Wɛ na wʋ́ waarɩ nɔɔna badonnǝ te tɩn
34:1–35:19
Ba na pɛ Sedesɩasɩ kwǝrǝ kalʋ tɩn
34
Babilɔnɩ tɩʋ pɛ Nebukadnɛtsarɩ dɩ o jar-kərə bam maama dɛɛn tu sɩ ba zaŋɩ najara dɩ Zeruzalɛm tɩʋ kʋm, dɩdaanɩ kʋ nawuurə yam mʋ. O jar-kərə bam kʋntʋ dɛɛn nuŋi lʋgʋ baŋa tɩɩnɩ dɩlʋ maama o na di paarɩ dɩ baŋa nɩ tɩn wʋnɩ mʋ. Maŋa kam kʋntʋ nɩ Baŋa-Wɛ ma kwe kwǝrǝ kantʋ DƖ pa Zeremi yɩ DƖ wɩ:2 Yisɩrayɛlɩ tiinə Baŋa-Wɛ dɩm na tagɩ te tɩn mʋ tɩntʋ: «Ve Zuda tɩʋ pɛ Sedesɩasɩ te, sɩ n ta dɩd-o n wɩ: ‹Baŋa-Wɛ mʋ tagɩ tɩntʋ yɩ DƖ wɩ: Amʋ yɔɔrɩ a ti a yigə mʋ sɩ a kwe tɩʋ kʋntʋ a kɩ Babilɔnɩ tɩʋ pɛ wʋm jɩŋa nɩ sɩ o zwɛ-kʋ dɩdaanɩ mim. 3 Nmʋ nan bá lu o jɩŋa nɩ. O nɔɔna wʋ́ zi‑m ba daarɩ ba ja ba vu o te. Kʋntʋ tɩn, nmʋ wʋ́ zɩgɩ Babilɔnɩ tɩʋ pɛ wʋm yigə nɩ sɩ á ŋɔɔnɩ daanɩ. Nmʋ laan ma n maŋɩ sɩ n vu Babilɔnɩ.a
4 Dɩ kʋ dɩ, Zuda tɩʋ pɛ Sedesɩasɩ, nan cəgi ni dɩlʋ Baŋa-Wɛ na tiŋi nmʋ ŋwaanɩ tɩn. Baŋa-Wɛ tagɩ n taanɩ DƖ wɩ: N bá tɩ najara wʋnɩ. 5 N lagɩ n tɩ n tɩtɩ tʋʋnɩ mʋ. Kʋ na yɩ n kwə balʋ na loori nmʋ yigə ba di paarɩ tɩn, nɔɔna dɛɛn di bantʋ lwi sɩm yɩ ba zwɛ wǝǝnu tɩlʋ lwǝm na ywǝmmǝ tɩn sɩ ba zuli-ba. Kʋntʋ mʋ ba ta wʋ́ di nmʋ dɩ luə. Ba maa wʋ́ taa keerǝ yɩ ba wɩ: «Dɩ́ pɛ yoo! Dɩ́ tu wʋm tɩga!» Amʋ Baŋa-Wɛ na goni ni sɩ kʋlʋ kɩ tɩn mʋ kʋntʋ.› »
6 Wɛ nijoŋnu Zeremi dɛɛn ma vu Zuda tɩʋ pɛ Sedesɩasɩ te Zeruzalɛm wʋnɩ, yɩ o ta wǝǝnu tɩntʋ maama o brɩ-o. 7 Kʋntʋ maama dɩ Babilɔnɩ tɩʋ pɛ wʋm jar-kərə yɔɔrɩ ba jɩgɩ Zeruzalɛm tɩʋ kʋm mʋ ba zaŋɩ najara kʋ baŋa nɩ. Ba dɛɛn ta wʋra ba kɩ najara dɩ Lakisi tɩʋ kʋm, dɩ Azeka tɩʋ kʋm dɩ mʋ. Zuda provɛnsɩ tɩɩnɩ dɩlʋ na lɔgɩ dɩ pɩ tɩn wʋnɩ, tɩɩnɩ dɩle dɩm kʋntʋ yɩranɩ mʋ ta zɩga.
Ba na yiri ba ni gambɛ ŋwaanɩ te tɩn
8 Baŋa-Wɛ daa ta ma pa Zeremi kwǝrǝ sɩ o ta. Pɛ Sedesɩasɩ dɛɛn ya goni ni mʋ dɩ Zeruzalɛm tiinə bam maama sɩ ba yagɩ ba gambɛ sɩm sɩ sɩ viiri zaanɩ. 9 Ni dɩm brɩ nɩ wʋlʋ maama na jɩgɩ gambɛ na yɩ Ebru tiinə tɩn, sɩ kʋ tu yagɩ-ba sɩ ba viiri zaanɩ, ba na yɩ baara, naa kaana dɩ. Kʋ wʋ maŋɩ sɩ nɔɔn-nɔɔnʋ taa jɩgɩ o doŋ Zuda dwi tu sɩ o taa yɩ o gambaa. 10 Tɩʋ kʋm nakwa bam dɩ nɔɔna bam maama ma sɛ pɛ wʋm ni. Ba ma yagɩ ba gambɛ sɩm pa ba viiri zaanɩ, baara dɩ kaana maama. 11 Dɩ kʋ dɩ, kʋ na kɩ fɩɩn tɩn, mʋ ba ləni ba wʋbʋŋa. Ba ma joori ba joŋi ba gambɛ sɩm ba na yagɩ sɩ sɩ viiri zaanɩ tɩn, pa sɩ joori sɩ ji ba gambɛ sɩ tʋŋɩ sɩ pa-ba.
12 Maŋa kam kʋntʋ nɩ Baŋa-Wɛ ma da kʋ ŋwaanɩ DƖ kwe kwǝrǝ kantʋ DƖ pa Zeremi yɩ DƖ wɩ: 13 Yisɩrayɛlɩ tiinə Baŋa-Wɛ dɩm na tagɩ te tɩn mʋ tɩntʋ:
«Amʋ dɛɛn na jaanɩ á nabaara bam a nuŋi Ezipi nɩ pa a joŋi-ba ba gabɛɛm wʋnɩ a yagɩ tɩn, mʋ a kɩ ni-gonim dɩ ba. A ma ta dɩ ba a wɩ: 14 ‹Ebru tu na kwe o tɩtɩ o yəgi o pa wʋlʋ sɩ o taa yɩ o gambaa, yɩ o na tʋŋɩ bɩna yardʋ o pa kʋ tu, sɩ kʋ tu yag-o bɩna yarpɛ bɩnɩ dɩm wʋnɩ.› Dɩ kʋ dɩ, abam nabaara bam wʋ sɛ amʋ ni dɩm kʋntʋ. Ba ma vɩn sɩ ba cəgi a taanɩ.b 15 Abam tɩtɩ nan ləni á wʋbʋŋa yɩ á kɩ á poli amʋ wʋʋ lanyɩranɩ. Á dɩdʋa dɩdʋa ma sɛ sɩ o pa o donnǝ Ebru tiinə viiri zaanɩ. Á brɩ á zʋ amʋ tɩtɩ digə kalʋ na wʋra a yɩrɩ zulə ŋwaanɩ tɩn wʋnɩ mʋ á goni ni sɩ á kɩ kʋntʋ. 16 Lele kʋntʋ abam laan yiri á ni dɩm kʋntʋ, pa á jɩgɩ amʋ yɩrɩ dɩm á yáala! Abam maama joori á kwe á gambɛ sɩlʋ á ya na yagɩ sɩ ba taa te ba tɩtɩ tɩn mʋ. Á ma fɩn-ba sɩ ba joori ba taa tʋŋɩ ba paɩ abam, baara dɩ kaana dɩ.»
17 Kʋntʋ ŋwaanɩ Baŋa-Wɛ daa na tagɩ te tɩn mʋ tɩntʋ:
«Abam wʋ sɛ amʋ ni sɩ á yagɩ á donnǝ Yisɩrayɛlɩ tiinə na yɩ á gambɛ sɩm tɩn sɩ ba viiri zaanɩ. Kʋntʋ ŋwaanɩ amʋ dɩ lagɩ a yagɩ abam sɩ á vu á tɩ najara wʋnɩ, sɩ yawɩɩrʋ dɩ kana dɩ ja á badonnǝ tɩ gʋ. Abam maa wʋ́ ji wo-zɔɔna lʋgʋ baŋa tɩɩnɩ maama yiǝ nɩ. 18 Kʋ na yɩ nɔɔna balʋ na cɔgɩ ni-gonim dɩlʋ a dɛɛn na kɩ dɩ a nɔɔna bam tɩn, amʋ dɩ lagɩ a cɔgɩ-ba mʋ. Ba wʋ kɩ ba tɔgɩ ni dɩlʋ ba na goni amʋ yigə nɩ tɩn. Ba gʋ na-bɩa mʋ ba goni-ka kuni bɩle yɩ, ba daarɩ ba da ka pɔɔrɩm sɩle sɩm tɩtarɩ laŋa nɩ ba kɛ ni-gonim dɩm ŋwaanɩ. Amʋ dɩ wʋ́ kɩ-ba nɩ ba na kɩ te dɩ na-bɩa kam tɩn. 19 A lagɩ a kwe Zuda dɩ Zeruzalɛm tɩʋ nakwa bam, dɩ pɛ sɔŋɔ dɩdɛɛra bam, dɩ kaanɩm tiinə bam, dɩ tɩʋ kʋm nɔɔna balʋ maama na dɛ na-bɩa kam tɩtarɩ laŋa nɩ tɩn, 20 a kɩ ba dʋna jɩŋa nɩ sɩ ba gʋ-ba. Zunə dɩ ga-vara mʋ wʋ́ ba ba di ba yɩra yam.
21 Kʋ ta na yɩ Zuda tɩʋ pɛ Sedesɩasɩ dɩ o dɩdɛɛra bam, amʋ wʋ́ sɩɩnɩ a kɩ-ba ba dʋna jɩŋa nɩ. Babilɔnɩ tɩʋ pɛ jar-kərə bam mʋ kʋntʋ. Bantʋ pipiri ba viiri lele yɩ ba daa bá jeeri abam dɩ najara. 22 Amʋ nan lagɩ a pa-ba ni mʋ sɩ ba joori ba ba yo. A maa wʋ́ pa ba daa zaŋɩ najara dɩ tɩʋ kʋntʋ. Ba lagɩ ba di-kʋ mʋ sɩ ba daarɩ ba zwɛ-kʋ kulə! Amʋ ta wʋ́ pa Zuda tɩɩnɩ dɩm taa yɩ di-dwəənu yɩranɩ, sɩ nɔɔn-nɔɔnʋ yɩ wanɩ dɩ wʋnɩ o zʋ.»
Baŋa-Wɛ na tagɩ te te tɩn mʋ kʋntʋ.