Zeremi na yəgi tɩga te tɩn
32
Baŋa-Wɛ daa na pɛ Zeremi ni dɩlʋ tɩn mʋ tɩntʋ. Kʋ dɛɛn kɩ kʋ maŋɩ dɩ Zuda tɩʋ pɛ Sedesɩasɩ na jɩgɩ bɩna fugə o paarɩ dim wʋnɩ tɩn mʋ. Babilɔnɩ tɩʋ pɛ Nebukadnɛtsarɩ paarɩ dim bɩna fugə-nana bɩnɩ dɩm wʋnɩ mʋ kʋntʋ.2 Maŋa kam kʋntʋ nɩ, Babilɔnɩ tɩʋ pɛ jar-kərə bam mʋ tu ba kaagɩ Zeruzalɛm tɩʋ kʋm ba pu, dɩ ba dɛɛn jaanɩ Wɛ nijoŋnu Zeremi ba pɩ Zuda pɛ sɔŋɔ kʋnkɔlɔ kʋm nɩ. 3 Zuda tɩʋ pɛ Sedesɩasɩ mʋ pɩ-o da, Zeremi dɛɛn na ŋɔɔnɩ Wɛ yiyiu-ŋwɛ o brɩ wǝǝnu tɩlʋ Zeruzalɛm seeni tɩn ŋwaanɩ. Sedesɩasɩ dɛɛn ya bwɛ Zeremi o wɩ: «Bɛɛ mʋ yɩ n brɩ nɩ n joŋi Baŋa-Wɛ kwǝrǝ n wɩ: DƖ lagɩ DƖ kwe tɩʋ kʋm DƖ kɩ Babilɔnɩ tɩʋ pɛ jɩŋa nɩ mʋ sɩ o di-kʋ?» 4 Zeremi ta tagɩ Baŋa-Wɛ kwǝrǝ nɩ: «Pɛ Sedesɩasɩ bá lu Babilɔnɩ tiinə bam jɩŋa nɩ. Baá ja-o ba vu ba pa Babilɔnɩ tɩʋ pɛ mʋ sɩ ba ŋɔɔnɩ daanɩ. 5 Ba laan wʋ́ ja Sedesɩasɩ ba vu Babilɔnɩ. O nan wʋ́ taa wʋ dáanɩ mʋ sɩ amʋ laan ba a waar‑o. Abam na kwaanɩ á jaŋɩ dɩ Babilɔnɩ tɩʋ tiinə bam, á lagɩ á tʋ mʋ. Amʋ Baŋa-Wɛ na tagɩ te tɩn mʋ kʋntʋ.»
6 Kʋntʋ maama kwaga nɩ, Baŋa-Wɛ daa ta ma ta dɩ Zeremi DƖ wɩ: 7 «Nmʋ ko cʋrʋ Salum bu Hananeyɛlɩ wʋ́ ba n te o ta dɩ nmʋ nɩ: ‹Amʋ bʋŋɩ sɩ a kwe a kara kalʋ na wʋ Anatɔtɩ nɩ tɩn mʋ a yəgi a pa‑m. Nmʋ maŋɩ sɩ n yəgi-ka, nmʋ na yɩ amʋ yɩra nɔɔnʋ tɩn ŋwaanɩ.› »
8 Kʋ na kɩ da yale tɩn, amʋ cʋrʋ Hananeyɛlɩ ma sɩɩnɩ o ba a te mɛ ba na pɩ-nɩ pɛ sɔŋɔ kʋnkɔlɔ kʋm nɩ tɩn, nɩnɛɛnɩ Baŋa-Wɛ na wuuri DƖ ta DƖ brɩ-nɩ te tɩn. DƖ ma ta dɩ amʋ DƖ wɩ: «Amʋ bʋŋɩ sɩ a kwe a kara kam na wʋ Anatɔtɩ nɩ, Bɛnzamɛn tiinə tɩʋ kʋm nɩ tɩn mʋ a yəgi a pa‑m. Nmʋ maŋɩ sɩ n yəgi-ka sɩ ka taa yɩ nmʋ nyɩm. Nan yəgi-ka n tan te.»
Kʋ na kɩ kʋntʋ tɩn, amʋ ma lwarɩ nɩ kʋ yɩ Baŋa-Wɛ kwǝrǝ cɩga cɩga mʋ a niə. 9 A ma yəgi a cʋrʋ kara kam na wʋ Anatɔtɩ nɩ tɩn o tee nɩ, yɩ a jeeli səbu-poŋo səbu-dala fugə-yarpɛ sɩ a pa‑o ka ŋwaanɩ. 10 A ta ma pʋpʋnɩ a yɩrɩ tɩga kam tɔnɔ wʋnɩ, yɩ a daarɩ a zi a jɩŋa kʋ baŋa nɩ. Nɔɔna badonnǝ ma nii yɩ ba sɛ a na kɩ te tɩn. Amʋ ma maŋɩ tɩga kam səbu sɩ kʋ taa yɩ cɩga. 11 Amʋ laan ma kwe tɔnɔ kʋlʋ a na zi yɩ tɩga kam yɩra sənə wʋ tɩ wʋnɩ tɩn, dɩdaanɩ tɔnɔ kʋdoŋ na lwəni-kʋ yɩ kʋ ta puri tɩn 12 a pa Neriya bu Baruki. O dɛɛn yɩ Maseya naa mʋ. A na pɛ‑o twannʋ tɩle tɩm kʋntʋ tɩn, mʋ a cʋrʋ Hananeyɛlɩ nɛa, kʋ ta wǝli dɩ nɔɔna balʋ na maanɩ a kǝm dɩm yɩ ba pʋpʋnɩ ba yɩra tɔnɔ kʋm wʋnɩ tɩn, dɩ Zuda tiinə balʋ maama na wʋ pɛ sɔŋɔ kʋnkɔlɔ kʋm nɩ tɩn. 13 Bantʋ maama na zɩgɩ da yɩ ba cəgi tɩn mʋ a pɛ Baruki ni yɩ a wɩ: 14 «Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: ‹Kwe twannʋ tɩntʋ dɩ́ na pʋpʋnɩ tɩga kam yəlo ŋwaanɩ tɩn, sɩ n laan kɩ-tɩ kambiə wʋnɩ sɩ tɩ maŋɩ da bɩna zanzan. Kɩ kʋntʋ dɩ tɔnɔ kʋlʋ ba na zi ba jɩan kʋ baŋa nɩ tɩn, dɩ kʋ doŋ kʋm ta na puri tɩn.› 15 Bɛŋwaanɩ, Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn na tagɩ kʋlʋ tɩn mʋ tɩntʋ: ‹Maŋa wʋ́ ba sɩ nɔɔna daa joori ba yəgi sam, dɩ karɩ, dɩ vinyə karɩ tɩʋ kʋntʋ wʋnɩ.› »
Zeremi wɛ-loro
16 A na kwe twannʋ tɩm a pa Neriya bu Baruki a ti tɩn, mʋ a loori Baŋa-Wɛ a wɩ:
17 «Yuutu Baŋa-Wɛ, nmʋ dɛ n dam-fɔrɔ kʋm baŋa nɩ n tʋŋɩ wo-kamunnu mʋ n kɩ wɛyuu kʋm, dɩ tɩga baŋa maama. Kʋlʋkʋlʋ nan tǝrǝ kʋ na tiini kʋ camma kʋ dwe nmʋ kǝm. 18 Nmʋ yɔɔrɩ n jɩgɩ sono mʋ n paɩ nɔɔna mʋrrʋ zanzan. N nan ta paɩ biə yaarɩ ba kwə lwarɩm ŋwaanɩ. N yɩ Wɛ-kamunu mʋ yɩ n dam dɩ gaalɩ. N yɩrɩ dɩm mʋ yɩ Paŋwa Tu Baŋa-Wɛ. 19 N yǝni n tɔgɩ yǝno dwi maama baŋa nɩ mʋ n kɩ tɩtʋŋ-kamunnu. Nmʋ ye nabiinǝ maama kikiə na yɩ te tɩn. N ma n ŋwɩ-ba sɩ kʋ maŋɩ dɩ cwe sɩlʋ ba na tɔgɩ tɩn dɩ kikiə yalʋ ba na tʋŋɩ tɩn. 20 Nmʋ dɛɛn kɩ tɩtʋŋ-kamunnu dɩ wo-kɩnkagɩla Ezipi wʋnɩ. Tɩtʋŋa yantʋ doŋ mʋ n ta jɩgɩ n kɩ dɩ zɩm maama Yisɩrayɛlɩ tiinə dɩ dwi-gɛ tiinə maama tee nɩ. Kʋntʋ ŋwaanɩ n yɩrɩ zaŋɩ je maama nɩ dɩ zɩm. 21 Nmʋ tɔgɩ n dam baŋa nɩ n tʋŋɩ wo-kamunnu dɩdaanɩ wo-kɩnkagɩla sɩ n ma n fugi Ezipi tiinə bam yɩ n daarɩ n vrɩ n nɔɔna Yisɩrayɛlɩ tiinə bam ba jɩŋa nɩ n yagɩ. 22 N ma n kwe tɩga kantʋ n dɛɛn na goni ni ka ŋwaanɩ dɩ ba nabaara bam tɩn n pa-ba. Ka maa yɩ tɩga kalʋ na ywəmmə dɩ varɩm dɩ kɔnɔ tɩn. 23 Ba dɩ na tu ba joŋi-ka tɩn, ba wʋ sɛ nmʋ niə yam. Ba brɩ ba wʋ tɔgɩ cwe sɩlʋ n na brɩ-ba tɩn. Kʋ na yɩ wǝǝnu tɩlʋ n na pɛ-ba ni sɩ ba taa kɩ tɩn, ba wʋ kɩ tɩ kʋlʋkʋlʋ. Kʋntʋ ŋwaanɩ nan mʋ te n pɛ lɛɛrʋ tɩntʋ maama ba ba baŋa nɩ.
24 Nii-na! Babilɔnɩ tiinə bam lɔgɩ taala kamunə ba yǝri dɩ́ tɩʋ kʋm kabri sɩm yɩra nɩ mʋ sɩ ba tɔgɩ-ya ba zʋ tɩʋ kʋm ba di dɩbam. Jara-kǝm, dɩ kana, dɩ yawɩ-cɛɛrʋ wʋ́ cɔgɩ dɩbam. Dɩ́ tɩʋ kʋm laan wʋ Babilɔnɩ jar-kərə bam jɩŋa nɩ mʋ sɩ ba wanɩ dɩbam. Nmʋ Baŋa-Wɛ na tagɩ nɩ kʋlʋ wʋ́ yi dɩbam tɩn laan mʋ tʋ dɩ́ baŋa nɩ, yɩ nmʋ tɩtɩ nɛ-kʋ. 25 Yuutu Baŋa-Wɛ, nmʋ ye nɩ kʋ bá daanɩ sɩ Babilɔnɩ tiinə bam di dam dɩ́ tɩʋ kʋm baŋa nɩ. N nan ta pɛ amʋ ni sɩ a kwe səbu-poŋo a ma yəgi kara kam, sɩ nɔɔna dɩ maanɩ a kǝm dɩm kʋntʋ yɩ ba zi ba jɩan kʋ ŋwaanɩ.»
26 Baŋa-Wɛ daa na pɛ Zeremi ni dɩlʋ tɩn mʋ tɩntʋ:
27 «Amʋ mʋ yɩ Baŋa-Wɛ dɩm. A nan yɩ nabiinǝ bam maama Wɛ mʋ. Woŋo wʋra kʋ na tiini kʋ camma kʋ dwe amʋ kǝm na? 28 Amʋ Baŋa-Wɛ nan na tagɩ te tɩn mʋ tɩntʋ: A lagɩ a kwe tɩʋ kʋntʋ mʋ a kɩ Pɛ Nebukadnɛtsarɩ dɩ o jar-kərə bam jɩŋa nɩ sɩ ba di-kʋ. 29 Jar-kərə balʋ na tu sɩ ba zaŋɩ najara dɩ tɩʋ kʋm tɩn wʋ́ zʋ tɩʋ kʋm wʋnɩ yɩ ba daarɩ ba zwɛ-kʋ. Ba maa wʋ́ pa mim di sam dɩlʋ nɔɔna na diini dɩ nayuni baŋa nɩ yɩ ba zwɛ wǝǝnu ba ma kɩ kaanɩm ba pa Baalɩ jwəm dɩm ba daarɩ ba kwe sana pɛɛra ba pa wa yadonnə tɩn. Ba tɩtʋŋa yam kʋntʋ pɛ a banɩ zaŋɩ ba baŋa nɩ mʋ.
30 Zuda dwi tiinə dɩ Yisɩrayɛlɩ dwi tiinə bam yɔɔrɩ ba tʋŋɩ lwarɩm kikiə amʋ yigə nɩ mʋ kʋ zɩgɩ ba nɔn-dʋnnɩ maŋa nɩ sɩ kʋ yi zɩm maama. Ba jɩan na kɩ wǝǝnu tɩlʋ tɩn yǝni tɩ zaŋɩ amʋ banɩ mʋ. Amʋ Baŋa-Wɛ na tagɩ te tɩn mʋ kʋntʋ. 31 Ba na maŋɩ ba cwi tɩʋ kʋm kuri tɩn mʋ kʋ nɔn-biə bam puli sɩ ba taa kɩ kʋlʋ na wʋ́ zaŋɩ a banɩ tɩn. Kʋ laan nan yi sɩ a cɔgɩ-kʋ, pa kʋ je a yigə nɩ. 32 Yisɩrayɛlɩ tiinə bam dɩ Zuda tiinə bam paɩ a banɩ mʋ yɔɔrɩ dɩ zaŋa dɩ ba lwarɩm kikiə yam. Kʋ maa yɩ ba pwa, dɩ ba nakwa, dɩ ba kaanɩm tiinə, dɩ ba nijoŋnǝ bam, dɩ balʋ maama na zʋʋrɩ Zeruzalɛm tɩʋ kʋm dɩ Zuda laŋa kam maama nɩ tɩn mʋ zaŋɩ a banɩ. 33 Ba mɛ ba kwaga ba ya amʋ, yɩ ba yigə tǝrǝ a wʋnɩ. Amʋ yɔɔrɩ a brɩ-ba maŋa maama mʋ. Ba nan wʋ cəgi a taanɩ dɩm. Ba maa wʋ sɛ sɩ a zaasɩ-ba. 34 Ba kwe wo-zɔɔna yalʋ ba na zuli tɩn ba zɩgɩ digə kalʋ na wʋra a yɩrɩ zulə ŋwaanɩ tɩn wʋnɩ, yɩ ba da kʋ ŋwaanɩ ba cɔgɩ-ka. 35 Ba ta ma lɔ bimbinə Bɛn-Hinom bolo kʋm nɩ, yɩ ba zuli Baalɩ jwəm dɩm ya baŋa nɩ. Ba maa yǝni ba kwe ba biə ba zwɛ mim wʋnɩ ba kɩ kaanɩm ba pa Molɔkɩ jwəm dɩm. Amʋ nan wʋ fɔgɩ a pa-ba ni sɩ ba kɩ kʋntʋ. Kǝm-lɔŋɔ kʋm kʋntʋ doŋ maŋɩ kʋ wʋ tu a wʋbʋŋa nɩ. Ba nan jɩgɩ kʋntʋ mʋ ba kɩ, pa Zuda tiinə bam maama tiini ba tusi.
36 Abam yǝni á tɛ tɩʋ kʋntʋ taanɩ á wɩ: ‹Jara-kǝm, dɩ kana, dɩ yawɩ-cɛɛrʋ mʋ lagɩ tɩ cɔgɩ tɩʋ kʋm pa kʋ taa wʋ Babilɔnɩ tɩʋ pɛ jɩŋa nɩ sɩ o wanɩ-kʋ.› Amʋ Yisɩrayɛlɩ tiinə Baŋa-Wɛ dɩm nan na tagɩ te tɩn mʋ tɩntʋ: 37 Kʋ na yɩ je sɩlʋ maama a na wʋ́ zəli a nɔɔna bam a yagɩ da a ban-zɔŋɔ kʋm ŋwaanɩ tɩn, a daa ta wʋ́ la-ba a zɩgɩ da a ja a joori ba tɩʋ kʋm, sɩ ba taa zʋʋrɩ yo dɩ yazurə. 38 Ba maa wʋ́ taa yɩ a nɔɔna, sɩ amʋ dɩ taa yɩ ba Tu Wɛ dɩm. 39 A maa wʋ́ pa ba taa jɩgɩ wʋbʋŋ-dɩdwɩ ba ŋwɩa wʋnɩ, pa ba taa kwarɩ amʋ maŋa maama. Baá kɩ kʋntʋ sɩ kʋ taa lana kʋ paɩ ba tɩtɩ dɩ ba kwaga kam. 40 A ta wʋ́ kɩ ni-gonim dɩlʋ na wʋ́ taa wʋra maŋa maama tɩn dɩ ba. Amʋ wʋ́ goni ni sɩ a taa kɩ-ba lanyɩranɩ maŋa maama. A maa wʋ́ pa ba taa kwarɩ amʋ dɩ ba wʋ maama, sɩ ba daa yɩ nuŋi a kwaga nɩ. 41 Kʋʋ́ kɩ amʋ ywəəni sɩ a taa kɩ-ba lanyɩranɩ. A maa wʋ́ fɔgɩ a jəri-ba tɩga kantʋ nɩ dɩ a wʋ maama.
42 Amʋ Baŋa-Wɛ na tagɩ kʋlʋ tɩn mʋ tɩntʋ: Amʋ sɩɩnɩ a ja lɛɛrʋ tɩntʋ maama a ba a dɩ nɔɔna bam wʋnɩ. Dɩ kʋntʋ maama a nan wʋ́ pa-ba yu-yoŋo nɩ a na goni ni nɩ aá pa-ba te tɩn. 43 Abam yǝni á ta je sɩntʋ taanɩ mʋ á wɩ: ‹Babilɔnɩ jar-kərə bam tu sɩ ba cɔgɩ tɩga kam. Ka lagɩ ka ji di-dwəənu yɩranɩ, mɛ nabiinǝ dɩ vara na tǝrǝ ka wʋnɩ tɩn.› Dɩ kʋ dɩ, nɔɔna daa wʋ́ yəgi tɩga yo seeni. 44 Cɩga tɩn, nɔɔna wʋ́ kwe səbu-poŋo ba ma yəgi tɩga je sɩntʋ wʋnɩ. Ba ta wʋ́ pʋpʋnɩ tɩga kam twannʋ, yɩ ba daarɩ ba zi ba jɩan tɩ baŋa nɩ. Nɔɔna badaara wʋ́ maanɩ ba kǝm dɩm yɩ ba dɩ zi ba jɩan kʋ ŋwaanɩ. Kʋ nan wʋ́ kɩ kʋntʋ mʋ Bɛnzamɛn tiinə tɩʋ kʋm nɩ, dɩ Zeruzalɛm nawuurə yam nɩ, dɩ Zuda tɩɩnɩ dɩm nɩ, kʋ ta wǝli dɩ pweeru laŋa kam seeni, dɩ wa-zʋʋrɩ seeni bwəəlu tɩm nɩ, dɩ jagwiə kagʋa kam seeni maama. Bɛŋwaanɩ, amʋ wʋ́ joori a pa a nɔɔna bam joori ba taa jɩgɩ yu-yoŋo. Amʋ Baŋa-Wɛ na tagɩ te tɩn mʋ kʋntʋ.»