ tɩntʋ: Pulim tɔnɔ kʋm tɛ kʋ brɩ nɩ Babilɔnɩ tɩʋ pɛ wʋ́ ba o di tɩʋ kʋntʋ, o daarɩ o cɔgɩ tɩga kam pa nabiinǝ dɩ vara maama mʋ je ka wʋnɩ. Nmʋ nan kwe tɔnɔ kʋm kʋntʋ n zwɛ, n na wʋ sɛ Zeremi na pʋpʋnɩ kʋlʋ tɩn ŋwaanɩ. 30 Baŋa-Wɛ kwǝrǝ kalʋ nan na wʋra Zuda tɩʋ pɛ Yeoyakim ŋwaanɩ tɩn mʋ tɩntʋ: Nmʋ bá na dwi sɩ kʋ tu jǝni Pɛ Davidi paarɩ jangɔŋɔ kʋm baŋa nɩ o di Zuda tɩʋ paarɩ. Nmʋ na tɩga, ba bá kɩ n yɩra tɩga kam wʋnɩ. Ya nan wʋ́ taa tigi pwələ nɩ mʋ, sɩ wɩa dɩ waarʋ zʋ-ya lanyɩranɩ. 31 A nan lagɩ a waarɩ-m mʋ, dɩ n biə, dɩ n tɩntʋŋna, á lwarɩm kikiə ŋwaanɩ. A ta lagɩ a tiini a lo lɛɛrʋ zanzan mʋ a yagɩ balʋ na zʋʋrɩ Zeruzalɛm tɩʋ nɩ dɩ Zuda laŋa kam maama nɩ tɩn yuu nɩ, ba na wʋ cəgi a taanɩ dɩm tɩn ŋwaanɩ. Amʋ wʋ́ waarɩ-ba nɩ a na goni ni nɩ aá kɩ-ba te tɩn maama mʋ.› »
32 Zeremi daa ma kwe tɔnɔ kʋdoŋ o pa o tɔn-pʋpʋnnʋ Baruki na yɩ Neriya bu tɩn. O dɛɛn maa tɛa wǝǝnu tɩm yɩ Baruki dɩ pʋpʋnɩ-tɩ o tiŋə. O ma pʋpʋnɩ kʋlʋ maama na wʋ pulim tɔnɔ kʋm wʋnɩ yɩ pɛ Yeoyakim zwɛ tɩn o kɩ kʋ dɩ wʋnɩ. Zeremi ta ma ta wǝǝnu tɩdonnǝ yɩ Baruki pʋpʋnɩ-tɩ o wǝli da.