2
Lɨno,
nɨkalamwile mʉ mwojo ghwango kuuti,
nanikwisa kange kʉlyʉmue,
kʉkʉvalemasia amoojo ghiinu.
2 Ʉlwakʉva ʉne nɨngavapelele ʉmue kuuva nʉ lʉsukunalo,
kwekʉti nakwale jʉno kyaɨkʉmhelela ʉne nɨɨve nʉ lʉkeelo,
looli jʉmue mwe vano nɨvalemisie mʉ moojo ghiinu!
3 Fye nambe nɨkavalembiile mʉ kalata jɨla kuuti,
nɨngiise kʉlyʉmue nɨleke kulemasivua mʉ mwojo ghwango na vaanhu vano vaveele vanoghiile kʉkʉmhelela nɨhovoke.
Nɨkagwile kuuti ʉne nɨngave nʉ lʉkeelo,
na jʉmue muvisagha nʉ lʉkeelo.
4 Nɨkavalembiile ɨkalata nʉ lʉsukunalo ʉlʉkome nʉ lʉpumuko na misosi.
Ʉvʉfumbue vwango nakwekʉti nalondagha kʉkʉvalemasia mʉ moojo ghiinu,
looli nalondagha mʉkagʉle vʉle nɨvaghanile fiijo.
Ʉlʉsaghɨlo kwa mhosi
5 Lɨno,
ʉmuunhu jʉno amʉlemisie jʉmonga mʉ mwojo ghwake,
naandemisie jʉʉne,
looli avalemisie na jʉmue.
Neke lɨno nanilonda kuvɨɨka ʉluo kuuva lʉtalamu kyongo.
6 Ʉlʉkwegho lʉno lʉmwaghile ʉmuunhu ʉjuo kuhʉma kʉ vinga mʉlyʉmue,
lʉnkwɨlile.
7 Lɨno,
mʉnoghiile kʉkʉnsaghɨla na kʉkʉnkangasia ʉmuunhu ʉjuo,
kuuti aleke kusukunala kyongo kuhanga afue ʉmwojo.
8 Nɨkʉvasʉʉma mʉmhʉfyaghe kuuti mʉmʉghanile.
9 Ʉvʉfumbue vwango ʉvwa kʉvalembela ɨkalata jɨla,
vʉlyale vwa kʉkagʉla nave mʉkʉmhʉlɨka mʉ sooni.
10 Pano mʉkʉnsaghɨla ʉmuunhu,
na jʉʉne niiva nɨnsaghiile.
Ʉlwakʉva nave pwelɨlɨ lɨno nɨnoghiile kusaghɨla,
nɨsaghiile pamaaso gha Kɨlɨsite vwɨmɨla ʉmue,
11 kuuti ʉSetano aleke kʉkʉtʉlema,
ʉlwakʉva tʉkagwile ʉvʉsʉfu vwake.
ɄPaulo kʉ lɨkaaja ɨlya Tuloa
12 Lɨno,
ye nɨfikile kʉ lɨkaaja ɨlya Tuloa kupʉlɨsia ɨMhola ɨNofu ɨja Kɨlɨsite,
ʉMʉtwa akandindulila ʉmʉlyango ʉghwa kʉvomba ɨmbombo jaake kʉla.
13 Neke nanɨkatenganile mʉ mwojo ghwango,
ʉlwakʉva nanɨkamwaghile kʉla ʉnyalʉkolo ghwitu ʉTiito.
Pe nɨkahwesia nɨkavʉʉka nilʉta kʉ Makedonia.
Kulefia mʉ ngʉfu sa Kɨlɨsite
14 Neke tʉkʉmhongesia ʉNgʉlʉve,
ʉlwakʉva mwa Kɨlɨsite ɨkʉtʉlongosia jaatu kulefia avalʉgʉ.
Kange,
ɨkʉtʉpelela ʉsue kukwɨsia ʉvʉkagʉsi vwa mhola sa Kɨlɨsite imbale sooni,
ndavʉle ʉlʉnuusi ʉlʉnono vʉle lukwɨlana kwoni.
15 Ʉlwakʉva kwa Ngʉlʉve ʉsue tʉlɨ ndavʉle ʉlʉnuusi ʉlʉnono ʉlwa Kɨlɨsite lʉno lʉkʉvafikila vooni,
vano vipokua na vano visova.
16 Kʉ vano vipokua,
ʉlʉnuusi ʉluo lʉnono,
lʉkʉvapeela ʉvwʉmi.
Neke kʉ vano visova,
ʉlʉnuusi ʉluo lʉviivi,
lʉkʉvapeela ʉvʉfue.
Lɨno,
ghwe veeni jʉno anoghiile kuvomba ɨmbombo ɨjio?
17 Ʉsue natʉlɨ ndavʉle avaanhu vinga vano vavɨkile ɨlɨsio lya Ngʉlʉve hwene kɨɨnu kya kʉghʉsia.
Looli mʉ ngʉfu isa Kɨlɨsite,
tupʉlɨsia ɨlɨsio lya Ngʉlʉve mʉ vʉgholofu vwoni pamaaso gha Ngʉlʉve ndavʉle atʉsungʼhile.