Avavombi ava lʉfingo ʉlʉpia
3
Asi,
musaagha kuuti tʉtengwile kange kukughinia?
Jeeje,
ʉsue natʉlɨ ndavʉle avaanhu avange vano vikʉvaletela ikalata isa kujoleka kʉlyʉmue,
nambe kusʉʉma ikalata kʉlyʉmue isa kʉvoleka kʉ vaanhu avange.
2 Ʉmue mwemue kalata jɨno jɨkʉtwoleka ʉsue,
jɨno jɨlembilue mʉ moojo ghiitu.
Avaanhu vooni vanoghiile kukwɨmba na kukagʉla ɨmbombo ɨja Ngʉlʉve jɨno tʉvombile kʉlyʉmue.
3 Muhʉfia kuuti ʉmue mwemue kalata ja Kɨlɨsite,
jɨno jihʉfia ɨmbombo jɨno tʉvombile kʉlyʉmue.
Ɨkalata ɨjio najɨlɨ ndavʉle ɨkalata jɨno jɨlembilue nɨ kɨlembelo,
looli jɨlembilue nʉ Mhepo ghwa Ngʉlʉve jʉno mwʉmi.
Kange,
namʉlɨ ndavʉle ɨkalata jɨno jɨlembilue mʉ kɨseghu,
looli jɨno jɨlembilue mʉ moojo gha vaanhu.
4 Tujova isio,
ʉlwakʉva ʉluo lwe lʉhʉvɨɨlo lwitu kwa Ngʉlʉve,
vwɨmɨla sino ʉKɨlɨsite atʉvombiile ʉsue.
5 Nakwekʉti tusaagha kuuti tuvomba kɨmonga mʉ ngʉfu siitu,
looli ingʉfu siitu sihʉma kwa Ngʉlʉve.
6 Ʉmwene ghwe jʉno atʉpeliile ingʉfu isa kuuva vavombi va lʉfingo ʉlʉpiaa ʉlʉhʉma kwa Mhepo ʉMwɨmɨke.
Ʉlʉfingo ʉluo nase ndaghɨlo sino silembilue,
ʉlwakʉva indaghɨlo sino silembilue sileeta ʉvʉfue,
looli ʉMhepo ʉMwɨmɨke ileeta ʉvwʉmi.
Ʉvʉvaha ʉvwa lʉfingo ʉlʉpia
7 Indaghɨlo sino silyalembilue mʉ fiseghu,
sino silyaletile ʉvʉfue,
silisile mʉ vʉvaha vʉno vuvalatɨka,
kuhanga aVaisilaeli vakakunua kʉkʉmʉlola ʉMoose kʉ maaso,
napano ʉvʉvaha ʉvuo vʉlyavalatiike ʉnsiki nʼdebe vʉvʉle.b
Nave ɨmbombo ɨja ndaghɨlo sino sipela ʉvʉfue jɨlisile mʉ vʉvaha ndavʉle ʉvuo,
8 lɨno ɨmbombo ɨja Mhepo ʉMwɨmɨke naje jiiva nʉ vʉvaha kukila?
9 Nave ɨmbombo jɨno jipelela avaanhu kuhɨghua jɨlɨ nʉ vʉvaha,
lɨno ɨmbombo jɨno jipelela avaanhu kuuva vagholofu pamaaso gha Ngʉlʉve najiiva nʉ vʉvaha kukila?
10 Lɨno,
ʉvʉvaha ʉvwa lʉfingo ʉlʉkʉʉlʉ navulɨngʼhana nʉ vʉvaha ʉvwa lʉfingo ʉlʉpia,
ʉlwakʉva ʉvʉvaha ʉvwa lʉfingo ʉlʉpia vʉkome kukila.
11 Nave kɨno kyale kya nsiki nʼdebe vʉvʉle kɨlyale nʉ vʉvaha,
kɨno kya jaatu kiiva nʉ vʉvaha kukila.
12 Lɨno,
tuvomba kɨsila vwoghofi,
ʉlwakʉva ʉluo lwe lʉhʉvɨɨlo lwitu.
13 Kange,
ʉsue natuvomba ndavʉle ʉMoose jʉno alisighile kʉ maaso nɨ kɨtambala,
kuuti aVaisilaeli valeke kʉkʉvwagha ʉvʉsililo ʉvwa lʉvalatɨko.
14 Neke aVaisilaeli navakalondagha kukagʉla.
Ʉmpaka lɨno pano vikwɨmba ifitabu ifya mʉ Lʉfingo ʉLʉkʉʉlʉ,
vikunua kukagʉla ʉvwakyangʼhaani,
viiva hwene vasighilue nɨ kɨtambala ɨkio.
Ʉvwakyangʼhaani ʉvuo vukagʉlɨka vwɨmɨla kʉkʉmwɨtɨka ʉKɨlɨsite,
luuva ndavʉle kuvʉsɨvua ɨkɨtambala ɨkio.
15 Se seene,
kuhanga kufika ʉmʉsyʉghʉ,
pano vikwɨmba ifitabu ifya ndaghɨlo isa Moose,
amoojo ghaave ghasighilue,
vikunua kʉkʉlʉtangʼhania.
16 Neke ʉmuunhu ghweni jʉno ɨkʉmwɨtɨka ʉMʉtwa,
ʉMʉtwa ɨkʉmʼbʉsia ɨkɨtambala ɨkio.
17 Lɨno,
ʉMʉtwa ghwe Mhepo,
pano pwale ʉMhepo ghwa Mʉtwa palɨ nʉ vwavʉke.
18 Lɨno,
ʉsue tweni twe vano natʉsighilue kʉ maaso nɨ kɨtambala,
tuhʉfia ʉvʉvaha vwa Mʉtwa ndavʉle ɨkɨlolelo vʉle kihʉfia ɨkɨhwani.
ɄMʉtwa jʉno ghwe Mhepo,
ghwe ɨkʉtʉhambʉsia tʉhwanane nʉ mwene.
Ɨkʉtʉhambʉsyagha kuhʉma ʉvʉvaha kufika ʉvʉvaha ʉvʉkome kukila.