Ingʉfu sa Ngʉlʉve mʉ fikongʼholo ifya nhapo
4
Lɨno,
ʉlwakʉva ʉNgʉlʉve mʉ lʉsʉngʉ lwake atʉpeliile ɨmbombo ɨjɨ,
natudendevʉka.
2 Tʉkanile lwoni kuvomba isa kʉ vʉsyefu inya soni,
nambe kʉkʉvasyanga avaanhu,
nambe kuhasɨngʼhania ɨlɨsio lya Ngʉlʉve nʉ vʉdesi.
Ʉlwene tujova ʉvwakyangʼhaani pa vʉvalafu,
neke avaanhu vooni vakagʉle mʉ moojo ghaave kuuti tʉlɨ va kyangʼhaani pamaaso gha Ngʉlʉve.
3 Neke nave ɨMhola ɨNofu jɨno tupʉlɨsia jɨsighilue kuvoneka,
jiiva jɨsighilue kʉ vano visova.
4 Najɨkagʉliike,
ʉlwakʉva ʉSetano jʉno ghwe mʼbaha ghwa ɨɨsi ɨjɨ,
akupikiile ʉlʉhala lwa vano navikʉmwɨtɨka ʉYesu,
kuuti vakunue kʉkʉlwagha ʉlʉmuli ʉlwa Mhola ɨNofu ɨja vʉvaha vwa Kɨlɨsite,
jʉno ghwe kɨhwani kya Ngʉlʉve.
5 Ʉlwakʉva ʉsue natupʉlɨsia imhola siitu,
looli tupʉlɨsia kuuti ʉYesu Kɨlɨsite ghwe Mʉtwa,
na jʉsue tʉlɨ vavombi viinu mʉlwa kʉmʼbombela ʉYesu.
6 ɄNgʉlʉve jʉno alyatiile,
“Ʉlʉmuli lʉmulike mʉ ngʼhiisi,”a
ghwe mwene imulika amoojo ghiitu,
na kʉkʉtʉpelela kukagʉla ʉvʉvaha vwake vʉno vuvalatɨka kʉ maaso gha Yesu Kɨlɨsite.
7 Ʉsue twe vano tʉlɨ ndavʉle ifikongʼholo ifya nhapo,
tʉpelilue ʉlʉmuli ʉluo,
neke lʉkagʉlɨke kuuti,
ingʉfu imbaha isa kʉvomba ɨmbombo ɨjio nasiitu,
sihʉma kwa Ngʉlʉve.
8 Sikʉtʉvona imhumuko sino sili papinga,
neke natulemua;
tuuva ni nganighani,
neke natufua mwojo.
9 Avaanhu vikʉtʉpumusia,
neke ʉNgʉlʉve naɨkʉtʉleka twe veene;
vikʉtʉtwangɨsia paasi,
neke natufua.
10 Ifighono fyoni amavɨlɨ ghiitu ghalɨ mʉ lʉtalamu ʉlwa kʉfua ndavʉle ʉYesu,
kuuti ʉvwʉmi vwa Yesu vʉvoneke mʉ mavɨlɨ ghiitu.
11 Ʉlwakʉva ʉsue twe vano tʉlɨ vʉʉmi,
jaatu tʉlɨ mʉ lʉtalamu ʉlwa kʉfua vwɨmɨla ʉYesu,
kuuti ʉvwʉmi vwake vʉvoneke mʉ mavɨlɨ ghiitu ghano ghifua.
12 Kwekʉti,
ʉsue tʉlɨ mʉ lʉtalamu ʉlwa kʉfua,
mʉ ʉluo,
ʉmue mukava ʉvwʉmi.
13 Mʉ Malembe aMɨmɨke ghalembilue amasio ghano ghiiti,
“Nɨlyamwɨtiike ʉNgʉlʉve fye nambe nɨlyajovile.”b
Na jʉsue tʉlɨ nʉ lwɨtɨko ndavʉle ʉluo,
fye nambe tujova.
14 Tujova ʉluo,
ʉlwakʉva tʉkagwile kuuti ʉNgʉlʉve jʉno alyansyʉsisie ʉMʉtwa ʉYesu,
ilikʉtʉsyʉsia na jʉsue.
Ʉmwene ilikʉtʉvɨɨka palɨkɨmo numue,
kuuti tukale nʉ Yesu.
15 Lɨno,
imhumuko sooni tukwʉpɨla vwɨmɨla ʉmue,
kuuti ʉlʉsʉngʉ lwa Ngʉlʉve lʉvafikile avaanhu vinga,
neke vamhongesyaghe fiijo ʉNgʉlʉve.
Mʉ ʉluo ʉNgʉlʉve ifighinisivwagha.
Ʉvʉvaha ʉvwa kʉvʉsila kʉsila
16 Lɨno,
natudendevʉka nambe amavɨlɨ ghiitu ghisakala,
looli nkate mʉ moojo ghiitu ʉNgʉlʉve ɨkʉtʉpela kuuva vapia ifighono fyoni.
17 Ʉlwakʉva ʉlʉpumuko lwitu lʉpepe,
kange lwa nsiki nʼdebe vʉvʉle.
Ʉlʉpumuko ʉluo,
lʉkʉtʉlɨngʼhanɨkɨsia ʉvʉvaha ʉvwa kʉvʉsila kʉsila.
Ʉvʉvaha ʉvuo vʉkome kukila,
vʉkʉtʉpelela kuvona imhumuko isi nakɨɨnu.
18 Lɨno,
ifiinu fino fivoneka,
fya nsiki nʼdebe vʉvʉle,
looli fino nafivoneka fya jaatu,
fye nambe tuvɨkɨla mwojo ifiinu fino nafivoneka.