Ɨkalata ɨja vʉvɨlɨ ɨja Paulo kʉ
Vakolinto
Ɨmhola ɨndongosi
Ɨkalata ɨjɨ alyalembile ʉnsungʼhua ʉPaulo. Alyavalembiile avɨtɨki ava mʉ lɨkaaja ɨlya Kolinto. Ɨlɨkaaja ɨlio lyale lɨvaha mʉ kɨghavo ɨkya Akaya mʉ ɨɨsi ɨja Vʉgiliki. Alyavalembiile ye alɨ piipi kʉkʉvaghendela. Akalondagha kʉkʉvakangasia avɨtɨki, ʉlwakʉva ghwe mwene alyatengʉlisie ɨkɨpʉgha ɨkya vɨtɨki kʉ Kolinto. Ʉlʉtasi ye akyale kulemba ɨkalata ɨjɨ ɨja vʉvɨlɨ, alyale ɨkʉvaghendela na kʉkʉvalembela ikalata (2 Vakolinto 2:3-4), neke nakʉlyale mapʉlɨngʼhano vwɨmɨla ʉlwɨtɨko mʉ kɨpʉgha ɨkio. Pe akalemba ɨkalata ɨjɨ, kʉkʉvatanga kunosia inongua isio, ʉmwene ye akyale kufika kʉ Kolinto.
Luvoneka avɨtɨki vamonga vakajovagha kuuti, ʉPaulo inangania indalama isa kɨpʉgha kya vɨtɨki, kange nansungʼhua ghwa kyangʼhaani. Pe ʉmwene ʉPaulo mʉ kalata ɨjɨ ɨkʉvavʉʉla kuuti ʉmwene ghwe veeni. Kange, ijova vwɨmɨla ɨmbombo ɨja kʉpʉlɨsia ɨMhola ɨNofu, ikwoleka kuuti ʉmwene alyakemelilue nʉ Ngʉlʉve kuvomba ɨmbombo ɨjio. Kange, ɨkʉvavʉlanɨsia avɨtɨki kuuti, indalama saave sivombaghe ɨmbombo ɨja kʉvatanga avɨtɨki ni fipʉgha fyoni ifya vɨtɨki.