Rekabi dwi tiinə bam taanɩ
35
Zʋzɩasɩ bu Yeoyakim dɛɛn na di Zuda paarɩ maŋa kalʋ nɩ tɩn mʋ Baŋa-Wɛ daa pɛ Zeremi ni yɩ DƖ wɩ: 2 «Zaŋɩ n vu mɛ Rekabi sɔŋɔ tiinə bam na zʋʋrɩ tɩn, sɩ n bǝŋi-ba sɩ á da daanɩ á vu Baŋa-Wɛ digə kam. Ja-ba n zʋ kʋ di sɩm dɩdʋa wʋnɩ, sɩ n laan pa-ba sana sɩ ba nyɔ.»3 Amʋ ma sɩɩnɩ a vu Zeremi bu Yazanɩa te. Wʋntʋ ta yɩ Habazinia naa mʋ. A ma bəŋi Yazanɩa dɩ o cʋrrʋ tɩm, dɩ o biə bam maama. Rekabi sɔŋɔ tiinə bam maama mʋ kʋntʋ. 4 A ma ja-ba a zʋ Baŋa-Wɛ digə kam wʋnɩ. Dɩ́ dɛɛn zʋ digə kalʋ ba na pɛ Wɛ tɩntʋŋnʋ Hanan tɔgɩna bam tɩn mʋ. Hanan dɛɛn yɩ Yigadalia bu mʋ. Bantʋ digə kam dɛɛn saŋɩ dɩdɛɛra bam digə kam mʋ, yɩ ka wʋ Salum bu Maaseya digə kam yuu nɩ. Maaseya dɛɛn yɩ Wɛ-digə kam ni-yɩrɩna bam dɩdʋa mʋ. 5 A laan ma kwe kɔɔra dɩ ba wʋnɩ sana a zɩgɩ Rekabi sɔŋɔ tiinə bam yigə nɩ. Zwɩ sɩlʋ ba na wʋ́ nyɔ sɩ wʋnɩ tɩn dɩ maa wʋra. A ma ta dɩ ba a wɩ: «Nyɔ-na á na lagɩ te tɩn.»
6 Ba ma ləri-nɩ ba wɩ: «Dɩbam culi sana. Dɩ́ nabaarʋ Rekabi bu Yonadabɩ maŋɩ o pa dɩbam ni yɩ o wɩ: ‹Abam dɩ á biə daɩ sɩ á nyɔ sana. 7 Abam ta ba maŋɩ sɩ á lɔ sam, naa sɩ á du wo-dwə tɩga nɩ, naa sɩ á jəri vinyə tweeru. Yɩ kɩ-na wǝǝnu tɩntʋ kʋlʋkʋlʋ. Taá zʋʋrɩ-na vwə wʋnɩ. Kʋntʋ mʋ wʋ́ pa á taá kaagɩ á beeri tɩga kam nɩ yɩ á daanɩ taan.› 8 Tɔ. Dɩbam dɩ nan yɔɔrɩ dɩ́ tɔgɩ dɩ́ nabaarʋ wʋm ni dɩm mʋ. Dɩbam tɩtɩ ba nyɔ sana. Dɩ́ kaana, dɩ dɩ́ biə dɩ nan ba nyɔ sana. 9 Dɩ́ nan ba lɔ sam sɩ dɩ́ zʋ dɩ wʋnɩ. Dɩ́ nan wʋ jəri vinyə tweeru, naa dɩ́ beeri karɩ dɩ kadwi sɩ dɩ́ du wo-dwə da. 10 Dɩ́ maa yɔɔrɩ dɩ́ zʋʋrɩ vwə wʋnɩ mʋ. Kʋntʋ tɩn, dɩ́ sɛ dɩ́ nabaarʋ Yonadabɩ ni dɩm maama. 11 Babilɔnɩ tɩʋ pɛ Nebukadnɛtsarɩ nan na tu laŋa kantʋ maama nɩ sɩ o zaŋɩ najara tɩn, mʋ dɩ́ kɩ ni daanɩ yɩ dɩ́ wɩ: ‹Pa-na dɩ́ zaŋɩ dɩ́ vu dɩ́ taa zʋʋrɩ Zeruzalɛm tɩʋ kʋm wʋnɩ sɩ dɩ́ wanɩ dɩ́ lu Babilɔnɩ jar-kərə bam dɩ Aram jar-kərə bam jɩŋa nɩ.› Kʋntʋ mʋ te dɩbam laan tu dɩ́ zʋʋrɩ Zeruzalɛm nɩ.»
12 Baŋa-Wɛ laan ma pa Zeremi ni yɩ DƖ wɩ: 13 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: «Zaŋɩ n vu Zeruzalɛm tiinə bam dɩ Zuda tiinə bam maama te n ta dɩ ba nɩ: ‹Zaasɩ-na sɩ á lwarɩ á na maŋɩ sɩ á kɩ te cɩga cɩga. Yɔɔrɩ á sɛ-na a kwiə yam. Amʋ Baŋa-Wɛ ni dɩm mʋ kʋntʋ. 14 Nii-na! Rekabi bu Yonadabɩ dɛɛn pɛ o kwaga kam ni nɩ ba yɩ nyɔ sana. Ba ma yɔɔrɩ ba sɛ o ni dɩm mʋ, pa dɩ zɩm maama ba ba nyɔ sana. Amʋ nan yɔɔrɩ a paɩ abam ni-kaana mʋ kuni zanzan. Dɩ kʋ dɩ, á ta ba sɛ a ni dɩm. 15 Maŋa maama wʋnɩ, amʋ yǝni a tʋŋɩ a nijoŋnǝ bam maama mʋ á tee nɩ. Ba ma kaanɩ abam ba wɩ: «Abam maama maŋɩ sɩ á yagɩ cwə-balwaarʋ tɩlʋ á na tɔgɩ tɩn, sɩ á daarɩ á ləni á wʋbʋŋa dɩ á lwarɩm kikiə yam. Daa yɩ taá zuli-na wa-yɔɔrʋ. Á na sɩɩnɩ á kɩ kʋntʋ, á wʋ́ na cwǝŋǝ sɩ á taa zʋʋrɩ tɩga kantʋ a na pɛ abam dɩ á nabaara bam tɩn wʋnɩ.» Dɩ kʋntʋ maama nan, abam wʋ sɛ sɩ á cəgi amʋ taanɩ dɩm. 16 Rekabi dwi tiinə bam yɔɔrɩ ba sɛ ba nabaarʋ wʋm ni mʋ cɩga cɩga. Kʋ nan na yɩ abam, á ba sɛ amʋ ni!›
17 Kʋntʋ ŋwaanɩ, Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: ‹Nii-na! Amʋ laan lagɩ a pa lɛɛrʋ yɔɔrɩ kʋ ba Zeruzalɛm tiinə bam dɩ Zuda tiinə bam maama baŋa nɩ, nɩ a na wuuri a ta nɩ aá kɩ te tɩn. Bɛŋwaanɩ, amʋ yɔɔrɩ a ŋɔɔnɩ dɩ ba mʋ, yɩ ba ba cǝgǝ. A ta ma kwaanɩ a bǝ-ba, yɩ ba vɩn sɩ ba ləri-nɩ.› »
18 Zeremi daa ma joori o ta dɩ Rekabi sɔŋɔ tiinə bam o wɩ: «Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ te tɩn mʋ tɩntʋ: ‹Abam yɔɔrɩ á sɛ á nabaarʋ Yonadabɩ ni dɩm cwǝŋǝ maama wʋnɩ, yɩ á kɩ o na brɩ abam sɩ á taá kɩ te tɩn maama. 19 Kʋntʋ ŋwaanɩ, amʋ Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn dɩ goni ni nɩ: maŋa maama wʋnɩ Rekabi dwi dɩm bá ga nɔɔnʋ sɩ kʋ tu taa tʋŋɩ o pa-nɩ.› »