24
Maŋa kalʋ Yeoyakim dɛɛn na di paarɩ tɩn mʋ Babilɔnɩ tɩʋ pɛ Nebukadnɛtsarɩ cəŋi Zuda tɩʋ maama o te. Kʋntʋ ma pa Yeoyakim maŋɩ Nebukadnɛtsarɩ dam kuri nɩ o kɩ bɩna yatɔ. Yeoyakim dɛɛn ma ləri o wʋbʋŋa yɩ o vɩn Nebukadnɛtsarɩ ni.a2 Baŋa-Wɛ ma pa jar-kərə nuŋi Babilɔnɩ, dɩ Siiri, dɩ Moabɩ, dɩ Amɔn tɩɩnɩ dɩm ba vu ba kɩ jara dɩ Zuda tiinə bam. Baŋa-Wɛ dɛɛn maŋɩ o tɔgɩ o nijoŋnǝ bam baŋa nɩ o kaanɩ Zuda tiinə bam wɩ: baá na cɔgɩm kʋntʋ doŋ.3 Lɛɛrʋ tɩlʋ na sɩɩnɩ tɩ yi-ba tɩn mʋ Baŋa-Wɛ pɛ ni sɩ tɩ kɩ. DƖ wʋbʋŋa ma ja sɩ DƖ zəli Zuda tiinə bam DƖ yigə nɩ, Pɛ Manasɩ na tʋŋɩ lwarɩm yalʋ tɩn ŋwaanɩ.4 Manasɩ dɛɛn na kɩ te tɩn, o gʋ balʋ na yɩ nɔn-ŋʋna tɩn mʋ pa ba jana taagɩ Zeruzalɛm tɩʋ kʋm ni maama. Kʋntʋ ŋwaanɩ Baŋa-Wɛ vɩn sɩ DƖ yagɩ o lwarɩm DƖ ma cɛ-o.
5 Yeoyakim dɛɛn na di paarɩ yɩ o kɩ wǝǝnu tɩlʋ tɩn, dɩ o tɩtʋŋa yam maama, ba pʋpʋnɩ-tɩ ba tiŋi Zuda Tɩʋ Pwa Cɩbarɩ tɔnɔ kʋm wʋnɩ. 6 Yeoyakim ma tɩ yɩ o bu Zekonɩa ləri o yuu nɩ o di paarɩ.
7 Ezipi pɛ wʋm daa wʋ sɛ sɩ o nuŋi o kɩ najara, bɛŋwaanɩ Babilɔnɩ tɩʋ pɛ mʋ maŋɩ o cəŋi Ezipi tɩʋ maama o te, kʋ zɩgɩ Ezipi bu-tʋla kam seeni sɩ kʋ vu kʋ yi Efratɩ bugə kam je sɩm maama.
Zuda tɩʋ Pɛ Yehoyakini taanɩ
8 Yehoyakini dɛɛn jɩgɩ bɩna fugə-nana mʋ yɩ o di paarɩ. O ma jǝni Zeruzalɛm nɩ o di paarɩ dɩm o kɩ canɩ sɩtɔ. O nu yɩrɩ mʋ Newusita. O maa yɩ Elinatan bukɔ yɩ o nuŋi Zeruzalɛm tɩn mʋ. 9 Yehoyakini dɛɛn tʋŋɩ lwarɩm o cɔgɩ Baŋa-Wɛ yigə, nɩ o ko wʋm dɩ na kɩ te tɩn mʋ.
10 Yehoyakini paarɩ dim maŋa nɩ mʋ Babilɔnɩ tɩʋ pɛ Nebukadnɛtsarɩ tʋŋɩ o jar-kərə sɩ ba vu ba li Zeruzalɛm tɩʋ dɩ najara. Ba ma vu ba kaagɩ tɩʋ kʋm ba pu. 11 Pɛ Nebukadnɛtsarɩ tɩtɩ dɩ ma tɔgɩ o yi da yɩ o nɔɔna bam ta wʋra ba kɩ jara dɩ tɩʋ kʋm. 12 Zuda tɩʋ pɛ Yehoyakini, dɩ o nu, dɩ o tɩntʋŋna, dɩ o dɩdɛɛra, dɩ o nakwa bam maama ma sɛ ba pa Babilɔnɩ pɛ wʋm. Babilɔnɩ pɛ wʋm ma pa ba ja Yehoyakini ba pɩ.b
Kʋntʋ dɛɛn kɩ Pɛ Nebukadnɛtsarɩ paarɩ dim bɩna nana bɩnɩ dɩm nɩ mʋ. 13 O ma vrɩ lʋnnɩ wǝǝnu tɩlʋ maama na wʋ Baŋa-Wɛ digə kam nɩ, dɩ pɛ sɔŋɔ kʋm nɩ tɩn o ja o viiri, nɩ Baŋa-Wɛ na wuuri DƖ ta nɩ: kʋʋ́ kɩ te tɩn.c O ma daarɩ o kʋrɩ səbu-sɩŋa wǝǝnu tɩlʋ Yisɩrayɛlɩ tɩʋ pɛ Solɔmɔn dɛɛn na kɩ o zɩgɩ Baŋa-Wɛ digə kam nɩ tɩn maama o ja o viiri. 14 O ma yɔɔrɩ o kwe Zeruzalɛm nɔn-biə na yi mʋrrʋ fugə tɩn o ja o vu o tɩtɩ tɩʋ. Kʋ dɛɛn yɩ ba jar-kərə bam, dɩ ba dɩdɛɛra bam, kʋ wǝli dɩ balʋ na yɩ gwarʋ dɩ lurə tɩn maama mʋ. Balʋ na tiini ba yɩ yinigə tiinə tɩn yɩranɩ mʋ o yagɩ tɩʋ kʋm wʋnɩ.
15 Pɛ Nebukadnɛtsarɩ ma ja Yehoyakini, dɩ o nu, dɩ o kaana, dɩ o dɩdɛɛra, kʋ wǝli dɩ Zeruzalɛm tɩʋ kʋm nadunə bam maama o vu Babilɔnɩ.d 16 O ta ma ja jar-kərə mʋrrʋ tɩrpɛ, dɩ gwarʋ dɩ lurə mʋrʋ dɩdʋa. Bantʋ maama ye najara kǝm lanyɩranɩ. 17 O ma pa Yehoyakini ko cʋrʋ Matanɩa ləri o yuu nɩ o ji pɛ. O ma ləri o yɩrɩ dɩm pa dɩ yɩ Sedesɩasɩ.e
Zuda tɩʋ Pɛ Sedesɩasɩ taanɩ
18 Sedesɩasɩ dɛɛn jɩgɩ bɩna fiinle-dɩdʋa mʋ yɩ o di paarɩ. O ma jǝni Zeruzalɛm nɩ o di paarɩ dɩm o kɩ bɩna fugə-dɩdʋa. O nu yɩrɩ mʋ Hamutalɩ. Wʋntʋ maa yɩ Zeremi wʋlʋ na nuŋi Libina tɩn bukɔ. 19 Zedɩkɩa dɛɛn tʋŋɩ lwarɩm mʋ o cɔgɩ Baŋa-Wɛ yigə, nɩ Pɛ Yeoyakim dɩ ya na kɩ te tɩn.
20 Lɛɛrʋ tɩlʋ maama na kɩ Zeruzalɛm dɩ Zuda tiinə bam yɩra nɩ tɩn tɔgɩ Baŋa-Wɛ ban-zɔŋɔ kʋm ŋwaanɩ mʋ. Kʋ na kweeli te tɩn, DƖ lɩ DƖ yigə mʋ ba baŋa nɩ.
Zeruzalɛm tɩʋ na tʋ te tɩn
Pɛ Zedɩkɩa dɛɛn ma zaŋɩ o nuŋi Babilɔnɩ tɩʋ pɛ Nebukadnɛtsarɩ kwaga nɩ.