25
Sedesɩasɩ paarɩ dim bɩna nʋgʋ bɩnɩ dɩm canɩ fugə cana kam wʋnɩ, ka da fugə dɛ dɩm nɩ mʋ Babilɔnɩ tɩʋ Pɛ Nebukadnɛtsarɩ dɛɛn tu o li Zeruzalɛm dɩ o jar-kərə bam maama. Ba ma kaagɩ tɩʋ kʋm ba pu yɩ ba daarɩ ba lɔ taalɩ-kamunə ba yǝri kʋ kabri sɩm yɩra nɩ.a2 Kʋ na yi Sedesɩasɩ paarɩ dim bɩna fugə-dɩdʋa bɩnɩ dɩm tɩn mʋ Babilɔnɩ tiinə bam dɛɛn wanɩ Zeruzalɛm tɩʋ kʋm ba di.
3 Kʋ na yi bɩnɩ dɩm kʋntʋ canɩ sɩna cana kam da nʋgʋ dɛ dɩm tɩn, kana dɛɛn tiini ka cɛ mʋ pa Zeruzalɛm nɔn-biə bam daa ba jɩgɩ wʋdiu sɩ ba di. 4 Babilɔnɩ tiinə bam ma yigi tɩʋ kʋm kabri sɩm ba dɩ tɩga nɩ, yɩ ba tɔgɩ pwəli sɩm nɩ ba zʋ kʋ wʋ. Zedɩkɩa dɩ o jar-kərə bam maama dɛɛn duri sɩ ba lu tɩtɩɩ nɩ mʋ. Ba ma kwe pɛ gaarɩ cwǝŋǝ kam, ba vu ba tɔgɩ ni dɩm na wʋ tɩʋ kabri sɩle sɩm tɩtarɩ nɩ tɩn, yɩ ba laan duri ba tu Zʋrdɛn bolo kʋm seeni.b 5 Dɩ kʋ dɩ, Babilɔnɩ tiinə jar-kərə bam dɛɛn zəli-ba mʋ. Ba ma vu ba yi Sedesɩasɩ sɩ kʋ maŋɩ dɩ Zeriko tɩ-kamparɩ sɩm seeni. O jar-kərə bam ma pwɛ da yigə nɩ, yɩ ba jagɩ ba daarɩ‑o.
6 Ba ma zi Sedesɩasɩ ba ja ba vu Babilɔnɩ tɩʋ pɛ Nebukadnɛtsarɩ te. O dɛɛn wʋ Hamatɩ provɛnsɩ dɩm tɩʋ Ribila nɩ mʋ. Nebukadnɛtsarɩ ma di taanɩ o vanɩ Sedesɩasɩ dáanɩ. 7 O ma pa ba gʋ Sedesɩasɩ biə bam, yɩ o zɩgɩ da o niə. Kʋ kwaga nɩ o pɛ ba pi Zedɩkɩa yiǝ yam mʋ ba lɩ, yɩ ba daarɩ ba kwe canna capʋnnʋ ba ma ba vɔ‑o ba vaŋɩ ba ja ba vu Babilɔnɩ.c
8 Nebukadnɛtsarɩ dɛɛn na di Babilɔnɩ tɩʋ paarɩ o kɩ bɩna fugə-nʋgʋ bɩnɩ dɩlʋ nɩ tɩn, canɩ sɩnu cana kam da yarpɛ dɛ dɩm nɩ mʋ o kwaga-saŋɩnʋ Nebuzaradan zʋ Zeruzalɛm tɩʋ kʋm wʋnɩ. Wʋntʋ maa yɩ Babilɔnɩ tɩʋ pamaŋna bam yigə tu. 9 O dɛɛn ma pa ba zwɛ Baŋa-Wɛ digə kam, dɩ pɛ sɔŋɔ kʋm, dɩ Zeruzalɛm sam dɩm maama. Ba dɛɛn zwɛ sa-ŋʋnnʋ dwi maama mʋ Zeruzalɛm tɩʋ wʋnɩ. 10 Nebuzaradan ma pa ni pa o jar-kərə bam yɔɔrɩ ba yigi Zeruzalɛm tɩʋ kabri sɩm ba dɩ tɩga nɩ. 11 O ma kalɩ nɔɔna balʋ ta na daarɩ tɩʋ kʋm wʋnɩ tɩn, kʋ ta wǝli dɩ gwarʋ ta na daarɩ tɩn, dɩ balʋ ya na duri ba zʋ Babilɔnɩ tiinə kɔgɔ kʋm wʋnɩ tɩn o ja o vu Babilɔnɩ.d 12 Kʋ nan na yɩ tɩʋ kʋm yinigə tiinə badaara, Nebuzaradan yagɩ-ba Zuda laŋa kam nɩ mʋ. O ma pa-ba tɩga sɩ ba va, dɩ vinyə tweeru karɩ, sɩ ba taa nii sɩ baŋa nɩ.
13 Babilɔnɩ tiinə bam ma zʋ Baŋa-Wɛ digə kam ba bwəri canna zɩla yam maama. Yantʋ maa yɩ ywə yale yam, dɩ war-zʋn-zɔŋɔ kʋlʋ ba na bǝi nɩ ‹Nɩnɩʋ kʋm› tɩn, dɩ war-zwɩ zɩgɩm tərikooru tɩm. Ba ma daarɩ ba kwe tɩ canna kam ba zɩŋɩ ba ja ba vu Babilɔnɩ. 14 Ba ta ma kwe zwɩ sɩlʋ ba na wʋ́ taa maɩ ba pɛ tɩntwarɩm tɩn, dɩ sɛbʋllʋ, dɩ wǝǝnu tɩlʋ na wʋ́ fɔgɩ tɩ kwɛ mim dɩm tɩn, dɩ zwɩ sɩlʋ ba na zwɛ wǝǝnu tɩlʋ lwǝm na ywǝmmǝ tɩn sɩ wʋnɩ tɩn, dɩ canna wǝǝnu tɩlʋ maama na jɩgɩ tɩ fɔgɩ Wɛ-digə cullu tɩm tɩn. 15 Nebuzaradan ta ma pa ba kwe Wɛ-digə zɩla yalʋ maama ba na mɛ səbu-sɩŋa, naa səbu-poŋo ba kɩ-ya tɩn. Tɩntʋ maa yɩ min-cala zwɩ dɩ zwɩ sɩlʋ ba na wʋ́ taa maɩ ba zɩzagɩ na bimbim dɩm baŋa nɩ tɩn mʋ. Ba ma kwe wǝǝnu tɩm kʋntʋ səbu-sɩŋa kam dɩ tɩ səbu-poŋo tɩm ba ja ba viiri.
16 Kʋ na yɩ ywə yale yam, dɩ war-zʋn-zɔŋɔ kʋm, dɩdaanɩ war-zwɩ zɩgɩm tərikooru tɩm, Pɛ Solɔmɔn dɛɛn ya pɛ ba mɔ wǝǝnu tɩm kʋntʋ maama Baŋa-Wɛ digə cullu tɩm ŋwaanɩ mʋ. Tɩ yɩra canna kam dɛɛn tiini ka dunǝ ka dwe sɩ ba maŋɩ. 17 Ywə yale yam dɩdʋa wɛ-baŋa seeni dɩdwarɩm dɛɛn yɩ kantɩ fugə-nana mʋ. Ywe maama yuu nɩ ba məəli canna nipuru mʋ da sɩ dɩ wanɩ dɩ təli digə kam yuu kʋm seeni. Nipuru yam dɩdʋa maama dɩdwarɩm maa yɩ kantɩ bɩtɔ. Ba mɛ canna mʋ ba sɔ ba lɛɛnɩ daanɩ ba kɩ da, yɩ ba gɔgɩrɩ kampwɩ tweeru biə ba kaagɩ nipuru yam. Ywə yale yam nipuru maama yɩ bɩdwɩ mʋ.
18 Nebuzaradan dɛɛn ta jaanɩ Wɛ kaanɩm nakwɩ tu Seraya, dɩ o kwaga-saŋɩnʋ Sofoni, dɩ Wɛ-digə kam ni-yɩrɩna batɔ bam mʋ o ja o viiri. 19 Kʋ na yɩ balʋ ya ta na daarɩ Zeruzalɛm tɩʋ kʋm wʋnɩ tɩn, o ma kalɩ ba jar-kərə yigə tu wʋm, dɩ nɔɔna banu balʋ ya na bwələ dɩ pɛ wʋm tɩn, dɩ dɩdɛɛrʋ wʋlʋ na lɩ nɔɔna sɩ o wǝli-ba jar-kərə kɔgɔ kʋm wʋnɩ tɩn, dɩ nɔɔna fusɩrdʋ balʋ ta na wʋra tɩn o wǝli da o ja o viiri. 20 Nebuzaradan dɛɛn jaanɩ bantʋ maama mʋ o vu Babilɔnɩ tɩʋ pɛ wʋm te. O dɛɛn wʋ Hamatɩ provɛnsɩ dɩm tɩʋ Ribila nɩ mʋ. 21 Dáanɩ mʋ Babilɔnɩ tɩʋ pɛ dɛɛn pɛ ba gʋ nɔɔna bam kʋntʋ maama. Kʋ dɛɛn kɩ kʋntʋ mʋ yɩ ba kalɩ Zuda dwi tiinə bam ba ja ba vu sa-tɩʋ yigə yigə.
Gedalia te Zuda o pa Babilɔnɩ tiinə
22 Pɛ Nebukadnɛtsarɩ ma lɩ Ahikam bu Gedalia sɩ o taa nii balʋ ta na daarɩ Zuda laŋa kam nɩ tɩn. Wʋntʋ dɛɛn maa yɩ Safan naa. 23 Zuda tɩʋ jar-kərə bam dɩ ba yigǝ tiinǝ na ni nɩ pɛ wʋm lɩ Gedalia mʋ sɩ o taa yɩ ba tɩʋ kʋm yuutu tɩn, ba dɛɛn ma vu Gedalia te Mitspa nɩ. Yigǝ tiinǝ bam yɩra mʋ tɩntʋ: Netanɩa bu Ismayɛlɩ, dɩ Kareya biə Yohanan, dɩ Zonatan, dɩ Netofa tu Tanwumɛtɩ bu Seraya, dɩ Maaka tu Yazanɩa. 24 Gedalia ma kɩ baarɩ ba kuri nɩ yɩ o du durə o ta dɩ ba o wɩ: «Yɩ taá kwarɩ-na fʋʋnɩ dɩ Babilɔnɩ dɩdɛɛra bam. Maŋɩ-na yo dɩ́ tɩʋ kʋm nɩ, sɩ á sɛ á pa Babilɔnɩ tɩʋ pɛ, sɩ á ŋwɩa kɩ lanyɩranɩ ka pa abam.»
25 Bɩnɩ dɩm kʋntʋ canɩ sɩrpɛ cana kam wʋnɩ, mʋ Netanɩa bu Ismayɛlɩ na yɩ Elisama naa tɩn dɛɛn tɔgɩ dɩ nɔɔna fugə pa ba vu Mitspa. Wʋntʋ dɛɛn yɩ pa-digə kam wʋ nɔɔnʋ mʋ. O dɩ o nɔɔna bam ma vu ba gʋ Gedalia, dɩ nɔɔna balʋ na wʋ o tee nɩ tɩn, kʋ na maŋɩ kʋ yɩ Zuda tiinə dɩ Babilɔnɩ tiinə dɩ. 26 Kǝm dɩm kʋntʋ baŋa nɩ nɔɔna maama ma duri ba vu Ezipi tɩʋ, kʋ na yɩ nabwənə bam, dɩ dɩdɛɛra bam, kʋ wǝli dɩ jar-kərə yigǝ tiinǝ bam maama dɩ, ba na kwarɩ Babilɔnɩ tiinə bam tɩn ŋwaanɩ.e
Ba na yagɩ Yehoyakini te tɩn
27 Ba dɛɛn na kalɩ Zuda tɩʋ Pɛ Yehoyakini ba ja ba vu Babilɔnɩ yɩ o kɩ bɩna fiintɔ-yarpɛ Babilɔnɩ nɩ tɩn, bɩnɩ dɩm kʋntʋ canɩ fugə-sɩle cana kam da fiinle-yarpɛ dɛ dɩm nɩ mʋ Babilɔnɩ tɩʋ Pɛ Evil-Merodakɩ kɩ Pɛ Yehoyakini zaanɩ, yɩ o pʋr‑o pɩɩna digə nɩ o yagɩ. Kʋ maa yɩ bɩnɩ dɩlʋ Evil-Merodakɩ na puli o di Babilɔnɩ tɩʋ paarɩ tɩn mʋ kʋntʋ. 28 O ma kɩ Pɛ Yehoyakini lanyɩranɩ, yɩ o pa‑o jǝŋǝ je na tiini ka jɩgɩ zulə ka dwe je sɩlʋ pwa badonnǝ bam na wʋ Babilɔnɩ nɩ na nɛ tɩn. 29 Yehoyakini ma lɩ o pɩɩna digə gwaarʋ tɩm o tiŋi. Dɛ maama wʋnɩ o ma lɛɛrɩ o di wʋdiu Babilɔnɩ tɩʋ pɛ tee nɩ. 30 Babilɔnɩ tɩʋ pɛ ta ma kwe kʋlʋ maama Yehoyakini na wʋ́ kɩ o yɩra nɩ tɩn o pa‑o dɛ maama, sɩ kʋ vu kʋ yi o tʋʋnɩ maŋa.