Wɛ wʋ́ pa DƖ nɔɔna joori ba na yazurə
33
Ba dɛɛn ta na pɩ Zeremi ba yagɩ pɛ sɔŋɔ kʋnkɔlɔ kʋm nɩ tɩn, mʋ Baŋa-Wɛ daa pɛ‑o DƖ kwǝrǝ DƖ kɩ kuni bɩle yɩ DƖ wɩ: 2 Baŋa-Wɛ yɩ dɩlʋ na naanɩ tɩga baŋa maama tɩn. DƖ ma fɔgɩ DƖ mɔ-ka DƖ daarɩ DƖ cwi-ka o zɩgɩ cɛpɩ. Dɩntʋ yɩrɩ mʋ yɩ Baŋa-Wɛ. DƖ nan tagɩ tɩntʋ mʋ DƖ wɩ:3 «Bəŋi-na amʋ yɩrɩ, sɩ aá ləri abam. A ta wʋ́ brɩ abam wo-kamunnu tɩlʋ ya na səgi yɩ á yǝri tɩ ni nɩ tɩn.»
4 Yisɩrayɛlɩ tiinə Baŋa-Wɛ dɩm daa tagɩ Zeruzalɛm tɩʋ kʋm sam dɩ Zuda pɛ sɔ-fwaarʋ tɩm taanɩ mʋ yɩ DƖ wɩ:
«Ba yigi sam dɩm ba dɩ tɩga nɩ, sɩ ba ma ba kwɛ tɩʋ kʋm kəbrə kam, sɩ ba wanɩ ba cɩ Babilɔnɩ jar-kərə bam sɩ ba yɩ zʋ tɩʋ kʋm wʋnɩ. 5 Á nan na kɩ najara dɩ ba, á tɩʋ kʋm wʋ́ su dɩ twa yɩ á kɩ-ba di-dwəənu tɩm wʋnɩ. Bɛŋwaanɩ, amʋ jaanɩ wʋbʋŋa sɩ á yɔɔrɩ a cɔgɩ-ba mʋ, a banɩ na zaŋɩ dɩ ba tɩn ŋwaanɩ. Amʋ yigə daa bá taa wʋ tɩʋ kʋm nɔn-biə bam wʋnɩ, ba lwarɩm kikiə yam ŋwaanɩ.
6 Nii-na! Dɛ nan ta wʋra sɩ amʋ joori a fɔgɩ a kwɛ tɩʋ kʋm. Amʋ wʋ́ sooni a nɔɔna bam pa ba taa zʋʋrɩ dɩ yazurə zurim wʋnɩ. 7 Amʋ wʋ́ pa Zuda tiinə bam dɩ Yisɩrayɛlɩ tiinə bam joori ba taa jɩgɩ yu-yoŋo, yɩ a pa ba fɔgɩ ba zɩgɩ dɩ dam nɩ ba dɛɛn na yɩ te tɩn. 8 Lwarɩm dɩlʋ maama ba na kɩ ba cɔgɩ a yigə tɩn, a lagɩ a saarɩ-dɩ a yagɩ mʋ. Ba na nuŋi amʋ kwaga nɩ tɩn, a nan ta wʋ́ kwe ba tusim dɩm kʋntʋ a ma a cɛ-ba. 9 Maŋa kam kʋntʋ nɩ, Zeruzalɛm tɩʋ kʋm wʋ́ pa a na yɩrɩ lʋgʋ baŋa tɩɩnɩ maama wʋnɩ. Amʋ wʋ́ na wʋpolo, dɩ zulə, dɩ paarɩ-zulǝ mʋ tɩʋ kʋm kʋntʋ ŋwaanɩ. Dwi tiinə maama wʋ́ lwarɩ wo-laarʋ tɩlʋ a na wʋ́ kwe a pa a nɔɔna bam tɩn ni nɩ. Bantʋ na nɛ a na fɔgɩ tɩʋ kʋm dɩ yazurə te tɩn, kʋʋ́ sʋ-ba yɩ ba yɩra dɩ taa saɩ.»
10 Baŋa-Wɛ na tagɩ te tɩn mʋ tɩntʋ:
«Abam kaagɩ á tɛ nɩ: ‹Tɩʋ kʋntʋ yɔɔrɩ kʋ ji di-dwəənu yɩranɩ mʋ pa nabiinǝ dɩ vara maama je ka wʋnɩ.› Cɩga tɩn, Zeruzalɛm tɩʋ cwe sɩm nɩ dɩ Zuda tɩɩnɩ dɩm maama wʋnɩ, nabiinǝ dɩ vara sɩɩnɩ ba tǝrǝ. Kʋ nan na wʋ́ taa yɩ te tɩn, je sɩm kʋntʋ nɩ mʋ abam daa lagɩ á ni 11 wʋpolo dɩ mwaanʋ sɔɔ na zaŋɩ. Kadri ywəəni dɩ daa wʋ́ taa wʋra. Ba maa wʋ́ ja le-kǝm pɛɛra ba ba Baŋa-Wɛ digə kam wʋnɩ, yɩ ba leeni nɩ:
‹Pa-na sɩ dɩ́ kɩ Paŋwa Tu Baŋa-Wɛ le,
sɩ Baŋa-Wɛ lamma!
DƖ sono kʋm dɩ maa wʋra maŋa maama.›
Bɛŋwaanɩ, amʋ wʋ́ joori a pa tɩga kantʋ na yu-yoŋo, nɩ ka dɛɛn na jɩgɩ te tɩn.»
Baŋa-Wɛ na tagɩ te tɩn mʋ kʋntʋ.
12 Paŋwa Tu Baŋa-Wɛ na tagɩ te tɩn mʋ tɩntʋ:
«Tɩga kam laan sɩɩnɩ ka daarɩ di-dwəənu yɩranɩ mʋ ka tigə, pa nabiinǝ dɩ vara daa tǝri ka wʋnɩ. Ka nan wʋ́ joori ka kwin dɩ ga-lɛɛrʋ sɩ nayɩra ja ba vara ba vu da ba kɔnɩ. 13 Kʋ na yɩ pweeru laŋa kam nɩ, dɩ wa-zʋʋrɩ seeni bwəəlu tɩm nɩ, dɩ jagwiə seeni kagʋa kam nɩ, dɩ Bɛnzamɛn laŋa kam nɩ, dɩdaanɩ Zeruzalɛm nawuurə yam dɩ Zuda laŋa kam maama nɩ, je sɩm kʋntʋ tɩɩnɩ maama wʋnɩ mʋ vara bam wʋ́ puli lanyɩranɩ yɩ nayɩra bam jeeli ba ni.»
Baŋa-Wɛ na tagɩ kʋlʋ tɩn mʋ kʋntʋ.
14 Baŋa-Wɛ daa ta ma ta DƖ wɩ:
«Maŋa lagɩ ka yi sɩ amʋ kɩ a su ni dɩlʋ a dɛɛn na goni dɩ Yisɩrayɛlɩ dwi tiinə dɩdaanɩ Zuda dwi tiinə bam nɩ aá zǝni-ba tɩn.
15 Maŋa kam kʋntʋ nan na yiǝ,
amʋ wʋ́ pa Davidi dwi dɩm puli naga dɩdʋa
yɩ kʋ tu wʋ́ taa yɩ nɔn-ŋʋm mʋ.
O ta wʋ́ taa tɔgɩ cɩga dɩ o na kɩ te dɩ nɔɔna tɩn mʋ
tɩga kam maama baŋa nɩ.
16 O paarɩ dim maŋa nɩ, Zuda tiinə wʋ́ na vrɩm,
yɩ Zeruzalɛm tiinə dɩ taa zʋʋrɩ dɩ yazurə.
Nɔɔna maa wʋ́ taa bǝi tɩʋ kʋm yɩrɩ nɩ:
‹Baŋa-Wɛ mʋ bʋrɩ dɩbam bʋra dɩ cɩga.›a
17 Amʋ Baŋa-Wɛ nan na tagɩ te tɩn mʋ tɩntʋ: Davidi dwi dɩm daa bá ga nɔɔnʋ sɩ kʋ tu yǝni o jǝni o di Yisɩrayɛlɩ tɩʋ paarɩ.b 18 Kaanɩm tiinə bam na nuŋi Levi dwi dɩm nɩ tɩn dɩ wʋ́ taa wʋra maŋa maama mʋ, sɩ ba taa kɩ zwɛɛm pɛɛra, dɩ wʋdiu pɛɛra, dɩ kaanɩm dwi dwi ba pa-nɩ.»
19 Baŋa-Wɛ daa ta ma pa Zeremi ni yɩ DƖ wɩ:
20 «Amʋ Baŋa-Wɛ na tagɩ kʋlʋ tɩn mʋ tɩntʋ: Amʋ goni ni dɩ wɩa kam dɩ tɩtɩɩ dɩm, sɩ tɩntʋ taa tui dɛ maama tɩ maŋa nɩ. Abam wʋ́ wanɩ á cɔgɩ ni-gonim dɩm kʋntʋ na? 21 Á ya na wanɩ á cɔgɩ-dɩ, á yaá wanɩ ni-gonim dɩlʋ a na kɩ dɩ a tɩntʋŋnʋ Davidi tɩn dɩdaanɩ dɩlʋ a na kɩ dɩ Levi tiinə bam tɩn á cɔgɩ. Kʋ nan na yɩ te tɩn, maŋa maama nɔɔnʋ wʋ́ taa wʋra o na wʋ́ nuŋi Pɛ Davidi dwi dɩm wʋnɩ sɩ o di paarɩ. Levi tiinə dɩ wʋ́ taa wʋra sɩ ba taa yɩ kaanɩm tiinə ba pa-nɩ. 22 Kʋ na yɩ a tɩntʋŋnʋ Davidi dwi dɩm, dɩ Levi dwi dɩm na kaanɩ ba pa-nɩ tɩn, a lagɩ a pa ba puli mʋ nɩ wɛyuu calɩcwɩ sɩm na daga te tɩn. Ba ni bá wanɩ dɩ ga dɩ ti, nɩ nɩnɩʋ ni kasʋlʋ biə na yɩ te tɩn.»
23 Baŋa-Wɛ daa ma pa Zeremi ni yɩ DƖ wɩ:
24 «N wʋ nɛ na? Nɔɔna badonnǝ jɩgɩ a nɔɔna bam ba twɩ yɩ ba wɩ: ‹Baŋa-Wɛ laan vri DƖ kwaga DƖ ya dwiə yale yamc DƖ ya na kuri tɩn.› Ba yǝni ba ta kʋntʋ doŋ, yɩ ba bʋŋɩ nɩ a nɔɔna bam daa ba jɩgɩ kuri mʋ. 25 Amʋ Baŋa-Wɛ nan na tagɩ te tɩn mʋ tɩntʋ: Ni-gonim dɩlʋ a na kɩ dɩ wɩa kam, dɩ tɩtɩɩ dɩm tɩn yɔɔrɩ dɩ zɩgɩ mʋ lanyɩranɩ. A ta ma pa wɛyuu dɩ tɩga baŋa taa tɔgɩ cwe sɩlʋ na yɔɔrɩ sɩ maŋɩ dɩ tɩ tɩn. 26 Kʋ ta yɩ bɩdwɩ mʋ, amʋ bá vɩn Zakɔbɩ dwi dɩm maŋa dɩ maŋa. A bá swe sɩ a kuri nɔɔnʋ a tɩntʋŋnʋ Davidi dwi tiinə bam wʋnɩ, sɩ kʋ tu di paarɩ a nɔɔna bam baŋa nɩ. Abraham, dɩ Yizakɩ, dɩ Zakɔbɩ dwi tiinə bam mʋ kʋntʋ. Aá joori a pa a nɔɔna bam taa jɩgɩ yu-yoŋo. A maa wʋ́ duri ba yibwənə.»